Cäk 40
40
Jothep Awer Nyuöth ke Kɔc Mac Yiic
1Na ɣɔn në nïn likakäŋ, ke raan ee mäu ke melik de Rip thiëëp, kekë raandɛn ee yen thäl kuïïn cï pam ë ke wäc melik piɔ̈u. 2Go melik piɔ̈u diu ke keek kaarou. Raan ee yen thiëp mäu, kekë raan ee ye thäl kuïïn cï pam. 3Go ke lɔ mac ɣön ë bɛ̈ny ë ɣönde tiit thok, të mɛc ë Jothep thïn. 4Na ɣɔn, acïk nïn juëc thöl ke ke mac, ke bɛ̈ny ee ɣöt tiit thok ë kuany Jothep bï keek aa luööi. 5Na ɣɔn, në wɛ̈ɛ̈r tök ke ke ŋoot ë ke mac, ke raan ee mäu thiëëp ë nyuöth, ku nyuöth bɛ̈ny ee kuïïn cï pam thaal ayadäŋ. Ku nyuöth ë ŋɛk aluel kë wuöc ke nyuöth ë ŋɛk däŋë. 6Na wën, aa riëël Jothep ɣɔn amiäk, ke yök keek ke ke cïï piɔ̈ɔ̈th mit. 7Go ke luɔp an, “Eeŋö dïït cä wek wenyïïn nyuan aya ee köölë?” 8Gokï puɔ̈k nɔm en an, “Wok ë nyuöth wën akɔ̈u, ku acïn raandan wëër keyiic wook.”
Go Jothep lɛ̈k keek an, “Ee Nhialic Yen ee raan gäm riɛl yen nyuöth weeriic, ka week guiëërkï yɛn nyuöthkun.”
9Go raan ee mäu ke melik thiëëp nyuöthde tɛ̈t Jothep, lueel an, “Në nyuöthdï yic, ade tim de enap ë kääc në yanɔm tueŋ. 10Tim de nɔm kër kadiäk. Na wën, aa nyok ë kër, ke ke go akɛɛn moc ëthiäu, ku gokï luɔk ë mïth ke enap. 11Ku yɛn aa muk abïny ë melik në yaciin. Guɔ mïth ke enap tet, ku nyiɛɛth ke abïny ë melikic, ku gäm en.”
12Go Jothep lɛ̈k en an, “Këdɛn lueel kï: kërkë kadiäk ee nïn kadiäk. 13Në ee nïnkë yiic kadiäk, melik de Rip abï yï lony, ku pɛ̈l yïn awänydu. Ku abï yï puɔ̈k nɔm në luɔidu yic. Ka bä bɛ aa gäm abïnyde cït man ɣɔn yïn en kɔn gäm en. 14Ku të cï yï lony, ke yï ye nɔm tak në yɛn të mit yïn piɔ̈u. Yïn läŋ, an kok piɔ̈u we yɛn, ku jam we melik në biäk bï yen ɛn luöny bei aloocic. 15Ku ee kakë yiic kedhie, yɛn aa kual ɣɔn pinyda, piny ë Ɣeberuu. Ku ayï ënɔɔnë eenë piny ë Rip, yakï mac baaŋ ke cïn kë cä looi, kë rɔ̈ŋ ke mac.”
16Na wën, atïŋ ë bɛ̈ny ee kuïïn cï pam thaal nɔn cï Jothep nyuöth ë raan ee mäu ke melik thiëëp weeric ke piɛth, ke tët Jothep nyuöthde ayadäŋ. Lueel an, “Yɛn ë nyuöth ayadäŋ ke ya ɣɛ̈ɛ̈c aɣööth kadiäk ke kuïïn cï pam në yanɔm. 17Ku në aɣöth nu në aɣööth nïïm nhialë kedhie, ade yic kacaam ke melik nyïïn kedhie. Na wën, ke ciɛm ë diɛt keek në aɣöthic në yanɔm.”
18Go Jothep lɛ̈k en an, “Wër ë yicde kï: aɣööth kë kadiäk, ee nïn kadiäk. 19Në ee nïnkë yiic kadiäk, melik abï yï luöny bei, ku tɔ yï tëëmë nɔm bei. Ku kɛɛkë yï nhial në tim nɔm. Ku yïn bï diɛt cam.”
20Ku ëtɛ̈ɛ̈n, kööl ë ye akööl diäk, aaye kööl ë dhiëëth ë melik de Rip. Go dhuëëŋ dït luöi bänyke kedhie. Ku luny raan ee mäu thiëëp bei kekë raan ee kuïïn cï pam thaal. Ku bïï keek në lïïmke yiic. 21Go raan ee mäu ke melik thiëëp dak nɔm në luɔide yic. 22Ku le bɛ̈ny ee kuïïn cï pam thaal nöök ë tim nɔm. Ku käŋ kedhie, acïk röt bɛ̈n looi cït man wään cï Jothep ke lueel. 23Go raan ee mäu thiëëp nɔm lɔ määr në Jothep taitai, ku cïï be tak.
Currently Selected:
Cäk 40: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
