Jɔn 17

Yecu Aläŋ ë Biäk de Kɔckɛn ë Piööcë

1Na wën, acï Yecu kakë lueel, ke jɔ enyin jat nhial, ku lueel an, “Wäär, kööl acï bɛ̈n, gämë Wëndu dhuëëŋ, ke Wëndu bï yï tɔ yök dhuëëŋ aya. 2Acït man cï yïn e gäm riɛl ë tiɔp nɔm ëbɛ̈n, ke bï kɔc gäm pïïr athɛɛr, kɔc cï gäm en kedhie. 3Ku kënë yen aye pïïr athɛɛr an, Ŋïny bï kek yïn ŋic, yïn Nhialic yic, yïn yïtök, ku ŋickï Yecu Kërtho raan ë yïn ë toc en. 4Yïn cä tɔ yök dhuëëŋ ë piny nɔm, luɔi cï gäm ɛn, an, bä looi, acä thöl. 5Ku ënɔɔnë, yïn Wäär, tɔ ya yök dhuëëŋ wokë yïn ëtök, në dhuëëŋ ɣɔn cath ke yɛn wokë yïn ëtök ɣɔn ŋootë piny ke liu.

6Yɛn ë kɔc nyuöth rinku ëgɔk, kɔc wään cï gäm ɛn ë piny nɔm: aake ye kɔcku, ku yïn aa gëm ke yɛn, ku acïk jamdu muk, 7ku acïk ŋic ënɔɔnë nɔn ë bï käŋ tëde yïn, ka cï gäm ɛn kedhie. 8Ku wël wään gämë yɛn acä ke gäm keek, ku acïk ke dɔm, agokï ŋic ëgɔk nɔn ë bä yɛn tëde yïn, ku gamkï nɔn ee yïn ë toc ɛn.

9“Yɛn läŋ në biäkden: yɛn cïï läŋ në biäk de kɔc ke piny nɔm, ee biäk de kɔc wään gämë yɛn, luɔi ee kek kɔcku. 10Ku kakï kedhie ee kaku, ku kaku ee kakï: ku yɛn ee dhuëëŋ yök ë keyiic. 11Ku ënɔɔnë, yɛn cïï be nu ë piny nɔm, ku nu kɔckë ë piny nɔm, ku la tëde yïn. Wäär, Raan ɣeric, muk kɔc në rinku, kɔc cï gäm ɛn,#17:11: Muk keek apiɛth në riɛl de rinku, rin cï gäm ɛn; këcïgɔ̈ɔ̈r däŋ ade yic Në riɛl de rinku muk kɔc cï gäm ɛn apiɛth. ke ke bï aa raan tök, cït man ë wok wo yïn. 12#Diɛt 41:9; Jɔn 13:18. Të wään nuö yɛn wo keek ëtök ë piny nɔm, acä ke muk apiɛth ë rinku:#17:12: Acä ke muk apiɛth në riɛl de rinku, rin cï gäm ɛn; këcïgɔ̈ɔ̈r däŋ ade yic Në riɛl de rinku yɛn cï kɔc cï gäm ɛn muk apiɛth. kɔc cï gäm ɛn acä ke tiit, ku acïn raan tök ë keek cï määr, ee wën ë määr ë käŋ ëtök, ke këcïgɔ̈ɔ̈r bï aa yic. 13Ku ënɔɔnë, yɛn lɔ tëde yïn, ku yɛn luel kakë ë piny nɔm, ë luɔi bï kek cath ë miɛt de yɛnpiɔ̈u, abïk piɔ̈ɔ̈th a yum. 14Acä ke gäm jamdu, ku acï kɔc ke piny nɔm ke maan gup, luɔi cïï kek ee ka ke piny nɔm, cït man ë yɛn, yɛn cie këde piny nɔm. 15Acie luɔi bï yïn ke bɛ̈ɛ̈i bei ë piny nɔm en läŋ, ee luɔi bï yïn ke gël ë kërac. 16Acïkï ee ka ke piny nɔm, cït man ë yɛn, yɛn cie këde piny nɔm. 17Tɔ ke ɣerpiɔ̈ɔ̈th në yicdu: jamdu yen aye yic. 18Acït man cï yïn a tuɔɔc ë piny nɔm, yen aa tuɔɔc ɛn keek ë piny nɔm aya. 19Ku në biäkden yen a ta yɛn a piɔ̈u ɣer, ke ke bï tɔ ɣerpiɔ̈ɔ̈th aya në yic.

20“Ku acie biäk de kɔckë kapäc yen läŋ, ee biäk de kɔc bï a gam në biäk de jamden aya, 21ke ke bï aa raan tök kedhie, acït man nu yïn ë yayic, Wäär, ku nuö ë yïyic, ke ke bï aa raan tök në woyiic ayadäŋ: ago kɔc ke piny nɔm gam nɔn ee yïn ë toc ɛn. 22Ku dhuëëŋ cï gäm ɛn acä gäm keek, ke ke bï aa tök, cït man ee wok tök: 23yɛn ë keyiic, ku yïn ë yayic, ke ke bï dikëdik abïk aa tök, ago kɔc ke piny nɔm e ŋic nɔn ee yïn ë toc ɛn, ku nɔn cï yïn keek nhiaar, acït man nhiɛɛr yïn ɛn.

24“Yïn Wäär, kɔc cï gäm ɛn, yɛn de piɔ̈u luɔi bï kek aa tɔ̈u në yɛn ëtök të nuö yɛn thïn, ke ke bï dhuëëŋdï tïŋ, dhuëëŋ cï gäm ɛn, nɔn cï yïn a nhiaar ɣɔn ŋootë piny ke kënë cak. 25“Wäär, Raan piɛthpiɔ̈u, yïn kuc kɔc ke piny nɔm, ku yïn ŋiɛc, ku ŋic kɔckë nɔn ee yïn ë toc ɛn. 26Ku acä ke tɔ ŋic rinku, ku abä ke tɔ ŋic, ke nhiëër ee yïn a nhiaar bï nu ë keyiic, ku nuö ë keyiic.”

Currently Selected:

Jɔn 17: dip-JPB

Highlight

Copy