Cɑ̈gø 21

Nywøli Isɑɑk

1Sɑrɑ̀ ɑ́nudd e opɑrrø yi Jwøng-ɑ Ácwɑ̈ɑ̈j, kɑ møg-ɑ ɑ́kwøbe kinni gï ógögge Sɑrɑ̀ gwøge. 2Kɑ Sɑrɑ̀ óyïddø’ dhɑnhø, kɑ Abrɑhɑm nyödde ki wɑ̈d, e rum yöø yøw, kì bøli keny-ɑ ɑ́kwøb yi Jwøk ceth. 3#Ibru 11.11 Kɑ Abrɑhɑm wɑ̈de cɑge ɑ́ Isɑɑk, eni wɑ̈n-ɑ ɑ́nywøl yi Sɑrɑ̀. 4#Cɑ̈gø 17.12; Gwøg 7.8 Kɑ Isɑɑk ngøle keny-ɑ ɑ́göög cyɑ̈ngge gɑ ɑ́bïdɑ̈g ni kɑ ɑ́köbbii yi Jwøk. 5Abrɑhɑm runne ɑ́bëëd gɑ miyø keny-ɑ ɑ́nywøøl Isɑɑk. 6Kɑ Sɑrɑ̀ okööbø kinni, “Jwøk yɑ ɑ́wëgge ngedhø. Ngɑn-ɑ ólïngi møg, óngedhi kyeel ki yɑn. 7Bong dhɑnhø mɑ ɑ́rum kinni yɑ ócuggø nyöddi Abrɑhɑm ki nyir, de cɑgg ɑ́ kɑ̀ yöø Abrɑhɑm ni men, nuti nyöddø yi yɑn ki wɑ̈d?”

8Isɑɑk ɑ́døngi ɑpønii. Kɑ Abrɑhɑm ogöögø ki ryëj me dwøng keny-ɑ ɑ́pønii.

Ryemi Äjer geki Icmɑil

9De Sɑrɑ̀ Icmɑil, wɑ̈n-ɑ ɑ́nyölli Abrɑhɑm yi Äjer ɑ́lidhe cyɑ̈ng ɑ́kyel e otugø geki wɑ̈de Isɑɑk. 10#Gɑl 4.29-30 Aköbbe Abrɑhɑm kinni, “Ryem bɑ̈ng geki wɑ̈de, mɑ́ wɑ̈d bɑ̈ng pɑ cuggi lɑ̈gø ki jɑmmì kyeel geki wɑ̈dɑ Isɑɑk.” 11Kɑ pyëw Abrɑhɑm órënyø yi møgɑni mɑ́ Icmɑil bɑ wɑ̈de thyew. 12#Röm 9.7; Ibru 11.18 De Abrɑhɑm ɑ́köbbi yi Jwøk kinni, “Pyëwí ko rɑ̈ɑ̈m kipe nyelthinh geki Äjer bɑ̈ngí. Gwøg gïn-ɑ óköbbi yïn yi Sɑrɑ̀. Kwɑrr møg-ɑ ɑ́kømmi yi yɑn ge ónywøl-ɑ yi Isɑɑk. 13Kwɑrri Icmɑil ógwøg yi yɑn gɑ pödhø me dwøng mɑ́ e bɑ wɑ̈dí thyew.”

14Adhwödh Abrɑhɑm kì mwøl ceth, kɑ ókɑ̈bbø ki ópun kí ɑtheeb pï. Kɑ gï mëgge Äjer, ɑryeme gøn geki wɑ̈de. Kɑ Äjer ókedhø e cyɑ̈dhi e muumø kì yij pɑ̈ɑ̈l Bircebɑ̀. 15Keny-ɑ ɑ́thumi pï kì yij ɑtheb, ɑcïbe nyelthinh thɑ yɑdh. 16Codhe, ɑkedhe kɑ pëgg-ɑ piny kì wɑ̈ye ki kɑɑm me bɑ mïtïr miyø, mɑ́ e ɑ́kööb kinni, “Wɑ̈dɑ pɑ thøw e onennø yi yɑn.” Ápëggi kenyɑni kɑ ócɑ̈gø ywøg.

17Nyelthinh ɑ́lïngi yi Jwøk e óywöngø, kɑ Äjer cwøl yi wëywöni Jwøk kì mɑl kinni, “Äjer, ɑ́ ngø ɑ ɑ́bɑ̈jji? Yï ko böggi! Nyelthinh ɑ́lïngi yi Jwøk e óywöngø. 18Dhwöödh kɑ kwɑɑny. Kwɑrre ógwøg yi yɑn gɑ pödhø me dwøng.” 19Codhe, kɑ Äjer nyinge yieb yi Jwøk, ɑlïdhe ki yith. Kɑ kedh-ɑ wïj yiinhɑni, ɑpɑ̈nge ɑtheb ki pï, ɑnënge nyelthinh ki pï kɑ ómɑ̈dhø. 20Kɑ nyelthinh mïdhi yi Jwøk kɑ ódøngø, e bëëd ɑ yij pɑ̈ɑ̈l Pɑrɑn, kɑ ogöögø ki jɑlpöd ki weth. 21Kɑ muuj ki dhɑjø yi meye kì Rïp.

Rebi Kwøb yi Abrɑhɑm geki Abimelek

22 # Cɑ̈gø 26.26 Kì bøli kenyɑni, kɑ Abimelek geki Piköl pënyi linye, Abrɑhɑm köbbi gen kinni, “Gïg-ɑ gøggi yi yïn bënn nyi kunyy-ɑ yïn yi Jwøk. 23Anɑn, köngí kì bøli Jwøk kinni bong gïnrɑj men-ɑ ógöggí yɑn, wɑlɑ̀ nyigɑ geki kwɑrrɑ dhuki megø. Bëëd ki bëëndøj ceth ki ji møg-ɑ kelli gen bëëd yi yïn, yïn ɑ́ wëdh, ni kɑ ɑ́bëëdɑ ki bëëndøj ki yïn ceth.”

24Kɑ Abrɑhɑm okööbø kinni, “Møgɑni ómïdhi yi yɑn.”

25Acɑ̈gi Abrɑhɑm ki gøønyi bɑ̈ng Abimelek men-ɑ ɑ́kɑb yith kì yï Abrɑhɑm. 26De Abimelek ɑ́löggi kinni, “Ngɑn-ɑ ɑ́gwøg gïn ni menɑni kwïj yi yɑn. Møgɑni nuti köbbi yɑn yi yïn, gïti dicyɑ̈ngtïn.” 27Codhe, kɑ Abimelek nëngi yi Abrɑhɑm ki dyëg kí dhög. Kɑ lwöbø reb yi gen. 28Kɑ Abrɑhɑm dyëg römm ɑ́bïryew peeje bøli Abimelek. 29Apyëëj Abrɑhɑm yi Abimelek kinni, “Á kipe ngø ɑ cïb dyëg römm gɑ ɑ́bïryew wɑ̈yi gen?”

30Alöggi Abrɑhɑm kinni, “Kwɑny dyëg römm møg kì yïɑ, gɑ møg nyodh kinni yï ɑ́yïëy kinni bɑ yɑn ɑ ɑ́kony yiinh.” 31Codhe, ɑcög kenyɑni e cwøl ɑ́ Bircebɑ̀, mɑ́ kenyɑni ɑ yije ɑ́köngi yi gen ryeet.

32Keny-ɑ ɑ́rum Abrɑhɑm ki lwöbø, kɑ dhøggi gen nywɑg gen geki Abimelek, kì Bircebɑ̀, kɑ Abimelek geki Piköl pënyi linye døøg-ɑ piny Pelistiyɑ̀. 33Apïïdh Abrɑhɑm ki kwël ólɑm kì Bircebɑ̀, kɑ Jwøng-ɑ Ácwɑ̈ɑ̈j, Jwøng-ɑ Nëënø gïti ɑtheer mɑlli yi en. 34Kɑ Abrɑhɑm obëëdø ɑ́ wëdh kì piny Pelistiyɑ̀ ki keny me bɑ̈ɑ̈r.

Currently Selected:

Cɑ̈gø 21: shkDCB

Highlight

Copy