Иуан 8
8
ЯЕНЭРЭШЪХЬ
Зинэ зышӀэ пэтэу аубытыгъэ бзылъфыгъэр
1Елеон Ӏуашъхьэм#8:1 Елеон Ӏуашъхьэр – Ерусалим игъунэгъубзэу, итыгъэ къокӀыпӀэ лъэныкъомкӀэ Кедрон къуладжэм иадрабгъу щыт Исус кӀуагъэ. 2Нэф къызэшъым, Тхьэм иунэшхо джыри чӀэхьагъ, зэкӀэ цӀыфхэри ежь дэжь къэкӀуагъэх. Исус тӀыси, Тхьэм игущыӀэхэр аригъашӀэхэу ыублагъ. 3Ащ дэжьым бзылъфыгъэ горэ, зинэ зышӀэ пэтэу къаубытыгъэр Тэурат егъэджэкӀо пащэхэми фарисейхэми Исус къыфащи, утыгум къырагъэуцуи, 4къыраӀуагъ:
– Дин гъэсакӀу, мы бзылъфыгъэр, зинэ ышӀэ пэтэу, къаубытыгъ. 5Мыщ фэдэхэм мыжъохэмкӀэ тяозэ, тыукӀынхэу Тэурат хабзэм зэритэу пегъымбар Мусэ унашъо къытфишӀыгъ#8:5 пегъымбар Мусэ унашъо къытфишӀыгъ – еплъ Пегъымбар Мусэ ятфэнэрэ тхылъэу ытхыгъэм 22:22.. О сыда епӀуалӀэрэр?
6Аущтэу зыкӀаӀуагъэр Исус Ӏоф хагъэфэнышъ, зэрагъэмысэн горэ къагъотыныр ары. Ау Исус зиуфи, ӀапэкӀэ чӀыгум зыгорэ тыритхагъ. 7Зэпамыгъэоу къеупчӀыхэ зэхъум, Исус зыкъыузэнкӀыжьи, ариӀуагъ:
– Шъуащыщэу псэкӀод зимыӀэр апэу бзылъфыгъэм мыжъокӀэ ерэу.
8Ар зареӀом, зиуфэжьи, чӀыгум тетхэу ыублэжьыгъ.
9Ар зызэхахым, агухэмкӀэ загъэмысэжьэу, анахьыжъхэр апэ итхэу, зым ыуж адрэр итэу, аужырэм нэс зэкӀэ ӀукӀыжьыгъ. Исус изакъоу къэнагъ, бзылъфыгъэри утыгум къинагъ. 10Исус зыкъыузэнкӀыжьи, бзылъфыгъэм нэмыкӀ зи ылъэгъужьыгъэпти, риӀуагъ:
– О бзылъфыгъ, узгъэмысэщтыгъэхэр тыдэ щыӀэха? Узгъэмысэн цӀыф зи къэнагъэп, ара?
11– Хьау, Зиусхьан, – къыӀуагъ бзылъфыгъэм, – цӀыф зи къэнагъэп.
– Сэри узгъэмысэрэп, – къыӀуагъ Исус. – КӀожь, джы щегъэжьагъэу псэкӀод умышӀэжь.
Исус – мы дунаим инэфын
12Исус джыри цӀыфмэ адэгущыӀи, къыӀуагъ:
– Дунаим инэфынэр сэры. Сэ сауж къырыкӀорэр шӀункӀым хэтэу зекӀощтэп, щыӀэныгъэм инэфынэ ыгъотыщт нахь.
13– О ор-орэу шыхьат узфэхъужьы, – къыраӀуагъ фарисейхэм. – Арышъ, шыхьат ухъущтэп.
14– Сэ шыхьат сызфэхъужьми, сишыхьатныгъэ шъыпкъэ, – ариӀожьыгъ Исус, – сыда пӀомэ, сэ сызщыщри сыздакӀорэри сэшӀэ. Ау шъо сызщыщри сыздакӀорэри шъушӀэрэп. 15Мы дунаим ицӀыфхэм Ӏофхэм хьыкум зэратырашӀыхьэрэм фэдэу хьыкум шъошӀы. Сэ зыми хьыкум тесшӀыхьэрэп. 16Ау зыгорэм хьыкум тесшӀыхьэ хъумэ, ащыгъум хьыкумэу тесшӀыхьэрэр шъыпкъэ, сыда пӀомэ, сэ зизакъоп, Ты лъапӀэу сыкъэзгъэкӀуагъэри сигъус. 17НэбгыритӀумэ къаушыхьатырэр шыхьат хъунэу шъуи Тэурат хабзэ ит#8:17 шъуи Тэурат хабзэ ит – еплъ Пегъымбар Мусэ ятфэнэрэ тхылъэу ытхыгъэм 19:15.. 18Сэр-сэрэу шыхьат сызфэхъужьы. Ты лъапӀэу сыкъэзгъэкӀуагъэри шыхьат къысфэхъу.
19Арыти къеупчӀыгъэх:
– Тыдэ щыӀа уятэ?
– Сэри ся Ти шъо тышъушӀэрэп, – пэгъокӀ ытыжьыгъ Исус. – Сэ сышъушӀэщтыгъэмэ, ся Ти шъушӀэщтыгъэ.
20Исус Тхьэм иунэшхо чӀэтэу, Тхьэм тын фашӀэу ахъщэр зыдалъхьэрэ пхъуантэхэм адэжь щытэу, цӀыфхэм Тхьэм игущыӀэхэр аригъашӀэ зэхъум, а гущыӀэхэр къыӀуагъэх. Зыми ар ыубытынэу фежьагъэп, сыда пӀомэ, зыщаубытыщтым игъо къэсыгъэгопти ары.
Сэ сыздакӀорэм шъо шъукъэкӀон шъулъэкӀыщтэп
21Исус джыри ахэмэ ариӀуагъ:
– Сэ сышъухэкӀыжьыщт, шъори шъукъыслъыхъущт, ау шъуипсэкӀодшӀагъэхэр шъутелъхэу шъулӀэжьыщт. Сэ сыздакӀорэм шъо шъукъэкӀон шъулъэкӀыщтэп.
22– Ежь-ежьырэу зиукӀыжьыщта? – аӀуагъ джуртхэм. – Ара «Сэ сыздакӀорэм шъо шъукъэкӀон шъулъэкӀыщтэп» зыкӀиӀорэр?
23– Шъо ыхэ шъущыщ, сэ ыпшъэ сыщыщ, – ариӀуагъ Исус. – Шъо мы дунаим шъущыщ, сэ мы дунаим сыщыщэп. 24«ШъуипсэкӀодшӀагъэхэр шъутелъхэу шъулӀэжьыщт» шъосӀуагъэ. Шъыпкъэ, сэ хэтми сызщыщыр къызышъуасӀокӀэ, шъушӀошъ мыхъумэ, шъуипсэкӀодшӀагъэхэр шъутелъхэу шъулӀэжьыщт.
25– О хэта узщыщыр адэ? – къыраӀуагъ ахэмэ.
– Апэм щегъэжьагъэу сэ хэтми сызщыщыр къызэрэшъосӀуагъэм сытет, – ариӀожьыгъ Исус. 26– Шъо къышъохьылӀагъэу шъузэрызгъэмысэн Ӏаджи къэсӀонэу сиӀ, ау сыкъэзгъэкӀуагъэр шъыпкъэ, ащ къыӀохэу зэхэсхыгъэхэр дунаим ицӀыфмэ ясэӀо.
27Исус Ты лъапӀэм ехьылӀагъэу къызэрадэгущыӀэрэр къагурыӀуагъэп. 28Арыти, Исус ариӀуагъ:
– ЦӀыф Лъэпкъым ы Къо зышъуӀэтыкӀэ,#8:28 ЦӀыф Лъэпкъым ы Къо зышъуӀэтыкӀэ – еплъ 3:14; 1:51. хэтми сэ сызщыщри сэр-сэрэуи зи сымыгъэцакӀэу, ся Тэ гущыӀэхэу сигъэшӀагъэхэр къызэрэсӀохэрэр къэшъушӀэщт. 29СыкъэзгъэкӀуагъэр сигъусэ, сизакъоу сыкъыгъэнагъэп, сыда пӀомэ, ежь игъоу ылъытэрэ Ӏофхэр сыдигъуи сэгъэцакӀэхэшъ ары.
30Исус а гущыӀэхэр къыӀохэзэ, цӀыфыбэмэ ежьыркӀэ шӀошъхъуныгъэ яӀэ хъугъэ.
Шъыпкъагъэм шъхьафит шъуишӀыжьыщт
31Исус джуртхэу шӀошъхъуныгъэ къыфызиӀэ хъугъэхэм ариӀуагъ:
– Сэ сигущыӀэхэр шъугухэм арылъхэмэ, шъыпкъэмкӀэ сигъогу рыкӀохэрэм шъуащыщ. 32Джащыгъум шъыпкъэр къэшъушӀэщт, шъыпкъэми шъхьафит шъуишӀыжьыщт.
33– Тэ Ибрахьимэ къытекӀыгъэ цӀыфхэм тащыщ, егъашӀэми зыми тырипщылӀыгъэп, – къыраӀожьыгъ ахэмэ. – «Шъхьафит шъухъужьыщт» зыфапӀорэм сыда къибгъэкӀырэр?
34– Шъыпкъэ дэдэр шъосэӀо, – ариӀуагъ Исус. – Хэти псэкӀод зышӀэрэр псэкӀодшӀэным пщылӀы фэхъужьы. 35Ау унэм къинэжьынэу пщылӀым къыфанэрэп. Тым ыкъу ары унэм къинэжьырэр. 36Арышъ, Къо лъапӀэм шъхьафит шъуишӀыжьмэ, шъхьафит шъыпкъэ шъухъужьыщт. 37Ибрахьимэ къытекӀыгъэ цӀыфхэм шъузэращыщыр сэшӀэ, ау сигущыӀэхэр шъугухэм арылъхэпышъ, сышъуукӀынэу сауж шъуит. 38Сэ ся Тэ дэжь щыслъэгъугъэхэр ары къасӀохэрэр, шъори шъуятэ дэжь щышъулъэгъугъэ Ӏофхэр ары жъугъэцакӀэхэрэр.
Шъуятэр шэйтаныр ары
39– Тэ тятэр Ибрахьим ары, – къыраӀуагъ джуртхэм Исус.
– Ибрахьимэ шъурибыныгъэмэ, Ибрахьимэ иӀофхэр жъугъэцэкӀэщтыгъэх, – ариӀожьыгъ Исус. 40– Ау джы сышъуукӀынэу сауж шъуит, Тхьэм къыӀорэ шъыпкъэр зэхэсхыгъэу къышъосӀуагъэ пэтми. Ибрахьимэ ащ фэдэ Ӏофхэр ышӀэщтыгъэхэп. 41Шъо шъуятэ Ӏофхэу ыгъэцакӀэхэрэр шъори шъогъэцакӀэх.
– ЗинэкӀэ тэ тыкъэхъугъэп, – къыраӀуагъ Исус. – Ты закъоу тиӀэр Тхьэр ары.
42– Тхьэр шъуятагъэмэ, сэ шӀу сышъулъэгъущтыгъ, – ариӀуагъ Исус, – сыда пӀомэ, сэ Тхьэм сыщыщэу мыщ сыкъэкӀуагъ. Сэр-сэрэу сыкъэкӀуагъэп, ежь сыкъыгъэкӀуагъ нахь. 43Сэ къасӀохэрэр сыд пае къыжъугурымыӀохэра? Сэ къасӀохэрэм шъуядэӀун шъулъэкӀырэпышъ ары къызкӀыжъугурымыӀорэр. 44Шъуятэр шэйтаныр ары. Шъуятэ зыфаер ары шъо жъугъэцэкӀэнэу шъузыфаер. Апэм щегъэжьагъэу ар цӀыф укӀакӀу, шъыпкъэми тетэп, сыда пӀомэ, шъыпкъэ зи хэлъэпышъ ары. Ащ пцӀы зиусыкӀэ, ыгу илъыр къеӀо, сыда пӀомэ, ар пцӀыусышъ, пцӀыри къызхэкӀырэр ежьырышъ ары. 45Ау сэ шъыпкъэр къызэрэсӀорэм пае, къасӀохэрэр шъушӀошъ хъурэп. 46Сэ псэкӀод сшӀагъэу шъуащыщ горэм къыушыхьатын ылъэкӀына? Шъыпкъэр къэсэӀо пэтми, сыд пае къасӀохэрэр шъушӀошъ мыхъура? 47Тхьэм ибынхэр ежь игущыӀэхэм ядэӀух, ау шъо Тхьэм игущыӀэхэм шъузкӀямыдэӀурэр Тхьэм шъурибынэпышъ ары.
Ибрахьимэ къэхъуным ыпэкӀэ сэ сыщыӀ
48– Самарие цӀыфхэм уащыщ, джынапцӀи о пхэс тэӀо. Тэ къатӀорэр шъыпкъэба? – къыраӀожьыгъ джуртхэм Исус.
49– ДжынапцӀэ сэ схэсэп, – апигъодзыжьыгъ Исус. – Сэ ся Тэ лъытэныгъэ фэсэшӀы, ау шъо шъукъысэхъоны. 50Сэ сищытхъу ыуж ситэп, ау сищытхъу ыуж итэу, цӀыфхэм хьыкум атезышӀыхьэрэр щыӀ. 51Шъыпкъэ дэдэр шъосэӀо, сигущыӀэхэр зыгъэцакӀэрэм егъашӀэми лӀэныгъэр ылъэгъущтэп.
52Исус ар зеӀом, джуртхэм къыраӀожьыгъ:
– ДжынапцӀэр о зэрэпхэсыр джы тшӀагъэ. Ибрахьимэ лӀагъэ, пегъымбархэри лӀагъэх, ау о «Сэ сигущыӀэхэр зыгъэцакӀэрэр егъашӀэми лӀэжьыщтэп» оӀо. 53Тятэжъышхо Ибрахьимэ нахьи унахь ина о? Ар лӀагъэ, пегъымбархэри лӀагъэх. О ухэтэу зыплъытэжьыра?
54– Сэ сыкъызщытхъужьмэ, сищытхъу зи уасэ иӀэп, – пэгъокӀ ытыжьыгъ Исус. – Ау сищытхъу зышӀырэр ся Тэу шъо шъуи Тхьэу зыфашъуӀорэр ары. 55Ар шъо шъушӀэрэп, ау сэ сэшӀэ. Ар сымышӀэу сӀуагъэмэ, сэри шъощ фэдэу пцӀыус сыхъущтыгъ. Ау ар сэшӀэ, игущыӀэхэри сэгъэцакӀэх. 56Шъуятэжъышхо Ибрахьимэ симафэ зэрилъэгъущтымкӀэ гушӀощтыгъэ. Ар ылъэгъугъ ыкӀи гушӀуагъэ.
57– Илъэс шъэныкъо умыныбжьэу, ау щытми Ибрахьимэ плъэгъугъэу оӀо, – къыраӀуагъ джуртхэм Исус.
58– Шъыпкъэ дэдэр шъосэӀо, – ариӀожьыгъ Исус. – Ибрахьимэ къэхъуным ыпэкӀэ сэ сыщыӀ.
59Исус ар зареӀом, аукӀыным пае еонхэу мыжъохэр къаштагъэх, ау Исус амылъэгъоу къахэкӀыжьи, Тхьэм иунэшхо къычӀэкӀыжьыгъ.
Currently Selected:
Иуан 8: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
