Piilimka 39

1Yɔgyɔgla ba jam ta Josefi a cheŋ ka Ejipiti. Potifar Ejipiti denɔ waai ale jam ka Faaro nyaarɔma kpagi la a da wa a ta nyini Ismael demma waai ale ta wa a cheŋ dula la jigi.

2Naawen a jam bo ale Josefi ate wa jigsi, a bo wa Ejipiti kpagni yenni po. 3Wa kpagni ale nya ayen Naawen a bo ale wa la, ate Naawen a te wa niaka wie meena po la, 4Josefi yaa nya ŋmanteka wa nina po ate wa a nya wa yenni zuk. Potifar yaa basi ate wa a nya wa yenni meena zuk ale pai jaab meena ate wa ta la a nyo wa nisa po. 5A nyini diipo ate wa basi ate wa a nya yenni meena ale jabuui meena ate wa soa la, Naawen yaa niak Ejipiti denɔwa yenni meena Josefi nyiŋ. Naawen niauŋku a jam bo jaab meena nyiŋ ate Potifar a soa la kama, yenni po ale laŋsaŋa po meena.

6Dila wa yaa pai jaab meena ate wa soa la nyo Josefi nisa po, wa an jam a te wari a daani wa ka wa ŋandiintaŋa ate wa a dɛ la. Yɔgyɔgla Josefi nyiŋka a jam boka jigi yeŋ ale nala, 7ku ale ga nye maga la wa kpagni powa nina yaa jam dua Josefi zuk ate wa weeni ayen <<Jam goa ale mu!>>

8Alege wa jam zɛri ale weeni ayen, <<Mi ale toalim a bo dela la, m kpagni niŋ a ka wari po a bo yenni po. Wa le soa jaabuuri meena la wa pai a nyo ka m nisa po ate m soa a nya. 9Waai a ka yenni de po a zuak a gaam mi. M kpagni an pai jaab a suk mi ka fi nyiini, dii nyiŋla fi ka wa pok. Mi tin nye ka sɛ a nye biemu de choa a tom kaasi Wen ya?>> 10Wa poom kasim jam a biisi ale Josefi kama daa meena, wa jam a zɛri kama ayen wa kan duak tiak po ale wa yaase wa bo wa jigi ya.

11Dai yeŋ ate wa jɔ yenni po ayen wa tom wa tuimaŋa ate yenni yɔmma waai a jam karo. 12Wa yaa yik wa garukku a tara ale weeni wa ayen, <<Jam duak ale mu!>> Alege wa jam liisi wa garukku a basi wa nisa po ale yiti chali nyini yenni po.

13Wa le nya ayen wa basi wa garukku wa nisa po alege a chali nyini yenni po la, 14wa yaa wi wa yenni yɔmma ayen, <<Ni nya ba ta Yiburu denɔwa de a jam kama ayen wa lɛ ti. Wa jam ka dela ayen wa goa ale mu alege ate mi a kaari. 15Wa le wom ayen m kaari a yaali maarika la, wa yaa basi wa garukku m tɛŋ ale yiti chali nyini yenni po.>>

16Wa yaa jam pai garukku a dueni ka wa tɛŋ ate wa kpagni a ga jam yeri. 17Ate wa yaa weeni wa ayen, <<Yiburu yɔmawa ate fi ta jam a te ti la a jam kama ayen wa lɛ ti. 18Alege mi ale ga kaari ayen ba maari mu la, wa yaa basi wa garukku a dueni m tɛŋ ale yiti chali nyini yenni de po.>>

19Wa kpagni ale ga wom wari dii ate wa powa a weeni wa ayen, <<Fi yɔmawa ale nye mu diila ale nna la,>> suipuurum yaa jam dɛ wa. 20Josefi kpagni yaa jam yik wa a lik juijui ate naawa a lik wa nuruma la.

Alege Josefi ale jam bo likka dɔkku po la, 21Naawen a jam bo ale wa kama. Ate wa sak nyemagsika ale te wa ŋmanteka waai ale a nya ligrɔma zuk la jigi. 22Ate waai ale a nya ligrɔma zuk la yaa basi ate Josefi a nya dii meena ale a nye dula la zuk. 23Ligrɔma nyaarɔwa ale pai jaab meena a nyo Josefi nisa po la wari a kan jam a daani wa, dii nyiŋla Naawen a jam bo ale Josefi kama, ate wa a nya niaka dii meena ate wa nye la po.

Currently Selected:

Piilimka 39: BWU

Highlight

Copy