Mk 15

Kïdhi Yëso Bøli Pilɑtø

(Mt 27.1-2, 11-14; Lk 23.1-5; Jn 18.28-38)

1Kì ri ru wøw ceth, kɑ jɑggi ókwër, kí jøgdøngø, kí jøpwönyi Cigg, kí jø tøg burø bënn ri gen löggi gen. Kɑ Yëso twöj gen, kɑ gø muuj gen Pilɑtø. 2Kɑ pyëj yi Pilɑtø kinni, “Bene yï Rɑ̈ɑ̈dh Yeud?”

Alöggi Yëso kinni, “Ákwøb yi yïn.”

3Kɑ gøøny yi jɑggi ókwër ki kwøb mø ngenyø. 4Kɑ pyëj yi Pilɑtø këti kinni, “Bong gïn løøg yi yïn? Lidh kwøbb-ɑ gïïr ek møg-ɑ gøøny gen yïn.”

5Kɑ ɑ́cög Yëso e pɑ löggi, ɑngɑ̈ng Pilɑtø.

Kuumi Yëso ki Thøø

(Mt 27.15-26; Lk 23.13-25; Jn 18.39–19.16)

6De kì yethi Cyɑ̈nggi Kwëër Ákɑɑdh, Pilɑtø ɑ́bëëd e nyi göny-ɑ wɑ̈g kì ød mɑg ki dhɑnhø ɑ́kyel, o ngɑnɑni nyi cwøl-ɑ yi teedø. 7O ɑ́bëëd e dɑ jɑl me cwøl ɑ́ Bɑrɑbɑ̀ kì ød mɑg. Jɑlɑni ɑ́mɑg-ɑ kyeel ki jøg mɑ ɑ́nɑ̈ɑ̈g ki ji kì yethi cyɑ̈nggi ɑgwɑg. 8Kɑ teedø ócugø, ge kwɑjj-ɑ Pilɑtø kipe kinni o gööge ki gïn-ɑ nyi gwøge. 9Kɑ teedø pyëje kinni, “Wu dwɑdd-ɑ kinni, gönyɑ wun Rɑ̈ɑ̈dh Yeud?” 10Mɑ́ e ngɑ̈ny wøw kinni, Yëso ɑ́muujii kɑ ɑter yi jɑggi ókwër.

11Kɑ teedø cwɑɑg mɑl yi jɑggi ókwër kinni cwøl gen Bɑrɑbɑ̀ kì yï Pilɑtø. 12Aköbbi teedø këti yi Pilɑtø kinni, “Kɑ ɑ́rum bëëde kinøw, wu dwɑdd-ɑ kinni o ngɑn-ɑ cwølli yi wun ɑ́ Rɑ̈ɑ̈dh Yeud, göggɑ ngø?”

13Kɑ ge óryeerø kinni, “Gur wïj yɑdh ɑrïw!”

14Apëjji Pilɑtø kinni, “Á rɑj mɑ ngø ɑ ɑ́gwøge?”

Kɑ ge ti-ɑ ryeerø ki mendwøng kinni, “Gur wïj yɑdh ɑrïw!”

15Kɑ Bɑrɑbɑ̀ gönyi teedø yi Pilɑtø, e dwɑdd-ɑ kinni o pëthi gen kwööj gen. Kɑ ɑ́rum Yëso ki pwödø, ɑmuuje gøn, o gur wïj yɑdh ɑrïw.

Gɑggi Yëso yi Dej

(Mt 27.27-31; Jn 19.2-8)

16Kɑ Yëso peej gøldwøng, (ɑ bɑ gøl modïr) yi dej, kɑ kɑtïbɑ̀ bëne cøng. 17Aruug ge gøn ki pɑrø me bɑ ɑ́cwïcwïl, kɑ ge okɑ̈dø ki yɑ̈ɑ̈r koodh, ɑcïb ge gøn wïje. 18Kɑ gø mɑl gen kinni, “Yï ɑ́mïdhi yi Jwøk, Rɑ̈ɑ̈dh Yeud!” 19Apwöd ge gøn kì wïje ki obej, kɑ ge ngudd-ɑ köme ki lɑ́ɑ̀w, kɑ ri gen bøødh gen piny kì bøle. 20Keny-ɑ ɑ́rum gen ki gɑggii, ɑluny gen pɑrø ɑ́cwïcwïl wɑ̈g kì ree, kɑ ógudhe dwøøg gen ree. Apeej ge gøn be gur wïj yɑdh ɑrïw.

Guri Yëso Wïj Yɑdh Arïw

(Mt 27.32-44; Lk 23.26-43; Jn 19.17-27)

21 # Röm 16.13 Kɑ ge órøømø ki Sɑymøn jɑl Serin, (wïyi Iskɑnder kí Rupus,) e kɑ̈ɑ̈l-ɑ yethi myërr. Kɑ cir yi jødej, kinni byelle yɑdh ɑrïw Yëso. 22Akïdhi ge gøn keny-ɑ cwøl ɑ́ Gölgöthɑ̀ (men-ɑ wɑngi kej Cu Wïj). 23Kɑ gø nëngi gen ki møgi oløg men-ɑ ótolø ki gïjø me keej. De ɑ́cög gø pɑ mɑdhe. 24#Wör 22.18 Agur ge gøn wïj yɑdh ɑrïw. Kɑ ógudhe pɑ̈ngi yi gen kì kelli gen, ge leng kɑ wél. 25Águr wïj yɑdh ɑrïw, e piny bɑ sɑɑ̀ ɑ́bïngwen kì mwøl. 26Møg-ɑ per gïn ɑ́kuumii ógwedø kinni, “Rɑ̈ɑ̈dh Yeud.” 27#Icɑ 53.12 Kɑ ɑ́muddi ji ɑ́ryew gur wɑ̈thi yenh ɑrïw kyeel ki en, ɑ́kyel kì wïj kyëje kí ɑ́kyel kì wïj cɑɑme. Kɑ møg-ɑ ókwøbø kì yethi wɑ̈jji kwërø kinni, “Ákwɑɑn kelli tyëngorøg,” pɑ̈dh-ɑ kɑ̈jji gen.

29 # Wör 22.7; 109.25; Mk 14.58; Jn 2.19 Kɑ gɑggi yi tyëng-ɑ kɑ̈lli kenyɑni, ge lëgg-ɑ wɑ̈thi gen, ge okööbø kinni, “Ëë! Yï ngɑn-ɑ nyɑɑg Kengø piny kɑ ger yi yïn ki cyɑ̈ng ɑ́dɑ̈g! 30Yiel rií, kɑ yï bïí piny kì wïj yɑdh ɑrïw!”

31Kɑ gɑggi yi jɑggi ókwër geki jøpwönyi Cigg kinni, “Ji møøgø ɑ́yiele, de pɑ cuggi yieli ree. 32Wiy Mesiy Rɑ̈ɑ̈dh Isrɑil bëe piny ɑnɑn kì wïj yɑdh ɑrïw, o lidh yi wɑ, o yïëy yi wɑ.”

Kɑ gwɑddi thyew yi jøg-ɑ ɑ́gur wɑ̈thi yenh ɑrïw kyeel ki en.

Thøwi Yëso

(Mt 27.45-56; Lk 23.44-49; Jn 19.28-30)

33Keny-ɑ ɑ́göög piny ki sɑɑ̀ pyɑ̈rø wïdɑ́ryew kì dicɑ̈ng, ɑløg piny ree muudhø kì wïj piny bëne, kɑ muunhɑni gït-ɑ sɑɑ̀ ɑ́dɑ̈g kì böörø. 34#Wör 22.1 Kì sɑɑ̀ ɑ́dɑ̈g kì böörø ɑcwöddi Yëso e óryeerø kinni, “Elöì, Elöì, lɑmɑ̀ sɑbɑktɑnì.” Møgɑni wɑng-ɑ kinni, “Jwøgɑ, Jwøgɑ, yïde ɑ wiy yɑn piny?”

35Keny-ɑ ɑ́lïngi møgɑni yi kwï ji møg-ɑ cungi kì kenyɑni, kɑ ge okööbø kinni, “Lïng wun, cwøll-ɑ Eliyɑ̀!” 36#Wör 69.21 Kɑ ɑ́kyel kì kelli gen órengø, kɑ ispwøny jwɑ̈ɑ̈ge yij møgi oløg me wɑj. Agɑ̈ɑ̈ne gøn wïj obej, kɑ gø cïbe dhøg Yëso, o gø cwije, ɑkööbe kinni, “Nëën wɑ, men-ɑ óbëën Eliyɑ̀ be kɑ̈ɑ̈lii piny kì wïj yɑdh ɑrïw!”

37Kɑ Yëso óryeerø, kɑ othøø.

38 # Kedhø 26.31-33 Kɑ ógønh-ɑ bɑ gëng kì yij Kengø ópyëdø kì dïdyëre, cɑg kì wïje mɑl gïti tyele piny. 39Kɑ dhɑbïdh men-ɑ ɑ́cungi ree rwööm en ki yɑdh ɑrïw, keny-ɑ ɑ́lidhe thøw-ɑ ɑ́thøw Yëso, ɑkööbe kinni, “Kidyër jɑɑl ɑ́bëëd ɑ́ Wɑ̈d Jwøk!”

40 # Lk 8.2-3 Ádɑ tyëng-ɑ mɑ̈nn mɑ ɑ́nëën ge lɑ̈wi. Meerì Mɑgdɑliyɑ̀, ki Meerì meyi Yɑgom-ɑ thinh geki Yosep, kí Sɑlömɑ̀. 41Gen ɑ ɑ́lugi kì bɑng Yëso keny-ɑ ɑ́yinge Gɑlelì, ge kɑ̈ll-ɑ gøn. O ɑ́dɑ tyëng-ɑ mɑ̈nn møøgø thyew møg-ɑ ɑ́bï Yerusɑlem ki en.

Konyi Yëso

(Mt 27.57-61; Lk 23.50-56; Jn 19.38-42)

42-43Keny-ɑ ɑ́göög piny ki böörø; en ɑ bøli kej gwïdø kipe cyɑ̈ɑ̈ng Sɑbɑth, kɑ Yosep jɑl Rɑmɑ̀, o bɑ jɑl me pere teg kì buri Yeud, o ying-ɑ kelli tyëng-ɑ nenni bëëni Pödhi Jwøk, pyëwe cwede, kɑ kedh-ɑ yï Pilɑtø, ɑcwøle dëël Yëso. 44Kɑ Pilɑtø ongɑ̈ngø kɑ ɑ́lïnge kinni, ɑ́rum ki thøø. Acwøle dhɑbïdh, kɑ gø pyëje mɑ rum Yëso ki thøø. 45Kɑ ɑ́yode møgɑni kì yï dhɑbïnhɑni, ɑmëgge dhɑnhø Yosep. 46Kɑ Yosep ongëwø ki ógødh kor-ɑ yöm. Kɑ dhɑnhø kɑ̈ɑ̈le piny kì wïj yɑdh ɑrïw, ɑkode gøn ki ógønhɑni, kɑ gø pyële yij rörø men-ɑ ótwegø kì ri kït. Kɑ ngyëd-ɑ dhø burɑni ki tungi kït. 47Kɑ keny-ɑ ɑ́pyëël dhɑnhø lidh yi Meerì Mɑgdɑliyɑ̀ geki Meerì meyi Yosep.

Currently Selected:

Mk 15: shkDCB

Highlight

Copy