Cɑ̈gø 25

Kwɑrri Abrɑhɑm Møøgø

(1 Kwøb 1.32-33)

1Kɑ Abrɑhɑm ókɑ̈bbø dhɑjø me cwøl ɑ́ Keturɑ̀. 2Kɑ onywølø ki yɑɑg mø cwølli gɑ Dhimrɑn, kí Yokcɑn, kí Medɑn, kí Midyɑn, kí Icbɑk, kí Cuɑ̀. 3Yokcɑn ɑ bɑ wïyi Cebɑ̀ geki Dedɑn. Kwɑrri Dedɑn bene gen ɑ bɑ tyëng Acuur, kí Lethuc, kí Leum. 4Wɑ̈ddi Midyɑn bɑ Epɑ̀, Eper, Aɑnök, Abïdɑ̀, kí Eldɑ̀. Jøgɑni bënn bɑ kwɑrri Keturɑ̀.

5Abrɑhɑm jɑmme bënn ɑ́wïye Isɑɑk. 6De Abrɑhɑm kɑ̈ng-ɑ ɑ́bëëde e onëënø, wɑ̈dde møg-ɑ ɑ́nywøl yi mɑ̈nn-ɑ kyeelø ɑ́thödhe ki jɑmmì. Kɑ gï köbbe dɑ̈ɑ̈g gen. Ge ɑ́dɑ̈ggi kuni wɑɑng cyɑ̈ɑ̈ng mwøl, o ri gen lɑ̈ɑ̈w gen ki Isɑɑk.

Thøwi Abrɑhɑm kí Konye

7Abrɑhɑm ɑ́bëëd ki runn miyø kí pyɑ̈r ɑ́bïryew wïdɑ́bïj. 8Ákɑ̈l yi Jwøk e rum yöø ki mendwøng. Ábëëd ki keny me bɑ̈ɑ̈r ki bëëdø me døøj. 9Kɑ kony yi wɑ̈dde ryeet, ɑ løg Isɑɑk geki Icmɑil kì yij órøngi Kïti Mɑkpïlɑ̀ kì yij pwödhi Eprön kì buti Mɑmɑrɑ̀ (Eprön bɑ wɑ̈d Dhoɑr kwɑɑr Kit). 10#Cɑ̈gø 23.3-16 Abrɑhɑm ɑ́koony-ɑ buti cyëge Sɑrɑ̀, kì yij pwönh-ɑ ɑ́ngew yi en ki yï kwɑrri Kit. 11Kì bɑng kɑ ɑ́thøw Abrɑhɑm, kɑ Isɑɑk wɑ̈de gyëdh yi Jwøk. Isɑɑk ɑ́bëëd ɑ Bir Lɑhɑy Roì kì bøli kenyɑni.

Kwɑrri Icmɑil

(1 Kwøb 1.28-31)

12Bene kwɑrri Icmɑil wɑ̈d Abrɑhɑm ek: Äjer nyɑɑr Rïp, bɑ̈ng Sɑrɑ̀ ɑ bɑ meyi Icmɑil. 13Wɑ̈ddi Icmɑil ek, gɑ ɑwɑd ki këër nywølø, Nebɑyoth ɑ mɑl, bɑnge dɑ Kedɑr, kí Adbeel, kí Mibsɑm. 14Kí Micmɑ̀, kí Dumɑ̀, kí Mɑɑsɑ̀. 15Kí Adɑd, kí Temɑ̀, kí Yetur, kí Nɑpic, kí Kedemɑ̀. 16Bene gen wɑ̈ddi Icmɑil ɑgɑk. Bene nyingi gen ɑnɑn møg-ɑ ɑ́göög ki nyingi kɑ̈lli gen kì kɑ̈jj-ɑ bëëd gen. Ge ɑ́göög ki wɑ̈thi kɑ̈llì pyɑ̈rø wïdɑ́ryew. 17Athøw Icmɑil e runne bɑ miyø kí pyɑ̈r ɑ́dɑ̈g wïdɑ́bïryew. 18Ge ɑ́bëëd ɑ myërr-ɑ kɑɑm Abïlɑ̀ geki Cur, ge cyɑ̈gi ki Rïp, kì kö yuu Acuur, e ri gen rwööm gen ki kwɑrri nyiiwɑ̈n.

Nywøli Isøø geki Yɑgob

19Bene kwɑrri gøl Isɑɑk ek: Abrɑhɑm ɑ́nywøl ki wɑ̈d me cwøl ɑ́ Isɑɑk. 20Keny-ɑ ɑ́göög runni Isɑɑk ki pyɑ̈r ɑ́ngwen, ɑnywøme Rebekɑ̀, nyɑn-ɑ ɑ́kɑ̈ɑ̈l kì Misøpøtɑmiyɑ̀. Bɑ nyɑɑr Bethuel, o bɑ nyimï Lɑbɑn jɑl Arɑm. 21Cï Isɑɑk ɑ́dhɑ̈li yïddø ki dhɑnhø, kɑ Jwøng-ɑ Ácwɑ̈ɑ̈j kwɑjji yi Isɑɑk kipere. Kwɑ̈jji Isɑɑk ɑ́yïëy yi Jwøng-ɑ Ácwɑ̈ɑ̈j, kɑ Rebekɑ̀ ongølø ki dhɑnhø. 22Ábëëd e bɑ ɑcwegg ɑ yije, kɑ ɑcweggɑni ónyïɑ̈ggø kì yije. Kɑ okööbø kinni, “Á kipe ngø ɑ cuggi gïn ni men ki cwöbø.” Kɑ kedh-ɑ be pyëji Jwøng-ɑ Ácwɑ̈ɑ̈j.

23 # Röm 9.12 Kɑ köbbi yi Jwøng-ɑ Ácwɑ̈ɑ̈j kinni,

“Pödhh ɑ́ryew ɑ yijí,

yï ónywøl ki ji mø mɑ̈n ki ri gen.

Ákyel óbëëd e teg kibøli men-ɑ kyeelø.

Nyel-ɑ dwøng óbëëd ɑ́ bɑ̈ng nyel-ɑ thinh.”

24Keny-ɑ ɑ́wɑ̈nhi bøli kej pɑ̈dhi piny, kɑ pɑ̈dh-ɑ piny ki ɑcwegg-ɑ cwøw. 25Kɑ Ngör bï-ɑ wɑ̈g dële pɑ̈ng yi yëyy, de ce rug-ɑ lɑwø me kwɑrø, kɑ nyinge cɑg ɑ́ Isøø. 26Abëën Cyɑ̈n wɑ̈g e mïdh-ɑ tyeli Isøø, kɑ cɑg ɑ́ Yɑgob.#25.26 Yɑgob: Nyingɑni lïngi nɑ “tögi tyelø” ki dhøg Ibru. Ge ɑ́nywøl e Isɑɑk runne bɑ pyɑ̈r ɑ́bïkyel.

Muuji Kej Kɑyø yi Isøø

27Kɑ yɑnythønhø ódøngø. Isøø ɑ́göög ki jɑldwɑr, nyi mɑɑr-ɑ wïïnø kì pɑ̈l, de Yɑgob nyi tyer-ɑ bëëdø kì pɑc. 28Isɑɑk ɑ́mɑɑr-ɑ Isøø, mɑ́ e tyer-ɑ cɑm ki lɑ̈yyi dwɑr. De Rebekɑ̀ ɑ́mɑɑr-ɑ Yɑgob.

29Cyɑ̈ng ɑ́kyel e Yɑgob otɑ̈dø ki ɑ́dɑs, ɑbëën Isøø e kɑ̈ɑ̈l-ɑ be dwɑr. Ábëëd ree dɑ kɑ̈j. 30Aköbbe Yɑgob kinni, “Yɑ kwɑjj-ɑ yïn, nëngí yɑn ki gïn-ɑ kwɑrø ɑnɑn, yɑ ɑ́nyönhi yi kɑ̈j.” (Bene ɑ bɑnge døøgii be cwøllø yi teedø ɑ́ Edöm.#25.30 edöm: Nyingɑni wɑng-ɑ “kwɑrø” ki Dhøg Ibru.)

31Kɑ Yɑgob okööbø kinni, “Yï ónëngi yi yɑn keløg kejí, kej kɑyø ómëggí yɑn.”

32Kɑ Isøø okööbø kinni, “Yɑ bɑ men thøw ni men, kej kɑyø ɑ́ me gwøøg ngø yi yɑn?”

33 # Ibru 12.16 Kɑ Yɑgob okööbø kinni, “Köngí møti kinni kejí, kej kɑyø ɑ́mëggí yɑn.”

Isøø ɑ́köngi, kɑ keje mëgge Yɑgob. 34Kɑ Isøø nëngi yi Yɑgob ki ópun kí muli ɑ́dɑs. Kɑ ocyɑ̈mø, kɑ omɑ̈dhø ki pï. Kej kɑyø ɑ́ngëwwe Yɑgob.

Currently Selected:

Cɑ̈gø 25: shkDCB

Highlight

Copy