Mt 7

Cɑyyi Ji Møøgø

(Lk 6.37-38, 41-42)

1“Wu ko nyi cɑ̈ɑ̈y ki ji møøgø, o wu ócög wu pɑ cɑy yi Jwøk, 2#Mk 4.24 mɑ́ wu ócɑy yi Jwøk kɑ kër-ɑ cɑyyi wun ji møøgø, o gïn-ɑ yije nyi rummi wun ji møøgø, en ɑ yije órummi wun yi Jwøk. 3Yïde ɑ nenní wëël-ɑ thiinh kì wɑɑng wɑɑd wun, o men-ɑ́ duli yɑdh men-ɑ wɑngí pɑ ywør yi yïn? 4Wɑlɑ̀ wɑɑd wun óköbbi yi yïn kidï kinni, ‘Wiy wëël-ɑ wɑngí èn kɑ̈ɑ̈lɑ wɑ̈g,’ e men-ɑ́ wɑngí dɑ duli yɑdh? 5Yï bɑ wëny! Kɑ̈ɑ̈l duli yɑdh wɑ̈g kì wɑngí møti, o yï ónëën kidøøj, o yï cuggí kɑ̈ɑ̈li wëël-ɑ wɑɑng wɑɑd wun wɑ̈g.

6“Gïn-ɑ bɑ ɑkwër ko nyi mëggu gwögg, mɑ́ wu ógwɑ̈y yi gwöggɑni. Kɑ tiggi wun ko nyi lëngu kundhøngø, mɑ́ gï ónyøn yi gen.

Cwöddi Wun, Yɑ̈ɑ̈b Wun, Ngɑ̈jji Wun

(Lk 11.9-13)

7“Cwöddi wun, o wu óthödhi; yɑ̈ɑ̈b wun, o wu óyïddi wun; ngɑ̈jji wun, o dhø ød óyïëbbi wun. 8Mɑ́ ngɑn-ɑ nyi cwöddi, nyii thödhø; o ngɑn-ɑ nyi yɑ̈bø nyii yïddø; o ngɑn-ɑ nyi ngɑ̈jji, dhø ød nyi yïëbb-ɑ en. 9Dɑ dhɑnhø kì kelli wun me mëggi wɑ̈de tungi kït, kɑ̀ kwɑ̈jje ki ópun? 10Wɑlɑ̀ gø mëgge’ thwöl, ke kwɑ̈jje ki rëjø? 11Keløg wu ngɑ̈ny thödhi nyigi wun ki gïgdøj, wun ɑ́ tyëngrijjø, Wïyi wun ɑ ying mɑl, tyëng-ɑ cwöddi kì yïe, koo thödhe ki gïg pëddi døøjø?

12 # Lk 6.31 “Göggi wun ji møøgø gïg-ɑ dwɑddi yi wun o ge göggi wun yi gen. Bene møgɑni ɑ wɑngi yi Cigg geki tyëngtöng mø Jwøk.

Yuu-ɑ Dhing

(Lk 13.24)

13“Nyi kɑ̈lu dhøng-ɑ dhing, mɑ́ dhøng-ɑ yïëbbi mɑc lɑɑj, o wɑ̈dh yööd kì yuu-ɑ kedhi yije, o ji-ɑ kɑ̈lli yuuɑni gïïr. 14De yuu-ɑ kedhi kej nënn-ɑ ɑtheer dhing, o wɑ̈dh teeg kì yije, o bɑ ji mø nøg ɑ nyi yod yuuɑni.

Yɑdh kí Nywøle

(Lk 6.43-44)

15“Koru ri wun kipe jøtöng mø pyed, møg-ɑ nyi bï yï wun ge nënni ge nɑ dyëg, de kì yethi gen, ge bɑ óthönhì mø rijjø. 16Ge óngij yi wun kì bɑng gïg-ɑ gøggi yi gen. Nywøli oløg pɑ nyi pøn kì kö but. O nywøli ólɑm pɑ nyi pøn ki kö ɑ́lɑl. 17Yɑnh døj nyi nywøl-ɑ nywøl mø døøj, o yɑnh rɑj nyi nywøl-ɑ nywøl mø rijjø. 18Yɑnh døj pɑ cuggi nywølø ki nywøl mø rijjø, o yɑnh rɑj pɑ cuggi nywølø ki nywøl mø døøj. 19#Mt 3.10; Lk 3.9 Yɑnh pɑ nywøl ki nywøl mø døøj, nyi ngøl-ɑ piny, kɑ leeng mɑc. 20#Mt 12.33 Jøtöng mø pyed óngij yi wun kì bɑng gïg-ɑ gøggi yi gen ceth.

Wu Kwïj yi Yɑn

(Lk 13.25-27)

21“Pɑth ki tyëng-ɑ nyi cwølli yɑn kinni, ‘Wuö, Wuö,’ ɑ ówɑ̈dhi Pödhi Jwøk, den-ɑ́ ngɑn-ɑ nyi gwøg gïn-ɑ dwɑddi yi Wïyɑ, ɑ ying mɑl. 22Kì Cyɑ̈ɑ̈ng Cɑ́y, yɑ óköbbi yi ji mø gïïr kinni, ‘Wuö, Wuö, wø ɑ́tööng ki nyingí, kɑ wø ryëmm-ɑ wɑ̈g ki wëyrijjø ki nyingí, kɑ wø ogöögø ki gïgdøngø mø gïïr ki nyingí.’ 23#Wör 6.8 De ge óköbbɑ kinni, ‘Wu kwïj yi yɑn ki mendwøng, kedh wun kì butɑ, wu bɑ tyëngrijjø.’

Jøg Áryew Mɑ Ágëëd ki Ud

(Lk 6.47-49)

24“Kɑ ɑ́rum bëëde kinøw, ngɑn-ɑ lïngi kwøbbɑ, kɑ ogöögø ki gïg-ɑ kømmɑ, ópɑ̈ɑ̈r yi yɑn kɑ jɑl me rumme nud, mɑ ɑ́geer øde kömi kït. 25Kɑ kødh ómɑ̈gø, kɑ bɑɑyø obëënø, kɑ yømø ocödø, kɑ ge göjj-ɑ kömi ønɑni, kɑ ocögø e pɑ pɑ̈ɑ̈dh, mɑ́ e ókëël-ɑ kömi kït.

26“O ngɑn-ɑ lïngi kwøbbɑ, kɑ gïg-ɑ kømmɑ ocögø gï pɑ gwøge, pɑ̈r ki jɑl mɑ dhëg, mɑ ɑ́geer øde kömi kwöjø. 27Kɑ kødh ómɑ̈gø, kɑ bɑɑyø obëënø, kɑ yømø ocödø, kɑ ge göjj-ɑ kömi ønɑni, kɑ ceg-ɑ pɑ̈ɑ̈dhø ki pɑ̈ɑ̈nhi dwøng!”

Tegi Yëso

28 # Mk 1.22; Lk 4.32 Keny-ɑ ɑ́rum Yëso ki kwøbi møgɑni, kɑ teedø ongɑ̈ngø yi yëth-ɑ pwönye. 29Nuti bëëdø e pɑ̈r ki jøpwönyi Cigg; de ɑ́pwönyi kɑ tegø.

Currently Selected:

Mt 7: shkDCB

Highlight

Copy