Иуан 14

ЯПШӀЫКӀУПЛӀЭНЭРЭШЪХЬ

Исус – Ты лъапӀэм дэжь кӀорэ гъогур

1– ШъумыгумэкӀ. ТхьэмкӀэ шӀошъхъуныгъэ зижъугъаӀ, сэркӀи шӀошъхъуныгъэ зижъугъаӀ. 2Сэ ся Тэ иунэшхо унэу хэтхэр бэ; армырыгъэмэ, шъосӀощтыгъэ: «ЧӀыпӀэ къышъуфэзгъэхьазырынэу сыкӀощт». 3СыкӀоу, чӀыпӀэ къызышъуфэзгъэхьазыркӀэ, сыкъэкӀожьынышъ, сыздэщыӀэм шъори шъущыӀэнэу шъуздэсщэщт. 4СыздакӀорэм игъогу шъо шъошӀэ.

5– Зиусхьан, – къыриӀуагъ Фомэ Исус, – уздакӀорэр тшӀэрэп. Арышъ, уздакӀорэм игъогу сыдэущтэу тшӀэн тлъэкӀына?

6– Гъогури, шъыпкъэри, щыӀэныгъэри сэры, – риӀожьыгъ Исус. – Сэ сигъогу рымыкӀомэ, Ты лъапӀэм дэжь цӀыф зи кӀошъущтэп. 7Сэ сышъошӀэмэ, ся Ти шъошӀэ. Джы щегъэжьагъэу ся Тэ шъошӀэ, шъулъэгъугъэ.

8– Зиусхьан, – къыӀуагъ Филипп, – Ты лъапӀэр тэгъэлъэгъуи, ар тфикъущт.

9– Мыщ фэдизрэ сышъуигъусагъэу, джыри о сымышӀэу ара, Филипп? – риӀуагъ Исус. – Сэ сызылъэгъугъэм Ты лъапӀэри ылъэгъугъ. Арышъ, о «Ты лъапӀэр тэгъэлъэгъу» сыдэущтэу пӀошъура? 10Сэ Ты лъапӀэм сыщыщэу, ежь ыгу сызэрилъ зэпытри, Ты лъапӀэри сэ къысщыщэу, сыгу зэрилъ зэпытри пшӀошъ хъурэба? ГущыӀэхэу къышъуасӀохэрэр сэр-сэрэу къасӀохэрэп. Ты лъапӀэу къысщыщэу, сыгу илъ зэпытым иӀофхэр егъэцакӀэх. 11Сэ Ты лъапӀэм сыщыщэу, ежь ыгу сызэрилъ зэпытри, Ты лъапӀэри къысщыщэу, сыгу зэрилъ зэпытри зысӀокӀэ, шъушӀошъ жъугъэхъу. Ар мыхъуми, Ӏофхэу сэ згъэцакӀэхэрэм апае шӀошъхъуныгъэ зижъугъаӀ. 12Шъыпкъэ дэдэр шъосэӀо, сэркӀэ шӀошъхъуныгъэ зиӀэм Ӏофхэу згъэцакӀэхэрэр ыгъэцэкӀэщтых, ахэмэ анахьи нахь Ӏофышхохэри ыгъэцэкӀэщтых, сыда пӀомэ, сэ Ты лъапӀэм дэжь сыкӀожьыщт. 13Сэ сцӀэкӀэ сыд щыщкӀи Ты ЛъапӀэм шъуелъэӀумэ, къышъуфэсшӀэщт, ы Къо Ты лъапӀэм ищытхъушхо цӀыфхэм аригъэлъэгъуным пае. 14Сэ сцӀэкӀэ сыд щыщкӀи шъукъысэлъэӀумэ, къышъуфэсшӀэщт.

Тхьэм ы Псэ ЛъапӀэ къафыригъэхынэу Исус игъогу рыкӀохэрэр зэригъэгугъагъэхэр

15– Шъо сэ шӀу сышъулъэгъумэ, сиунашъохэр жъугъэцэкӀэщтых. 16Сэ Ты лъапӀэм селъэӀунышъ, ащ шъуигукъао Шъушъхьэщызыхыжьын нэмыкӀ горэ къышъуфыригъэхыщт. Ар шъуигъусэ зэпытыщт. 17Тхьэм ы Псэ ЛъапӀэу цӀыфхэм шъыпкъэр язгъашӀэрэр ары. Дунаим ицӀыфхэм ар зэрамылъэгъурэм ыкӀи зэрамышӀэрэм пае, ар агу илъынэу адэн алъэкӀырэп, ау шъо ар шъошӀэ, сыда пӀомэ, шъуигъусэшъ, шъугу илъ зэпытышъ ары. 18Шъыпкъэ, шъо ибэу шъукъэзгъэнэщтэп; шъуадэжь сыкъэкӀожьыщт. 19ТӀэкӀу шӀэмэ, дунаим ицӀыфхэм салъэгъужьыщтэп, ау шъо сышъулъэгъущт, сыда пӀомэ, сэ сыщыӀэшъ, шъори шъущыӀэщт. 20Ау ся Тэ ыгу сызэрилъ зэпытри, шъори сыгу шъузэрилъ зэпытри, сэри шъо шъугухэм сызэрарылъ зэпытри а мафэм шъо шъушӀэщт. 21Сиунашъохэр зиӀэу, ахэр зыгъэцакӀэрэр ары сэ шӀу сызылъэгъурэр. Сэ шӀу сызылъэгъурэр ся Ти шӀу къылъэгъущт. Сэри ар шӀу слъэгъущт ыкӀи зыкъезгъэлъэгъущт.

22Джащыгъум Иудэ (Иудэ Искариотыр арэп) Исус къыриӀуагъ:

– Зиусхьан, дунаим ицӀыфхэм о зямыгъэлъэгъоу, тэ зыкъытэбгъэлъэгъунэу оӀо, ар сыдэущтэу хъура?

23– Сэ шӀу сызылъэгъурэм сигущыӀэхэр ыгъэцэкӀэщтых, – риӀожьыгъ Исус. – Сэ ся Ти ар шӀу къылъэгъущт, а цӀыфыми дэжь тэ тыкъэкӀонышъ, ащ ыгу тилъыщт. 24ШӀу сызымылъэгъурэм сигущыӀэхэр ыгъэцакӀэхэрэп. ГущыӀэхэу къасӀохэу зэхэшъуххэрэр сэ сигущыӀэхэп, Ты лъапӀэу сыкъэзгъэкӀуагъэм игущыӀэх нахь.

25– Сышъуигъусэфэ, а гущыӀэхэр къышъосӀуагъ. 26Ау шъуигукъао Шъушъхьэщызыхыжьрэр, Тхьэм ы Псэ ЛъапӀ ары, сэ сцӀэкӀэ Ты лъапӀэм къышъуфыригъэхыщт. Ащ зэкӀэ шъуигъэшӀэщт, сэ къышъосӀуагъэхэри зэкӀэ шъугу къыгъэкӀыжьыщтых. 27Гупсэф къышъуфэсэгъанэ, сигупсэф шъосэты. Гупсэфэу сэ шъостырэр дунаим къышъуитын ылъэкӀырэп. ШъумыгумэкӀ, шъумыщын.

28– «СышъухэкӀыжьми, шъуадэжь сыкъэкӀожьыщт» зэрэшъосӀуагъэр зэхэшъухыгъэ. Сэ шӀу сышъулъэгъугъэмэ, «Ты лъапӀэм дэжь сыкӀожьыщт» зэрэсӀуагъэмкӀэ шъугушӀощтыгъ, сыда пӀомэ, Ты лъапӀэр сэщ нахьи нахь ин. 29Мы Ӏофыр къэхъуным ыпэкӀэ шъосӀуагъэ, ар хъу зыхъукӀэ, шӀошъхъуныгъэ шъуиӀэ хъуным пае. 30Ащ нахьыбэрэ сыкъыжъудэгущыӀэжьыщтэп, сыда пӀомэ, мы дунаим ипщ къэкӀо пэт. Ащ иӀоф сэ къысхэлъэп. 31Ау Ты лъапӀэр шӀу зэрэслъэгъурэри, унашъоу къысфишӀыгъэхэр зэрэзгъэцакӀэхэрэри дунаим ицӀыфхэм ашӀэн фае. Шъукъэтэджи, мыщ тыӀужъугъэкӀыжь.

Currently Selected:

Иуан 14: AdgNT14

Highlight

Copy