1 Tham 26

Nyɔak Dee-bid kɛ päl na̱k Thɔɔl

1Ɛ jɛn cu ji̱ Dhip Thɔɔl ben jiök kä Giba i̱, “/Ciɛ Dee-bid ɛnɛ ci rɔ tɛ̱̈ɛ̱̈ rɛy pa̱a̱m kä Ɣä-ki-laa min lot ni Yɛ-ci-mon ɔ?” 2Inɔ cu Thɔɔl ben rɛy dɔaar kä Dhip, kɛ nɛy ti bathdɔɔri diɔ̱k ti ca kuany rɛy ji̱ I-thɛ-rɛl, wa Dee-bid go̱r rɛy dɔaar kä Dhip. 3Kä cuɛ pua̱t thaar pa̱a̱m A-ki-la, gekä duɔ̱p in lot ni Yɛ-ci-mon. Duundɛ ɣöö cu Dee-bid ŋot cieŋɛ rɛy dɔaar. Kä min cɛ jɛ ŋa̱c i̱ guur Thɔɔl ɛ rɛy dɔaar. 4Cuɛ lieem ja̱k, kɛ ɣöö ba wä ŋa̱c mi ci Thɔɔl ben. 5Kä cu Dee-bid ben guäth in ci Thɔɔl pua̱t thi̱n. Kä cuɛ gua̱a̱th in tɔ̱ɔ̱c Thɔɔl thi̱n tit, kɛnɛ Ä-bi-ner gat Ner, bo̱o̱th rɛ̈mdɛ. Kä Thɔɔl tɔ̱ɔ̱cɛ rɛy kɛmɛkä, ku rɛm lɛ tɔ̱ɔ̱c gekädɛ.

6Kä cu Dee-bid Ä-ɣi-mɛ-lɛk raan Ɣɛ̈th kɛnɛ Yo-ab däman Ä-bi-cay gat Dhɛ-ru-yaa jiök i̱, “Ɛŋa ba̱kɔ wä kɛɛlɔ kɛmɛkä Thɔɔl?” Kä cu Ä-bi-cay wee i̱, “Banɛ wä kɛɛl.” 7Kä cu Dee-bid kɛnɛ Ä-bi-cay wä kä rɛm Thɔɔl kɛ wäär. Ɛn wi̱ni Thɔɔl cɛ niɛɛn rɛy kɛmɛkä, cɛ mutdɛ cak piny wi̱i̱dɛ. Kä Ä-bi-ner kɛnɛ rɛm cikɛ niɛɛn gekädɛ. 8Kä cu Ä-bi-cay Dee-bid jiök i̱, “Ci Kuoth ji̱ ka̱m gua̱n tɛ̈ru ɛn walɛ. Kɛ kui̱c ɛmɔ ku ɣä jak kä yiathä jɛ piny kɛ mut, bä yiɛth kɛ yiëth ɛ kɛlɔ cä rɛwdɛ bi nyɔk.” 9Kä cu Dee-bid ɛ loc i̱, “Cu jɛ näk. Kɛ ɣöö ɛŋa bi ram mi ca kuany ɛ Kuoth Nhial näk ɔ, mɔ bia̱ gua̱n dueeri mɔ?” 10Kä cu Dee-bid wee i̱, “Nikɛ ciöt Kuɔth Nhial in tëk, bi Kuoth Nhial jɛ näk, kiɛ bi cäŋ liethdɛ ben. Kiɛ ba jɛ näk ko̱o̱r. 11Lo̱k Kuoth Nhialɛ ɛn ɣöö bä ram mi cɛ kuany näk. Duundɛ ɣöö käni mut ɔ te wi̱i̱dɛ mɔ kɛnɛ cuk pi̱i̱ni, banɛ wä.” 12Cukɛ mut kɛnɛ cuk pi̱i̱ni ka̱n wi̱i̱ Thɔɔl. Kä cukɛ jiɛn. Kä thilɛ ram mi cu jɛ ŋa̱c kiɛ cu jɛ nɛn. Kɛ ɣöö ca kɛn diaal kuer nien ɛ Kuoth Nhial.

13Kä cu Dee-bid wä kui̱ pa̱a̱m nhial, cɛ kɛ moc kam mi di̱i̱t. 14Kä cuɛ rɛm cɔl, kɛ Ä-bi-ner gat Ner wee i̱, “/Ci ɣä liŋ inu Ä-bi-ner?” Kä cu Ä-bi-ner wee i̱, “Ɛ ji̱n ŋa cɔɔl kuäärɔ?” 15Kä cu Dee-bid wee i̱, “A /ci ji̱n kua̱ wut? Kä ɛŋa päär kɛ ji̱ mɔ kä I-thɛ-rɛl? Kä ɛŋu /ci kuääru gaŋ ɔ? Kɛ ɣöö tëë kɛ ram mi ci kuääru näk. 16Kä ɛn nɔ ci la̱t ɔ /cɛ gɔaa. Nikɛ ciöt Kuɔth Nhial in tëk, ro̱ŋi nikɛ lia̱a̱, kɛ ɣöö /keni kuääru gaŋ, min ca kuany Ɛ Kuoth Nhial. Täämɛ guicɛ mut kua̱r kɛnɛ cuk pi̱i̱ni tin te wi̱i̱dɛ a ni kä.”

17Kä cu Thɔɔl jɔw Dee-bid ŋic, cuɛ wee i̱, “Ɛ gatdä ni Dee-bid inu?” Kä cu Dee-bid ɛ loc i̱, “Ɛ jɔwdä, kuäärä.” 18Kä cu Dee-bid wee i̱, “Ɛŋu guur kuäärä läätdɛ mɔ? Ɛŋu cä la̱t ɔ? Kä ɛ duer ŋukä cä la̱t ɔ? 19Kɛ kui̱c ɛ mɔ täämɛ liŋ ruacdä lö kuäärä. Mi ɛ Kuoth Nhial ci ji̱ jäk kä ɣä mɔ, a jɛ nhɔk muc. Kä mi kɛ naath cakɛ kuɛth nhiam Kuɔth Nhial, kɛ ɣöö ca ɣä juɔc raar ɛn walɛ kɛ ɣöö cä bi tekɛ kui̱c kä nyin Kuɔth Nhial, laar kɛn ɛ i̱ ‘Wër pal ni kuth kɔ̱kiɛn.’ 20Kä cu riɛmdä bi jak kä lony piny guäth mi dɔ̱ŋ ɛ /ci mɔ a gua̱th Kuɔth Nhial. Kɛ ɣöö ci kuäär I-thɛ-rɛl ben go̱r ni cak, ce̱tkɛ ram mi kak ŋɛc rɛy päämni.”

21Kä cu Thɔɔl wee i̱, “Cä duer la̱t. Ku luny jɔk Dee-bid gatdä, cä ji̱ bi nyɔk kɛ lät kä mi jiääk, kɛ ɣöö tëkdä cɛ gɔaa waaŋdu ɛn walɛ. Nɛnɛ ɣän ca ɣä dɔ̱a̱r kä cä mi jiääk la̱t.” 22Kä cu Dee-bid wee i̱, “Mut ɛn kuäär, ɛ ŋuɛ̈t kɛl ɛ ben naŋ. 23Bi Kuoth Nhial ram ɔ moc ce̱tkɛ cuŋkɛ kɛnɛ ŋa̱thdɛ. Kɛ ɣöö ci Kuoth Nhial ji̱ ka̱m ɣä ɛn walɛ, kä /ci ɣän ram mi ca kuany ɛ Kuoth Nhial dëë näk. 24Kä nɛnɛ ce̱tkɛ mɔ gɔaa tëkdu mɔ waaŋdä, inɔ bä tëkdä gɔaaɛ kä Kuoth Nhial, Kä bɛ ɣä kän rɛy rikni diaal.” 25Kä cu Thɔɔl Dee-bid jiök i̱, “Ɛ puɔ̱th tekɛ ji̱ Dee-bid gatdä! Bi ti nyin ŋuan la̱t, kä bikɛ rɔ lot.” Cu Dee-bid wä dupdɛ, kä cu Thɔɔl loc wi̱c.

Currently Selected:

1 Tham 26: nusNHB

Highlight

Copy