Lukə̀ 9

Yěsû a twuumə̀ ngàŋə̀ ntwuumə̀ ɨ̀ze za ntsòbə̀ ɨpaa a àpyìinə

1Yěsû à lə̀ fuŋə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa a taʼà alyiʼə ŋŋâ a ghobə nɨ mɨ̀tɨ̀ŋnə̀ a nɨ tyiʼə̀ nfuukə̀ ɨ̀zhyə̂ nkɨ mbarə̀ ɨghoonə. 2Ntyiʼə̀ ntwuumə̀ a ghobə lo pobə lèrə̀ ngə̀ mə nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀ nkɨ ntyiʼə̀ mbarə̀ ɨghoonə. 3Tsaʼnə a lə̀ mənə ntwuumə̀ a ghobə la a lə̀ nshwəŋə̀ lo, “Kò nɨ̀ lòo wɨghə àzwuumə̀ àtse; kò nɨ̀ lòo wɨghə mbàŋə̀, kò nɨ̀ lòo wɨghə àpàamə̀, kò nɨ̀ lòo wɨghə mɨ̀zɨghə̀ kə̀ nkabə̀, kò nɨ̀ kɨ nchi ntwuʼtə̀ wɨghə ɨtsəʼə pɨ̀nyaanə. 4Nɨ̀ lèrə̀ ngə̀ nkwuunə̀ a ndâ nɨ nɨ̀ kwuunə̀nə la, nɨ̀ ghoŋə̀ ghu mbyàa nkwùə̀ nɨ nɨ̀ ghǎ lèrə̀. 5Nɨ̀ tə ngə̀ nkwuunə̀ alyiʼə nɨ ka pɨ kẅiirə̀ e wɨghə, nɨ̀ furə̀ wɨghə, nkwùtə̀ àpùbə nɨ a pənə a mɨ̀kwùə̀ pɨghə a nɨ nèrə̀ lo ka pɨghə pobə pə wɨghə nɨ àzwuumə̀ àtse” 6Pobə tyiʼə̀ nfurə̀ ndèrə̀, nkwuunə̀ amwuə zhyə̀ àlaʼà ndèrə̀ amwuə zhyə̀ àlaʼà, nchwìitə̀ ntwuumə̀ ghù ɨ̀shìʼnə̀ wa nkɨ mə mbarə̀ pə̀ənə̀ ɨlyiʼə ɨ̀tsùmə̀.

Àzhìʼtə̀ Heròdə̀ a tsànkə̀ aŋunə ànwùə̀ nɨ à lə̀ zuʼnə

(Mat 14.1-12; Mrk 6.14-29)

7Tsaʼnə Heròdə̀ ẅùə̀ nɨ à lə̀ pənə ɨ̀fò àlaʼà Galìlyə̂, à lə̀ zuʼnə ɨ̀nwùə̀ pèrə pə la, àtwuə̀ e a lə̀ tsànkə̀, ntiinə pànə̀ pɨ̀tse lə̀ mənə nshwəŋə̀ lo Jònə ngàŋə̀ àŋâ àkẅiirə̀ nchyə à kẅirə̀ nzhwuumə̀ a nɨ̀wɨghə̀. 8Pɨ̀tse mə nshwəŋə̀ lo Elijah à kẅirə̀ ntô, pɨ̀tse kɨ nchi mmə nshwəŋə̀ lo ngàŋə̀ ntwuumə̀ Nẅùə̀ ghù ntsàambyə̀ ntsàambyə̀ wa ghùtse à kẅirə̀ nzhwuumə̀ a nɨ̀wɨghə̀. 9Heròdə̀ a tyiʼə̀ nshwəŋə̀ lo, “Ndə̀ lə̂ àtwuə̀ Jònə, ẅèrə wə̀ ŋònə̀ nɨ ǹtyiʼnə ndzuʼù ànwùə̀ mbə̀ʼə e lə pə ɨ̀wə̌?” Ntyiʼə̀ nkyiitə̀ lo zəənə̀ e.

Yěsû a zə̂ pànə̀ nkaamə̀ ɨtaanə̀

(Mat 14.13-22; Mrk 6.30-40; Jòn 6.1-14)

10Nkwùə̀ nɨ ngàŋə ntwuumə̀ ɨ̀ze za lə̀ kẅirə̀nə nkwə̂, pobə lə̀ tiitə̀ ɨ̀nwùə̀ ɨ̀tsùmə̀ nɨ pobə lə̀ ghɨ̀rə̀nə ambo Yěsû. A lòo a ghobə pobə pɨ pobə ndàʼà lèrə̀ àlaʼà Betsedà. 11Nkwùə̀ nɨ ɨ̀pùŋə̀ pə̀ənə̀ lə̀ zuʼnə lo pobə pyə̀ alyiʼə ghu la, pɨ zùŋə̀ e ghu. A kẅiirə̀ a ghobə ntyiʼə̀ nshwəŋə̀ ambo pobə mbə̀ʼə ànwùə̀ Nɨ̀fò Nẅùə̀ nkɨ mbarə̀ pɨghoonə.

12A lə̀ pə a ngẅènə̀ nẅùumə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa ɨ tô ambo ze nshwəŋə̀ lo, “Myàʼtə̀ àpùŋə̀ pànə̀ zə pobə lèrə̀, nkwuunə̀ amwuə ɨ̀laʼà pobə ɨlyiʼə nɨ ɨ paatə̀nə mbə̀ʼə pobə zəənə̀ àzwuumə̀ ndzɨghə̀ kə̀ alyiʼə ndyə̂ ghu, ntiinə alyiʼə zə̀ a alyiʼə nɨ ka pànə̀ mə chyə̂ a ghobə ghu nnoʼò.”

13Yěsû a kẅùə̀ ambo pobə lo, “Pɨghə àtwuə̀ mbɨ̀ŋmə̀ ɨ̀zɨghə nɨ̀ ŋâ àzwuumə̀ pobə zɨghə̀.”

Pobə shwəŋə̀ ambo ze lo, “Ka pəə pə wəə nɨ àzwuumə̀ àtse ndàŋə̀ e ɨ̀tùmə ɨ̀paanə̀ ɨtaanə̀ nɨ ɨ̀swuə̀ ɨpaa. A tə mbə zhyə̀ nɨ pə̀ənə̌ zə̂ pànə̀ pə pɨ̀tsùmə̀, yi pə̀ənə̌ chi zwuunə̀ mɨ̀zɨghə̀ ambo pobə.” 14Pànə̀ nɨ pɨ lə̀ pənə ghu lə̀ pə tsaʼa pànə̀ nkaamə̀ ɨtaanə̀.

A shwəŋə̀ ambo ɨ̀zùŋə̀ ndzùmə̀ ɨ̀pe pa lo, “Nɨ̀ ghɨ̀rə̀ pobə nwuunə̀ a ɨ̀shyə̂ ɨ̀kẅìrə ɨ̀kẅìrə, taʼà àkẅìrə â pə tsaʼa pànə̀ mɨ̀ghumə̀ mɨntaanə̀” 15Pobə lə̀ ghɨ̀rə̀ tyìʼə̀ a lenə, pànə̀ pa pɨ̀tsùmə̀ nontə̀ a ɨ̀shyə̂. 16A piinə̀ ɨ̀tùmə ɨ̀paanə̀ pa ɨtaanə̀ nɨ ɨ̀swuə̀ za ɨpaa, mbə̀ʼkə̀ àtwuə̀ e a àtɨ̀ghə nchàʼtə̀ a Nẅùə̀ ŋŋâ a mɨyàa nchyâ mborə̀ aŋunə mbiʼtə̀ ŋŋâ ambo ɨ̀zùŋə̀ ndzùmə̀ ɨ̀pe pa lo pobə ghàbə̀ ambo pànə̀ pa. 17Pànə̀ pɨ̀tsùmə̀ lə̀ zɨghə̀ ndzwurə̀ pɨ shwatə̀ ɨ̀chepə̀ pèrə lẅenə̀ mɨnkaamə ntsòbə̀ ɨpaa.

Pità a tiitə̀ ŋònə̀ nɨ Yěsû à pənə ẅèrə

(Mat 16.13-19; Mrk 8.27-29)

18A pə njyə̂ ɨ̀tse Yěsû a pə nchàʼtə̀ a Nẅùə̀ tyìʼə̀ ze nɨ ze, ɨ̀zùŋə̀ ndzùmə̀ ɨ̀pe pə a nɨ̀pwùnə ze, a pyiitə̀ a ghobə lo, “Pànə̀ pa nshwəŋə̀ lo ǹchyə̂ mbə la ɨ̀wə̌?” 19Pobə kẅùə̀ lo, “Pɨ̀tse pa nshwəŋə̀ lo Jònə ngàŋə̀ àŋâ àkẅiirə̀ nchyə. Pɨ̀tse mə nshwəŋə̀ lo Elijah nɨ à kẅirə̀nə nkwə̂. Pɨ̀tse mə nshwəŋə̀ lo a ngàŋə̀ ntwuumə̀ Nẅùə̀ ghù ntsàambyə̀ wa ghùtse nɨ à kẅirə̀nə nzhwuumə̀.” 20La a pyiitə̀ a ghobə lo, “La nɨ̀ pə nshwəŋə̀ àzɨghə lo ǹchyə̂ mbə la ɨ̀wə̌?”

Pità a kẅùə̀ lo, “Ẅùə̀ wa nɨ Nẅùə̀ à zoʼnə la.”

Yěsû a shwəŋnə̀ mbə̀ʼə ngəʼə̀ nɨ̀ à ghǎ zəənə̀ pòŋə̀ kwɨghə̀

(Mat 16.20-28; Mrk 8.30–9.1)

21Yěsû a kwàtə̀ a ghobə nshwəŋə̀ lo, “Kò pobə shwəŋə̀ a ghobə ambo ŋònə̀ ɨ̀tse.” 22Nkɨ nshwəŋə̀ ambo pobə lo, “Moonə̀ ŋwùə̀ à ghǎ zəənə̀ mbuurə̀ ngəʼə̀ ntsùmə̀, pɨ̀tǎ pɨ àlaʼà, nɨ pɨ̀fò màʼà Nẅùə̀ nɨ pɨ̀nèrə̀ mbòomə twuunə̀ e, nzhwuutə̀ e a kɨ pə aŋunə njyə̂ ɨtarə a chi nzhwuumə̀ a nɨ̀wɨghə̀.” 23A shwəŋə̀ ambo pobə pɨ̀tsùmə̀ lo, “Ŋònə̀ ɨ̀tse à tə mə ntàʼà a nɨ zùŋə̀ ndzùmə̀ mə̀ a twuunə̀ ɨ̀pɨ̀ŋmə̀ e mbìʼì àtɨ̀ghə pànkə̀nə e ntyiʼə̀ ndzùŋə̀ mə̀ tyìʼə̀ njyə̂ ɨ̀tsùmə̀, 24ntiinə ŋwùə̀ wa ntsùmə̀ nɨ à tàʼnə lo chwarə̀ ɨ̀pɨ̀ŋmə̀ e la ǎ pî, la ŋwùə̀ wa ntsùmə̀ nɨ à tàʼnə lo kwɨghə̀ ntii mə̀ la ǎ chwarə̀. 25Àpìi o a àkə mbə̀ʼə wə̀ pìʼì àtwuə̀ ɨ̀shyə̂ zə̀ àtsùmə̀ la nga mbî a nɨ̀chyə̂mbyə̂ o pɨghə Nẅùə̀, kə̀ nga ndzəənə̀ ngəʼə̀? 26Ŋwùə̀ à tə mbə nɨ ɨ̀sɨŋnə̀ mbə̀ʼə mə̀ pobə mɨ̀ntə̌ ɨ̀mâ, yi Moonə̀ Ŋwùə̀ à ghǎ pə nɨ ɨ̀sɨŋnə̀ aŋunə ze nkwùə̀ nɨ à ghǎ tô amwuə mɨ̀tɨ̀ŋnə̀ ɨ̀me mɨ ẅùunə nɨ mɨ̀tɨ̀ŋnə̀ mɨ Tǎ pobə pəngèrə̀ pyə̀ nɨ pɨ laanə̀nə la. 27La ǹshwəŋə̀ tyìʼə̀ a nkǔŋə nkuŋə ambo pɨghə lo, pànə̀ pɨ̀tse pyə̀ nɨ pɨ təəmə̀nə a ɨ̀shyə̂ nɨ̀ghə̂ pɨ ghǎ kwɨghə̀ a ghobə apə̀, pyàa nkwùə̀ nɨ pobə ghǎ zəənə̀ ànwùə̀ Nɨ̀fò Nẅùə̀.”

Yěsû a kẅebə̀ mbɨ̀ŋmə̀ e

(Mat 17.1-8; Mrk 9.2-8)

28A lə̀ kɨ pə tsaʼa njyə̂ nɨ̀fàamə̂ tsaʼnə à lə̀ shwəŋə̀nə mɨ̀nwùə̀ mèrə mə̀ la, à lə̀ lòo Pità nɨ Jònə nɨ Jemə̀ pobə pɨ pobə koʼò ndèrə̀ àtwuə̀ mbarə̀ a nɨ chàʼtə̀ a Nẅùə̀. 29Tsaʼnə à lə̀ mənə nchàʼtə̀ a Nẅùə̀ la, ɨ̀sɨghə̀ e ɨ lə̀ kẅebə̀, ɨtsəʼə ɨ̀pe fuə tə ntsèntə̀ tsaʼa mbə̀ŋə̀ nɨ ɨ̀ ŋwàŋə̀nə. 30Pobə kɨ wùutə̀ ndzəənə̀ pànə̀ pɨpaa; Mǔsî pobə Elijah pobə pə nshwəŋnə̀ pobə pɨ Yěsû. 31Pànə̀ pə pɨpaa lə̀ tô amwuə nɨ̀ghaʼà ghù nẅìinə̀nə mmə nshwəŋnə̀ pobə pɨ Yěsû amwuə ndwuumə̀ nɨ à ghǎ kwɨghə̀ a Yèrusalèmə̀ a nɨ lẅenə̀ mɨ̀nkàʼnə mɨ Nẅùə̀. 32Pità pobə pɨ pànə̀ nɨ pɨ lə̀ pənə alyiʼə ghu lə̀ pə ntsə̀grə̀ a pɨlô. La nkwùə̀ nɨ pobə lə̀ zhwèmnə̀nə, pobə lə̀ zəənə̀ a nɨ̀ghaʼà e ghù nẅìinə̀nə wa pobə pànə̀ pa pɨpaa nɨ pobə pɨ pobə lə̀ təəmə̀nə la. 33Tsaʼnə pànə̀ pa lə̀ mənə mmyàʼtə̀ a Yěsû la, Pità à lə̀ shwəŋə̀ ambo ze lo, “Masàa, a pòŋə̀ lo pə̀ənə̀ ghoŋə̀ a nɨ̀ghə̂. Ghɨ̀rə̀ pəə korə̀ ɨ̀zuŋə̀ ɨtarə, taʼà a pə ambo ghò, taʼà a pə ambo Mǔsî, ɨ taʼà kɨ ntyiʼə̀ mbə ambo Elijah” (ka à lə̀ zhyə̂ ànwùə̀ nɨ à lə̀ mənə nshwəŋə̀.) 34Tyìʼə̀ tsaʼnə à lə̀ pirə̀nə mmə nshwəŋnə̀, mbàʼà ɨ̀ shwuʼə̀ nnàanə̀ a ghobə, àkẅàrə̀ a kwuunə̀ a ghobə. 35Pobə lə̀ zuʼù ngyə̀ ɨ̀ furə̀ amwuə mbàʼà za nshwəŋə̀ lo, “Lə̌ Moonə̀ mə̀ ẅùə̀ nɨ ǹtsoʼò mə; nɨ̀ tyiʼə̀ ndzuʼnə̀ e.” 36Nkwùə̀ nɨ ngyə̀ za ɨ̀ lə̀ zhwemnə̀nə, pobə lə̀ tyiʼə̀ ndzəənə̀ a Yěsû ze nɨ ze. Pobə lə̀ kẅupə̀ mɨ̀ntswùə̀ ɨ̀mobə ka shwəŋə̀ ghobə ànwùə̀ nɨ pobə lə̀ zəənə̀nə ambo ŋònə̀ ɨ̀tse nkwùə̀ ghu.

Yěsû a parə̀ a mômbyàŋnə̀ nɨ à lə̀ pənə nɨ àzhyə̂

(Mat 17.14-18; Mrk 9.14-27)

37Njyə̂ ɨ̀ lə̀ laanə̀, Yěsû pobə ɨ̀zùŋə̀ ndzùmə̀ ɨ̀pe pa shwuʼə̀ àtwuə̀ mbarə̀ gha, àpùŋə̀ pə̀ənə̀ a tô ntsirə̀ e. 38Taʼà ŋònə̀ ɨ̀tse amwuə àpùŋə̀ pànə̀ za, a kyiinə̀ nshwəŋə̀ lo, “Ɨ̀nèrə̀ ɨ̀nwùə̀, m̀buʼù mbô, yèmpə̀ a moonə̀ mə̀ wə̀ ntiinə à pənə ndàʼà moonə̀ mə̀. 39Àzhwùə̀ tɨ̀pòŋə̀ za a kô a moonə̀ wa mmàʼà a ɨ̀shyə̂, a tyiʼə̀ nkyiinə̀ nkunə̀ a ɨ̀shyə̂ àfùʼkə̀ a tyiʼə̀ nfurə̀ a ntswùə̀ ze. Ka fàʼà pyiimə̀ e a nɨ myàʼtə̀ e la mə ntsə̀ŋə̀ e. 40Ǹtə mbuʼù mbô ambo ɨ̀zùŋə̀ ndzùmə̀ ɨ̀pô lo pobə̂ fuukə̀ àzhyə̂ zə̀ la pobə fuukə̀ ghobə kɨkaŋə.”

41Yěsû a shwəŋə̀ lo, “Pànə̀ pɨ tɨ àpyiimə̀; ɨ̀waanə̀ pànə̀ pɨ tɨ̀pòŋə̀! Mbɨ chyə̂ pə̀ənə̀ lə ndwùnə̀ ɨla ghu kɨ ẅìimə̀ ntɨŋmə̀ mə̀ la ghu zaʼà nɨ̀ pòŋə̀ ẅìimə̀ ànwùə̀ mə̀? Tô nɨ moonə̀ o wa a ɨ̀shyə̂ nɨ̀ghə̂.”

42Tsaʼnə à lə̀ mənə ntô nɨ ẅèrə, àzhyə̂ za a chi ntinə̀ e mmàʼà a ɨ̀shyə̂ mmə nnə̀ʼə̀ e. Yěsû a saʼà Àzhwùə̀ tɨ̀pòŋə̀ za, mbarə̀ a moonə̀ wa ŋŋâ ambo tǎ ɨghobə. 43Pànə̀ pɨ̀tsùmə̀ lə̀ yerə̀ amwuə ndwuumə̀ nɨ pobə lə̀ zəənə̀ ɨ̀tɨ̀ŋnə̀ Nẅùə̀.

Yěsû a chi nshwəŋnə̀ mbə̀ʼə nɨ̀wɨghə̀ e

(Mat 17.22-23; Mrk 9.30-32)

Tsaʼnə pobə lə̀ pirə̀nə mə nkwàŋə̀ mɨ̀nwùə̀ nɨ Yěsû à lə̀ ghɨ̀rə̀nə mɨ mə nkə̀ʼnə̀ e a ghobə la, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, 44“Nɨ̀ tsùŋə̀ nzhwiʼtə̀ àshwəŋnə̀ zə̀ â kwuunə̀ àtwuə̀ pɨghə. Pɨ̌ ŋŋâ a Moonə̀ Ŋwùə̀ ambo pànə̀ pɨ mɨsoŋə.” 45Pobə lə̀ zuʼù la ka ànwùə̀ ghu a tsùŋə̀ ndaanə̀ e àtwuə̀ pobə, ntiinə pɨ lə̀ lə̀əmə̀nə lo kò pobə zhyə̂ a ghobə, pobə kɨ mbô a nɨ pyiitə̀ e.

Ŋònə̀ ngẅùunə la ɨ̀wə̌?

(Mat 18.1-5; Mrk 9.33-37)

46Pobə pìʼnə̀ a nɨ tànkə̀ mbyiitə̀ pobə nɨ pobə lo, ŋònə̀ ngẅùunə amwuə pobə la ɨ̀wə̌? 47La Yěsû à lə̀ zhyə̂ ànwùə̀ nɨ pobə lə̀ mənə nkwàŋə̀ amwuə mɨ̀ntɨŋmə̀ ɨ̀mobə, ndòo a mɨlyiʼə mɨnkɨ̂ ntô ntə̂ a nɨ̀pwùnə ze, 48nshwəŋə̀ ambo pobə lo, “Ŋwùə̀ ntsùmə̀ nɨ à kẅiirə̀nə mɨlyiʼə mɨnkɨ̂ ntii mə̀ à kẅiirə̀ la gha; ŋwùə̀ ntsùmə̀ nɨ à kẅiirə̀nə mə̀ à kẅiirə̀ la ŋònə̀ nɨ à twuumə̀nə mə̀. Ntiinə ẅùə̀ wa nɨ à kɨ̂nə ndẅùunə̀ amwuə pɨghə la ẅùə̀ nɨ à pənə ŋònə̀ ngẅùunə.” 49Jònə a kẅùə̀ lo, “Masàa, pəə tô ndzəənə̀ a ŋònə̀ ɨ̀tse a fuukə̀ ɨ̀zhyə̂ amwuə mɨ̀pùmə̀ mɨ pə̀ənə̀ aŋunə nɨ̀linə̀ ɨ̀tsô, pəə zùŋə̀ e ntiinə ka à pə e ŋwùə̀ àkwùə̀ ɨ̀wə̀ənə̀.” 50Yěsû a shwəŋə̀ lo, “Kò nɨ̀ zùŋə̀ e ntiinə ŋònə̀ nɨ ka à twuunə̀ ànwùə̀ zə̀ a chyə̂ la pɨghə pɨ pobə.”

Nɨ̀kwurə̀ nɨ Sàmariyà tsɨ̀tse twuunə̀ a nɨ kẅiirə̀ a Yěsû

51Tsaʼnə nkwùə̀ ɨ̀ lə̀ mənə mbaatə̀ lo Yěsû a koʼò ndèrə̀ a nɨ̀pwuurə̀ la, à lə̀ lòo àkwàŋə̀ lo lèrə̀ e pə a Yèrusalèmə̀. 52À lə̀ zàamə̀ ntsàa pə̀ənə̀ a mbyə̀ lo pobə̂ ghə̀ nkwuunə̀ àlaʼà Sàmariyà ntsùnkə̀ àzwuumə̀ àtsùmə̀ zaʼà a pòŋə̀ tô. 53La pànə̀ pa lə̀ twuunə̀ a nɨ kẅiirə̀ e ntiinə pobə lə̀ zhyə̂nə lo, à wə̀ ndàŋə̀ làŋə̀nə ndèrə̀ a Yèrusalèmə̀. 54La nkwùə̀ nɨ Jònə pobə Jemə̀ nɨ pobə lə̀ pənə ɨ̀zùŋə̀ ndzùmə̀ ɨ̀pe lə̀ zhyə̂nə a lenə la, pobə lə̀ pyiitə̀ e lo, “Ndòʼnə̀mbyə̂, wə̀ pyiimə̀ lo pəə shwuʼkə̀ ɨ̀mǔ ɨ̂ furə̀ a nɨ̀pwuurə̀ ntô ntòonə̀ a ghobə?” 55Yěsû a pə̀ŋə̀ nnaŋə̀, nsaʼà ghobə. 56Pobə tyiʼə̀ nfurə̀ ndèrə̀ amwuə àlaʼà yè nyaanə.

Tsaʼnə a tɨ̀ŋnə̀nə a nɨ pə àzùŋə̀ ndzùmə̀ Yěsû

(Mat 8.19-22)

57Tsaʼnə pobə lə̀ mənə ngyìinə̀ àlàŋə la, ŋònə̀ ɨ̀tse a shwəŋə̀ ambo Yěsû lo, “Mbɨ zùŋə̀ o alyiʼə ntsùmə̀ nɨ wə̀ lèrə̀nə.” 58Yěsû a kẅùə̀ lo, “Pəntsobə chyə̂ nɨ mɨ̀mbwùʼə̀ ɨ̀mobə, pɨ̀mɨsɨŋə pə nɨ mɨ̀nkàanə̀ ɨ̀mobə la ka Moonə̀ Ŋwùə̀ a pə e nɨ alyiʼə nɨ mbə̀ʼə a nùŋə̀ àtwuə̀ ghu nzhwùutə̀.” 59Yěsû a shwəŋə̀ ambo yɨ̀tse ŋònə̀ lo, “Zùŋə̀ mə̀.”

La a shwəŋə̀ ambo ze lo, “Ndòʼnə̀mbyə̂, tyiʼə̀ n̂gə̀ ndzàamə̀ ntẅəŋə̀ a tǎ ɨwəə zaʼà.” 60Yěsû a shwəŋə̀ ambo ze lo, “Myàʼtə̀ pànə̀ pyə̀ nɨ pɨ pənə tsaʼa ɨ̀kwuə̀ pə̀ənə̀ pobə̂ tẅəŋə̀ ɨ̀kwuə̀ pə̀ənə̀ pobə. La aŋunə ghò, lèrə̀ ngə̀ nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀.”

61Ghùtse ŋwùə̀ a shwəŋə̀ ambo ze lo, “Mbɨ zùŋə̀ o mbǎ Ndòʼnə̀mbyə̂, la tyiʼə̀ n̂gə̀ ndàʼnə̀ pə̀ənə̀ a ɨmwuə alyiʼə zaʼà.” 62Yěsû a shwəŋə̀ ambo ze lo, “ŋònə̀ nɨ a ẅìimə̀nə àsoorə̀ àfàʼà nchi mbə̀ŋə̀ nnaŋə̀ ndzùmə̀ la, ka kùʼnə̀ e a nɨ kwuunə̀ amwuə ànwùə̀ Nɨ̀fò Nẅùə̀.”

Currently Selected:

Lukə̀ 9: pny

Highlight

Copy