Mt 16

Yɑb ki Ngïji

(Mk 8.11-13; Lk 12.54-56)

1 # Mt 12.38; Lk 11.16 Abëën Jøpɑresì kí Jøsɑduk, kɑ gø kwɑjji gen kinni nyudhe gïn ki ngïji men kɑ̈ɑ̈l Pödhi Jwøk, ge ceg-ɑ gøn ki rɑngø. 2Aløøg mø gen yi Yëso kinni, “Kì ri buddi cɑ̈ng, wu nyii kööbø kinni, ‘Wɑɑng piny óbëëd e tɑr kɑ̀ bëëd mɑl e kwɑɑr.’ 3O kì mwøl wu nyii kööbø kinni, ‘Kødh ómɑ̈gi dicyɑ̈ngtïn, mɑ́ pøøl kwɑɑr, o mɑl køm-ɑ mïnø.’ Wu ngɑ̈ny rɑng ki ngïjji mɑl, de wu dhɑl yi rɑng ki ngïjji bëëdi dhɑnhø kì kömi piny. 4#Mt 12.39; Lk 11.29 Rïny-ɑ rɑj ki orøg yɑb-ɑ ngïji. De bong ngïji men-ɑ ónyudhi gen, den-ɑ́ ngïji mi Yönɑ̀ kete.”

Adhwödhe, kɑ gï wiye.

Kɑmïrɑ̀ Mi Jøpɑresì kí Jøsɑduk

(Mk 8.14-21)

5Akedhi jøbɑng Yëso løøgø, de wɑ̈thi gen ɑ́wïl ki kɑ̈nø ki gïncɑm. 6#Lk 12.1 Kɑ ge köbbi yi Yëso kinni, “Tiu nënnø, kɑ ri wun kor wun kipe kɑmïrɑ̀ mi Jøpɑresì kí Jøsɑduk.”

7Kɑ dhøggi gen lømmi gen kinni, “Kööb ɑ bɑng kɑ̀ bëëd e bong ópùn mɑ ɑ́kɑ̈ɑ̈l yi wɑ.”

8De møgɑni ngɑ̈nyi yi Yëso, kɑ gï pyëje kinni, “Wu tyëng-ɑ yïëyø mi wun nøg, wude ɑ lømmu dhøggi wun ki kwøbbi bongi ópùn kì yï wun? 9#Mt 14.17-21 Kwøbbɑni nuti gɑmø yi wɑ̈thi wun? Wɑ̈thi wun ɑ́wïl ki ópùn ɑ́bïj møg-ɑ ɑ́cɑm yi ji gɑ ɑ́lïp ɑ́bïj? Á kwɑnni dhöng ɑ́dï ɑ ɑ́cøng yi wun ge pɑ̈ng yi nyingi gïncɑmɑni? 10#Mt 15.34-38 Kí ópùn ɑ́bïryew møg-ɑ ɑ́cɑm yi ji gɑ ɑ́lïp ɑ́ngwen, ɑ́ dhöng ɑ́dï ɑ ɑ́cøng yi wun? 11Dhɑ̈li yodø kidï yi wun kinni yɑ pɑ kømmi kwøbbi ópun. De koru ri wun kipe kɑmïrɑ̀ mi Jøpɑresì kí Jøsɑduk.”

12Codhe, ɑyodii yi gen kinni pɑ wɑng-ɑ kinni kor gen ri gen kipe kɑmïri ópun, den-ɑ́ pwönyi Jøpɑresì geki Jøsɑduk ɑ kømme.

Møg-ɑ Ákwøb yi Pïtør kì ri Yëso

(Mk 8.27-30; Lk 9.18-21)

13De keny-ɑ ɑ́wɑ̈dhi Yëso myërr-ɑ buti kɑɑl Kɑysɑriyɑ̀ Pïlïpì, kɑ jøbɑnge pyëje kinni, “Ji okööbø kinni, Nyɑɑr Dhɑnhø bɑ men?”

14 # Mt 14.1-2; Mk 6.14-15; Lk 9.7-8 Kɑ ge ólöggø kinni, “Kwï ji okööbø kinni, bɑ Jøn Jɑljwɑ̈g, o møøgø okööbø kinni bɑ Eliyɑ̀, o møøgø okööbø kinni bɑ Jermɑyɑ̀ wɑlɑ̀ jɑltöng megø.”

15Kɑ gï pyëje kinni, “De wu okööbø kinni, yɑ bɑ men?”

16 # Jn 6.68-69 Alöggi Sɑymøn Pïtør kinni, “Yï bɑ Mesiy, Wɑ̈d Jwøng-ɑ Nëënø.”

17Kɑ köbbi yi Yëso kinni, “Yïn ɑ Sɑymøn wɑ̈d Jøn, rií dɑ gyëdh, mɑ́ møgɑni nuti nyudhi yïn ɑ yi dhɑnhø, den-ɑ́ Wïyɑ, ngɑn-ɑ ying mɑl. 18O yɑ köbb-ɑ yïn thyew kinni, yï bɑ kït, o kömi kïnɑni ɑ ógeerɑ kɑnïsɑ̀ miɑ, o bong gïn-ɑ ótyɑmii, cɑgg ɑ́ thøø. 19#Mt 18.18; Jn 20.23 Moptɑɑ̀ mø Pödhi Jwøk ómëggɑ yïn, o gïn-ɑ kyer yi yïn kì kömi piny ókyer kì Pödhi Jwøk, o gïn-ɑ yïëy yi yïn kì kömi piny, bɑ ɑyïëy kì Pödhi Jwøk.”

20Codhe, kɑ jøbɑnge kyëdde kinni ko di ngɑn köbbi yi gen kinni, bɑ Mesiy.

Kwøbbi Yëso kì ri Orɑnge kí Thøwe

(Mk 8.31–9.1; Lk 9.22-27)

21Bøli kenyɑni ɑ ɑ́cɑ̈gi Yëso ki nyudhi jøbɑnge kinni bɑ men kedhi Yerusɑlem, de órɑngi yi jɑmmì mø ngenyø kì cinggi jɑggi pödhø, kí jɑggi ókwër, kí jøpwönyi Cigg. O ónɑ̈g, de ódhwödh kì yij thøø, kì dɑ̈ɑ̈g cyɑ̈ng.

22Kɑ peej wɑ̈ye yi Pïtør, ɑcyɑ̈re gøn kinni, “Wuö, møgɑni tøøk kì yï Jwøk, gïg ni møg pɑ cuggi bëën kömí!”

23Kɑ lïïdh-ɑ yïe kidøøj, ɑköbbe Pïtør kinni, “Kedh kì butɑ, Cethɑn! Yïde ɑ rïwwí bølɑ? Møg-ɑ kømmi yi yïn pɑ kɑ̈ɑ̈l-ɑ yï Jwøk, de ge bɑ rummi dhɑnhø yøw!”

24 # Mt 10.38; Lk 14.27 Codhe, kɑ Yëso jøbɑnge köbbe kinni, “Ke di ngɑn dwɑddi bëën bɑngɑ, wedde pyëwe, kɑ yɑdh ɑrïwe byele, kɑ luge bɑngɑ. 25#Mt 10.39; Lk 17.33; Jn 12.25 Mɑ́ ngɑn dwɑddi yieli wëye, wëye ólɑ̈ɑ̈nye, o ngɑn lɑ̈ɑ̈ny wëye kiperɑ, wëye óyode. 26Dɑ gïndøj me yod yi dhɑnhø, keløg piny bëne oyodø yi en, kɑ wëye lɑ̈ɑ̈nye? Wɑlɑ̀ ɑ́ gïn ɑ ómuuj yi dhɑnhø ɑ́ men gøøme wëye? 27#Mt 25.31; Wör 62.12; Röm 2.6 Mɑ́ Nyɑɑr Dhɑnhø ɑ́cyɑ̈ngi bëënø, ki mɑ̈ɑ̈r Wïye, geki wëywödde, o ji mëgge köggi gen; ngɑn mëgg-ɑ kööng-ɑ kyëëw ki gïg-ɑ ɑ́gøgge. 28Yɑ köbb-ɑ wun kidyër kinni, dɑ ji møøgø kì kelli tyëng-ɑ nud kì keny ɑnɑn, mø thøø pɑ bel yi gen, gïti keny-ɑ ólidh gen Nyɑɑr Dhɑnhø, e obëënø ɑ́ Rɑ̈dh.”

Currently Selected:

Mt 16: shkDCB

Highlight

Copy