Иуан 10
10
ЯПШӀЭНЭРЭШЪХЬ
Мэлэхъо дэгъур
1– Шъыпкъэ дэдэр сэ шъосэӀо, мэлэщым къэлапчъэмкӀэ дэмыхьэу, нэмыкӀ чӀыпӀэкӀэ дэпшыеу дахьэрэр тыгъуакӀу, хъункӀакӀу. 2Ау къэлапчъэмкӀэ дахьэрэр мэлхэм ямэлахъу ары. 3Къэрэгъулэм мэлахъом къэлапчъэр къыфыӀуехы, мэлхэри мэлахъом ымакъэ едэӀух. Мэлахъор ежь имэлхэм ацӀэкӀэ яджэ, къыдещых. 4Мэлахъом имэл пстэури къыздищхэкӀэ, апэ итэу макӀо. Мэлхэри ащ лъэкӀох, сыда пӀомэ, ымакъэ ашӀэжьышъ ары. 5Ау хымэм ыуж ихьэхэрэп, кӀатхъужьы нахь, сыда пӀомэ, хымэ макъэр ашӀэрэпышъ ары.
6А гъэсэпэтхыдэр Исус ариӀуагъ. Ау ащ къикӀырэр ахэмэ къагурыӀуагъэп.
7Арыти, Исус джыри къыӀуагъ:
– Шъыпкъэ дэдэр шъосэӀо, мэлэщым икъэлапчъэр сэры. 8СапэкӀэ къэкӀогъэ пстэури тыгъуакӀох, хъункӀакӀох, мэлхэри ахэмэ ядэӀугъэхэп. 9Къэлапчъэр сэры. СэркӀэ дахьэрэр мыкӀодэу къэнэжьыщт, дэхьащт, къыдэкӀыжьыщт, хъупӀи ыгъотыщт. 10ТыгъуакӀор къызфакӀорэр тыгъонэуи, ыукӀынэуи, ыгъэкӀодынэуи ары. Сэ сыкъызфэкӀуагъэр щыӀэныгъэшхоу икъугъэр цӀыфмэ ястыныр ары.
11– Мэлэхъо дэгъур сэры. Мэлэхъо дэгъум ыпсэ мэлхэм апае еты. 12Мэлхэр зимыеу пкӀэ хэлъэу лажьэрэ мэлахъом тыгъужъыр къакӀоу зилъэгъукӀэ, мэлхэр къегъанэхэшъ, кӀетхъужьы. ЕтӀанэ тыгъужъыр мэлхэм къахэлъадэшъ, елӀых, зэбгырефых. 13А лӀым зыкӀыкӀитхъужьырэр ыпкӀэ хэлъэу лажьэу, мэлхэм зэрафэмыгумэкӀырэр ары.
14,15– Мэлэхъо дэгъур сэры. Ты лъапӀэм сызэришӀэу, сэри Ты лъапӀэр зэрэсшӀэрэм фэдэу, симэлхэр сэшӀэх, мэлхэми сашӀэ. Сэ спси симэлхэм апае сэты. 16Мы мэл Ӏэхъогъум щымыщхэу нэмыкӀ мэлхэри сиӀэх. Ахэри къэсщэнхэ фае, ахэри сымакъэ къедэӀущтых. Аущтэу зы мэл Ӏэхъогъу хъущтых, зы мэлахъуи яӀэщт. 17Сэ спсэ къэсштэжьынэу зэрэстырэр ары Ты лъапӀэм шӀу сызкӀилъэгъурэр. 18Сэ спсэ зыми стырихырэп, сэр-сэрэу сэты. Ар стынэуи къэсштэжьынэуи лъэкӀ сиӀ. А унашъор сэ ся Тэ къысфишӀыгъ.
19А гущыӀэхэм апае джуртхэм джыри зэ куп-купэу загощыгъ.
20– Ащ джынапцӀэ хэс, ыӀорэр ышӀэжьырэп. Сыда ащ шъузкӀедэӀурэр? – аӀощтыгъэ ахэмэ ащыщыбэмэ.
21Ау нэмыкӀхэм аӀощтыгъ:
– А къыӀохэрэр джынапцӀэ зыхэс лӀым игущыӀэхэп. ДжынапцӀэм нэшъур къыгъэплъэн ылъэкӀына?
Джуртхэм Исус зэрамыштагъэр
22ЕтӀанэ Тхьэм иунэшхо Тхьэм фагъази, зэрэратыжьыгъагъэм пае, мэфэкӀ мэфэшхохэу#10:22 Тхьэм иунэшхо Тхьэм фагъази, зэрэратыжьыгъагъэм пае, мэфэкӀ мэфэшхохэр – Исус къэхъуным ыпэкӀэ 167-рэ илъэсым Антиок Епифан зыцӀэ пачъыхьэм тхьэ нэпцӀхэм апае къурмэншӀыпӀэ Тхьэм иунэшхо щигъэуцугъагъ. А пачъыхьэм Тхьэм иунэшхо аущтэу ыуцӀэпӀыгъэти, джуртхэм а унэшхор агъэкъэбзэжьи, Тхьэм ынэшӀу ащ щифэнэу елъэӀугъагъэх. Аущтэу Тхьэм иунэшхо ежь фагъази, къызэрэратыжьыгъагъэр агу къагъэкӀыжьызэ, джуртхэм илъэс къэс мэфийрэ а мэфэкӀ мэфэшхохэр агъэмэфэкӀы. ДжуртыбзэкӀэ а мэфэкӀ мэфэшхохэм зэряджэхэрэр «Ханукэ». Ерусалим щагъэмэфэкӀхэрэр къэсыгъэх. Ащыгъум кӀымэфагъ. 23Исуси Тхьэм иунэшхо чӀэтэу, пачъыхьэ Сэлмэн ыцӀэкӀэ заджэхэрэ щагоу шъхьэ зытелъ къэлапчъэхэр зиӀэм къыщикӀухьэщтыгъэ. 24Джуртмэ Исус къауцухьи, къеупчӀыгъэх:
– Нафэу къытэмыӀоу, сыд фэдизрэ джыри тэмыгъашӀэу тыщыбгъэӀэщта? Христосыр орымэ, занкӀэу къытаӀу.
25– ШъосӀуагъэба, ау шъо шъушӀошъ хъурэп, – ариӀожьыгъ Исус. – Сэ ся Тэ ыцӀэкӀэ згъэцакӀэрэ Ӏофхэр шыхьат къысфэхъух. 26Ау шъо шъушӀошъ хъурэп, сыда пӀомэ, зэрэшъосӀуагъэм тетэу, симэлхэм шъо шъуащыщэп. 27Симэлхэр сымакъэ къедэӀух. Сэ ахэр сэшӀэх, ахэри сауж итхэу къэкӀох. 28Ахэмэ мыкӀодыжьын щыӀэныгъэ ясэты, егъашӀэми кӀодыжьыщтхэп. Зыми ахэр сӀэкӀихынхэ ылъэкӀыщтэп. 29Сэ ся Тэу ахэр къысэзытыгъэр зэкӀэмэ анахь ин. Зыми ахэр ся Тэ ӀэкӀихынхэ ылъэкӀыщтэп. 30Ты лъапӀэмрэ сэррэ тыз.
31Исус ар зареӀом, джуртхэм ежь аукӀыным пае, еонхэу мыжъохэр къаштагъэх. 32Ау Исус ариӀуагъ:
– Ты лъапӀэм дэжь къикӀыгъэу, Ӏофышхо гъэшӀэгъон Ӏаджи шъозгъэлъэгъугъэ. Ахэмэ ащыщэу тара мыжъохэмкӀэ шъукъысаозэ, сызфэшъуукӀынэу шъузыфаер?
33– Ӏофышхо гъэшӀэгъон горэ о зэрэпшӀагъэр арэп мыжъохэмкӀэ тыкъыуаозэ, утыукӀынэу тызыкӀыфаер, ау о уцӀыфэу «Сытхь» пӀоу, Тхьэр зэрэбгъэпцӀырэр ары, – къыраӀожьыгъ джуртхэм.
34– Шъо шъуи Тэурат хабзэ итба, Тхьэм моущтэу зэриӀуагъэр#10:34 Тхьэм… зэриӀуагъэр – яплъ Орэд ЛъапӀэхэм 81:6.: «Сэ сӀуагъэ шъо шъузэрэтхьэхэр?» – ариӀожьыгъ Исус. – Тхьэм игущыӀэ тхыгъэхэри укъуагъэ хъущтхэп. 35Аущтэу ежь игущыӀэхэр цӀыфхэу къызфэкӀуагъэхэм «Шъо шъутхьэх», – ариӀуагъ Тхьэм. 36Арышъ, сэ Ты лъапӀэм къыгъэнэфагъэу мы дунаим къыгъэкӀуагъэм, «Сэ Тхьэм сыри Къу», зэрэсӀуагъэм пае, сыдэущтэу «О Тхьэр огъэпцӀы», къысэшъуӀон шъулъэкӀыра? 37Сэ ся Тэ иӀофхэр сымыгъэцакӀэхэмэ, сэркӀэ шӀошъхъуныгъэ зишъумыгъаӀ. 38Ау ся Тэ иӀофхэр сэгъэцакӀэхэмэ, сэркӀэ шӀошъхъуныгъэ шъуимыӀэ пэтми, а ӀофхэмкӀэ шӀошъхъуныгъэ зижъугъаӀ. Ащыгъум сэ Ты лъапӀэм сыщыщэу ыгу сызэрилъ зэпытри, Ты лъапӀэри къысщыщэу сыгу зэрилъ зэпытри къэшъушӀэщт, къыжъугурыӀощт.
39Джыри зэ Исус аубытынэу фежьагъэх, ау аӀэпыкӀыгъ.
40Ащ нэужым Исус Иордан зыцӀэ псыхъом джыри зэпырыкӀыжьи, Иуан цӀыфхэр зыщиумэхъыщтыгъэ чӀыпӀэм кӀуи, ащ къэнагъ. 41ЦӀыфыбэхэри ыдэжь къэкӀуагъэх.
– Иуан зы нэшэнэ гъэшӀэгъони къыгъэлъэгъуагъэп, ау мы лӀым ехьылӀагъэу къыӀуагъэхэр зэкӀэ шъыпкъэх, – къаӀуагъ ахэмэ.
42А чӀыпӀэми цӀыфыбэмэ ИсускӀэ шӀошъхъуныгъэ яӀэ хъугъэ.
Currently Selected:
Иуан 10: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
