Jon 4

Jisòs jis ghê wùt ywen wù Sàmaliyà

1Te ghɨt a Falàsî tì ywo na Jisòs ti kwoti jùmtìbàmsu, fo mòlû ha ghɨna nâ hidù chyâ su Jon su. 2Ghɨna ndùku jîsà biyani ma mòlû mù tɨ̂n ndùku fo wi nâbi Jisòs. À ndùku fo jùmtìbàmsu wunsu lesu. 3Jisòs yu gha mi yin a ghɨ ndùku jîsà kum wûn ni, lo a Jùdiyà kaha yen a Galìlî, 4shihi yèn tohna lumu a Sàmaliyà. 5À hì mô te wù chyàlà a Sàmaliyà yen tan a yi tèk yile ghɨ toŋte na Sikà yi bakha yênà wu lùk wu fu chyə we Jakòb tì fo ha wâ wûn Josèf yâ, 6ki bôt, yen chwo ndokò a ngwùŋ yì be ye Jakòb tì chɨma hi tè to mòlû atɨ̂n. Ma à hì mô nchwì tâ.

7Wùt ywen wù Sàmaliyà wùlè ben hi to mòlû, Jisòs lon mòlû ha wûn jis na, “Fo mu nì mòlû ma mu nyu.”

8À ndùku mô ni ma jùmtìbàmsu wunsu ti lyi yen a fùtɨ̂n à yì tèk hi yun a mwə̀ mù yə̂mù.

9Wùt ywen àtɨ̂n jis ha Jisòs na, “Wò mò wut à Jûs mu mô wùt à Sàmaliyà? Wò gbi yàni hi tè lon a mòlû ha mu agha?” À ndùku mô yani ghɨt a Jûs nì ghɨt a Sàmaliyà nê kwonà wi gha.

10Te wù bufa ni, Jisòs ki jîs ha wûn na, “Wò ye hì khə mwə̀ me Yènfù fo ha ghɨta fê khə wùt we wù lona mòlû muna ha wò, ma wò ti lon mòlû, a bu mòlû mù jwò, wù fo ha wò.”#4.10 À wijə mòlû mù jwò: Yi mô yi jìs yi Gɨlìs na, Mòlû me mù chyə.

11Wùt ywen àtɨ̂n buf ha wun na, “Wò nè lyê afa mòlû mù tɨ̂n hi fo ha mu a bèbɨn, kəta wi shyə hi tû atɨ̂n, be yi mòlû tɨni laha lye ni agha? 12A wò kwàktè na wò chyàlò bè bì wâhù Jakòb we wù tì fo be yi mòli yîn ha ghàh, nyo kəbi atɨ̂n kəbi nì mwəlà mù wûn nì nyamsu wunsu agha?”

13Jisòs jis ha wun na, “À nyu nâbi nde mòlû munâ, ma toŋu wunu hi yimte kə yi yimtî. 14Biyani, ma à nyu nâbi nde mòlû me mu fo ma kuŋ à mòlû bê tè fè yim a jə̀ wûn. Wùt ki nyo mòlû munâ ma mù kahi te yi tôk ma yi fwo a wun wù wùn, ma mù nì wûn ma wù khɨti chyəna ghe ghɨ bè chyâ mê wi.”

15Wùt ywên à Sàmaliyà àtɨ̂n jis ha Jisòs na, wù fo mòlû mù tɨ̂n ha yi ma toŋu mòlû bê tè fè yima jə̀ yi, ma yi bê tè shik hi to mòlû yi be afân.

16Jisòs fî jis kə ha wun na, “Ndu toŋa lɨm wâ ma ghàn à wûn bê yen mu.”

17Wùt ywen àtɨ̂n jis na yi kəta wi lɨm.

Jisòs ki jîs ha wûn na, “Wò jis kə nâ hamok na wò kəta wi lɨm. 18Wò mò ni ma wò ti bimi lɨmànà à tân fwu kə ghɨna à jɨ̀m. Nâ we wò chyə a wûn a ndâ chîn a laha wijə nâbi lɨm wâ. Yi ni chwùtè na wò jìsà kə nâ hamok.”

19Wùt ywen àtɨ̂n ki jîs ha wun na, “Mu ti yen na wò mò fòktì wù chìk a bâ. 20Bì ghaha ndùku kokhe Fùyèn a kun afân biyani ghɨt a Jûs ti lem na ghɨ kəta hi tè kokhe Fùyèn a Jèlusalèm.”

21Jisòs jis ha wun na, “Wùt ywên, mu jìsà ha wò hamok na, yu kwoka bênàlò a we ghɨ bè hi fê kokhe wi Yènfù a kun afân, kokhe wi nâbi a Jèlusalèm. 22Ghàn ghɨt a Sàmaliyà ghàn khə wi nâbi wùt we ghàn kokhe, ghàh ghɨt a Jûs khə wùt we ghàh kokhe beka ghàh làhi fòktè lum we Yènfù mò hi bònhè ghɨt à jɨ̀m atɨ̂n. 23Yu kwoka bênàlò, ghɨ jîsà ni ma wu hì mô kə nâ a chyə̂, ma Yohnà Fùyènà ni ma ghɨta hi kokhe funfu kə hamok a mô nki ghɨ̂t ghe Yènfù khɨŋa na ghɨ hi kokhe wûn 24Yènfù mò a Yohnà, ghɨt ghe ghɨ kokhe wûn ghɨ kəta hi tè kokhe wûn hamok, kokhe kə nì jyak ghe Yohnà wuna atɨ̂na nè fo.”

25Wùt ywên àtɨ̂n ki jîs ha wun na, “Mu khə na we ghɨ chwoka lema, a mô Klistù, nè bênàlò mô hi bèn hi fòktì nâbi ghə ha ghàh.”

26Jisòs ki fôktè mihì ha wun na, “À mò mu we mu jìsà ha wò chin ni.”

27Kə ni, te Jisòs jìsa, jùmtìbàmsu wunsu kaha ben yen te wù jìsà ghê wùt ywen hì mô nì kani, nâ wùt wù mòk a ghɨna fùtɨ̂n tà tì buf jə gha yile ha wùt ywen àtɨ̂n na, wò khɨŋa ghə agha? Tê buf kəbi gha yile ha Jisòs na, “À mò ghə wù jìsà ghàn à wùt ywen wùna agha?”

28Wùt ywen àtɨ̂n lo de nam a wuna ghɨ mòla kaha lyi yen a yi tèk jis ha ghɨta na, 29“Ghàn bê yen wùt we wù fòkte nâ gha ma à jɨ̀m ghe mu ndùku nê. A wi wun we ghɨ chwoka lema agha?” 30Ghɨta fwu yen hi yen a wûn.

31Wu mô afû jùmtìbàmsù chyate wun jîsà na, “Chichà yə shyətàfu.”

32Jisòs jis ha ghɨna na, “Mu hì mô ma mu ti yə shyə yəna, ghàn khə wi gha kum ghə.”

33Jùmtìbàmsù wunsu hì kante a ghɨna sù ngɨŋ bufa na, “Yi ni mò na wùt lè ye ben nì shyə yəna ha wûn ma?”

34Jisòs ki jîs ha ghɨna na, “Shyə yəna ma mò kə hi nè yi fêt yi we wù tuma mu nì kôŋì, hi nè mihè yi fêt yi tɨni. 35Ba ghàn khəlò ngàn yìlè ghɨ mâ na, ghɨ yomelò, a chya kə njoŋ sù kìk ghɨ kpilò. Biyani ghàn yen lê gha yile. Ghàn yusa ke kə yi kî te fùkmù kə̀kà. Mwə̀ mù yə̂mù mò ma mù ti byî mô kə hi tè kpì. 36Nâ chîn mò ni ma wùt wù kpèna hì kpêlò ghɨ lâkà wûn. Wù kpê ghɨt a bime ghe ghɨ khɨte chyənà ye yì bè mê wi shyəma wûn ghê wùt wu yomena chîntè hi saŋlê. 37Yi mô na ngàn yinâ na wùt wùlè yomê wùt wùlè kpê mô kə nâ hamok. 38Mu ti tum ghàn na ghàn shik à kpi mwə̀ mù yə̂mù a fùk teka ghàn fet. Ghɨt a lô che fêt, ghàn mô hi kpì.”

39Ghɨt a Sàmaliyà bimî yi tèk afû dô kə ni kum yi gha ye wùt ywen we ye jisa ha ghɨna na, “Wù ye fôktì nâbi ghə ghe mu time hì nê.” 40Ghɨt a Sàmaliyà ben yen Jisòs ni hì chyate wûn na wù faŋ ghê ghɨna, wù chyə ghê ghɨna tuk mù bà.

41Ghɨta fî ben yu yikî Jisòs bimilò, dô kə ni, 42ki jîs ha wùt ywen we na, “Ghàh ti bimi chîn à wijə kum nì gha ye wò ye fokte ha ghàh. Chîn ghàh ti yu kə nâ yikînì nì ngɨŋ sahisu khɨli na a mò kə nâ wûn Bònhè à mbyî.”

Jisòs chwuk wâ wùt wù ta wùlè

43Jisòs chyə tuk me mù bà lo yen a Galìlî. 44À ndùku mô ni ma wù ti jis kə a wûn a ngɨŋ na, “Ghɨ tà timi hì kokhe fòktè Fùyèn wù lùk afa wù fwo atɨ̂n.” 45À hì mô te wù ye tana a yi lak yi Galìlî ni, ghɨta afû fyi wûn nâ a jûŋ beka ghɨna mò ma ghɨ tî yên gha à jɨ̀m ghe wù tì ne a Jèlusalèm a mu tuk afa ghɨ ndùku yə Yə Daŋa Chyalani atɨ̂n.

46Jisòs fî kaha yen yi tèk yi kanà yi lak yi Galìlî, wù lùk afa wù tì ne mòlû mù kahi a mu lùk yâ, yen wùt wù ta wùlè afû, wu fêtà ha fə̀n, wâ wûn mô wu khɨ̀ yafâ. 47Wùt wù fèt mu wuna ben te wù ywo na Jisòs ti bên a Galìlî ma wù lo ben a Jùdiyà hì chyate Jisòs na wù bê chwuk wâ wûn wù lɨmà wù mò kə hi kpû. 48Jisòs jis ha wun na, “Wùt ha ghàn wi hi bimî a bu na wù yen a chwena gha kanana te mu ne.”

49Wùt wù fètana àtɨ̂n fî jis kə na, “Bèbɨn, nyàŋhi bî ma ghàh wò yen, à bu yâ ma wâ mù kpu.”

50Jisòs ki jîs ha wûn na, “Wo yênà, wan wâ nè talò.”

Wùt àtɨ̂n yu kə yâ lo lò, 51shihi kolo yèn kwônà ghê ghɨta wuna ghɨ fetana ale, ghɨna jis ha wun na, “Wan wâ ti bonâ.”

52Wu buf ha ghɨna na, gut atɨna ye mi yini? Ghɨna jis na, “Gut atɨ̂na ye mi nchwì.” 53Bè wan àtɨ̂n khɨli na gut atɨ̂na ye mi kə wu yu afa Jisòs ye jisa ha yi na, “Wan wâ nè talò.” Ghɨt à jɨ̀m a wun yi sah yi nda bimî.

54Yìna mò gha kanani yi kumteni te Jisòs tì ne a Galìlî te wù kaha yena a Jùdiyà.

Currently Selected:

Jon 4: bmv

Highlight

Copy