Matiyò 8

Jisòs chwuk wùt wù kùhana

(Mâk 1.40-45; Lûk 5.12-16)

1À hì mô te Jisòs kaha chwo a kun, ghɨta nâ hidù hì gbê a wun yi bàm. 2Wùt lè kəta a kùh, bên tum sù ngwuk a wun ashyə̂ jis ha wun na, “Bâba, wò hi kôŋà wò chwuk mu.”

3Jisòs nâhì a wô kum wun jis na, “Mu kòŋàlò, tâ.” Kə wu yu, kùh atɨna mî a wun wu wùn. 4Jisòs ki jîs ha wun na, “Kə wò nè mômà hi fòktè gha ye yi gana ha wùt lè. Ndù chwuti kə ngɨŋ yâ ha ngàŋ à ndâ Fùyèn ma wò fo fo ye sak yi Musìs tì jìsa na wùt ki tâ te wò nì kùhà, wù folò shyəma ghɨta khɨli na wù ti tâ.”

To sù sojà ale chwûtì bimî wuni

(Lûk 7.1-10)

5À ndùku mô te Jisòs gbe lye yênà a yi tèk yi Kàbanùm to sù sojà ghɨt a Lûm ale ben chyati wun jis na wù gamti yi. 6Wù jis ha wun na, “Bâba, wùt à mù wù fèt mò a ndâ ma wù ti kə̂blì yena ngə̂k nâ haŋaŋ.”

7Jisòs jis ha wun na, “Mu nè bê chwukalò wûn.”

8To sù sojà ghe fî fîsì na, Bâba, mu kpene wi shyəma wò lye a mu ndâ. Jîsà kə yi jîs ma wùt à mù wù fèt ta. 9Mu jìsà ni beka mu boŋa fètà a ghɨta yi dèt kəta sojàsu a mu yi dèt. Mu jis ha wùna na, ‘Ndù,’ wù yen kə yi yên, mu jis ha wùlè na, ‘Bî,’ wù ben kə yi bên, mu jis ha wùt mù wù fèt na, “Nì ni wù ni kə yi nî.”

10Te Jisòs ywo gha ye wù jìsa ni, jwo yum wûn, wù jis ha ghɨt ghe ghɨ ndùku gbê a wu yi bàm ya na, “Mu jìsà ha ghàn hamok na, mu tà timi yen jə wùt wu kəta nki bimi yîn nâbi a Isalì. 11Mu jìsà ha ghàn na ghɨta bè fwolò dô kə ni ma ghɨ lo kə bûlà tu mbyi tu tù jɨ̀m ma ghɨ bê ndòko a wu luk wu yənu fə̀n wù Fùyènù ghê Ablàhâm nì Isìk nì Jakòb. 12Ghɨ bè bɨlà jûmà fihe wana toka ghe ghɨ kəta hi tè mò afû ma ghɨna fwo yen atɨ̂n à bɨn a finana ma hi luŋle jyê kuta a soŋ.” 13Jisòs jis ni ki jîs ha to sù sojà ghe na, “Wo kolo yênà. Mu ti nì gha ye wò bime na mu làhi nì ha wò.” Kə wu yu, wùt à wun wù fètana we tâ.

Jisòs chwuk ghɨta ghɨ dô kə ni

(Mâk 1.29-34; Lûk 4.38-41)

14Jisòs gbi lye a Bità ndâ, yen nè ywê Bità, mô wu khɨ̀, kəta a gut. 15Wù kum wûn, gut atɨna mi kə yi mî. Wù lôtì chyâhì mwə̀ mù yə̂ mù, Jisòs yə̂.

16À hì mô wu yu kolô, ghɨ ben nì ghɨta ha Jisòs ghɨ dô kə ni, ghɨ kəta yohnù be, wù jis kə yi jîs, yohnù be tɨnu fwu, wù fî chwuk ghɨt a yafana nâ jɨ̀m. 17Gha mɨ ghɨ̂n ndùku gânà ni hi lunhe gha ghe fòktì Ìsayà tì nyàka na, “Wù tì chwuk yaftu ghàhnà tù fî mihì yaftu a ghàhnà wu wùn.”

Ghɨt ghe ghɨ kpene hi jùmtè Jisòs

(Lûk 9.57-62)

18Jisòs yen nôn à ghɨt ghe ghɨ ndùku mô a wun a ngwùŋ ki jîs ha jùmtìbàmsu wunsu na ghɨna daŋ à yen a yi jin yi lwi Galìlî fokô. 19Kə ni chichà sak wùlè fwu ben toŋti wun jis na, “Chichà, mu tê jûmtèlò wò nâbi afa wò yènà.”

20Jisòs fîsì ha wun na, “Sòŋàtù kətalò bûkù ghɨna, nyɨ̀mû kəta sù ndâ, biyani Wâ Wùt kəta wi luku hi nìŋhe tô wuna atɨ̂n hi yùtì.”

21Jùmtìbàm à wûn yìlè ben jis ha wun na, “Bâ, de ma mu kolò ye gùma bôm shyəma mu bê hi jûmtè wò.”

22Biyani, Jisòs jis ha wun na, “Bi ma ghɨ lo, wò de ma ghɨt ghe ghɨ mô te ghɨt a kputena hi gûmà ghɨt a ghɨna ghɨ kputena.”

Jisòs nî fufa ta tenâ

(Mâk 4.35-41; Lûk 8.22-25)

23Ni te Jisòs jìsa ya, lye a ngwùk, jùmtìbàmsu wunsu boŋ lye a ngwùk hì daŋà. 24Kə ni, fufa ta shɨŋ yìmì hì chyâlà bəmâ, hì shikà jwò mòlû kwoka lye a ngwùk, a mô ni Jisòs bwunê. 25Jùmtìbàmsù wunsu yen shik yemhì wûn jyana, “Yèmâ a Bâba ma wò bonhi ghàh, ghàh ti kputelò!”

26Wù buf ha ghɨna na, “Ghàn fànà ghə ni? Bimi yani tobte kə ni.” Te wù jìsa ni lôtì kântì fufa nì jwò, luktu china kə ni moŋ.

27Ghɨt atɨna hì mô nì kani buf nâ, “À mò wùni wùt ni, nâbi fufa nì jwò ywo wun agha?”

Jisòs jum yohnù be

(Mâk 5.1-20; Lûk 8.26-39)

28À hì mô te ghɨna daŋa lwî we yen tan a bàh a lak afa ghɨ ndùku toŋte na Gàdàlà, ghɨna kwônà ghê ghɨt ale, ghɨ fwo bênà a gùma à bà, kəta yohnù be, ma wu ti nì ghɨna hì chyəfa nâ be, ghɨta teta kə yi têt ghɨna. 29Ghɨna yen ben nì Jisòs ni bwat buf na, “Wò khɨŋa ghə ha ghàh a Wâ Fùyèn wunâ? Wò ben hi fo ngək ha ghàh shyəma tuk wahu wu ngəku bè kpen ma?”

30À ndùku mô ni, kùnduku wule yə bakhe afû dô kə ni. 31Yohnù be we chyati Jisòs jis na, “Wò jum fihi ghàh, wò tum ghàh a kùnduku woko fùtɨ̂n.”

32Jisòs jis ha yohnù be tɨnu na, “Ghàn yen”. Kə wu yu, wu fwu yen lye atɨn à wù kùnduk afa, wu shɨŋ nì nyɨŋi yen tan a bàh yi bi lwi, chemle a jwô kputilò.

33Ghɨt ghe ghɨ ndùku chînà kùnduku tɨnu tet lò yen tan atɨ̂n à yì tèk fôktì gha ye yi gana nâ yì jɨ̀m nì gha ye yi gana ha ghɨt a yohnù be we. 34Ghɨta fwu yi tèk afû kə à jɨ̀m yen yen Jisòs chyati wun na wu lo chya a ghɨna yi lak afû.

Currently Selected:

Matiyò 8: bmv

Highlight

Copy