Tuima 7

1Kaabteerɔ kpioŋku yaa bek wa ayen, <<Ka wensie?>>

2Sitiven yaa tulisi ayen, <<M suata ale m koba, ni wom mi. Zula Wenni a jam pai wadek a sak ti kowa Abrayam kama. Dila powa, Abrayam jam bo ka Mesopotamiya tɛŋka. Wa an diem jam cheŋ Yaran, 3a weeni wa ayen, <Basi fi tɛŋka ale fi dɔkdemma abe fi cheŋ tɛŋ kaai ate mi ayen m dak a sak fu la.> (Piilimka 12:1)

4<<Abrayam yaa basi Kaldiya tɛŋka ale ge cheŋ a ga bo Yaran tɛŋka. Abrayam kowa ale ga kpi la, Wen yaa weeni Abrayam ayen wa jam tɛŋka de ate ni boro yɔgyɔgla nna la. 5Dila powa Wen an jam te Abrayam tɛŋka de juijui ya. Alege Wen jam puulim kama ayen wa ale pai ka a te wa ate wa ale wa ŋaaŋbisa meena a soa ka. Diipo ate Wen weeni Abrayam dila la, wa jam diem ka biiga.#7:5 Piilimka 17:8 6Naawen ale weeni wa dii la ale nna, <Fi ŋaaŋbisaŋa ale chim nicham tɛŋ kaai ate ba an soa la po. Dula jigini nuruma ale pai ba chim yɔm a namsi ba paari bena kobsinaansi. 7Alege tɛŋ kala ate ba tom a te la, mi le bo ka buusa. Dila ŋaaŋnyiŋ ba le basi tɛŋ kala abe ba nyini a jam dela jigini a te mi zula.>#7:6-7 Piilimka 15:13-14; Nyinika 3:12 8Wen yaa weeni Abrayam ayen wa gebi wa yoanni ate ku sak ayen wa ale Abrayam yaa ta ka nɔiyeŋ ale chaab. Abrayam yaa biak Aizik a gebi wa mɛ yoanni wa biam da naaniŋka dai. Aizik mɛ yaa biak Jekob ate Jekob mɛ a yaa chim wa bisa pi ale bayewa ko.

9<<Jekob bisaŋa yaa dɛ nyuri ale ba suoku Josefi a deri yik wa a da ate wa chim yɔma Ejipiti tɛŋka. Alege Wen a jam bo ale wa kama, 10a vari wa a basi daani kaai meena ate wa jam tu la po, a te wa ŋmanteka ale yam Ejipiti naawa Faaro niŋ, ate wa basi ate wa a nya Ejipiti demma ale Faaro dek yenni zuk.#7:10 Piilimka 41:43 11Kom yaa jan jam Ejipiti ale Keenan tɛŋsaŋa po, ate ninam nna yegayega a jam. Ti kokpieŋsaŋa an jam baga a nya ŋandiinta. 12Jekob ale wom ayen ŋandiinta a bo Ejipiti tɛŋka la, wa yaa tom wa bisaŋa ti koma ayen ba cheŋ dula jigini. Ba piilim chelim ale la. 13Ba ale ŋman pilim cheŋ dii a nye buye la, Josefi yaa basi ate wa suataŋa a miŋ wa, ate Naawa yaa seba Josefi dɔkdemma. 14Josefi yaa te tuntomiŋ wa kowa Jekob a weeni wa ayen wa ale wa dɔkdemma meena nuruba pisiyopɔi ale banuwa a jam Ejipiti tɛŋka a maa boro ale wa.#7:14 Piilimka 46:26-27 15Jekob yaa kɔlim cheŋ Ejipiti tɛŋka a bo dula a ga kpi ate ti kokpieŋsaŋa mɛ kpi 16ate ba yaa pai ba a ta jam Sikiim a gu ba. Ba jam gu ba ka vɔrup buui po ate ba gu Abrayam la. Abrayam dek ale jam da vɔrumu ale ligra Ayaamo nidoabilisaŋa jigi Sikiim tɛŋka po.

17<<Alege Naawen ale jam puulim dii ale Abrayam la a jam moata kama. Ti nuruma yaa ŋmasi jam a piisi a gum du Ejipiti tɛŋka po. 18Naab paalik ale jam yiti a nya Ejipiti tɛŋka, wa jam zɛ Josefi nɔi po. (Nyinika 1:8) 19Wala a jam ta ka gaasa nna yegayega ale ti kokpieŋsaŋa a fɛ ba ayen ba pai ba buluataŋa a ta nyini peelim a dueni ate ba kpi. 20Dila powa ale ba jam biak Moosis. Wa jam nala kama Wen nina po. Wa jam bo ka wa kowa yenni ate ba a nya wa zuk ate ku ga paari chiisa sita. 21Ba ale jam maa pai wa a dueni peelim ayen wa kpi la, naawa lie ale jam pai wa ate wa chim wadek nidoabili a nya wa zuk. 22Ba jam sak wa Ejipiti demma Yammu meena ale ka diila kama, ate wa yaa chim nuru pagrik wie po ale wa biik po.#7:20-22 Nyinika 2:1-10

23<<Moosis ale chim paari bena pisinaansi la, ku yaa jam wa popola po ayen wa cheŋ ga nya wa suataŋa Izirali nidoabilisaŋa. 24Wa yaa nya ale Ejipiti denɔ ale Izirali denɔ a ta chaab. Moosis yaa ga maari wa suoku Izirali denɔwa, a deri ko Ejipiti denɔwa. 25Wa jam poli kama ayen wadek nuruma le miŋ ayen Wen le pai ka wa a vari ba a basi, alege ba an jam miŋ ya. 26Vari ale veenti la Moosis yaa nya ale Izirali demma baye a ta chaab ate wa yaa pii nyiŋ ayen wa gaari ba. Wa yaa weeni ba ayen, <Nidoaba, ni wom de, ni ka suata, ka boa ale soa ate ni a kpaliŋ chaaba?> 27Alege nuru waai ale jam a namsi wa choawa la a yaa tusi Moosis a basi nakpiak ale ge bek Moosis ayen, Ka wana ale nye fi niŋdeerɔ ale boteerɔ tama zuwa. 28Fi a yaali ayen fi ko mi mɛ kama ase deemwa ate fi ko Ejipiti denɔwa diila? (Nyinika 2:14) 29Moosis ale wom dila la, wa yaa basi Ejipiti tɛŋka ale yiti chali cheŋ a ga bo Midian tɛŋka a chim nichaanɔ. Dula jigini wa yaa biak nidoabilisa baye.

30<<Bena pisinaansi ale taam la, Wen maarɔ yaa jam wa jigi sagni po ase bolim ŋiak la goanni po.#7:30 Nyinika 3:2 31Moosis ale jam nya dila la, ku yaa cha wa ate wa yaa forisi paari ayen wa ŋmasi nya chak. Wa yaa jam wom Naawen lueluk ale ku weeni ayen, 32<Mi ka fi kokpieŋsaŋa Wen, Abrayam Wenni ale Aizik Wenni ale Jekob Wenni.> (Nyinika 3:6) Yɔgsum yaa yik Moosis ate wa nyiŋka a gɔk ate wa an ŋman jam baga a nya bu. 33Ti Naawen yaa weeni wa ayen, <Yeeri fi nuesaŋa, dii nyiŋla, fi ale za juijui la, ka tɛŋ weleŋ. 34M nya m nuruma ale bo Ejipiti tɛŋka a nam dii la kama. M be wom ba funfɔbla mɛ kama ate m siŋ jam ayen m vari ba a basi. Gomsi fidek yɔgyɔgla de ate m tom ate fi cheŋ Ejipiti.> (Nyinika 3:5, 7-8, 10)

35<<Moosiswa de ate ba jam zɛri wa ale a bek wa ayen, <Ka wana ale nye fi niŋdeerɔ ale varibasidɔ la?> Ka Wen dek ale tom wa ba jigi. Wa jam basi ate ka Maarɔwa waai ale jan jam wa jigi tiiku ale a dɛ la po la a maa maari wa ayen wa soa ba a nya ba zuk abe wa chim ba varibasidɔ? 36Wa sum jam dɛ nuruma niŋ kama a ta ba a nyini Ejipiti tɛŋka po a nyini a nye wakperikaliisa ale wie ŋaai ale a sak ayen Wen bo ale wa kama Ejipiti tɛŋka po ale nyakpiemu buui ate ba a wi ayen Nyakpiem Mɔnuŋku la po, ale sagni po ate ku ga paari bena pisinaansi. 37Moosiswa de abe le weeni Izirali demma ayen, <Wen ale te ni biisiteerɔ ase mi la a ta nyini nidek suataŋa po.> (Teerika 18:15) 38Moosiswa de abe ka waai ale jam bo Izirali demma po diipo ate ba jam tigsi chaab sagni po la. Wa jam boro kama diipo ate Wen maarɔwa a jam biisi ale wa Sinai Guuku zuk la. Wa be tuesi Wen tuntomiŋ kaai ale a te ti nyuvuri la kama yaa pai ka a te ti.

39<<Alege ti kokpieŋsaŋa a zɛri wa nɔi kama. Ba tusi wa a basi ka nakpiak ale a yiili ba suiniima po ayen ba dan baga abe ba pilim cheŋ Ejipiti tɛŋka. 40Ba yaa weeni Moosis suoku Aaron ayen, <Nye wena ate ŋade ti niŋ. Dan ka Moosiswa de, waai ale ta ti nyini Ejipiti tɛŋka po a nyini la, ti zɛ jabuui ale nye wa la.> (Nyinika 32:1) 41Ba yaa mɛ naabiik va ŋala po a kaab ka, ale a dɛ masim jabuui ate ba nye ale badek nisima la nyiŋ. 42Alege Wen a tulim basi ba ayen ba a zuli wenzuk ŋantaŋa, ase ku le ŋmarisi dii biisiteerɔma gbaŋka po ayen, <<Izirali demma, bena pisinaansi ale nna, nama ko duŋsa a nye kaabka a te Mi diipo a ta ni bo sagni po la? 43Ni jam pai ka Molok wenni viuku a ji. Ni jam maa pai ka chiŋmarika wenni Arifan jameemmu a ji a ta cheŋ mɛ. Bala meena ka bɔgta ate ni nye a yaa te ti zula. Dila nyiŋ m le basi ate nuruba a ta ni cheŋ gaam Babilon tɛŋka.> (Amos 5:25-27)

44<<Ti koma a jam ti ka viuk juijui ate Wen jam a biisi ale ba la sagni po. Wen dek ale jam sak Moosis wa le wa ti viuku dii la, ate wa ti ku ase Wen ale zɔk dii la. 45Ku ŋaaŋnyiŋ ate ti kokpieŋsaŋa a tuesi ku ba koma jigi la, a jam ji ku kama diipo ate ba jam va Josua ate ba jam tuesi tɛŋ sii ate Wen a jam yiak si nuruma alege ate ba a cheŋ la. Ba jam ta Viuku ka dila tɛŋ sila po ate ku ga paari diipo ate Deevid jam la, 46Waai ale jam nya ŋmanteka Wen jigi la, a yaa bek ayen basi ate m sɛ yeri a te Wen dii ale ka m kokpieŋka Jekob Wen la. 47Alege ka Solomon ale sɛ Wen yenni.

48<<Wen Dii Ale Bo Wenŋmazuk La kan bo yie ŋaai ate nurubisa a pai ba nisima sɛ la po, ase biisiteerɔwa ale weeni dii ayen, 49<Wenŋmazuk ale mi naam zukpaglika, ate tɛŋzuk de a chim m naŋsa tabika jigi. Ka boan jaab yeri ate fi ale sɛ a te mi? Naawen ale weeni. Yaase mi vuusum jigi a bo ka be. 50Daa mi nisa ale nye ŋantaŋa de meena?> >> (Azaya 66:1-2)

51Sitiven a diem biisi gum du ayen, <<Nama tukpari nyama, ni an pai ni suiniima a te Wen ya, yaase ni wom wa, ni kan tu chaab ale Wen Chiika ale a weeni ni dii la, ni kokpieŋsaŋa ale jam nye dii dek la ale la. 52Ka biisiteerɔma wana ate ni koma an basi ate wa namya? Ba jam ko baai ale jam a mooli ayen Wayɔrisima Nyɔnɔ a cheena la, waai ate nama bobri sak ate ba yik wa a ko la. 53Nama abe ale jam tuesi Sinsaŋŋa ate Wen maarɔma a jam pai ŋa a te ni. Alege ni an siak a te ŋa.>>

54Kpaŋŋa ale wom Sitiven ale a biisi diila, ku yaa te ba suipuurum ate ba ŋɔbi nyina. 55Alege Wen Chiika ale sueri Sitiven suinummu la, wa yaa zak zuk a nya wenŋmazuk a nya Wen nyaksika ale Yeezu a za Wen juga geŋ. 56Sitiven yaa weeni ayen, <<Ni nya, mi nya kama ale wenŋmazuk a lagri ate Saalɔbiika a za Wen juga geŋ.>>

57Ba yaa kaari nna yegayega a weeni ayen ba kan ŋman a yaali ayen ba wom wa. Ba yaa chali cheŋ wa jigi 58a yik wa a ta nyini tɛŋka po a nyini a pai tintana a yuk wa ayen ba ko. Seerɔma mɛ a yeeri ba kasaautaŋa a dueni bi paalik kanyi ate ba a wi ayen Sɔɔl naŋsa tɛŋ ayen wa a nya. 59Ba ale jam a yuk wa la, wa jam a puusi kama ayen, <<M Nyɔnɔ Yeezu Kirisita, ŋoa m chiika.>> 60Wa yaa kpi duna tɛŋ a weeni ate ku jueli ayen, <<M Nyɔnɔ Yeezu Kirisita, kan pai biemu de a tuni ba.>> Wa ale weeni dila la, wa yaa deri kpi.

Currently Selected:

Tuima 7: BWU

Highlight

Copy