Jònə 6
6
Tsaʼnə Yěsû à lə̀ zə̂nə pànə̀ nkaamə̀ ɨtaanə̀
(Mat 14.13-21; Mrk 6.30-44; Luk 9.10-17)
1Tsaʼnə mɨ̀nwùə̀ mèrə mə lə̀ làŋə̀nə, Yěsû a twuumə̀ atəŋə Galìlyə̂ (nɨ pɨ lə̀ kɨnə mmə nfuŋə̀ nɨ Tìberyàsə̀) ndèrə̀ amwuə zhyə̀ ndzìnə. 2Àpùŋə̀ pànə̀ pɨ̀noʼnə lə̀ zùŋə̀ e ntiinə pobə lə̀ zəənə̀nə ɨ̀lènə̀ ɨ̀nwùə̀ pɨ̀yerə̀nə yerə̀nə nɨ a lə̀ ghɨ̀rə̀nə aŋunə pɨghoonə. 3Yěsû pobə ɨ̀zùŋə̀ ndzùmə̀ ɨ̀pe koʼò ndèrə̀ àtwuə̀ mbarə̀ nnwuunə̀ ghu. 4A lə̀ kɨ pə la nɨ nkwùə̀ Nɨ̀ghaʼà Àlàŋə̀ Mmyàʼtə̀ pɨ̀Jew ɨ̀ lə̀ paatə̀. 5Yěsû a kɨ pə̀ŋə̀ ɨ̀myə̂ ɨ̀me, ndzəənə̀ àpùŋə̀ pànə̀ pɨ̀noʼnə a pə ntô ambo ze. Lenəla, a pyiitə̀ ambo Filibə̀ lo, “Pə̀ənə̌ zwuunə̀ mɨ̀zɨghə̀ lə ɨghə nɨ mbə̀ʼə mɨ zə̂ pànə̀ pə̀?” 6Yěsû à lə̀ shwəŋə̀ a zə la nɨ lòo nzhwiʼì a Filibə̀ ntiinə à lə̀ zhyə̂nə ànwùə̀ nɨ ǎ ghɨ̀rə̀.
7Filibə̀ a kẅùə̀ ambo ze lo, “A tə mbə pə nkabə̀ àfàʼà aŋunə pɨ̀ŋwɨgrə̀ ndùnə̀ ɨ̀ kùʼnə̀ e a nɨ lòo ndzwuunə̀ mɨ̀zɨghə̀ nɨ mbə̀ʼə taʼà ŋwùə̀ ɨghobə a zɨghə̀ e tyìʼə̀ a mɨlyiʼə apə̀.”
8Taʼà àzùŋə̀ ndzùmə̀ e ghùtse nɨ pɨ lə̀ mənə nfuŋə̀ nɨ Andrù, mbə ndyimə Shimùnə̀ Pità a shwəŋə̀ ambo ze lo, 9“Mômbyàŋnə̀ ghùtse à wə̀ a nɨ̀ghə̂ nɨ ntsɨŋə̀ àpaanə̀ barley ɨtaanə̀ nɨ ɨ̀swuə̀ ɨpaa. La mbə̀ʼə zèrə zə ghɨ̀rə̀ lə̀ àkə ambo ndùnə̀ pànə̀ wə̀?”
10Yěsû a shwəŋə̀ lo, “Nɨ̀ ghɨ̀rə̀ pànə̀ pə nwuunə̀ a ɨ̀shyə̂.” Nɨ̀yìinə à lə̀ noʼò alyiʼə ghu ka mɨ̀zùŋə. Lenəla ɨ̀zùŋə̀ ndzùmə̀ ɨ̀pe ghɨ̀rə̀ ŋwùə̀ ntsùmə̀ a nwuunə̀ a ɨ̀shyə̂. Mbyàŋnə̀ ndàʼà lə̀ pə tsaʼa nkaamə̀ ɨtaanə̀. 11Yěsû a tyiʼə̀ ndòo ntsɨŋə̀ àpaanə̀ za, ŋŋâ a mɨyàa ambo Nẅùə̀, ngàpə̀ a zèrə ambo pànə̀ nɨ pɨ lə̀ nwuunə̀nə a ɨ̀shyə̂. Nkɨ ngɨ̀rə̀ a lenə aŋunə ɨ̀swuə̀. Ŋwùə̀ ntsùmə̀ nɨ à lə̀ nwuunə̀nə a ɨ̀shyə̂ à lə̀ zɨghə̀ tsaʼnə à kòŋə̀nə. 12Nkwùə̀ nɨ ŋwùə̀ ntsùmə̀ à lə̀ zɨghə̀nə ndzwurə̀, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ shwatə̀ àpwùʼə̀ njiilo kò mɨlyiʼə a lèrə̀ e àfǐfǐ.” 13Lenəla pobə lə̀ lyàa ɨ̀chepə̀ ntsɨŋə̀ àpaanə̀ za ɨtaanə̀ nɨ pànə̀ lə̀ zɨghə̀nə ndẅenə̀ mɨnkaamə ntsòbə̀ ɨpaa.
14Nkwùə̀ nɨ pànə̀ pə lə̀ zəənə̀nə àlènə̀ ànwùə̀ yerə̀nə yerə̀nə zə nɨ Yěsû à lə̀ ghɨ̀rə̀nə la, pobə lə̀ pìʼnə̀ a nɨ shwəŋə̀ lo, “A tyìʼə̀ nkǔŋə nkuŋə lo lə̌ ngàŋə̀ ntwuumə̀ Nẅùə̀ nɨ à lə̀ pənə tô amwuə àtwuə̀ ɨ̀shyə̂!” 15Tsaʼnə Yěsû à lə̀ zhyə̂nə lo pɨ pə ntàʼà e lo zoʼò aŋunə ɨ̀fò nɨ mɨ̀tɨ̀ŋnə̀, à lə̀ tswurə̀ nchi nkoʼò ndèrə̀ nɨ mbyə̀ àtwuə̀ mbarə̀ gha ze nɨ ze.
Yěsû a yìinə̀ àtwuə̀ nchyə
(Mat 14.22-33; Mrk 6.44-52)
16Nkwùə̀ nkwə̌ ɨ̀ lə̀ kùʼù ɨ̀zùŋə̀ ndzùmə̀ ɨ̀pe shwuʼə̀ ndèrə̀ a ntswùə̀ atəŋə Galìlyə̂, 17nkwuunə̀ amwuə àkànwuʼə, nchi mmə ntwuumə̀ atəŋə ghu lo lèrə̀ a Kàpenòmə̀. A lə̀ kɨ pə nkwùə̀ ghu ɨlyiʼə sinə̀ la Yěsû a pirə̀ tɨ tô ntsirə̀ a ghobə. 18Nkɨ wùutə̀ kɨ̀fèrə̀ ntɨ̀ŋnə̀ a pìʼnə̀ a nɨ làŋə̀, ngɨ̀rə̀ nchyə ɨ tyiʼə̀ mmə mbə̀grə̀ nɨ ɨ̀tɨ̀ŋnə̀. 19Pobə lə̀ yìinə̀ amwuə àkànwuʼə aŋunə ntyə̌ ɨ̀tse tsaʼa pɨ̀kìlometà ntuurə̀, ndzəənə̀ a Yěsû a mə ngyìinə̀ aŋunə nchyə mmə ntô paatə̀ a ghobə, àkẅàrə̀ yè noʼnə a kwuunə̀ a ghobə, 20la Yěsû a shwəŋə̀ ambo pobə lo “A mɨ̀ŋə̀ kò nɨ̀ pô.” 21Pobə lə̀ ghaʼà a nɨ lo e amwuə àkànwuʼə a ghu, nkɨ wùutə̀ àkànwuʼə a pyàa mə e alyiʼə nɨ pobə lə̀ pənə ndèrə̀.
Pànə̀ pìʼnə̀ a nɨ tàʼà alyiʼə nɨ Yěsû à pənə ghu
22Njyə̂ lə̀ laanə̀, àpùŋə̀ pànə̀ za nɨ a lə̀ ghoŋə̀nə amwuə zhyə̀ ndzìnə nchyə a zəənə̀ lo ka Yěsû a lə̀ kwuunə̀ e pobə ɨ̀zùŋə̀ ndzùmə̀ ɨ̀pe amwuə ndàʼà taʼà àkànwuʼə nɨ a lə̀ pənə alyiʼə ghu, la ndzəənə̀ lo ɨ̀zùŋə̀ ndzùmə̀ ɨ̀pe lə̀ lèrə̀ pə pobə nɨ pobə. 23Tyìʼə̀ nkwùə̀ ghu, ɨ̀kànwuʼə pɨ̀tse lə̀ furə̀ a Tìberyàsə̀ ntô ntəəmə̀ mbaatə̀ alyiʼə nɨ Ndòʼnə̀mbyə̂ à lə̀ ŋânə a mɨyàa ambo Nẅùə̀ ŋŋâ àpaanə̀ za pobə kwurə̀ la. 24Nkwùə̀ nɨ ka àpùŋə̀ pànə̀ za a lə̀ zəənə̀ a ghobə a Yěsû, nkɨ ka zəənə̀ a ghobə ɨ̀zùŋə̀ ndzùmə̀ ɨ̀pe, pobə lə̀ kwuunə̀ amwuə ɨ̀kànwuʼə pɨ̀ghu ntwuumə̀ ndèrə̀ a nɨ tàʼà a Yěsû a Kàpenòmə̀.
Yěsû la àpaanə̀ nɨ a za ŋŋâ nɨ̀chyə̂mbyə̂
25Nkwùə̀ nɨ pobə lə̀ zəənə̀nə e a ndzìnə nchyə gha, pobə lə̀ pyiitə̀ ambo ze lo, “Ɨ̀nèrə̀, wə̀ lə̀ tô a nɨ̀ghə̂ nkwùə̀ àkə?”
26Yěsû a kẅùə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ka nɨ̀ tàʼà a wɨghə a gha la ntii ɨ̀lènə̀ ɨ̀nwùə̀ pɨ̀yerə̀nə yerə̀nə nɨ ǹgɨ̀rə̀nə, nɨ̀ tàʼà mə̀ la ntiinə nɨ̀ lə̀ kwurə̀nə àpaanə̀ za ndzwurə̀. 27Kò nɨ̀ kɨ nfàʼà mbuurə̀ àfàʼà zə̀ tɨsɨŋnə pə aŋunə mɨ̀zɨghə̀ nɨ mɨ̌ pɨ̂, nɨ̀ fàʼà pə aŋunə mɨ̀zɨghə̀ ma nɨ mɨ ghoŋə̀nə nɨ nkuŋə̀, kə̀ mɨ̀zɨghə̀ nɨ mɨ ma ŋŋâ a nɨ̀chyə̂mbyə̂. Lə̌ mɨ̀zɨghə̀ nɨ Moonə̀ Ŋwùə̀ à ghǎ ŋâ ambo pɨghə, ntiinə Nẅùə̀ à lènə̀ mə e tsaʼa moonə̀ e.”
28Lenəla pobə pyiitə̀ e lo, “Mbə̀ʼə pəə ghɨ̀rə̀ lə ɨla ntyiʼə̀ nfàʼà àfàʼà nɨ Nẅùə̀ à tàʼnə lo pəə fàʼà?”
29Yěsû a kẅùə̀ ambo pobə lo, “Ànwùə̀ nɨ Nẅùə̀ à tàʼnə lo nɨ̀ ghɨ̀rə̀ a chyə̂ lo nɨ̀ nùŋə̀ mɨ̀ntɨŋmə̀ ɨ̀mɨghə aŋunə ŋònə̀ nɨ à tsàanə la.” 30Pobə chi mbyiitə̀ ambo ze lo, “Àlènə̀ ànwùə̀ nɨ wə̌ nèrə̀ ambo pəə mbə̀ʼə pəə zəənə̀ mbyiimə̀ la a zèrə, wə̌ ghɨ̀rə̀ ànwùə̀ àkə? 31Pɨ ŋwàʼnə̀ amwuə àŋwàʼnə̀ Nẅùə̀ lo, pɨ̀tǎ pɨ tǎ pəə lə̀ zɨghə̀ manna amwuə alyiʼə waakə; Pɨ ŋwàʼnə̀ nshwəŋə̀ la lo, ‘A lə̀ ŋâ a ghobə nɨ àpaanə̀ nɨ a furə̀nə a nɨ̀pwuurə̀ lo pobə kwurə̀.’”
32Yěsû a shwəŋə̀ ambo pobə tyìʼə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ka a lə̀ ŋâ Mǔsî ŋŋâ àpaanə̀ nɨ a furə̀nə a nɨ̀pwuurə̀ ambo pɨghə, a lə̀ ŋâ Tǎ ɨwəə. La à ŋâ e Tǎ ɨwəə ŋŋâ a wɨghə nɨ àpaanə̀ nkǔŋə nkuŋə za nɨ a furə̀nə a nɨ̀pwuurə̀. 33Àpaanə̀ za nɨ Nẅùə̀ à wa ŋŋâ la, a zhyə̀ za nɨ a za nfurə̀ a nɨ̀pwuurə̀ nshwuʼə̀ ngɨ̀rə̀ lo pànə̀ pɨ àtwuə̀ ɨ̀shyə̂ chyə̂.”
34Tsaʼnə pobə lə̀ zuʼnə a lenə la, pobə shwəŋə̀ ambo ze lo, “Tǎ, tyiʼə̀ ŋŋâ tyìʼə̀ àpaanə̀ zə ambo pəə nkwùə̀ ɨ̀tsùmə̀.”
35Yěsû a ghɨ̀rə̀ a laanə̀ ambo pobə lo, “Mɨ̀ŋə̌ àpaanə̀ nɨ̀chyə̂mbyə̂, ka njyə̀ ɨ̀ pə ghǎ zaŋə̀ e a ŋwùə̀ wa ntsùmə̀ nɨ à tônə ambo mɨ̀ŋə̀. Njyə̀ nchyə ɨ̂ kɨ ndzaŋə̀ e a ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə mɨ̀ŋə̀ apə̀. 36La tsaʼnə ndə̀ shwəŋə̀ mə ambo pɨghə lo, nɨ̀ zəənə̀ mə mə̀ la ka pyiimə̀ a wɨghə. 37Ŋwùə̀ wa ntsùmə̀ nɨ Tǎ ɨwəə à ŋânə ambo mɨ̀ŋə̀ ǎ tô ambo mɨ̀ŋə̀. Ka mbə kɨ waʼà mə̀ a ŋònə̀ wa nɨ à tônə ambo mɨ̀ŋə̀, 38ntiinə ka ndə̀ furə̀ mə̀ a nɨ̀pwuurə̀ nshwuʼə̀ la a nɨ ghɨ̀rə̀ ànwùə̀ nɨ ǹtàʼnə. Ndə̀ shwuʼə̀ pə a nɨ ghɨ̀rə̀ ànwùə̀ nɨ ẅùə̀ wa nɨ à twuumə̀nə mə̀ à kòŋə̀nə lo ǹgɨ̀rə̀ 39Ànwùə̀ nɨ ze wa nɨ à twuumə̀nə mə̀ à tàʼnə lo ǹgɨ̀rə̀ a chyə̂ lo, kò m̀myàʼtə̀ mə̀ a taʼà ŋwùə̀ wə̀ ɨ̀tse nɨ à ŋânə wə̀ lo â pî. Ǹchyə̂ pə a nɨ gha nzhwuumə̀ a ghobə aŋunə nɨ̀wɨghə̀ aŋunə ndẅùutə njyə̂. 40Ntiinə ànwùə̀ nɨ Tǎ ɨwəə à tàʼnə a chyə̂ lo ŋwùə̀ wa ntsùmə̀ nɨ à zəənə̀nə a Moonə̀ e nkɨ nnùŋə̀ ntɨŋmə̀ e aŋunə ze, à ghǎ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀, n̂gǎ nkɨ nzhwuumə̀ e aŋunə nɨ̀wɨghə̀ aŋunə ndẅùutə njyə̂.”
41Tsaʼnə à lə̀ shwəŋə̀nə a lenə la, pɨ̀Jew pìʼnə̀ a nɨ lẅùmpə̀ ntiinə à shwəŋə̀nə lo “Ǹchyə̂ mbə la àpaanə̀ za nɨ a furə̀nə a nɨ̀pwuurə̀ nshwuʼə̀” 42Pobə pìʼnə̀ a nɨ pyiitə̀ lo, “Ka lə pə e Yěsû moonə̀ Jòsebə̀. Yi pə̀ənə̀ zhyə̂ a tǎ ɨghobə pobə mǎ e? À tyiʼə̀ ndàŋə̀ ɨla ghu nshwəŋə̀ lo, ‘Ǹfurə̀ a nɨ̀pwuurə̀ nshwuʼə̀?’”
43Yěsû a shwəŋə̀ ambo pobə lo, “Kò nɨ̀ kɨ ndẅùmpə̀ pɨghə nɨ pɨghə aŋunə ànwùə̀ nɨ ǹshwəŋə̀nə. 44Mbə̀ʼə ka ŋwùə̀ tô e ambo mɨ̀ŋə̀ tɨghu Tǎ ɨwəə nɨ a lə̀ tsàanə mə̀ à sùŋə̀ e ntô mbaatə̀ mə̀. Ngǎ kɨ zhwuumə̀ e aŋunə nɨ̀wɨghə̀ aŋunə ndẅùutə njyə̂. 45Ngàŋə ntwuumə̀ Nẅùə̀ ŋwàʼnə̀ lo, ‘Nẅùə̀ à ghǎ tyiʼə̀ nnèrə̀ a ghobə pɨ̀tsùmə̀.’ Ŋònə̀ wa ntsùmə̀ nɨ à zhwiʼtə̀nə ànwùə̀ nɨ Tǎ ɨwəə à shwəŋnə̀, nkɨ ndanə̀ ambo ze a ghǎ tô ambo mɨ̀ŋə̀. 46Ka a pə e pə lo ŋònə̀ ɨ̀tse a zəənə̀ mə a Tǎ; a ye ndàʼà ze wa nɨ à furə̀nə pobə Tǎ nɨ a zəənə̀ mə a Tǎ. 47Nshwəŋə̀ tyìʼə̀ a nkǔŋə nkuŋə ambo pɨghə lo ŋònə̀ wa nɨ a nùŋə̀nə ntɨŋmə̀ e aŋunə mɨ̀ŋə̀, à wa nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. 48Mɨ̀ŋə̀ a àpaanə̀ nɨ̀chyə̂mbyə̂. 49Pɨ̀tǎ pɨ̀tǎ ɨ̀pɨghə lə̀ zɨghə̀ a manna amwuə alyiʼə waakə la nkɨ nkwɨghə̀ kwɨghə̀nə. 50La àpaanə̀ zə̀ nɨ ǹshwəŋə̀nə mbə̀ʼə zèrə lə la àpaanə̀ nɨ a furə̀nə a nɨ̀pwuurə̀ nshwuʼə̀ mbə zhyə̀ za nɨ ŋwùə̀ à tə nkwurə̀ a zèrə a gha nchi kwɨghə̀ e apə̀. 51Mɨ̀ŋə̀ a àpaanə̀ mbə zhyə̀ za nɨ a za nchyə̂ nɨ a zə nfurə̀ a nɨ̀pwuurə̀ nshwuʼə̀ la. Ŋònə̀ nɨ à kwurə̀nə àpaanə̀ zèrə zə à ghǎ chyə̂ a nɨ̀chyə̂mbyə̂ wa nɨ à ghoŋə̀nə nɨ nkuŋə̀; àpaanə̀ nɨ mbɨ tô ŋâ ambo pànə̀ pɨ àtwuə̀ ɨ̀shyə̂ kwurə̀ nchyə̂ la mbòbə̀ mbɨ̀ŋmə̀ mə̀.”
52À lə̀ shwəŋə̀ a lenə la, pɨ̀Jew pìʼnə̀ a nɨ tànkə̀ nɨ àzaŋə̀ loŋə pobə nɨ pobə nshwəŋə̀ lo, “Mbə̀ʼə ŋònə̀ wə̀ a tyiʼə̀ ŋŋâ mbòbə̀ mbɨ̀ŋmə̀ e lo pə̀ənə̀ kwurə̀ lə ɨla ghu?”
53Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo nɨ̀ tə ngoŋə̀ a wɨghə mbòbə̀ mbɨ̀ŋmə̀ Moonə̀ Ŋwùə̀ tɨ kwurə̀, nkɨ nnô àləəmə̀ e, nɨ̀ pə a wɨghə nɨ nɨ̀chyə̂mbyə̂ apə̀. 54Ŋònə̀ wa ntsùmə̀ nɨ à kwurə̀nə mbòbə̀ mbɨ̀ŋmə̀ mə̀ nkɨ nnô àləəmə̀ mə̀, à wa nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ngǎ kɨ zhwuumə̀ e aŋunə nɨ̀wɨghə̀ aŋunə ndẅùutə njyə̂, 55ntiinə mbòbə̀ mbɨ̀ŋmə̀ mə̀ a ngotə mɨ̀zɨghə̀; àləəmə̀ mə̀ a kɨ mbə a ngotə àzwuumə̀ yè nônə. 56Ŋònə̀ wa nɨ à kwurə̀nə mbòbə̀ mbɨ̀ŋmə̀ mə̀ nkɨ nnô àləəmə̀ mə̀ à ghoŋə̀ amwuə mɨ̀ŋə̀, ǹkɨ ngoŋə̀ amwuə ze. 57Tǎ nɨ à tsàanə mə̀ a wə̀ nchyə̂, ngwə̀ ǹkɨ mmə nchyə̂ mbə̀ʼə e. A kɨ mbə ndəŋə ndəŋə lo ŋònə̀ nɨ à kwurə̀nə mə̀, ǎ kɨ chyə̂ mbə̀ʼə mə̀. 58Mɨ̀ŋə̀ à àpaanə̀ nɨ a lə̀ furə̀nə a nɨ̀pwuurə̀ nshwuʼə̀, ka pə e tsaʼa zhyə̀ za nɨ pɨ̀tǎ pɨ̀tǎ ɨ̀pɨghə lə̀ zɨghə̀nə nkɨ kwɨghə̀ kwɨghə̀nə la. Ŋònə̀ nɨ à zɨghə̀nə àpaanə̀ zèrə zə ǎ pə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ka pə kwɨghə̀ e tsaʼnə pɨ̀tǎ pɨ̀tǎ ɨ̀pɨghə lə̀ kwɨghə̀nə la.”
59Yěsû à lə̀ shwəŋə̀ a zèrə zə ànwùə̀ amwuə nkwùə̀ za nɨ à lə̀ pə nnèrə̀ a ndâ àshwatə̀ pɨ̀Jew a Kàpenòmə̀.
Àshwəŋnə̀ nɨ̀chyə̂mbyə̂
60Ɨ̀zùŋə̀ ndzùmə̀ ɨ̀pe pɨ̀noʼnə lə̀ zuʼù ànwùə̀ zèrə zə̀ mbìʼnə̀ a nɨ shwəŋə̀ lo, “Ànwùə̀ zə̀ nɨ à nèrə̀nə lə a tɨ̀ŋnə̀ tɨsɨŋnə. Mbə̀ʼə lə pyiimə̀ ɨ̀wə̌?”
61Yěsû à lə̀ zhyə̂ lo ɨ̀zùŋə̀ ndzùmə̀ ɨ̀pe pə ndẅùmpə̀ mbə̀ʼə ànwùə̀ ghu, nshwəŋə̀ ambo pobə lo, “Ànwùə̀ zèrə zə̀ a ghɨ̀rə̀ mɨ̀ntɨŋmə̀ ɨ̀mɨghə zaŋə̀? 62Lenəla, nɨ̀ tə mbəla ngǎ kɨ zəənə̀ Moonə̀ Ŋwùə̀ a kẅirə̀ nkoʼò ndèrə̀ a nɨ̀pwuurə̀ alyiʼə nɨ à lə̀ pyə̀nə mbə ghu nɨ̀ tyiʼə̀ ngɨ̀rə̀ lə ɨla? 63A ŋâ Àzhwùə̀ Nẅùə̀ ŋŋâ a nɨ̀chyə̂mbyə̂. Ka ɨ̀tɨ̀ŋnə̀ ŋwùə̀ mɨsoŋə pə e nɨ ànwùə̀ àtse a nɨ ghɨ̀rə̀. Ɨ̀shwəŋnə̀ pə̀ nɨ ǹshwəŋə̀nə ambo pɨghə la ɨ̀shwəŋnə̀ nɨ pèrə pa ngɨ̀rə̀ Àzhwùə̀ Nẅùə̀ nɨ a za ŋŋâ a nɨ̀chyə̂mbyə̂ la a tô ambo pɨghə. 64La pɨghə pɨ̀tse pirə̀ nɨ ka nɨ̀ pyiimə̀ a wɨghə.” Yěsû à lə̀ shwəŋə̀ a lenə ntiinə à lə̀ pyə̀nə nzhyə̂ a ghobə pɨ̀tse nɨ ka pobə pyiimə̀ a ghobə ànwùə̀ nɨ à wə̀ nshwəŋə̀ pobə ẅùə̀ nɨ à ghǎ shwùunə̀ e. 65Aŋunə nɨ̀ka pyiimə̀ a ghobə, a làŋə̀ nɨ mbyə̀ nshwəŋə̀ lo, “Lə̌ ɨ̀sùmə ànwùə̀ nɨ a tənə ngɨ̀rə̀ lo n̂shwəŋə̀ ambo pɨghə lo, mbə̀ʼə ŋwùə̀ a tô e ambo mɨ̀ŋə̀ tɨghu Tǎ ɨwəə à ŋâ ɨ̀sàanə̀ apə̀.”
66Mɨ̀nwùə̀ mèrə mə lə̀ ghɨ̀rə̀ ɨ̀zùŋə̀ ndzùmə̀ ɨ̀pe pɨ̀noʼnə kɨ̀ɨrə̀ a ghobə ka chi pə yìinə̀ a ghobə pobə pɨ pobə. 67Yěsû a chi mbə̀ŋə̀ mbyiitə̀ ambo ɨ̀zùŋə̀ ndzùmə̀ ɨ̀pe pa ntsòbə̀ ɨpaa lo, “ngə̀ aŋunə pɨghə la, nɨ̀ kɨ ntàʼà lèrə̀ àzɨghə?” 68Shimùnə̀ Pità a kẅùə̀ ambo ze lo, “Ndòʼnə̀mbyə̂, pəə̌ myàʼtə̀ o tyiʼə̀ lèrə̀ àzəə ambo ɨ̀wə̌? Ghǒ ndàʼà ŋwùə̀ nɨ à wa nɨ àshwəŋnə̀ za nɨ a za ŋŋâ nɨ̀chyə̂mbyə̂ wa nɨ à ghoŋə̀nə nɨ nkuŋə̀. 69Tɨ̀tsòŋə̀, pəə pyiimə̀ nkɨ nzhyə̂ lo ghǒ ẅùə̀ wa nɨ à laanə̀nə mmyàanə̀ nfurə̀ ambo Nẅùə̀.”
70Yěsû a tyiʼə̀ mbyiitə̀ ambo pobə lo, “Ka la a lə̀ tsoʼò e mɨ̀ŋə̀ ntsoʼò a wɨghə wa ntsòbə̀ ɨpaa? La tàʼà ŋwùə̀ wɨghə ɨ̀tse a devə̀lə̀.” 71Yěsû à lə̀ shwəŋə̀ a devə̀lə̀ a pə la Yudà moonə̀ Shimùnə̀ Iskaryòtə̀ ntiinə mbaa pə tsaʼnə à lə̀ pənə taʼà ŋwùə̀ amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa la, à lə̀ pə ghǎ shwùunə̀ e.
Currently Selected:
Jònə 6: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
