Cäk 19
19
Awäny dïït ë Thɔdom
1Na ɣɔn thëën, aa bɔ̈ tuucnhial kaarou Thɔdom, ke ke yök Lɔt ke rɛ̈ɛ̈r ë kal thok. Na wën, alɔ Lɔt ke tïŋ, ke gɔp rɔt loor kenïïm. Go yenɔm lɔ guöt piny ë kenïïm arëk abï piny jak në yenɔm. 2Ku lueel an, “Bänykï, wek liɛp an yalkï röt baai de lïmdun bäk wecök lɔ waak, ku niɛnkï ëtɛ̈ɛ̈n. Ku miäk wek duëër pääc aduduur, ku ŋuɔɔtkï ke we lɔ tueŋ.”
Agokï puk nɔm an, “Ei, wo bï niin ë pëëric eenë.”
3Go Lɔt keek lɔ̈ŋ ë caŋawën. Agokï lɔ baai në yen ëtök. Ago ke thäl kuïn, ku guïïrkï kamaan këcam piɛth, ku tɔkï kamaan cäm.
4Na wën, aŋoot kamaan ke ke kën guɔ tɔ̈c, ke kɔc ke Thɔdom ë ke geeu ɣöt piny kedhie: röör dït, ku dhuök kedhie, abïï ciën raan tök. 5#Bäny 19:22-24. Ku cɔlkï Lɔt, lëkkï yen an, “Kɔc wën bɔ̈ an bïk bɛ̈n niin ɣöndu, nukï ë nou? Yiɛ̈në ke wook buk keek bɛ̈n niɛɛn.”
6Go Lɔt lɔ biic të nu kek, ku thiöök ɣöt thok. 7Ku lëk keek an, “Wek läŋ mïthëkɔckuɔ, duökï kërɛɛc cït ë kënë loi. 8Piɛŋkï, yɛn de nɔm duet kaarou, duet kën kɔn yök në röör. Abä ke gäm week, bäk keek lɔ looi cït man ë kë kaarkï. Ku duökï kɔckë jak, në luɔi cï kek bɛ̈n në yacin.”
9Agokï lueel an, “Nyai në wonïïm, yïn ee raan lei, ye ŋa yïn? Ka yïn duëër wook jɔ nyuöth kë buk looi. Nyai në wonïïm, yïn buk luöi kërɛɛc wär kë buk luöi keek ënɔɔnthiinë.” Agokï Lɔt jäp ciëën, ku lekï an lek athïn dhoŋ. 10Ago kɔc kë kaarou bɛ̈n, ku pɛ̈ɛ̈rkï Lɔt cin, ku leerkï ɣöt, ku thiökkï ɣöt thok. 11#2 Mel 6:18. Ku cɔɔrkï kɔc kääc biic nyïïn kedhie, röör ku dhuök. Agokï ɣöt kɛ̈n bɛ̈n yök thok.
Lɔt ajäl Thɔdom
12Ago kɔckë kaarou lɛ̈k Lɔt an, “Na de yï nɔm kɔc kɔ̈k wut eenë, mïth ku duet, ku mïth ke wänmuuth, ku nɔn yen kɔckuön kɔ̈k nu ee wunë, ke bɛ̈ɛ̈iyë ke bei wutic. 13Në luɔi kɔɔr wok nɔn bï wok ee wunë riɔ̈ɔ̈k. Në baŋ cï kiɛɛu de kɔckë dït arëët tëde Bɛ̈nydït. Ka wok aa tooc ë Bɛ̈nydït buk bɛ̈n riɔ̈ɔ̈k.”
14Ago Lɔt lɔ tëde kɔc bï duɛtke thiaak, ku lëk keek an, “Jatkï röt ku dapkï jäl ë tënë, Bɛ̈nydït akɔɔr nɔn bï En ee wunë riɔ̈ɔ̈k.” Agokï yök cït man alɛɛŋ tei.
15Na ɣɔn amiäk aduduur, ke lëk ë tuucnhial Lɔt an, “Dap rɔt jɔt, ku jɔt tiiŋdu kekë duɛtku kaarou. Na cïï jäl, ke yïn bïï mat ë kɔc ke ee wunë yiic.” 16#2 Pet 2:7. Ago lɔ cuëŋ, gokï päär cin ku dɔmkï tiiŋde ciin kekë duetke kaarou, ku bïïkï ke bei wutic, aacï Bɛ̈nydït ke kony. 17Na wën, aa cïk keek bɛ̈ɛ̈i bei, ke lëkkï keek an, “Katkï ke we bï wëikun luök. Duökï kääc kueer, ku duökï wekɔ̈ɔ̈th liec. Ɣɛtkï ë kuriic ke we cï bï thou.”
18Ago Lɔt lɛ̈k keek an, “Ei, acie yen bänykï, duökï wook tɔ loi ë kënë. 19Wek ë ya luöi këpiɛth aläl, ku luäkkï wëikï. Kur ameckï aläl, ku riääk dïïtë abï wo yök ke wo ŋoot kueer. Ka yɛn bï thou ke ya kën ɣet ëtɛ̈ɛ̈n. 20Wun thiinë cak tïŋ? Athiɔ̈k aläl. Takï ya lɔ ëtɛ̈ɛ̈n. Aduɛ̈ɛ̈rkï tïŋ, ee të thiinakäŋ ku yɛn duëër ban.”
21Ago lɛ̈k en an, “Acïï rac, acä gam, yɛn cïï wun thiinë bï riɔ̈ɔ̈k. 22Riɛŋë, dap lɔ, acïn kë bä looi agut të bä wek kɔn ɣet wut.”
Ku në luɔi ë cï Lɔt en cɔɔl an wun koor, ke wut acï bɛ̈n cäk an Dhowar.#19:22: Dhowar: Rinkë në Ɣeberuu acït “koor.”
Riääk de Thɔdom kekë Gomoora
23Lɔt aɣet Dhowar ke akɔ̈l ë cï thok bɛ̈n. 24#Math 10:15; 11:23,24; Luk 10:12; 17:29; 2 Pet 2:6; Jud 7. Ago Bɛ̈nydït many de thulpuur dap guɔ wäl Thɔdom kekë Gomoora ëthiäu. 25Ku riëëk pɛ̈ɛ̈nydït ayï wak ëbɛ̈n, mɛt ke në kɔc nu ë pɛ̈ɛ̈nydït yiic ëbɛ̈n, agut cï ka ee cil piny. 26#Luk 17:32. Ago tiiŋ ë Lɔt yekɔ̈u lɔ̈ɔ̈k lieec, go rɔt puk ke ye mën de amilɔ.
27Na ɣɔn amiäk aduduur, ke Abraɣam ë riɛɛl të wään kɛ̈ɛ̈c en në Bɛ̈nydït nɔm. 28Ku woi Thɔdom kekë Gomoora, ku wak ëbɛ̈n. Ago tol tïŋ ke ë rɔt cɔ̈k nhial ëtɛ̈ɛ̈n, cït man ë tol nu ë pul dïït dëpë mac thïn. 29Yen tän de ka, të ɣɔn ë riëëk ë Nhialic pɛ̈ɛ̈nydït nu në wakic. Ku Nhialic akën nɔm määr në Abraɣam ɣɔn riëëk En pänydït rëër ë Lɔt thïn. Ago Lɔt tɔ bän ke cïn kë cï ye jak.
Të ë bïï Mowɛɛp ku Ammon
30Na wën, acï Lɔt riɔ̈ɔ̈c në luɔi bï yen rëër Dhowar, ke lɔ ë kuriic kekë duɛtke kaarou, lek rëër ëtök ë kuuric. 31Ago nyan kɛ̈ide lɛ̈k nyan thiinë an, “Wääda akɔɔr dhiɔp. Ku acïn raan tök në ee pinyë nɔm,#19:31: piny nɔm ëbɛ̈n; nɔn ee pinyë. raan bï wo thiaak agoku mïth dhiëëth. 32Tɔku wääda wit ë mɔ̈u. Ku buk tɔ̈c në yen, ke wo bï mïth yök në yen.” 33Agokï wuönden tɔ wit ë mɔ̈u në ee wɛ̈ɛ̈rë. Ku lɔ nyan kɛ̈ide ɣöt, tɔ̈ɔ̈c ke wun. Ku akën ë wun ë bɛ̈n yök të ë tɔ̈ɔ̈c en, ayï të ë be yen rɔt jɔt.
34Na ɣɔn amiäk, ke lëk ë nyan kɛ̈ide nyan thiinë an, “Yɛn ë tɔ̈c wën akɔ̈u wokë wää. Beku tɔ dëk ë mɔ̈u ee köölë ayadäŋ. Ku bä tɔ̈c wekë yen, ke wo bï nïïm dɛ mïth në wääda. 35Agokï wuönden tɔ wit ë mɔ̈u ayadäŋ në ee wɛ̈ɛ̈rë. Na wën, ke nyan thiinë ë jɔt rɔt, ku le tɔ̈c ke wun. Ku wuönden acï mɔ̈u wit aläl, ka akën bɛ̈n yök të ë tɔ̈ɔ̈c en, ayï të ë jɔt en rɔt. 36Yen luɔi ë yök ë duet ke Lɔt mïth ka kedhie në wuönden. 37Ago nyan kɛ̈ide mɛwä dhiëëth, go cäk an Mowap.#19:37: Mowap: Rinkë në Ɣeberuu acït “tëde wäär.” Yen aye kuɛɛrë Mowɛɛp nu ënɔɔnthiinë. 38Ku dhiëëth nyan thiinë mɛwä ayadäŋ, go cäk an Benami.#19:38: Benami: Rinkë në Ɣeberuu ee “wën de raanda” ku në Ɣeberuu acït “Raan de Ammon.” Ku yen aye kuɛɛrë kɔc ke Ammon ënɔɔnthiinë.
Currently Selected:
Cäk 19: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
