Jònə 4
4
Yěsû a tsirə̀ a mə̀ngyə̌ Sàmariyà
1Yěsû à lə̀ zhyə̂ lo pɨ̀Farìsî zuʼù mə lo ze Yěsû à wə̀ ngɨ̀rə̀ pànə̀ pɨ̀noʼnə pə ndzuʼù ànwùə̀ e, nkɨ mmə ŋŋâ àkẅiirə̀ nchyə ntsàarə̀ tsaʼnə Jònə à lə̀ mənə ŋŋâ. 2(A nɨ shwəŋə̀ a nkǔŋə nkuŋə, ka Yěsû àtwuə̀ ɨ̀pɨ̀ŋmə̀ e a lə̀ mə ŋŋâ e àkẅiirə̀ nchyə, à lə̀ mə ŋŋâ ɨ̀zùŋə̀ ndzùmə̀ ɨ̀pe.) 3Nkwùə̀ nɨ Ndòʼnə̀mbyə̂ à lə̀ zuʼnə a lenə la, à lə̀ myàʼtə̀ a Judyà nkẅirə̀ ndèrə̀ e a Galìlyə̂. 4À lə̀ pə làŋə̀ la àlaʼà Sàmariyà lèrə̀ ghu.
5Tsaʼnə à lə̀ mənə ndàŋə̀ àlaʼà Sàmariyà, à lə̀ kwuunə̀ amwuə mbòmpə àlaʼà nɨ pɨ lə̀ mənə nfuŋə̀ nɨ Sikàa, ɨ̀ paatə̀ àpàbə ɨ̀shyə̂ za nɨ Yàkobə̀ à lə̀ ŋânə ambo moonə̀ e Jòsebə̀ la. 6Àghə̀əmə nchyə Yàkobə̀ a lə̀ pə alyiʼə ghu. A kɨ pə a ntɨ̀ŋnə̀ àzhwùunə, Yěsû a kaanə̀ aŋunə àkwùə̀ nɨ̀yìinə̀, nnwuunə̀ a nɨ̀pwùnə àghə̀əmə za mmə nzhwùutə̀.
7Mə̀ngyə̌ Sàmariyà ɨ̀tse à lə̀ tô a nɨ tuʼù nchyə, Yěsû a shwəŋə̀ ambo ze lo, “Ŋâ nchyə n̂nô.” 8A kɨ pə la nɨ ɨ̀zùŋə̀ ndzùmə̀ ɨ̀pe lèrə̀ mə̀ amwuə mbòmpə àlaʼà a nɨ ghə̀ ndzwuunə̀ mɨ̀zɨghə̀.
9Mə̀ngyə̌ Sàmariyà wa a pyiitə̀ ambo ze lo, “Ghǒ ŋwùə̀ pɨ̀Jew, m̀bə ŋwùə̀ Sàmariyà, wə̀ tyiʼə̀ nshwəŋə̀ lo ŋ̂ŋâ o nɨ nchyə lə ɨla?” À lə̀ shwəŋə̀ a lenə la ntiinə ka pɨ̀Jew pobə pànə̀ pɨ Sàmariyà lə̀ pə a ghobə nɨ ànwùə̀ àtse a nɨ ghɨ̀rə̀.
10Yěsû a kẅùə̀ ambo ze lo, “Wə̀ tə mbəla nzhyə̂ a àzwuumə̀ nɨ Nẅùə̀ à wa ŋŋâ, nkɨ nzhyə̂ a ŋònə̀ nɨ à mənə mbyiitə̀ o nɨ nchyə lə, yi wə̌ pyiitə̀ e, a kɨ ŋŋâ o nɨ nchyə wa nɨ ẅèrə wa ŋŋâ a nɨ̀chyə̂mbyə̂ la.”
11Mə̀ngyə̌ wa a kẅùə̀ ambo ze lo, “Tǎ, ka wə̀ pə o nɨ àtəəmə̀ a nɨ tuʼù nchyə amwuə, la àghə̀əmə nchyə zə a mìnə̀ ka mɨ̀zùŋə. Wə̌ tyiʼə̀ lòo nchyə nɨ ɨ wa ŋŋâ a nɨ̀chyə̂mbyə̂ la ɨghə? 12Wə̀ tsàarə̀ pə a tǎ ɨwəə Yàkobə̀ nɨ à lə̀ pyə̀nə nnô amwuə àghə̀əmə nchyə zə pobə mɨ̀nyàamə̀ ɨ̀me mbòŋə̀ ŋŋâ ambo pəə?”
13Yěsû a kẅùə̀ ambo ze lo, “Ŋònə̀ nɨ à nônə nchyə wə̀, njyə̀ nchyə ɨ̌ kẅirə̀ zaŋə̀ e, 14la ŋònə̀ nɨ ǎ nô nchyə nɨ mbɨ ŋâ ambo ze, ka njyə̀ nchyə ɨ pə ghǎ chi zaŋə̀ e a ye. Nchyə wa nɨ mbɨ ŋâ ambo ze ɨ̌ pə̀ŋə̀ tyiʼə̀ nɨ̀mwurə̀ ɨ̀shyə̂ amwuə ze tyiʼə̀ ŋâ e nɨ nchyə nɨ ɨ wa ŋŋâ a nɨ̀chyə̂mbyə̂ wa nɨ à ghoŋə̀nə nɨ nkuŋə̀.”
15Mə̀ngyə̌ wa a shwəŋə̀ ambo ze lo, “Tǎ, ŋâ mə̀ nɨ nchyə ghu mbə̀ʼə njyə̀ nchyə ɨ̀ tə ndzaŋə̀ a mə̀, ǹkɨ nchi ntô mə̀ a nɨ̀ghə̂ a nɨ tuʼù nchyə apə̀.”
16Yěsû a shwəŋə̀ ambo ze lo, “Ghə̀ nfuŋə̀ a ndwuumə̀ o pɨghə ze tô a nɨ̀ghə̂.”
17Mə̀ngyə̌ wa a shwəŋə̀ lo, “Ka ndwuumə̀ mə̀ a pə e ghu.”
Yěsû a shwəŋə̀ ambo ze lo, “Wə̀ shwəŋə̀ tyìʼə̀ a nkǔŋə nkuŋə lo ka wə̀ pə o nɨ ndwuumə̀, 18ntiinə wə̀ pə mə nɨ pɨ̀lwuumə̀ pɨtaanə̀; ŋònə̀ nɨ ghò wə̀ pɨghə ze tɨ̀tsòŋə̀ wə̀ ka à pə e ndwuumə̀ o. Njiilo wə̀ shwəŋə̀ tyìʼə̀ a nkǔŋə nkuŋə.”
19Mə̀ngyə̌ wa a shwəŋə̀ ambo ze lo, “Masàa, ǹdzəənə̀ lo ghǒ ngàŋə̀ ntwuumə̀ Nẅùə̀. 20Pɨ̀tǎ ɨ̀pəə lə̀ chàʼtə̀ a Nẅùə̀ àtwuə̀ mbarə̀ ghə, la pɨghə pɨ̀Jew shwəŋə̀ àzɨghə pə lo alyiʼə yè ghuʼtə̀nə a Nẅùə̀ a kùʼnə̀ pə a Yèrusalèmə̀.”
21Yěsû a shwəŋə̀ ambo mə̀ngyə̌ wa lo, “Pyiimə̀ ànwùə̀ nɨ ngwə̀ shwəŋə̀ lə mbǎ mǎ, nkwùə̀ ɨ̀ zə ntô nɨ ka nɨ̀ pə ghǎ chi səəkə̀ a wɨghə a Tǎ àtwuə̀ mbarə̀ ghə kə̀ a Yèrusalèmə̀. 22Pɨghə pànə̀ pɨ Sàmariyà nɨ̀ səəkə̀ la Nẅùə̀ nɨ ka nɨ̀ zhyə̂ a wɨghə, la pəə pɨ̀Jew mə nsəəkə̀ a Nẅùə̀ nɨ pəə zhyə̂nə, ntiinə Nẅùə̀ à wa ndàŋə̀ pə a ndzùmə̀ pɨ̀Jew nchwarə̀ pə̀ənə̀. 23La nkwùə̀ ɨ̀ zə nkùʼù, ɨ̀ pyə̀ mə nkùʼù, nɨ pànə̀ nɨ pobə pa nsəəkə̀ a Nẅùə̀ nɨ nkǔŋə nkuŋə ghǎ səəkə̀ a Tǎ amwuə Àzhwùə̀ nɨ nkǔŋə nkuŋə, ntiinə la mbuurə̀ pànə̀ zhyə̀ nɨ Tǎ à tàʼnə lo pɨ̀ səəkə̀ e. 24Nẅùə̀ la Àzhwùə̀, lenəla pànə̀ nɨ pɨ pa nsəəkə̀ e chyə̂ a nɨ səəkə̀ e amwuə Àzhwùə̀ nɨ nkǔŋə nkuŋə.”
25Mə̀ngyə̌ wa a shwəŋə̀ lo, “Ǹzhyə̂ lo Ghù Ndzoʼnə wa à wə̀ ntô, nɨ pɨ fuŋə̀nə nɨ Kristù la. Nkwùə̀ nɨ à ghǎ tô, à ghǎ tiitə̀ a wəə nɨ mɨ̀nwùə̀ mɨ̀tsùmə̀.”
26Yěsû a shwəŋə̀ ambo ze lo, “Mɨ̀ŋə̀ nɨ ngwə̀ nshwəŋnə̀ ambo ghò lə a ze.”
27Tyìʼə̀ nkwùə̀ ghu, ɨ̀zùŋə̀ ndzùmə̀ Yěsû tô ntsirə̀ e a pə nshwəŋnə̀ pobə mə̀ngyə̌, ànwùə̀ ghu a kə̀ʼnə̀ a ghobə ka mɨ̀zùŋə. La ka ŋwùə̀ ɨghobə ɨ̀tse a pyiitə̀ e ambo mə̀ngyə̌ wa lo, “Wə̀ tàʼà àkə?” kə̀ ambo Yěsû lo, “Pɨghə ze pə nshwəŋnə̀ lə àkə?”
28Mə̀ngyə̌ wa à lə̀ myàʼtə̀ àtəəmə̀ nchyə e alyiʼə ghu nkẅirə̀ ndèrə̀ amwuə mbòmpə àlaʼà nshwəŋə̀ ambo pànə̀ lo, 29“Nɨ̀ tô ndzəənə̀ a ŋònə̀ nɨ à tiitə̀nə mə̀ nɨ ànwùə̀ àtsùmə̀ nɨ ǹgɨ̀rə̀ mə̀. Lə pə pə Ghù Ndzoʼnə wa?” 30Lenəla pobə lə̀ furə̀ amwuə mbòmpə àlaʼà za ndèrə̀ a nɨ ghə̀ ntsirə̀ e.
31A lə̀ pə nkwùə̀ ghu ɨ̀zùŋə̀ ndzùmə̀ ɨ̀pe mə ndəpə̀ e mmə nshwəŋə̀ lo, “Zɨghə̀ àzwuumə̀ àtse.”
32A shwəŋə̀ ambo pobə lo, “Ngwə̀ nɨ mɨ̀zɨghə̀ nɨ mbɨ zɨghə̀ nɨ ka nɨ̀ zhyə̂ a wɨghə ànwùə̀ àtse mbə̀ʼə mèrə.”
33Lenəla, ɨ̀zùŋə̀ ndzùmə̀ ɨ̀pe pyiitə̀ a tɨ̀tɨ̀rə̀ pobə lo, “Ŋònə̀ ɨ̀tse a kɨ pəla ntô ŋŋâ e nɨ mɨ̀zɨghə̀?”
34Yěsû a kẅùə̀ ambo pobə lo, “Mɨ̀zɨghə̀ ɨ̀mâ chyə̂ a nɨ fàʼà àfàʼà ẅùə̀ wa nɨ à lə̀ tsàanə mə̀, nkɨ nfàʼà a zèrə tə myàanə̀. 35Yi nɨ̀ wa shwəŋə̀ lo, ‘À pirə̀ mbuŋə̀ ŋwɨgrə̀ nɨ̀kwàa mɨ̀zɨghə̀ tɨ̀ŋnə̀?’ Ngwə̀ shwəŋə̀ a wɨghə lo, nɨ̀ pə̀ʼkə̀ ɨ̀myə̂ ɨ̀mɨghə nnaŋə̀ ndzəənə̀ tsaʼnə mɨ̀zɨghə̀ tɨ̀ŋnə̀nə amwuə ɨ̀swùumə nkùʼù a nɨ fùʼù. 36Pɨ pa ntwuə̀ a ŋònə̀ nɨ à wa nfùʼù la, a kɨ mmə nshwatə̀ mɨ̀ntàamə mə la aŋunə nɨ̀chyə̂mbyə̂ wa nɨ à ghoŋə̀nə nɨ nkuŋə̀. Njiilo ŋònə̀ nɨ à wa mbyə̀ pobə ŋònə̀ nɨ à wa nfùʼù pwuutə̀ mbə nɨ nɨ̀ghaʼà. 37Lenəla àshwəŋnə̀ zə̀ lo, ‘Taʼà ŋwùə̀ à pyə̀, ẅùə̀ a tyiʼə̀ nfùʼù’ a nkǔŋə nkuŋə. 38Ndə̀ tsàa a wɨghə lo nɨ̀ fùʼù amwuə ɨ̀swùumə wa nɨ ka nɨ̀ lə̀ fàʼà a wɨghə amwuə. Pànə̀ pɨ̀tse fàʼà àfàʼà yè tɨ̀ŋnə̀, nɨ̀ tyiʼə̀ fùʼù àpìi àfàʼà àzobə.”
Ngàŋə àlaʼà Sàmariyà yɨ̀noʼnə nùŋə̀ ntɨŋmə̀ ɨ̀ghobə aŋunə Yěsû
39Ngàŋə àlaʼà Sàmariyà yɨ̀noʼnə lə̀ nùŋə̀ ntɨŋmə̀ aŋunə Yěsû ntii ànwùə̀ nɨ mə̀ngyə̌ wa à lə̀ shwəŋə̀nə mbə̀ʼə Yěsû lo, “A lə̀ tiitə̀ mə̀ nɨ ànwùə̀ àtsùmə̀ nɨ ndə̀ ghɨ̀rə̀ mə̀.” 40Tsaʼnə pànə̀ pɨ Sàmariyà lə̀ tônə ambo ze la, pobə lə̀ puʼù mbô lo â chyə̂ pobə pɨ pobə, a kɨ nchyə̂ pobə pɨ pobə aŋunə njyə̂ ɨpaa.
41Ntii àshwəŋnə̀ e, pànə̀ pɨ̀noʼnə lə̀ kẅìʼnə̀ nnùŋə̀ ntɨŋmə̀ aŋunə ze, 42ntyiʼə̀ nshwəŋə̀ ambo mə̀ngyə̌ wa lo, “Ka pəə nùŋə̀ a wəə ntɨŋmə̀ aŋunə ze ntii ndàʼà ànwùə̀ nɨ wə̀ shwəŋnə̀, pəə nùŋə̀ ntɨŋmə̀ wəə pə ntiinə pəə àtwuə̀ ɨ̀pɨ̀ŋmə̀ àzəə zuʼù ànwùə̀ nɨ à shwəŋə̀nə nkɨ nzhyə̂ lo a ngàŋə̀ nchwarə̀ pə̀ənə̀ a àtwuə̀ ɨ̀shyə̂.”
Yěsû a parə̀ a moonə̀ taʼà àtwuə̀ ngàŋə̀ àfàʼà mɨ̀karə ghù mbyàŋnə̀
43Tsaʼnə njyə̂ za ɨpaa lə̀ làŋə̀nə, à lə̀ lèrə̀ a Galìlyə̂, 44mbə̀ʼnə Yěsû àtwuə̀ ɨ̀pɨ̀ŋmə̀ e à lə̀ pyə̀ mə nshwəŋə̀ lo pɨ pa ka ghuʼtə̀ e a ngàŋə̀ ntwuumə̀ Nẅùə̀ amwuə àlaʼà àzobə. 45Nkwùə̀ nɨ Yěsû à lə̀ kwuunə̀nə a Galìlyə̂, pànə̀ pɨ Galìlyə̂ lə̀ kẅiirə̀ e ntiinə pobə lə̀ pənə àzobə amwuə Nɨ̀ghaʼà Àlàŋə̀ Mmyàʼtə̀ a Yèrusalèmə̀ ndzəənə̀ ànwùə̀ àtsùmə̀ nɨ à lə̀ ghɨ̀rə̀nə.
46Yěsû à lə̀ tyiʼə̀ nkẅirə̀ ndèrə̀ a Kanà nɨ à pənə amwuə Galìlyə̂ la, alyiʼə nɨ à lə̀ pə̀ŋə̀nə nchyə ɨ tyiʼə̀ mɨ̀lùʼù. Ngàŋə̀ àfàʼà mɨ̀karə yɨ̀tse à lə̀ pə a Kàpenòmə̀ moonə̀ e ghù mbyàŋnə̀ à mənə ngòonə̀. 47Nkwùə̀ nɨ à lə̀ zuʼnə lo Yěsû à furə̀ mə a Judyà ntô a Galìlyə̂, à lə̀ tô mbuʼù mbô ambo ze lo â tô Kàpenòmə̀ mbarə̀ a moonə̀ e ghù mbyàŋnə̀ nɨ à lə̀ pənə ngòonə̀ ntyiʼə̀ mmə ntàʼà kwɨghə̀. 48Yěsû à lə̀ shwəŋə̀ ambo zə lo, “Nɨ̀ tə ka zəənə̀ a wɨghə ɨ̀lènə̀ ɨ̀nwùə̀ ghobə mɨ̀nwùə̀ mɨ yerə̀nə yerə̀nə nɨ̀ pyiimə̀ a wɨghə ànwùə̀ mə̀ apə̀.”
49Àtwuə̀ ngàŋə̀ àfàʼà mɨ̀karə wa a kẅùə̀ lo, “Tǎ, tô pùu lèrə̀ zaʼà moonə̀ mə̀ â pòŋə̀ kwɨghə̀.”
50Yěsû a shwəŋə̀ ambo ze lo, “Lèrə̀ o, moonə̀ o à pɨ tɨ̀ŋnə̀.”
Ŋònə̀ wa à lə̀ nùŋə̀ ntɨŋmə̀ e aŋunə ànwùə̀ nɨ Yěsû à lə̀ shwəŋə̀nə ntyiʼə̀ ndèrə̀ e. 51Tsaʼnə à lə̀ mənə ndèrə̀, ngàŋə àfàʼà ɨ̀ze tô ntsirə̀ e a àlàŋə̀ nshwəŋə̀ lo, “Moonə̀ o wa à fiitə̀.” 52A pyiitə̀ a ghobə nɨ nkwùə̀ nɨ moonə̀ wa à lə̀ fiitə̀nə, pobə kɨ nkẅùə̀ lo, “Fibà wa à lə̀ myàʼtə̀ e ɨ̀zòonə a ndzə̀ŋə̀ nẅùumə̀.” 53Tǎ wa a kẅempə̀ lo lə lə̀ pə nkwùə̀ za nɨ Yěsû à lə̀ shwəŋə̀nə ambo ze lo, “Moonə̀ o à pɨ tɨ̀ŋnə̀.” Lenəla à lə̀ nùŋə̀ ntɨŋmə̀ e aŋunə Yěsû pobə pɨ ngẅàrə̀ e a nɨ furə̀ nkwùə̀ ghu. 54Lə lə̀ pə ɨ̀lènə̀ ɨ̀nwùə̀ nɨ pyàanə ɨpaa nɨ Yěsû à lə̀ ghɨ̀rə̀nə nkwùə̀ nɨ à lə̀ furə̀nə Judyà ntô a Galìlyə̂.
Currently Selected:
Jònə 4: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
