Piilimka 40

1Ku ale beni maga la, waai ale a te Ejipiti naawa daam la ale baai ale te wa boroborok la kpagni a jam nye ate naawa sui a kaasi. 2Faaro sui a jam kaasi ale wa kpaŋŋa bayewa kama, daam teerɔ kpagni ale boroborok seerɔ kpagni, 3ate wa yaa pai ba a nyo ligrɔma kpagni nisima po, juijui dek ate ba jam lik Josefi la.

4Ligrɔma kpagni a jam pai ba a nyo ka Josefi nisa po ate wa a nya ba zuk. Ba ale jam bo likka dɔkku po ate ku beni magadek la, 5bayema meena a jam gɔdaasim kama, Ejipiti naawa daam teerɔma kpagni ale boroborok seerɔma kpagni, baai ate ba jam lik ba la a jam gɔdaasim kama yok yeŋ, ate gɔdaasima meena a ta ŋa kiri.

6Vari ale veenti ate Josefi a jam ba jigi la, wa yaa jam nya ale ba sue a kaasi. 7Dila wa jam bek Faaro kpaŋŋa baai ale jam bo likka dɔkku wa kpagni yenni po ale wa la ayen, <<Ka boa ate ni nimbidaasa a kaasi jinla?>>

8Ba yaa tulisi ayen, <<Ti meena a gɔdaasim kama alege nuru karo a weeni ŋa kiriya.>> Josefi yaa weeni ba ayen, <<Gɔdaasima kie miŋka daa Wen ale soa? Ni weeni mu ni gɔdaasimaŋa.>>

9Ate daam teerɔ kpagni yaa weeni Josefi wa gɔdaasimaŋa. Wa weeni wa ayen, <<M gɔdaasimaŋa po m nya ka tiib m niŋ, 10ate tiimu zuk naŋsa sita a boro. Naŋsaŋa ale pusi la si deri chim a yɔn yɔna a muni. 11Faaro beerika a jam bo ka m nisa po, mi yaa pai yɔnaŋa ŋmiak a nyo Faaro beerika po a te wa.>>

12Josefi yaa weeni wa ayen. <<Di kiri ale, naŋsa sitawa ka daa ŋata. 13Daa ŋata po Faaro ale zak fi zuk a zaani a ŋman pai fu a zaani fi naŋkulaŋa po, ate fi ale pai Faaro beerika a nyo wa nisa po ase fi ale jam a nye diila, ase diipo ate fi jam chim daam teerɔ la. 14Alege ku dan cheŋ nalimnyiini ale fu, teeri ate fi sak nyemagsika ale mu. Weeni m wari a te Faaro ate wa yeeri mu a ta nyini likka dɔkku de po a nyini. 15Diila ba fɛ mi kama a ta nyini Yiburu demma tɛŋka a nyini, ate dela mɛ mi an nye wari ya a magsi ba a nyo mu likka dɔk po.>>

16Boroborok seerɔma kpagni ale jam nya ayen Josefi a tulisi magsi la, wa yaa weeni Josefi ayen, <<Mi mɛ gɔdaasim kama ayen, mi jika kpanjɔkta tita ale boroborok. 17Ŋmani kpanjɔkku po ba jam sɛka ŋandiinta tɔgatɔga a nyo ku po a te Faaro, alege nuinsaŋa a jaa dɛ ti kama kpanjɔkku ate m ji la po.>>

18Josefi yaa weeni ayen, <<Kude kiri ale nna, kpanjɔkta titawa ka daa ŋata. 19Daa ŋata po, Faaro ale gebi fi zukku a pai fi nyiŋka a saŋ tiib nyiŋ. Ate nuinsaŋa ale dɛ ka.>>

20Yɔgyɔgla de daa ŋatawa a jam ka Faaro biam dai, ate wa yaa jam nye tigi a te wa kpaŋŋa meena. Wa jam zak daam teerɔ kpagni ale boroborok seerɔma kpagni zuima a zaani wa kpaŋŋa niŋ. 21Wa ŋman jam pai daam teerɔ kpagni kpaŋtaŋa a te wa, ate wa ŋman pilim pai daam beerika a nyo Faaro nisima po, 22alege wa jam pai boroborok seerɔ kpagni a yik ka tiib nyiŋ, ase Josefi ale weeni gɔdaasimaŋa kiri diila.

23Alege daam teerɔ kpagni an jam teeri Josefi wari ya, wa jam baŋ wa wari kama.

Currently Selected:

Piilimka 40: BWU

Highlight

Copy