Cɑ̈gø 8
8
Døøgi Bɑɑyø
1Nöö ɑ́nudd e opɑrrø yi Jwøk, en kí lɑ̈yyi pɑ̈l geki dhög kí dyëg møg-ɑ ying gen yij yɑ̈y. Kɑ yømø gøøje kömi piny, kɑ pï ócɑ̈gø ki døøg piny. 2Kɑ nyingi piny ówïyø’ mullø ki pï, kɑ pøøl kì mɑl ówïyø kunyi piny ki kødh. 3-4Kɑ pïg-ɑ ɑ́bëëd kömi piny mud gen døøg-ɑ piny. Kì bɑng cyɑ̈ng miyø kí pyɑ̈r ɑ́bïj, pï ɑ́døøg piny kɑ yɑ̈y ócöbbø kì wïj kït ɑ́kyel kì kelli Kïtti Arɑrɑt kì pyɑ̈rø wïdɑ́bïryew cyɑ̈nggi bïryeew dwɑ̈tt. 5Pï ɑ́kedh ge døøg-ɑ piny gïti kɑ ɑ́nënni wɑ̈thi kïttì kì cyɑ̈ng-ɑ mɑl kì ri pyɑ̈ri dwɑ̈tt kì yij run.
6Kì bɑng cyɑ̈ng pyɑ̈r ɑ́ngwen møøgø, kɑ Nöö óyïëbbø ki ɑwɑj. 7Aöde ki ɑ́gɑg. Ágɑg nuti dwöögø, de ɑ́wɑ̈dhi pëggi be wïïnø gïti keny-ɑ ɑ́dwön pï. 8Codhe, ɑöd Nöö ki ɑkur kinni o gø yode, mɑ́ dwöön pï kì kömi piny, 9de ɑkur ɑ́jɑd ki keny me cïbe tyele, kɑ dwöög-ɑ yij yɑ̈y yï Nöö, mɑ́ piny ɑ́bëëd e nudd e pɑ̈ng yi pï, ɑrïïje cinge kɑ gø kwɑnye, ɑkɑ̈ɑ̈le gøn yij yɑ̈y. 10Kɑ oyïdø ki cyɑ̈ng ɑ́bïryew møøgø, ɑdøøge ɑkur ki örø. 11Kɑ ɑkur dwöög-ɑ yïe kì böörø, e ókɑ̈ddø ki yïth ólɑm me mɑr kì dhøge, kɑ yod yi Nöö kinni pï nungø kì kömi piny. 12Codhe, ɑnëëne ki cyɑ̈ng ɑ́bïryew møøgø, ɑcige ɑkur örø, de ɑkur ɑ́cög e pɑ dwöög.
13Kì cyɑ̈ng-ɑ mɑl kì ri dwɑ̈n-ɑ mɑl kì yij run, e runni Nöö bɑ miy ɑ́bïkyel kí ɑ́kyel, ɑ ɑ́dwön pï kì piny, kɑ wïj yɑ̈y yɑl yi Nöö, kɑ nenn-ɑ wɑ̈g kì wɑ̈thi tùng bënn, ɑlidhe gøn kinni piny thwøwø. 14De piny nuti ti thwøwø gïti kɑ ɑ́göög cyɑ̈nggi ryeew dwɑ̈tt ki pyɑ̈r ɑ́ryew wïdɑ́bïryew.
15Kɑ Nöö köbbi yi Jwøk kinni, 16“Yïn, wuki cyëgí, kí wɑ̈ddí geki mɑ̈nni gen, kedhu wɑ̈g kì yij yɑ̈y. 17Kɑ̈ɑ̈l lɑ̈yy bënn wɑ̈g kì yij yɑ̈y, winy, kí lɑ̈yy, kí gïg-ɑ mulli kì piny bënn. Wiy ge nywøl gen o ge ngënyi gen kì kömi piny.” 18Codhe, kɑ Nöö bï-ɑ wɑ̈g geki cyëge, kí wɑ̈dde geki mɑ̈nni gen. 19Lɑ̈yy bënn, kí gïg-ɑ mulli bënn, kí wɑ̈thi winy bënn ɑ́kedhi wɑ̈g, ge cyɑ̈dhi gɑ jɑlø kí dhɑjø.
Muunyi Nöö ki Gëëdhi
20Codhe, kɑ Nöö ogëdø ki këli lɑm mi Jwøng-ɑ Ácwɑ̈ɑ̈j. Kɑ ókɑ̈bbø kì ri winy geki lɑ̈yy-ɑ dhïw, kɑ gï rɑ̈be kì kömi këli lɑm, gɑ gïg mëgge Jwøk. 21Kɑ Jwøng-ɑ Ácwɑ̈ɑ̈j pyëwe ómïnø yi gënh-ɑ nyi rɑ̈b bëne menɑni, ɑköbbe ree kinni, “Piny pɑ cigi cɑyø yi yɑn këti kipe gööj ji. Rummi ji rijjø, cɑgg ge nudd gɑ othønhø, de gïg-ɑ nëënø kì kömi piny pɑ cigi nɑ̈gø yi yɑn këti ni men. 22Ni kɑ cyɑ̈dhi piny, kɑ̈g geki kɑj ki byel, kööjø geki lëdhi piny, lew geki wuudø, wɑ̈r geki dicɑ̈ng ge pɑ cungi.”
Currently Selected:
Cɑ̈gø 8: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
