Tuk 23

Lia̱a̱ Thara

1Guäth ëë ci Thara te te̱e̱kä kɛ run ti kuɔ̱r wi̱cdɛ jiɛn da̱ŋ rɛw wi̱cdɛ bärɔw, 2cuɛ li̱w kä Kir-yath-ar-bä min la Ɣɛb-ron rɛy rööl Kɛ-naan. Cu A-bɛ-ram wä guäth liethdɛ kɛ ɣöö bɛ jɛ wä par. 3Kä min cɛ thuɔ̱k kɛ pa̱r ciëkdɛ, cuɛ jɛ ba̱ny piny kä cuɛ ruac kɛ gaat Ɣɛ̈th jio̱kɛ kɛ i̱, 4“Ɛ ɣän raan rööl go̱lä, kä ciëŋä rɛydun ala ram mi jääl. Bia muɔcɛ ɣä mun kunyä kɛ yɛ kɛɛl kɛ ɣöö dëë ciekdä cu kony.” 5Cu gaat Ɣɛ̈th A-bɛ-ram loc, 6“A lɔcdu kɔ̱c, liŋ ruacda. Ji̱n lapi kuäär mi ŋun Kuoth rɛyda. Kony ciekdu muun kunyä min gɔaa ni jɛn kä gua̱th kunynikɔ. Thilɛ ram kɛl kä kɔ mi dëë ji̱ pën kɔa̱a̱k kunyä mi de̱ri raandu kony thi̱n.” 7Min ci A-bɛ-ram ɛ liŋ, cuɛ rɔ goŋ nhiam ji̱ dhɔaar ɛmɔ, tin la gaat Ɣɛ̈th, 8kä cuɛ kɛ jiök i̱, “Mi nhɔakɛ jɛ ɛ thuɔ̱k ɛn ɣöö bä raandä kap guäth kunyä, nhɔakɛ jɛ ɛn ɣöö bia wä ruac kɛ kui̱dä nhiam Ɛp-rɔn gat Dho-ɣar, 9kä a jɛ käm ɣä kɔa̱a̱k kunyä Mak-pe-la min la duŋdɛ, jɛn kɔa̱a̱k in te pe̱e̱k kakädɛ, a jɛ käm ɛ ɣä nhiamdun kɛ pe̱k ko̱kädɛ kɛɛliw, ala gua̱a̱th kunyä kɛ kui̱ nɛɛnikä.” 10Ɛp-rɔn puɔ̱nydɛ tëë rɛy kuayni Ɣɛ̈th tin kɔ̱kiɛn, kä mëë cɛ mëë ca lar ɛ A-bɛ-ram liŋ, cuɛ A-bɛ-ram cu loc nhiam nath diaal tëë ca rɔ̱ dol thok rɛ̈ɛ̈k i̱, 11“/Ciɛ jɛn, kuäär! Liŋ ruacdä. Ɣän bä ji̱ moc kɛ muc, jɛn kak kɛnɛ kɔa̱a̱k kunyä ni kɛɛl cä jɛ thöp ji̱ kɛ muɔ̱c, cä ka̱m ji̱ nhiam nɛɛnikä. Ɛ jɛ nɔ, ku raandu wä kony.” 12Cu A-bɛ-ram rɔ lɛni goŋ nhiam ji̱ dhɔaar ɛmɔ, 13kä cuɛ ruac kɛ Ɛp-rɔn nhiamdiɛn, kä cuɛ jɛ jiök i̱, “Ɣän /cä dëë me̱t nhɔk ɛnɔ. A ji̱ ka̱mä pe̱k ko̱kä kakä. Käp ɛ, kä jakni ɣä kä wa̱a̱ raandä kony thi̱n.” 14Cu Ɛp-rɔn ɛ loc i̱, 15“A lɔcdu kɔ̱c, liŋ ruacdä. Ɛ ku ŋu mi tëërnɛ kamädan, ɛn kak kökdɛ ɛ yio̱w ti kur ŋuaan. Ku raandu wä kony thi̱n.” 16Cu A-bɛ-ram ɛ nhɔk, kä cuɛ Ɛp-rɔn ka̱m pe̱k yio̱o̱ni tin cɛ la̱r jɛ, kä cuɛ kɛ ka̱m jɛ nhiam gan Ɣɛ̈th diaal, yio̱w ti kur ŋuaan. 17Kä inɔ, cu kak Ɛp-rɔn in te kä Mak-pe-la gekä Ma-mɛ-ri, kɛnɛ kɔa̱a̱k kunyä kɛ jiɛn diaal tin te rɛydɛ, 18cuɛ la duŋ A-bɛ-ram kä cu gaat Ɣɛ̈th tëë ca rɔ̱ dol thok rɛ̈ɛ̈k a nëën. 19Niɛ wa̱nɔ cu A-bɛ-ram ciekdɛ ni Thara wä kony kɔ̱k ɛmɔ dhɔɔr in cɔal i̱ Ɣɛb-ron ro̱o̱l Kɛ-naan. 20Ɛ jɛ nɔ, cu A-bɛ-ram rɔ jëk mun kä gaat Ɣɛ̈th, jɛn mun kɛnɛ kɔa̱a̱k kunyä min te rɛydɛ ala gua̱a̱th kunyä.

Currently Selected:

Tuk 23: nusNHB

Highlight

Copy