Jònə 19
19
Pɨ saʼà ɨ̀sàʼa Yěsû ndə̂ lo pɨ̀ zhwuutə̀ e
1Lenəla, Palètə̀ à lə̀ lòo a Yěsû ŋŋâ pɨ kəʼə̀ e. 2Pɨ lə̀ lòo mɨ̀fàa mɨ kɨkobə mbaʼà tsaʼa tɨ̀làarə̀ ntuŋə̀ àtwuə̀ ze, ntyiʼə̀ ngẅî atsəʼə yè pàŋə̀nə àtse aŋunə ze, 3mbìʼnə̀ a nɨ nyèŋə̀ e nshwəŋə̀ lo, “Pəə pə nchàʼtə̀ o mbǎ ɨ̀fò pɨ̀Jew!” Pobə shwəŋə̀ a lenə la ntyiʼə̀ ndùbə̀ mɨ̀ghə̀ʼə̀ ɨ̀me.
4Palètə̀ a kẅirə̀ nfurə̀ a àpyìinə nshwəŋə̀ ambo àpùŋə̀ pə̀ənə̀ za lo, “Nɨ̀ zəənə̀, mbɨ lòo e furə̀ a àpyìinə a mbyə̀ pɨghə mbə̀ʼnə ka ǹdzəənə̀ a mə ànwùə̀ tɨ̀pòŋə̀ àtse nɨ à ghɨ̀rə̀nə nɨ mbə̀ʼə pɨ zhwuutə̀ e aŋunə.” 5Yěsû a tyiʼə̀ nfurə̀ nɨ atsəʼə pàŋə̀nə a mbɨ̀ŋmə̀ ze nɨ tɨ̀làarə̀ pɨ̀kɨkobə àtwuə̀ ze. Palètə̀ a shwəŋə̀ ambo pobə lo “Ŋònə̀ ghu à wə̀ lə!”
6Pɨ̀fò màʼà Nẅùə̀ pobə ngàŋə mbyabə̀ ɨlyiʼə àzobə lə̀ zəənə̀ Yěsû la nkyiinə̀ shwəŋə̀ lo, “Kẅùumə̀ e aŋunə àtɨ̀ghə pànkə̀nə!”
Palètə̀ a kẅùə̀ ambo pobə lo, “Nɨ̀ lòo e ngə̀ nkẅùumə̀ tyìʼə̀ pɨghə ntiinə ka ǹdzəənə̀ mə̀ ànwùə̀ tɨ̀pòŋə̀ ɨ̀tse nɨ à ghɨ̀rə̀nə nɨ mbə̀ʼə pɨ kẅùumə̀ e aŋunə.”
7Pɨ̀Jew pa kẅùə̀ ambo ze nɨ mɨ̀tɨ̀ŋnə̀ lo, “Pəə pa nɨ mbòomə nɨ à nèrə̀nə lo à chyə̂ a nɨ kwɨghə̀, ntiinə à wa nnèrə̀ lo ze la Moonə̀ Nẅùə̀.”
8Nkwùə̀ nɨ Palètə̀ à lə̀ zuʼnə ànwùə̀ zə̀, àkẅàrə̀ a lə̀ chi nkwuunə̀ e ka mɨ̀zùŋə, 9a kẅirə̀ nkwuunə̀ amwuə ntoʼò mbyiitə̀ a Yěsû lo, “Wə̀ furə̀ àzô la ɨghə?” La ka Yěsû a kẅùə̀ e ànwùə̀ àtse. 10Palètə̀ a shwəŋə̀ ambo ze lo, “Wə̀ twuunə̀ o a nɨ shwəŋnə̀ ambo mɨ̀ŋə̀? Ka wə̀ zhyə̂ o lo ǹchyə̂ nɨ ɨ̀tɨ̀ŋnə̀ a nɨ ghɨ̀rə̀ pɨ̀ myàʼtə̀ o, nkɨ mbə nɨ ɨ̀tɨ̀ŋnə̀ a nɨ ghɨ̀rə̀ pɨ̀ kẅùumə̀ o aŋunə àtɨ̀ghə pànkə̀nə.”
11Yěsû a kẅùə̀ ambo Palètə̀ lo, “Wə̀ chyə̂ nɨ ɨ̀tɨ̀ŋnə̀ àtwuə̀ mɨ̀ŋə̀ ntiinə Nẅùə̀ à ŋânə a ẅèrə ambo ghò. La ngə̀ aŋunə ànwùə̀ tɨ̀pòŋə̀ ŋònə̀ nɨ à ŋânə mə̀ ambo ghò, àze a pɨ pɨ̂ tsàarə̀.” 12Palètə̀ a zuʼù a lenə la ntyiʼə̀ ntàʼà àlàŋə a nɨ myàʼtə̀ a Yěsû. La pɨ̀Jew chi nkyiinə̀ nɨ ɨ̀tɨ̀ŋnə̀ nshwəŋə̀ lo, “Wə̀ tə myàʼtə̀ e, wə̀ chi mbə o ɨ̀swùə Kaasà apə̀. Ŋwùə̀ wa ntsùmə̀ nɨ à shwəŋə̀nə lo ze a ɨ̀fò, à chi mbə la ngàŋə̀ kɨpaanə Kaasà.”
13Palètə̀ a zuʼù a lenə la ndòo a Yěsû nfurə̀ nnwuunə̀ aŋunə nɨ̀ghòorə nɨ korə̀. Pɨ lə̀ poomə̀ alyiʼə ghu la nɨ mɨ̀ghòorə, mmə nfuŋə̀ a zèrə amwuə àshwəŋnə̀ Hibrù nɨ Gabbatha. 14Àzhwùunə a lə̀ tyiʼə̀ mmə ntô tɨ̀ŋnə̀ amwuə njyə̂ nɨ pɨ lə̀ mənə nchwuʼtə̀ mbɨ̀ŋmə̀ a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀, Palètə̀ a shwəŋə̀ ambo pɨ̀Jew lo, “Lə̌ ɨ̀fò ɨwɨghə.”
15Pobə chi kyiinə̀ lo, “Zhwuutə̀ e! Zhwuutə̀ e! Nkẅùumə̀ e aŋunə àtɨ̀ghə pànkə̀nə!”
Palètə̀ a pyiitə̀ ambo pobə lo “N̂kẅùumə̀ a ɨ̀fò ɨwɨghə aŋunə àtɨ̀ghə pànkə̀nə?”
Pɨ̀fò màʼà Nẅùə̀ kẅùə̀ ambo ze lo, “Ka ɨ̀fò ɨwəə ɨ̀tse pə e ghu ndàŋə̀ e Kaasà.”
16Palètə̀ a tyiʼə̀ ŋŋâ a Yěsû ambo pobə lo pobə̂ ghə̀ kẅùumə̀ e aŋunə àtɨ̀ghə pànkə̀nə.
Pɨ kẅùumə̀ a Yěsû aŋunə àtɨ̀ghə pànkə̀nə
(Mat 27.32-34; Mrk 15.21-32; Luk 23.26-43)
17Lenəla, pɨ lə̀ lòo a Yěsû nfurə̀. À lə̀ pìʼì àtɨ̀ghə pànkə̀nə e tyìʼə̀ ze ndèrə̀ alyiʼə nɨ pɨ lə̀ mə nfuŋə̀ nɨ àghòʼrə àtwuə̀ (pɨ mə nfuŋə̀ amwuə àshwəŋnə̀ Hibrù nɨ Golgotà.) 18Pɨ lə̀ kẅùumə̀ e alyiʼə ghu aŋunə àtɨ̀ghə pànkə̀nə pobə pɨ pànə̀ pɨ̀tse pɨpaa. Taʼà a pə amwuə ẅùə̀ pàa, taʼà a kɨ mbə amwuə ẅùə̀ pàa. 19Palètə̀ à lə̀ ŋwàʼnə̀ àŋwàʼnə̀ mbaanə̀ àtwuə̀ àtɨ̀ghə pànkə̀nə lo, “Yěsû ŋwùə̀ Nazarètə̀, Ɨ̀fò pɨ̀Jew.” 20Pɨ̀Jew pɨ̀noʼnə lə̀ fuŋə̀ àŋwàʼnə̀ zə̀ ntiinə alyiʼə nɨ pɨ lə̀ kẅùumə̀nə a Yěsû a lə̀ paatə̀ mbòmpə àlaʼà ngẅùunə. Pɨ lə̀ ŋwàʼnə̀ àŋwàʼnə̀ amwuə àshwəŋnə̀ Hibrù, ŋŋwàʼnə̀ amwuə àshwəŋnə̀ Latin, nkɨ ŋŋwàʼnə̀ amwuə àshwəŋnə̀ Greek. 21Pɨ̀fò màʼà Nẅùə̀ pobə pɨ̀Jew pa shwəŋə̀ ambo Palètə̀ lo, “Kò wə̀ ŋwàʼnə̀ lo, ‘Ɨ̀fò pɨ̀Jew’, ŋwàʼnə̀ pə lo, ‘À shwəŋə̀ lo ze la ɨ̀fò pɨ̀Jew.’”
22Palètə̀ a kẅùə̀ lo, “Ànwùə̀ nɨ ŋ̀ŋwàʼnə̀nə, ŋ̀ŋwàʼnə̀ mə.”
23Nkwùə̀ nɨ pɨ̀soyì pa lə̀ kẅùumə̀nə a Yěsû, pobə lə̀ lòo ɨtsəʼə ɨ̀pe ngàbə̀ ɨ̀pàa nɨ̀kwàa; taʼà ŋwùə̀ a lòo taʼà àpàa, taʼà ŋwùə̀ a lòo taʼà àpàa. Atsəʼə e yè màʼnə nɨ a lə̀ pənə yè sàa nɨ pɨ lə̀ paʼnə, ka alyiʼə yè zùnkə̀nə a pə e aŋunə a lə̀ kɨ mbə ghu. 24Pɨ̀soyì pa shwəŋə̀ pobə nɨ pobə lo ka kùʼnə̀ e lo pə̀ənə̀ sìitə̀ atsəʼə zə̀, pə̀ənə̀ tumə̀ pə ɨpirə ndzəənə̀ a ŋònə̀ nɨ à pɨ zɨghə̀ a zèrə. A lə̀ koʼò mbwùumə̀ aŋunə ànwùə̀ nɨ pɨ lə̀ ŋwàʼnə̀nə amwuə àŋwàʼnə̀ Nẅùə̀ lo,
“Pobə lə̀ ghàbə̀ ɨtsəʼə pa a tɨ̀tɨ̀rə̀ pobə,
ntumə̀ ɨpirə aŋunə atsəʼə mə̀ yè màʼnə.”
Lə̀ kɨ mbə ànwùə̀ nɨ pɨ̀soyì pa lə̀ ghɨ̀rə̀nə.
25Mǎ pɨ Yěsû nɨ ndyimə e yɨ̀ mə̀ngyə̌, nɨ Màriyà ngẅùə Klopàsə̀, nɨ Màriyà nɨ à lə̀ furə̀nə a Magdalà lə̀ təəmə̀ a ɨ̀sùmə àtɨ̀ghə pànkə̀nə nɨ pɨ lə̀ kẅùumə̀nə a Yěsû aŋunə. 26Yěsû a zəənə̀ mǎ e pobə àzùŋə̀ ndzùmə̀ za nɨ à lə̀ kòŋə̀nə la pobə təəmə̀ a ɨ̀sùmə àtɨ̀ghə pànkə̀nə ntyiʼə̀ nshwəŋə̀ ambo mǎ e lo, “Mǎ, lə̌ Moonə̀ o yɨ̀ mbyàŋnə̀.” 27À lə̀ kɨ nshwəŋə̀ ambo àzùŋə̀ ndzùmə̀ e za lo, “Lə̌ mǎ o.” A nɨ furə̀ nkwùə̀ ghu àzùŋə̀ ndzùmə̀ e za a lə̀ lòo e tsaʼa mǎ e pobə ze tyiʼə̀ nchyə̂ a ndâ ze.
Nɨ̀wɨghə̀ Yěsû
(Mat 27.45-56; Mrk 15.33-41; Luk 23.44-49)
28Nkwùə̀ ghu Yěsû a zhyə̂ lo à myàanə̀ mə ànwùə̀ àtsùmə̀ nɨ à lə̀ pənə ghɨ̀rə̀ ntyiʼə̀ nshwəŋə̀ lo “Ntɨŋmə̀ mə̀ ɨ wə̀ ndzwuumə̀.” À lə̀ shwəŋə̀ a nɨ lẅenə̀ ànwùə̀ nɨ àŋwàʼnə̀ Nẅùə̀ a shwəŋə̀nə. 29Tyìirə̀ ɨ̀tse à lə̀ təəmə̀ alyiʼə ghu nɨ mɨ̀lùʼù mɨ ŋwaŋnə̀nə amwuə ndẅenə̀, pobə tyiʼə̀ ntsùbə̀ a kùntsa amwuə mɨ̀lùʼù mɨ ŋwaŋnə̀nə ma ntuŋə̀ aŋunə àtɨ̀ghə ntsàa mbètə̀ ntswùə̀ e ghu. 30Nkwùə̀ nɨ Yěsû à lə̀ nyoŋə̀nə mɨ̀lùʼù mɨ ghu, à lə̀ shwəŋə̀ lo, “A myə̀!”
À lə̀ tyiʼə̀ ntsəŋə̀ àtwuə̀ e a ɨ̀shyə̂, àzhwùə̀ e a ləənə̀ a kwɨghə̀.
Pɨ sòbə̀ nɨ̀pwùnə nɨ mbyìinə̀ nɨ Yěsû
31Pɨ̀Jew pɨ̀tse lə̀ tô ambo Palètə̀ lo pɨ piʼtə̀ mɨ̀kwùə̀ mɨ pànə̀ nɨ pɨ lə̀ kẅùumə̀nə a ghobə aŋunə ɨ̀tɨ̀ghə pɨ̀pànkə̀nə. Pobə lə̀ pyiitə̀ a lenə ntiinə njyə̂ àlaʼà pɨ̀Jew ɨ̀ lə̀ pirə̀ mbwùʼə̀ a taʼà njyə̂, ka pobə kɨ mmə ntàʼà a ghobə lo ɨ̀kwuə̀ pɨ̀ghu ghoŋə̀ aŋunə ɨ̀tɨ̀ghə pɨ̀pànkə̀nə njyə̂ àlaʼà, ntiinə njyə̂ àlaʼà ghu ɨ̀ lə̀ pə nɨ tə̀chwìi. 32Lenə la, pɨ̀soyì pɨ̀ghu lə̀ tô mbiʼtə̀ mɨ̀kwùə̀ mɨ pɨ̀zə̀ərə̀ nɨ pɨ lə̀ kẅùumə̀nə a ghobə pɨ Yěsû la. 33La nkwùə̀ nɨ pobə lə̀ pyàanə aŋunə Yěsû, pobə lə̀ zəənə̀ lo à kwɨghə̀ mə e, ka pobə chi mbiʼtə̀ ghobə mɨ̀kwùə̀ ɨ̀me. 34Taʼà soyì wa ghùtse a tyiʼə̀ nsòbə̀ nɨ̀pwùnə nɨ mbyìinə̀ nɨ Yěsû nɨ nɨkoŋə, àləəmə̀ pobə nchyə zùŋə̀ nfurə̀. 35Ŋònə̀ nɨ à lə̀ zəənə̀nə ànwùə̀ zə̀ à shwəŋə̀ a sàŋə̀ sàŋə̀ tsaʼnə à lə̀ zəənə̀nə njiilo nɨ̀ pyiimə̀ ànwùə̀ nɨ à shwəŋə̀nə a nkǔŋə nkuŋə, a kɨ nzhyə̂ lo a shwəŋə̀ a nkǔŋə nkuŋə. 36Mɨ̀nwùə̀ mə lə̀ lòo alyiʼə a nɨ lẅenə̀ ànwùə̀ nɨ a pənə amwuə àŋwàʼnə̀ Nẅùə̀ lo, “Ka pɨ̀ pə ghǎ pəʼə̀ e àkẅìinə àtse a mbɨ̀ŋmə̀ ze.” 37A kɨ nchi mbə amwuə alyiʼə àŋwàʼnə̀ Nẅùə̀ yètse lo, “Pobə ghǎ tyiʼə̀ mmə nnaŋə̀ a ze wa nɨ pobə lə̀ sòbə̀nə la.”
Pɨ tẅəŋə̀ a Yěsû
(Mat 27.57-61; Mrk 15.42-47; Luk 23.50-56)
38Tsaʼnə pɨ lə̀ zhwuutə̀nə a Yěsû la, Jòsebə̀ ŋwùə̀ Àrəmàtyâ à lə̀ loonə̀ lo Palètə̀ â myàʼtə̀ e â lòo àkwuə̀ Yěsû ngə̀ ntẅəŋə̀. (Jòsebə̀ wə̀ à lə̀ pə taʼà àzùŋə̀ ndzùmə̀ Yěsû yètse nɨ à lə̀ mənə ngyìinə̀ ndə̀əmə̀ mbɨ̀ŋmə̀ e ambo pɨ̀Jew.) Palètə̀ à lə̀ pyiimə̀ lo â lòo àkwuə̀ ghu ndòo nfurə̀. 39Nikòdemùsə̀ nɨ à laʼa mə ntô ambo Yěsû nɨ ɨ̀twuʼə̀ à lə̀ kɨ mbə àze alyiʼə ghu, nɨ mɨ̀ghurə̀ mɨ myrrh nɨ pɨ nyàamə̀nə ghobə alùsə̀. Mɨ̀ghurə̀ mèrə mə lə̀ lìrə̀ tsaʼa pɨ̀kilù mɨ̀ghumə̀ mɨntarə. 40Pànə̀ pɨpaa lə̀ lòo àkwuə̀ Yěsû ndyibə̀ amwuə atsəʼə fuə mbwuutə̀ pobə mɨ̀ghurə̀ ma a nɨ zùŋə̀ a mbòomə pɨ̀Jew tsaʼnə pobə lə̀ mənə ntẅəŋə̀ àkwuə̀ ŋwùə̀. 41Nkaʼà ɨ̀tse lə̀ pə alyiʼə nɨ pɨ lə̀ kẅùumə̀nə a Yěsû la. Nɨ̀shyə̀ tsɨ̀ shwuə̀ tsɨ̀tse nɨ pɨ laʼa mə ntẅəŋə̀ e a ŋwùə̀ amwuə apə̀ lə̀ pə amwuə nkaʼà ghu. 42Tsaʼnə njyə̂ àlaʼà pɨ̀Jew ɨ̀ lə̀ pirə̀nə mbwùʼə̀ a taʼà njyə̂, nɨ̀shyə̀ tsɨ̀ghu kɨ mbaatə̀ la, pobə lə̀ nùŋə̀ a Yěsû amwuə nɨ̀shyə̀ tsɨ̀ghu.
Currently Selected:
Jònə 19: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
