Cɑ̈gø 35

Gyëdhi Yɑgob yi Jwøk kì Betiil

1 # Cɑ̈gø 28.11-17 Kɑ Yɑgob köbbi yi Jwøk kinni, “Kedhí Betiil kɑ yï bëëd kì kunɑni, kɑ Jwøng-ɑ ɑ́cwöb kì bølí keny-ɑ ɑ́pɑ̈ɑ̈r, yï bwøg-ɑ ómyëw Isøø, gëddí ki këli lɑm kì kunɑni.”

2Codhe, kɑ Yɑgob tyëng gøle geki tyëng-ɑ bute bënn köbbe kinni, “Weddu ngïjji jwögg-ɑ pɑth møg-ɑ yï wun, kɑ wu lwøggi wun, o wun dhïwi wun, kɑ ógudhi wun wil wun. 3Wɑ ceg-ɑ dhwödhø kì keny, wɑ kedh-ɑ Betiil. Jwøng-ɑ ɑ́køny yɑn kì bøli keny-ɑ ɑ́bëëdɑ yɑ orɑngø, ógëddɑ ki këli lɑm kì kunɑni. Ábëëd e cyɑ̈dhi kɑ yɑn kì kɑ̈jj-ɑ ɑ́cyɑ̈dhɑ bënn.” 4Codhe, kɑ ngïjji jwögg-ɑ pɑth møg-ɑ yï gen, geki gwell-ɑ yïthhi gen bënn mëggi gen Yɑgob. Kɑ ge koony thɑ óthur-ɑ dwøng kì buti Cekïm yi Yɑgob.

5Codhe, kɑ Yɑgob odhwödhø geki wɑ̈dde kì kenyɑni. De tyëng myërr-ɑ cyɑ̈gi ɑ́göjji wɑ̈ɑ̈rø yi Jwøk, kɑ ge ocögø ge pɑ løg bɑng gen. 6Kɑ Yɑgob geki tyëng-ɑ cyɑ̈dhi ki en bënn kedh-ɑ Ludh, kɑɑl-ɑ cwølli ɑnɑn ɑ́ Betiil, kì piny Kɑnɑɑn. 7Kɑ Yɑgob ogëdø ki këli lɑm kì kunɑni, ɑcɑge gøn ɑ́ Betiil, ɑ wɑngi ød Jwøk, mɑ́ Jwøk ɑ́cwöb kì bøle kì kenyɑni wɑɑng-ɑ ɑ́pɑ̈ɑ̈re, e bwøg-ɑ ómen. 8Kɑ Debörɑ̀ 'mïdhi nyigi Rebekɑ̀ othøø, kɑ koony thɑ óthur-ɑ Betiil, kɑ kenyɑni cɑg gen ɑ́ “Óthuri Ywøg.”

9Keny-ɑ ɑ́dwöög Yɑgob kì Töör Arɑm, Jwøk ɑ́cwöb kì bøle kɑ gyëdhe. 10#Cɑ̈gø 32.28 Kɑ köbbi yi Jwøk kinni, “Nyingí cwøl ɑ́ Yɑgob, de yï pɑ cigi cwøllø yïn ɑ́ Yɑgob, nyingí ócwøl ɑ́ Isrɑil.” Codhe, ɑcɑge gøn ɑ́ Isrɑil. 11#Cɑ̈gø 17.4-8 Aköbbii yi Jwøk kinni, “Yɑ bene Jwøk Áyïmø. Nywøøl kɑ yï ngënyí, kɑ yï göög yïn ɑ́ pödhø. Yï ógöögø ki kweyi jurrì mø gïïr, kɑ yï løg-ɑ kweyi rɑ̈nhì. 12Piny-ɑ ɑ́mëggɑ Abrɑhɑm geki Isɑɑk ómëggɑ yïn, wuki kwɑrrí.” 13Akedhi Jwøk mɑl, kɑ gø wiye keny-ɑ ɑ́di gen. 14#Cɑ̈gø 28.18-19 Kɑ Yɑgob cwödh-ɑ piny ki kït kì keny-ɑ ɑ́kööb gen ki Jwøk, kɑ kömi kïnɑni kunye ki møgi oløg geki møw møg thyëye gøn Jwøk. 15Keny-ɑ ɑ́kööb yi Yɑgob geki Jwøk gø ɑ́cɑge ɑ́ Betiil.

Thøwi Rɑceel

16Kɑ ge odɑ̈gø kì Betiil. Kɑ Rɑceel pïïd yi pɑ̈dhi piny ge nuti wɑ̈nhi Eprɑtɑ̀ ki kɑɑm me lɑɑj, 17de ɑ́bëëd ɑ́ pɑ̈dhi piny me rɑɑj. Kɑ̈ng-ɑ bëëde e orɑngø kinøw, ɑköbbii yi gɑ̈ɑ̈mi kinni, “Yï ko böggi Rɑceel. Yï nywøl-ɑ wɑ̈d megø.” 18Wɑ̈nɑni ɑ́nywøl yi Rɑceel, de Rɑceel kiree ɑ́thøw. Wɑ̈nɑni ɑ́cɑge ɑ́ Ben Onì,#35.18 Ben Onì: Nyingɑni wɑng-ɑ “wɑ̈d rɑ̈ɑ̈m pyëwɑ,” ki dhøg Ibru. codhe ɑthøwe. De wɑ̈nɑni ɑ́døøg ki cɑgø yi wïye ɑ́ Ben Yɑmïn.#35.18 Ben Yɑmïn: Nyingɑni wɑng-ɑ “wɑ̈d cingi kyëj,” wɑlɑ̀ “wɑ̈d cingi kyëjɑ,” ki dhøg Ibru.

19Athøw Rɑceel. Kɑ koony kö yuu Eprɑtɑ̀, kɑɑl-ɑ cwøl ɑ́ Betleem ɑnɑn. 20Kɑ Yɑgob cwödh-ɑ piny ki kït kì wïj röre, ɑ́ kïn-ɑ nyi pɑɑr Rɑceel, gïti dicyɑ̈ngtïn, nud kì kenyɑni. 21Codhe, kɑ Yɑgob ódøøgø wɑ̈di yöö, kɑ gudd-ɑ buti ønbɑ̈r kì Eder.

Wɑ̈ddi Yɑgob

(1 Kwøb 2.1-2)

22 # Cɑ̈gø 49.4 Kɑ̈ng-ɑ ɑ́ying Isrɑil kunɑni, kɑ Ruben kedh-ɑ ri Bilɑ̀ cï wïye, kɑ møgɑni lïngi yi Isrɑil, kɑ pyëwe órënyø.

Yɑgob yïe ɑ́dɑ wɑ̈dd pyɑ̈rø wïdɑ́ryew. 23Wɑ̈ddi Leɑ̀ cï Yɑgob nyɑn-ɑ dwøng bɑ ɑ́bïkyel: Ruben, wɑ̈n-ɑ kɑyø, kí Cimeøn, kí Leebì, kí Yeudɑ̀, kí Isɑkɑr, kí Dhebulun. 24Ányöddi ki wɑ̈dd ɑ́ryew yi Rɑceel: Yosep kí Ben Yɑmïn. 25Ányöddi ki wɑ̈dd ɑ́ryew yi Bilɑ̀ bɑ̈ng Rɑceel: Dɑn kí Nɑptɑlì. 26Kɑ nyöddi ki wɑ̈dd ɑ́ryew yi Dhilpɑ̀ bɑ̈ng Leɑ̀, Gɑd kí Aceer. Bene gen wɑ̈ddi Yɑgob ɑgɑk, møg-ɑ ɑ́nywøl kì Töör Arɑm.

Thøwi Isɑɑk

27 # Cɑ̈gø 13.18 Kɑ Yɑgob kedh-ɑ yï wïye kì Mɑmɑrɑ̀ buti Kibrön, kun-ɑ ɑ́bëëd yi Abrɑhɑm geki Isɑɑk. 28Isɑɑk ɑ́bëëd ki runn miyø kí pyɑ̈r ɑ́bïdɑ̈g. 29Athøw Isɑɑk kì cyɑ̈ɑ̈n piny cyee, e rum yöø ki mendwøng. Kɑ kony yi Isøø geki Yɑgob wɑ̈dde.

Currently Selected:

Cɑ̈gø 35: shkDCB

Highlight

Copy