Mark 14
14
Pɨ taŋə̀ a mɨnaŋə àtwuə̀ Yěsû
(Mat 26.1-5; Luk 22.1-2; Jòn 11.45-53)
1A lə̀ pirə̀ njyə̂ ɨpaa njyə̂ Nɨ̀ghaʼà Àlàŋə̀ Mmyàʼtə̀ pobə njyə̂ nɨ̀zɨghə̀ Àpaanə̀ Tɨkoʼò ɨ pòŋə̀ kùʼù. Pɨ̀fò màʼà Nẅùə̀ pobə pɨ̀nèrə̀ mbòomə lə̀ mə nnaŋə̀ àlàŋə a nɨ kô a Yěsû a ndzùmə̀ ndzùmə̀ zhwuutə̀ e. 2La nshwəŋə̀ lo, “Ka a pòŋə̀ e lo pə̀ənə̀ ghɨ̀rə̀ ànwùə̀ zə̀ amwuə njyə̂ Àlàŋə̀ Mmyàʼtə̀, ntiinə pə̀ənə̀ tə ngɨ̀rə̀ a lenə, mɨ̀làʼà furə̀ amwuə pə̀ənə̀.”
Mə̀ngyə̌ ɨ̀tse a zoʼò a Yěsû nɨ mɨ̀ghurə̀ a Betanì
(Mat 26.6-13; Jòn 12.1-8)
3Yěsû à lə̀ pə a Betanì, a ndâ Shimùnə̀ ngàŋə̀ àkɨ̀kẅinə. Nkwùə̀ nɨ à lə̀ mənə ndzɨghə̀, mə̀ngyə̌ ɨ̀tse à lə̀ kwuunə̀ amwuə ndâ nɨ mɨ̀ghurə̀ mɨ àzhyǎ mɨ tsə̂nə nɨ pɨ tsùŋə̀nə nɨ ngotə nadə̀ amwuə məndzìrə̀ nɨ pɨ tsùŋə̀nə nɨ àlàbastà nkẅìrə̀ a mèrə a àtwuə̀ ze. 4Mɨ̀ntɨŋmə̀ mɨ pànə̀ pɨ̀tse nɨ pobə lə̀ pənə a alyiʼə ghu lə̀ zaŋə̀, pobə tyiʼə̀ nshwəŋə̀ pobə nɨ pobə lo, “À lanə ntsə̀ŋə̀ mɨ̀ghurə̀ mɨ àzhyǎ mə lə̀ mbə̀ʼə àkə? 5Ntiinə mbə̀ʼə pɨ shwùunə̀ mɨ̀ghurə̀ mə ndàŋə̀ nkaamə̀ nkɨrə ɨtarə ndòo a zèrə ŋŋâ ambo ngàŋə àfumə̀!” Pobə lə̀ saʼà a mə̀ngyə̌ wa nɨ àsinə̀ ɨ̀sɨghə̀.#14.5 Taʼà nkaamə̀ à lə̀ pə nkabə̀ nkùʼnə̀ a nɨ twuə̀ ngàŋə̀ àfàʼà ghu aŋunə taʼà ŋwɨgrə̀.
6La Yěsû a shwəŋə̀ ambo pobə lo, “Nɨ̀ myàʼtə̀ e, nɨ̀ tòmnə̀ e lə ntii àkə? À ghɨ̀rə̀ la ànwùə̀ nɨ a pòŋə̀nə ka mɨ̀zùŋə ambo mɨ̀ŋə̀. 7Ngàŋə àfumə̀ chyə̂ pɨghə pɨ pobə nkwùə̀ ɨ̀tsùmə̀, mbə̀ʼə nɨ̀ yèmpə̀ a ghobə nkwùə̀ ɨ̀tsùmə̀ nɨ nɨ̀ kòŋə̀nə. La aŋunə mɨ̀ŋə̀, ka mmə mbə mə̀ pə̀ənə̀ nkwùə̀ ɨ̀tsùmə̀. 8À ghɨ̀rə̀ la ànwùə̀ nɨ mbə̀ʼə a ghɨ̀rə̀. À zoʼò mə̀ nɨ mɨ̀ghurə̀ ma ndzàamə̀ ntsùnkə̀ la mbɨ̀ŋmə̀ mə̀ mbə̀ʼə nkwùə̀ nɨ̀tẅəŋə̀ mə̀ ɨ̀ kɨ kùʼù. 9Lenəla, ǹshwəŋə̀ tyìʼə̀ nkǔŋə nkuŋə ambo pɨghə lo, alyiʼə àtsùmə̀ nɨ pɨ ghǎ chwìitə̀ ntwuumə̀ ghù ɨ̀shìʼnə̀ wə̀ amwuə àtwuə̀ ɨ̀shyə̂ àtsùmə̀, pɨ ghǎ kẅuumə̀ ànwùə̀ nɨ à ghɨ̀rə̀nə lə.”
Yudà a pyiimə̀ a nɨ shwùunə̀ a Yěsû
10Yudà Iskaryòtə̀ nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ pa ntsòbə̀ ɨpaa à lə̀ lèrə̀ ambo àtwuə̀ pɨ̀fò màʼà Nẅùə̀ a nɨ ghə̀ shwùunə̀ a Yěsû ambo pobə. 11Pobə lə̀ ghaʼà ka mɨ̀zùŋə a nɨ zuʼù a lenə, ntyiʼə̀ nkàʼà a nɨ ŋâ e nɨ nkabə̀. Lenəla a tyiʼə̀ mbìʼnə̀ a nɨ tàʼà àlàŋə a nɨ ŋâ e ambo pobə.
Yěsû a zɨghə̀ mɨ̀zɨghə̀ mɨ Àlàŋə̀ Mmyàʼtə̀ pobə ɨ̀zùŋə̀ ndzùmə̀ ɨ̀pe
12Amwuə ntsàambyə̀ njyə̂ a nɨ zɨghə̀ àpaanə̀ tɨ koʼò, nɨ pɨ lə̀ mənə ngwàrə̀ a mômbyə̂ ndzìrə̀ Àlàŋə̀ Mmyàʼtə̀, ɨ̀zùŋə̀ ndzùmə̀ Yěsû pyiitə̀ ambo ze lo, “Wə̀ tàʼà lo pəə ghə̀ ntsùŋə̀ la zèrə alyiʼə ambo ghò a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀?”
13Lenəla ntwuumə̀ ɨ̀zùŋə̀ ndzùmə̀ ɨ̀pe ɨpaa, nshwəŋə̀ ambo pobə lo, “Nɨ̀ nkwuunə̀ ndèrə̀ amwuə mbòmpə àlaʼà, nɨ̌ tsirə̀ a ŋònə̀ mbyàŋnə̀ ɨ̀tse a pìʼì nɨkɨŋə nɨ nchyə. Nɨ̀ zùŋə̀ e, 14nkwuunə̀ amwuə ndâ nɨ ǎ kwuunə̀ nshwəŋə̀ ambo ngàŋə̀ ndâ lo, ‘Ɨ̀nèrə̀, ntaŋə wa nɨ pəə pɨ ɨ̀zùŋə̀ ndzùmə̀ ɨ̀pâ zɨghə̀ mɨ̀zɨghə̀ mɨ Àlàŋə̀ Mmyàʼtə̀ amwuə la ɨ ghə?’ 15Ǎ nèrə̀ a wɨghə nɨ ntaŋə ghù ẅùunə nɨ ɨ pənə àtɨ̀ghə nɨ pɨ chyâ mə ɨ̀pwuumə̀ ɨ̀tsùmə̀ amwuə nkɨ ntsùŋə̀ ambo pɨghə. Nɨ̀ tyiʼə̀ ntsùŋə̀ ɨ̀pwuumə̀ nɨ pə̀ənə̌ zɨghə̀ mɨ̀zɨghə̀ mɨ Àlàŋə̀ Mmyàʼtə̀ amwuə.”
16Ɨ̀zùŋə̀ ndzùmə̀ ɨ̀pe pa lə̀ lèrə̀ ngə̀ kwuunə̀ amwuə mbòmpə àlaʼà nkɨ ndzəənə̀ tyìʼə̀ tsaʼnə à lə̀ shwəŋə̀nə la, ntyiʼə̀ ntsùŋə̀ ɨ̀pwuumə̀ njyə̂ Àlàŋə̀ Mmyàʼtə̀ pa.
17Nkwùə̀ nkwə̌ ɨ lə̀ kùʼù Yěsû pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa lèrə̀ ghu. 18Pobə lèrə̀ ghu la ngə̀ nnwuunə̀ àtwuə̀ tepèrə̀ mmə ndzɨghə̀, Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə, taʼà ŋwùə̀ wɨghə ɨ̀tse ǎ shwùunə̀ mə̀, mbə ŋònə̀ nɨ à wə̀ ndzɨghə̀ pəə ze.” 19Pobə pìʼnə̀ a nɨ sòmnə̀ ntyiʼə̀ mbyiitə̀ pobə nɨ pobə lo “A mɨ̀ŋə̀?” 20Yěsû a kẅùə̀ ambo pobə lo, “A taʼà ŋwùə̀ amwuə pɨghə pa ntsòbə̀ ɨpaa nɨ à wə̀ ntsùbə̀ àpaanə̀ pəə ze amwuə taʼà àkaŋə̀. 21Moonə̀ Ŋwùə̀ ǎ kwɨghə̀ tyìʼə̀ tsaʼnə pɨ lə̀ ŋwàʼnə̀nə amwuə àŋwàʼnə̀ Nẅùə̀ la. Ngəʼə̀ noʼnə ɨ chyə̂ àtwuə̀ ŋònə̀ wa nɨ ǎ shwùunə̀ a Moonə̀ Ŋwùə̀! A lə̀ pyə̀ mbòŋə̀ lo kò pɨ pyə̂ e a ye.”
Ndẅùə̀ndzùmə̀ mɨ̀zɨghə̀ mɨ Ndòʼnə̀mbyə̂
(Mat 26.26-30; Luk 22.14-20; 1Ko 11.23-25)
22Tsaʼnə pobə lə̀ mənə ndzɨghə̀, Yěsû a piinə̀ àpaanə̀, ŋŋâ a mɨyàa ambo Nẅùə̀ mbəʼə̀ a zèrə, ŋŋâ ambo ɨ̀zùŋə̀ ndzùmə̀ ɨ̀pe nshwəŋə̀ lo, “Nɨ̀ kò. Lə̌ mbɨ̀ŋmə̀ mə̀.”
23A lə̀ kɨ mbìʼì ndoŋə̀ mɨ̀lùʼù, ŋŋâ a mɨyàa ambo Nẅùə̀, ŋŋâ a zèrə ambo pobə, pobə pɨ̀tsùmə̀ nô amwuə ndoŋə̀ ghu. 24Yěsû a tyiʼə̀ nshwəŋə̀ ambo pobə lo, “Lə̌ àləəmə̀ mə̀; àləəmə̀ ɨ̀kàanə̀ nɨ mbɨ wàrə̀ nɨ a pɨ kẅìnə̀ àtwuə̀ nɨ pànə̀ pɨ̀noʼnə. 25Ǹshwəŋə̀ tyìʼə̀ nkǔŋə nkuŋə ambo pɨghə lo, ka mbə chi nô mə̀ mɨ̀lùʼù mə tə mbyàa njyə̂ nɨ ngǎ kẅirə̀ nô a mèrə shwuə̀ shwuə̀ amwuə alyiʼə Nɨ̀fò Nẅùə̀.”
26Lenəla, pobə tyiʼə̀ ndzòbə̀ nchyə, nfurə̀ nkoʼò ndèrə̀ àtwuə̀ Mbarə̀ Olìvə̀.
Yěsû a shwəŋə̀ tsaʼnə Pità à ghǎ twuunə̀ e
(Mat 26.31-35; Luk 22.31-34; Jòn 13.36-38)
27Yěsû a shwəŋə̀ ambo pobə lo, “Pɨghə pɨ̀tsùmə̀ ghǎ kɨ̀ɨrə̀ waʼà mə̀, ntiinə pɨ ŋwàʼnə̀ amwuə àŋwàʼnə̀ Nẅùə̀ lo, ‘Ngǎ zhwuutə̀ a mbyabə̀ mɨ̀mbyə̂ mɨ ndzìrə̀ wa, mɨ̀mbyə̂ mɨ ndzìrə̀ mɨ̀tsùmə̀ taanə̀.’ 28La nkwùə̀ nɨ mbɨ zhwuumə̀ a nɨ̀wɨghə̀, mbɨ lèrə̀ a mbyə̀ pɨghə a Galìlyə̂.” 29Pità a shwəŋə̀ ambo ze lo, “Pànə̀ pɨ̀tsùmə̀ lə pyə̀ nkɨ̀ɨrə̀ mmyàʼtə̀ o, mmyàʼtə̀ mə̀ a ghò apə̀.”
30Yěsû a kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo, tyìʼə̀ nɨ ɨ̀twuʼə̀ sìnə̀, ankəʼə a ghǎ kɨ toŋə̀ nkwùə̀ ɨpaa wə̀ twuunə̀ mə̀ nkwùə̀ ɨtarə.”
31La Pità a kẅirə̀ nshwəŋə̀ nɨ ɨ̀tɨ̀ŋnə̀ lo, “A tə mbə pə nɨ̀wɨghə̀, nkwɨghə̀ pùu; mbə̀ʼə ntwuunə̀ mə̀ a ghò apə̀.”
Ɨ̀zùŋə̀ ndzùmə̀ ɨ̀pe ɨ̀tsùmə̀ zùŋə̀ nkɨ shwəŋə̀ a lenə.
Yěsû a chàʼtə̀ a Nẅùə̀ a Gethsemane
(Mat 26.36-46; Luk 22.39-46)
32Pobə lə̀ ghə̀ mbyàa a alyiʼə àtse nɨ pɨ lə̀ mənə nfuŋə̀ nɨ Gethsemane, a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ nwuunə̀ a ɨ̀shyə̂ nɨ̀ghə̂ n̂gə̀ nchàʼtə̀ a Nẅùə̀.” 33À lə̀ shwəŋə̀ a lenə la ndòo Pità, nɨ Jemə̀, nɨ Jònə, pobə pɨ pobə lèrə̀. Mbɨ̀ŋmə̀ e ɨ pìʼnə̀ a nɨ pɨ̂, ntɨŋmə̀ e lẅenə̀ nɨ àsòmnə̀. 34A shwəŋə̀ ambo pobə lo, “Ntɨŋmə̀ mə̀ ɨ wə̀ ndẅenə̀ nɨ àsòmnə̀ tə ntyiʼə̀ tyìʼə̀ a nɨ zhwuutə̀ a mə̀, nɨ̀ nwuunə̀ a ɨ̀shyə̂ nɨ̀ghə̂ mbə a nɨ̀lyìinə̀ mmə mbyabə̀.”
35À lə̀ nyaʼa mmìntə̀ tyìʼə̀ lə mmàʼà mbɨ̀ŋmə̀ e a ɨ̀shyə̂, nchàʼtə̀ a Nẅùə̀ lo, àlàŋə a tə mbəla mbə ghu, yi mbə̀ʼə mətùmə nkwùə̀ ngəʼə̀ wə̀ a làŋə̀ tɨghu à zəənə̀ a zèrə. 36Nshwəŋə̀ lo, “Abà, Tǎ ɨwəə! Mbə̀ʼə wə̀ ghɨ̀rə̀ ànwùə̀ àtsùmə̀. Kẅiirə̀ ndoŋə̀ ngəʼə̀ zə̀ ambo mɨ̀ŋə̀. Kò a pə e pə tsaʼnə ǹtàʼnə, â pə pə tsaʼnə wə̀ tàʼnə a nɨ ghɨ̀rə̀.”
37A kẅirə̀ ntô ndzəənə̀ ɨ̀zùŋə̀ ndzùmə̀ ɨ̀pe pə ndyə̂, a shwəŋə̀ ambo Pità lo, “Shimùnə̀, ghò wə̀ ndyə̂ o? Mbə̀ʼə ka wə̀ nwuunə̀ o a nɨ̀lyìinə̀ aŋunə mətùmə nkwùə̀? 38Nɨ̀ nwuunə̀ a nɨ̀lyìinə̀ mmə nchàʼtə̀ a Nẅùə̀ mbə̀ʼə nɨ̀ kaŋə kunə̀ amwuə àkwàʼnə̀. Àzhwùə̀ a zə̀ nkòŋə̀, la mbòbə̀ mbɨ̀ŋmə̀ ɨ̀ porə̀.”
39Yěsû a kẅirə̀ ndèrə̀ a nɨ chàʼtə̀ a Nẅùə̀, nkɨ nshwəŋə̀ tyìʼə̀ mɨ̀nwùə̀ nɨ à pyə̀nə mə nshwəŋə̀. 40A kɨ kẅirə̀ tô, mbirə̀ ndzəənə̀ ɨ̀zùŋə̀ ndzùmə̀ ɨ̀pe pa pobə mə ndyə̂ a ghobə lyə̂nə, ntiinə pɨlô a lə̀ pənə a àtwuə̀ pobə tɨsɨŋnə. Ka pobə lə̀ zhyə̂ a ghobə ànwùə̀ nɨ mbə̀ʼə pobə shwəŋə̀ ambo ze.
41A lə̀ chi ntô nkwùə̀ nɨ pyàanə ɨtarə, mbyiitə̀ ambo pobə lo, “Nɨ̀ wə̀ nkɨ mbirə̀ ndyə̂ a wɨghə lyə̂nə nzhwùutə̀ a wɨghə? Â kùʼù! Nkwùə̀ ɨ̀ kùʼù; pɨ shwùunə̀ mə a Moonə̀ Ŋwùə̀ ambo ngàŋə ngɨ̀rə̀ ɨ̀nwùə̀ tɨ̀pòŋə̀. 42Nɨ̀ lòo a ɨ̀shyə̂, pə̀ənə̀ lèrə̀! Nɨ̀ zəənə̀, ŋònə̀ nɨ à shwùunə̀nə mə̀ à wə̀ ntô.”
Pɨ kô a Yěsû
(Mat 26.47-56; Luk 22.47-53; Jòn 18.3-12)
43Tsaʼnə Yěsû à lə̀ pirə̀nə mmə nshwəŋnə̀, Yudà nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a zùŋə̀ ntô pobə pɨ àpùŋə̀ pə̀ənə̀ nɨ pobə twuʼtə̀nə pɨ̀mɨnẅuə pɨ ntsòo pobə mɨ̀pòrə̀, nɨ pɨ̀fò màʼà Nẅùə̀ pobə pɨ̀nèrə̀ mbòomə nɨ pɨ̀lɨ̀ŋmə̂ pɨ àlaʼà lə̀ twuumə̀nə.
44Yudà, ŋònə̀ nɨ à lə̀ shwùunə̀nə e à lə̀ ŋâ àlènə̀ ambo pobə lo, “Ŋònə̀ wa nɨ mbɨ nyoŋə̀ mɨ̀ghə̀ʼə̀ ɨ̀me la ŋònə̀ ghu. Njiilo nɨ̀ kô e ngyìinə̀ mbyabə̀ ɨ̀shìʼnə̀ ndòo ndèrə̀ nɨ ẅèrə.” 45Tyìʼə̀ tsaʼnə Yudà à lə̀ tônə, à lə̀ zùŋə̀ ndàŋə̀ ndèrə̀ a nɨ̀pwùnə Yěsû nnyoŋə̀ mɨ̀ghə̀ʼə̀ ɨ̀me nshwəŋə̀ lo, “Masàa!” 46Lenəla, pànə̀ pɨ̀ghu lə̀ kô a Yěsû ngẅìimə̀ e nɨ mbô mɨ̀tɨ̀ŋnə̀. 47La taʼà ŋwùə̀ amwuə pànə̀ nɨ pobə lə̀ təəmə̀nə a nɨ̀pwùnə mmə nnaŋə̀, a tsoʼò a mɨnẅuə ntsòo ndə̂ nɨtugrə nɨ ngàŋə̀ àfàʼà àtwuə̀ pɨ̀fò màʼà Nẅùə̀. 48Yěsû a shwəŋə̀ ambo pobə lo, “Nɨ̀ tyiʼə̀ ntô nɨ pɨ̀mɨnẅuə pɨ ntsòo pobə mɨ̀pòrə̀ a nɨ kô mə̀ tsaʼa ntuŋə̀ ɨ̀shyə̂? 49Ndə̀ mə mbə pə̀ənə̀ a Ndâ Mɨ̀shwàʼà Nẅùə̀ njyə̂ ɨ̀tsùmə̀ nnèrə̀ a wɨghə nɨ mɨ̀nwùə̀ ka nɨ̀ kô a wɨghə a gha. La ànwùə̀ zə̀ a chyə̂ a nɨ furə̀ mbə̀ʼə lẅenə̀ ànwùə̀ nɨ Àŋwàʼnə̀ Nẅùə̀ a lə̀ shwəŋə̀nə.”
50Ɨ̀zùŋə̀ ndzùmə̀ ɨ̀pe ɨ̀tsùmə̀ lə̀ myàʼtə̀ e nkɨ̀ɨrə̀ a ghobə.
51Môngwàswùumə̀ ɨ̀tse nɨ à lə̀ lyibə̀nə pə ndàʼà atsəʼə fuə a mbɨ̀ŋmə̀ ze à lə̀ pə ndzùŋə̀ a Yěsû. Pànə̀ pa lə̀ kyiitə̀ lo kô e, 52la a myàʼtə̀ atsəʼə ambo pobə nkɨ̀ɨrə̀ e ntǔmnə̀.
Pɨ lòo a Yěsû ndèrə̀ a mbyə̀ Kansèrə̀
(Mat 26.57-68; Luk 22.54-55; Jòn 18.13-14, 18.19-24)
53Pɨ lə̀ lòo a Yěsû ndèrə̀ a ndâ àtwuə̀ pɨ̀fò màʼà Nẅùə̀ alyiʼə nɨ pɨ̀fò màʼà Nẅùə̀, nɨ pɨ̀lɨ̀ŋmə̂ pobə pɨ̀nèrə̀ mbòomə lə̀ mənə nshwatə̀. 54Pità à lə̀ mə ndzùŋə̀ e la mbə a ndyə̌ sàa ngə̀ nkwuunə̀ amwuə àpùʼù àtwuə̀ pɨ̀fò màʼà Nẅùə̀, nnwuunə̀ pobə pɨ pànə̀ nɨ pobə mənə mbyabə̀ ɨlyiʼə mmə ndzô ɨ̀mǔ e. 55Pɨ̀fò màʼà Nẅùə̀ pobə Kansèrə̀ ntsùmə̀ lə̀ tàʼà àlàŋə àtsùmə̀ a nɨ zəənə̀ ànwùə̀ nɨ mbə̀ʼə pobə shwəŋə̀ aŋunə Yěsû mbə̀ʼə zhwuutə̀ e, la ka zəənə̀ a ghobə. 56Pànə̀ pɨ̀noʼnə lə̀ shwəŋə̀ mɨ̀nwùə̀ mɨ fuə mbə̀ʼə Yěsû, la ɨ̀shwəŋnə̀ ɨ̀pobə furə̀ chwìi chwìi.
57Pànə̀ pɨ̀tse lə̀ lòo a ɨ̀shyə̂ nyìi a chwìrə̀ wə̀ aŋunə ze nshwəŋə̀ lo, 58“Pəə lə̀ zuʼù a shwəŋə̀ lo, ‘Ngǎ kùmə̀ Ndâ Mɨ̀shwàʼà Nẅùə̀ zə̀ nɨ pànə̀ poomə̀nə lə, kẅirə̀ poomə̀ a zhyə̀ nɨ ka à poomə̀ e pànə̀ pɨ mɨsoŋə aŋunə njyə̂ ɨtarə.’” 59Mbaa pə pobə, ka pobə lə̀ zhyə̂ a ghobə ndwuumə̀ nɨ mbə̀ʼə pobə ghɨ̀rə̀ ɨ̀shwəŋnə̀ ɨ̀pobə yìinə̀ ndəŋə ndəŋə.
60Àtwuə̀ pɨ̀fò màʼà Nẅùə̀ a təəmə̀ a mbyə̀ pobə pɨ̀tsùmə̀ mbyiitə̀ a Yěsû lo, “Ka wə̀ pə o nɨ ànwùə̀ àtse a nɨ shwəŋə̀? Ka wə̀ pə o nɨ ànwùə̀ àtse a nɨ shwəŋə̀ aŋunə mɨ̀nwùə̀ nɨ pɨ pə nshwəŋnə̀ àtwuə̀ ghò lanə?”
61La Yěsû à lə̀ zhwemnə̀ e ka shwəŋə̀ e ànwùə̀ àtse. Àtwuə̀ pɨ̀fò màʼà Nẅùə̀ a kẅirə̀ mbyiitə̀ e lo, “Ghò la Ghù Ndzoʼnə wa, mbə Moonə̀ Nẅùə̀ nɨ pɨ pa nguʼtə̀ la?”
62Yěsû a kẅùə̀ lo, “A mɨ̀ŋə̀, nɨ̀ ghǎ zəənə̀ a Moonə̀ Ŋwùə̀ â nwuunə̀ a pàa àpô Nẅùə̀ yè zɨghə̀nə nɨ à twuʼtə̀nə mɨ̀tɨ̀ŋnə̀ mɨ̀tsùmə̀, â furə̀ a nɨ̀pwuurə̀ nshwuʼə̀ amwuə mbàʼà.”
63Tsaʼnə à shwəŋə̀nə la, àtwuə̀ pɨ̀fò màʼà Nẅùə̀ a zùŋə̀ nsìirə̀ ɨtsəʼə ɨ̀pe nshwəŋə̀ lo, “Pə̀ənə̀ chi ntàʼà pɨ̀ndzəənə̀ zəənə̀nə aŋunə àkə? 64Nɨ̀ zuʼù tsaʼnə à zòomə̀nə a Nẅùə̀. Nɨ̀ kùmə̀ nkwàŋə̀ àzɨghə lo pə̀ənə̀ ghɨ̀rə̀ la ghu?”
Pobə pɨ̀tsùmə̀ lə̀ lə̂ ɨ̀sàʼa mbyiimə̀ lo pɨ̀ zhwuutə̀ e.
65Pobə pɨ̀tse lə̀ pìʼnə̀ a nɨ tẅùə̀ mɨ̀tẅuə̀ aŋunə Yěsû, nkorə̀ ɨ̀myə̂ ɨ̀me nɨ àpàa atsəʼə, mmə ntsòo e nshwəŋə̀ lo, “Səʼə̀ a ŋònə̀ nɨ à tsòonə o.” Pɨ̀mbyabə̀ ɨlyiʼə lə̀ lòo e ngə̀ ntyiʼə̀ mbuʼù.
Pità a twuunə̀ a Yěsû
(Mat 26.69-75; Luk 22.56-62; Jòn 18.15-18, 18.25-27)
66Pità à lə̀ pirə̀ nnwuunə̀ amwuə àpùʼù za mmə ndzô ɨ̀mǔ e, ngàŋə̀ àfàʼà àtwuə̀ pɨ̀fò màʼà Nẅùə̀ ghù mə̀ngyə̌ yɨ̀tse a tô, 67ntsirə̀ a Pità nnaŋə̀ e amwuə ɨ̀myə̂ ɨ̀me nshwəŋə̀ lo, “Yi wə̀ tə nkɨ mbə pɨghə Yěsû ŋwùə̀ Nazarètə̀?”
68La Pità a làʼnə̀ e ànwùə̀ ghu nshwəŋə̀ lo, “Ka ǹzhyə̂ mə̀ a ye, ka kɨ zhyə̂ mə̀ ànwùə̀ nɨ ghò wə̀ nshwəŋə̀ lə.” À lə̀ shwəŋə̀ a lenə la, nfurə̀ mbə a ntswùə̀ àpùʼù, [ankəʼə a zùŋə̀ ntoŋə̀].#14.68 Ka pɨ̀tse ɨ̀ŋwàʼnə̀ shwəŋə̀ e ànwùə̀ zə̀.
69Mômə̀ngyə̌ wa à lə̀ chi ndzəənə̀ Pità mbìʼnə̀ a nɨ shwəŋə̀ ambo pànə̀ nɨ pobə təəmə̀nə alyiʼə ghu lo, “Lə̌ taʼà ŋwùə̀ ɨ̀ghobə ghùtse.” 70La Pità a kɨ nchi ndàʼnə̀ e.
Mətùmə nkwùə̀ a chi kɨ làŋə̀, pànə̀ nɨ pobə lə̀ təəmə̀nə a alyiʼə ghu nshwəŋə̀ ambo Pità lo, “A tyìʼə̀ nkǔŋə nkuŋə. Wə̀ la taʼà ŋwùə̀ ɨ̀ghobə ghùtse, ntiinə wə̀ kɨnə nfurə̀ àzô la a Galìlyə̂.”
71A pìʼnə̀ a nɨ chyâ ndòonə̀ aŋunə mbɨ̀ŋmə̀ e, ntsə̀əmə̀ nshwəŋə̀ lo, “Ka nzhyə̂ mə̀ a ŋònə̀ wə̀ nɨ nɨ̀ wə̀ nshwəŋnə̀ mbə̀ʼə e lə. Nẅùə̀ ǎ chyâ ndòonə̀ mə̀ mbə̀ʼə m̀mə nyìi la chwìrə̀.”
72Tyìʼə̀ nkwùə̀ ghu, ankəʼə a kɨ nchi ntoŋə̀. Pità a kẅuumə̀ tsaʼnə Yěsû à lə̀ shwəŋə̀nə ambo ze lo, “Ankəʼə à ghǎ kɨ toŋə̀ nkwùə̀ ɨpaa, wə̌ twuunə̀ mə̀ nkwùə̀ ɨtarə.” A lə̀ kẅuumə̀ a lenə la mbirə̀ a nɨ̀yìi.
Currently Selected:
Mark 14: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
