Luɔi 8

1Ku gam Thaulo thonde.

Paulo Ayɔŋ ɣön ë Nhialic

Na wën, ee aköölkë, ke yöŋ dït cak rɔt tëde ɣön ë Nhialic nu ë Jeruthalem, gokï thiëi roor piny ë Judaya ëbɛ̈n kekë Thamaria, keek kedhie, ee tuuc kapäc kek ë dɔ̈ŋ. 2Go kɔc riëëu Nhialic gokï Thepano jɔt lek thiɔ̈k, ku dhiëëukï ë dhiën dït.

3 # Luɔi 22:4,5; 26:9-11. Ku Thaulo yen aaye ɣön ë Nhialic riɔ̈ɔ̈k, ee lɔ ë ɣööt yiic kedhie, le ku dɔm röör ku diäär, mɛc keek ë aloocic.

Wëlpiɛth Awëëtë Keek ë Thamaria

4Na wën, ke kɔc cï thiëi roor ke ke lɔ ë baai yic ëbɛ̈n, lek kɔc guiëër jam. 5Ku lɔ Pilip pänydïït cɔl Thamaria, le kɔc guiëër Kërtho. 6Na wën, ke kuut ë kɔc ë ke gam ka lueel Pilip në piɔ̈n tök, wään piŋ kek göök cï looi ku tïŋkï keek. 7Jɔɔk rac acïk bɛ̈n bei ë kɔc juëc gup, kɔc cïk dɔm, ke ke cöt ë röl dït, ku dem kɔc juëc cï duany, ayï ŋöl. 8Go miɛtëpiɔ̈u dït ë pänydïïtë.

9Ku ade raan cɔl Thimon, raan wään ë kɔc thuëëth ë pänydïïtë guöp, ee kɔc de Thamaria tɔ gäi arëët, ku ye rɔt tɔ ye gök dïït ë raan, 10aake ye jamde piŋ kedhie, kɔc kor aɣɔ̈l röördït, aa yek lueel an, Raanë acath ke riɛl dïït ë Nhialic. 11Aake ye këde piŋ, luɔi cï en keek tɔ gäi në thuɛ̈th ë yen thuëth ëcaŋɣɔn. 12Na wën, aa cïk jam de Pilip gam, wään guïïr en ka ke ciɛɛŋ de Nhialic ku rin ke Yecu Kërtho, ke ke baptith, röör ayï diäär. 13Go Thimon guöp gam ayadäŋ: na wën, aacï baptith, ke ye cool ë rɛ̈ɛ̈r kekë Pilip, ku gɛ̈i, wën cï en göök cï looi tïŋ ayï kake gäi.

14Na wën, aacï tuuc nu Jeruthalem e piŋ nɔn cï Thamaria jam ë Nhialic gam, gokï Petero tuöc keek kekë Jɔn: 15Të cï kek bɛ̈n, ke ke läŋ Nhialic në biäkden an, bïk Wëidït ɣer nööm: 16Wëidït aake ŋoot ke ke kën bɛ̈n ë raan tök guöp ë keyiic: acï ke baptith tei në rin ke Bɛ̈nydït Yecu. 17Ku jɔkï kecin thany ë kegup, agokï Wëidït ɣer nööm.

18Na wën, aacï Thimon e tïŋ nɔn cï kɔc miɔɔc në Wëidït në thäny cï tuuc kecin thany ë kegup, ke jɔ an, gëm keek wëu an: 19“Gämkï yɛn ee riɛlë aya, ke raan bän a cin thany ë yeguöp ke bï Wëidït ɣer nööm.”

20Go Petero yɔ̈ɔ̈k an, “Ë wëuku ë ke mär ë yïn ëtök, luɔi cï yïn e lueel e yïpiɔ̈u nɔn duëërë miɔ̈c ë Nhialic ɣɔɔc ë wëu! 21Jamë yïn liu thïn ëliŋliŋ: piɔ̈ndu acïï piɛth ë Nhialic nyin. 22Yen puk yïn yïpiɔ̈u në kërɛɛcduön cï wööcë, ku jɔ Bɛ̈nydït lɔ̈ŋ, ke kë cï tak ë yïpiɔ̈u ke bï dɛ të bï e yiɛ̈n päl yïn. 23Yïn wɔi ënɔɔnë, yïn tɔ̈u ke yï kec piɔ̈u cït man ë keth, ku cïï kërac duut aril.”

24Go Thimon bɛ̈ɛ̈r an, “Läŋkï Bɛ̈nydït në këdï, ke bï ciën kë bï bɛ̈n ë yaguöp në ka wën cäk lueel.”

25Na wën, aa cïk guiëër guïïr kek kɔc jam ë Nhialic thöl, ke ke jɔ kenïïm dhuöny Jeruthalem, ku guïïrkï wëlpiɛth bɛ̈i ke Thamaria bɛ̈i juëc.

Pilip ku Bɛ̈ny de Ethiopia

26Na wën, ke tunynhial tuny ë Bɛ̈nydït jɔ Pilip yɔ̈ɔ̈k an, “Jɔt rɔt, lɔ të lɔ wöuwic, të nu kueer jël ë Jeruthalem le Gadha.” Kueer tëk ë jɔ̈ɔ̈ric. 27Go rɔt jɔt ku jël: ku ade mony ë Ethiopia, mony cï roc, ku ye bɛ̈nydïït de naamdɛn dït ë Kandake cök, tiiŋ melik de Ethiopia, ku nu monyë ë wëu nïïm kedhie, wëu ke tiiŋ melik, ku aacï bɛ̈n Jeruthalem bï bɛ̈n lam, 28ku dhuny enɔm ke rɛ̈ɛ̈r ë abëlde yic abël biic, ke kuen gäär ë tiët Yithaya yic. 29Na wën, ke Wëidït ë jɔ Pilip yɔ̈ɔ̈k an, “Lɔ tëthiɔ̈k, mätë rɔt kɔc ke abëlë yic.” 30Go Pilip kat le të nu yen, go piŋ ke kuen këcïgɔ̈ɔ̈r ë tiët Yithaya. Go thiëëc an, “Ŋic thar ë ke kuen?”

31Go lueel an, “Duɛ̈ɛ̈r ŋic adï, të cïn en raan bï a bɛ̈n nyuööth?” Go Pilip lɔ̈ŋ an, bä nhial, nyuc ë yalɔ̈ɔ̈m. 32#Yith 53:7,8 (LXX). Ku të wën kueen en këcïgɔ̈ɔ̈ric acï gɔ̈ɔ̈r alë an:

“Acï thel cït man ë amäl le teem röl,

Ku cït man ë nyɔɔŋ amääl lɔ lik ë raan nɔm raan tem nhïmke,

Yen a miim en aya.”

33Në kuur cï e tɔ koor en acï löŋde kuöc guiir.

Ku remde eeŋa bï ye lueel?

Luɔi cï wëike nyaai ë piny nɔm.”

34Go mony cï roc Pilip yɔ̈ɔ̈k an, “Yïn thiëëc an, ë tiët luel jamë ë këde ŋa? Ee këde yen guöp, ku ye këde raan däŋ?” 35Na wën, ke Pilip jɔ yethok tueer, ku gɔl jam ë cöök awën, ago guiëër ka ke Yecu. 36Na wën, të ciɛth kek kueer, ke ke jɔ ɣet të nu pïïu: go mony cï roc lueel an, “Tïŋ, pïïu kï, eeŋö pën a baptith?” 37Go Pilip lueel an, “Të gam yïn ë yïpiɔ̈u ëbɛ̈n, ke yïn duëërë baptith.” Go bɛ̈ɛ̈r an, “Yɛn gam Yecu Kërtho nɔn ee yen Wën ë Nhialic.”

38Go abël biic tɔ kääc: gokï lɔ piny kaarou lekï ë pïïu yiic, yen Pilip kekë mony cï roc, go baptith. 39Na wën, aa cïk bɛ̈n bei ë pïïu yiic, ke Wëi ke Bɛ̈nydït ke ke gɔp Pilip wei, ku akënë mony cï roc bɛ tïŋ, go kueerde dɔmic ku mit piɔ̈u. 40Go Pilip rɔt a yök Adhoto: go tëëk ë wuötiic kedhie, ke guiir wëlpiɛth, aɣet të cï en bɛ̈n Kaitharia.

Currently Selected:

Luɔi 8: dip-JPB

Highlight

Copy