Aŋa o te ꞌĀpōtoro 1

He uŋa iŋa mai o te ⌊Vārua Maitai⌋

1ꞌI ruŋa i tāꞌaku puka pāpaꞌi raꞌe, e tōꞌoku repahoa hōnui ko Teofiro ē, i pāpaꞌi ai a au o ruŋa i te meꞌe taꞌatoꞌa aŋa ꞌe hāpī e Ietū mai te mahana haꞌamata i tāꞌana aŋa 2ꞌātā ki te mahana iri ōꞌona ki te raŋi. Kai iri ꞌā i haka ꞌite rō ai hai Vārua Maitai ki tāꞌana nuꞌu haꞌataꞌa he ⌊ꞌāpōtoro⌋ i te meꞌe o rāua mo aŋa. 3I ora era mai te mate, he haka takeꞌa i a ia ki rā nuꞌu mo aŋi-aŋi e rāua ko ora ꞌā a ia. E maha ꞌahuru mahana i haka takeꞌa i oho ai a Ietū i a ia ꞌe i vānaŋa ai o ruŋa i te ⌊haka tere iŋa ꞌāpī o te ꞌAtua⌋.

4ꞌI rā ŋā mahana noho era o Ietū ꞌi muri i tāꞌana ꞌāpōtoro i kī takoꞌa rō ki rā nuꞌu mo taꞌe eꞌa mai Hērutarema. He kī:

«Ka noho kōrua ka tiaki ꞌi nei ꞌātā ka tano rō te meꞌe hōrea atu e tōꞌoku Matuꞌa, he meꞌe vānaŋa atu era e au. 5A ⌊Iovani⌋ hai vai i ⌊papatito⌋ ai; ꞌe, e ko roa te mahana, nā he papatito atu te ꞌAtua i a kōrua hai Vārua Maitai, te auraꞌa, he uŋa i te Vārua Maitai mo noho mau rō ꞌāvai ꞌi roto i a kōrua».

He iri iŋa o Ietū ki te raŋi

6ꞌI te mahana e tahi he ꞌui e te nuꞌu taka-taka ꞌi muri i a ia:

—E Ietū, ¿he toꞌo koe, ꞌi te hora nei, i te tātou henua mai te rima o te rōmano mo haka tere haka ꞌou e tātou e te itaraera?

7He pāhono e Ietū:

—Taꞌe he meꞌe mo kōrua e ꞌite; i te Matuꞌa nō te parau mo kī i te hora ꞌe i te mahana o rā meꞌe. 8Ka turu mai ena ki ruŋa i a kōrua te Vārua Maitai, he ai te kōrua pūai mo eꞌa mo vānaŋa i te parautiꞌa o ruŋa i a au ꞌi Hērutarema, ꞌi te kona taꞌatoꞌa o Hūrea ꞌe o ⌊Tāmāria⌋, ꞌe ꞌātā ki te ŋā kona hopeꞌa ena o te roa.

9I kī era i te meꞌe nei, he iri he oho a Ietū a ruŋa, e uꞌi nō ꞌā e tū nuꞌu era, he viri e te raŋi e tahi ꞌe he ŋaro rō ꞌai. 10E uꞌi nō ꞌana tū nuꞌu era a ruŋa pē hē a Ietū i ŋaro ai, i māroa ai ꞌi muri e rua taŋata e uru rō ꞌā i te kahu tea-tea. 11He kī: «E te taŋata o Karirea ē, ¿he aha rā i no-noho i uꞌi rō ai a te raŋi? A Ietū noho atu era ꞌi muri i a kōrua, iri ena ki te raŋi, ko ia ꞌā nā ka hoki mai ena. Pa he iri iŋa ena ōꞌona takeꞌa ena e kōrua, pē ira ꞌana tōꞌona hoki iŋa mai».

He toꞌo iŋa i a Mātia mo ꞌāpōtoro

12He hoki ia tū ŋā ꞌāpōtoro era ki Hērutarema mai ruŋa i te maꞌuŋa kī o te ꞌŌrivo, he kona e hāhine rō ꞌā, he roa tano o te haka tere hūrio mo haꞌere ꞌi te ⌊mahana haka ora⌋. 13I tuꞌu era ki Hērutarema, he eke ananake ki te piha o ruŋa o te hare ꞌi ira e noho era. Te nuꞌu nei ko Pētero, ko Iovani, ko ⌊Tanatiako⌋, ko Antarea, ko Feripe, ko Tōmā, ko Torometi, ko Māteo, ko Tanatiako poki ꞌa Arafeo, ko Tīmona he ⌊sērote⌋, ko Hura poki ꞌa Tanatiako. 14Te aŋa o rāua he haka taka-taka mo pure ananake ko te taina o Ietū, ko ⌊Māria⌋ matuꞌa ōꞌona ꞌe ko te tētahi atu ŋā viꞌe.

15ꞌI rā ŋā mahana he vānaŋa a Pētero ki te nuꞌu taka-taka ⌊haka moe i te manaꞌu⌋ ꞌi ruŋa i a Ietū e hoꞌe hānere piti ꞌahuru, he kī:

16«Pē ira mau ꞌā te meꞌe nei ana topa, e tōꞌoku taina ē, mo haka tano ki te meꞌe kī e te Vārua Maitai ꞌi ruŋa i te ⌊Pāpaꞌi Moꞌa⌋ pāpaꞌi e ⌊Tāvita⌋ o ruŋa i a Hura, kope uŋa era i te nuꞌu mo ꞌa-ꞌaru i a Ietū. 17A Hura he kope e tahi o mātou, ꞌe ꞌi muri i a mātou e aŋa era. 18(Hai moni ꞌauhau o te meꞌe taꞌe tano aŋa e ia i hoꞌo ai i te henua e tahi. ꞌE mai te kona ruŋa nui o ira i viri ai hai pūꞌoko ꞌe he ŋāꞌaha-ꞌaha tahi te kōkoma ki haho. 19I ꞌite era o ruŋa o rā meꞌe e te nuꞌu taꞌatoꞌa o Hērutarema, he nape i te ꞌīŋoa o rā kona ko Āteretama, te auraꞌa ꞌi te rāua ꞌarero: “He Henua Toto”)».

20He kī haka ꞌou e Pētero: «Nā e kī rō ꞌana ꞌi ruŋa i te puka o te hīmene pē nei ē:

“E oꞌo rō tōꞌona hare e te tokerau,

ꞌe ꞌina e tahi meꞌe mo noho ꞌi ira”.

»ꞌE, takoꞌa:

“Mo te rua taŋata e maꞌu i tōꞌona tōroꞌa

ꞌe e aŋa i tāꞌana aŋa”.

21»ꞌI roto i a tātou te ŋāŋata e noho mai ena ꞌi te hora taꞌatoꞌa o Ietū ꞌi muri i a tātou, 22mai te hora papatito i a ia e Iovani ꞌātā ki te hora iri ki te raŋi. Ki uꞌi ki toꞌo mai e tahi o rāua mo mataꞌite takoꞌa ananake ko mātou pē nei ē: a Ietū ko ora ꞌā mai te mate».

23E rua ꞌīŋoa i kī ai: ko ⌊Kōsē⌋, e kī era ko Varasāvā, kī takoꞌa ko Huto, ꞌe te rua ko Mātia. 24He pure ia ananake:

«E te ꞌAtua ē, ko koe i ꞌite i te huru o te māhatu o te taŋata taꞌatoꞌa. Ka haka ꞌite mai koe ko ai o roto o te ŋāŋata nei e rua i haŋa e koe 25mo maꞌu i te aŋa he ꞌāpōtoro, aŋa e Hura ꞌātā ki te hora hara ōꞌona ꞌe ꞌai ko oho ꞌā ki te kona tano mōꞌona».

26I uꞌi era he topa ki a Mātia; ꞌe mai rā hora he riro rō ꞌai o roto o te nūnaꞌa ꞌāpōtoro.

Currently Selected:

Aŋa o te ꞌĀpōtoro 1: rap

Highlight

Copy