Matiu 21

1Ban wa gbʊrɔ a Jerusalɛm nɩ a Betefagɩ a Olive Tɩɩr Tɔ̃ɔ ju, Yesu tʊ̃n a wʊ poturbo ayi, 2na wʊ 'yɛr kʊ ba, “Yɩ chen a tẽbile 'lɔ na be a yɩ niem, yɩn tɩ nyɛn bʊ̃ɔ ban lũ ka a bʊ̃pɔl ara kɔɔ wʊ, yɩ for yaa waan. 3Ala ɩ nɩrɛ wa sʊʊr yɩ naa, ‘Ŋmɩnɛ a yɩ foro a bʊ̃ɔ?’ Yɩ 'yɛr kʊ wʊ, ‘A Sɩ Soro lɛ bʊɔrɔ yaa.’ Wʊn bar sɔr ka yɩ foraa waan fɔɔ jaa.”

4A yele anyã ɩ na ka a na ɩ yelmãɛ a lɛ a Nãaŋmɩn 'yɛ'yɛrɛ na dɔ̃ɔ 'yɛr na wʊ 'yɛrɛ. 5“'Yɛr kʊ a Jerusalɛm nɩbɛ, ‘Nyɛ, a yɩ nãa waara na a yɩ sɛ̃. Wʊ siir wʊ mãɛ na wʊ do bʊ̃ɔ. Bʊ̃pɔl bile lɛ wʊ do waara nɩ.’ ” (Jekariya 9:9)

6A poturbo chen tɩ tʊ̃ a lɛ a Yesu na 'yɛr ɩka ba ɩ. 7Ba waan na a bʊ̃ɔ nɩ a bʊ̃pɔl bile na ba de a ba fɔɔr 'yɩɛr dɔɔl, ka wʊ do jãnɛ a bʊ̃pɔl ju. 8Nɩyɔɔ 'yɩɛr a ba fɔɔr a sɔr pɔ ka bamɩne mɩ 'mɛl vaɩ 'yɩɛr a sɔr pɔ. 9A nɩyɔɔ bala na be a niem nɩ a bala na turo a puor chɩlɛ na 'yɛrɛ, “Yãan yooo, Nãa David Bie! Nãaŋmɩn wʊ sʊ̃ʊ a 'lɔ wʊn tʊ̃! (Yiel Gãn 118:26) Yãan yooo, dãnfʊ wʊ ta a saaju Nãaŋmɩn.”

10Wʊn wa kpɛ a Jerusalɛm tẽe pɔ, a nɩbɛ ba jaa ɩrɛ na yulõbʊmm, na ba sʊrɔ, “An lɛ a nyã?”

11Ka a nɩyɔɔ bala na turo wʊ 'yɛr, “Nyã lɛ ɩ a Nãaŋmɩn 'yɛ'yɛrɛ, Yesu na yi a Najaretɩ na be Galilee.”

12Yesu kpɛ naa a Nãaŋmɩn puorfʊ yir bɛchaar pɔ, na wʊ dire a bala na chiin a bonsɩ tɩ daara nɩ a bala na daara baraa, tɩ na wʊ dara a libitɛɛrbɛ tɛɛbʊlsɩ nɩ a bala na daara a papar dakɔɔr lɔɔrɔ. 13Wʊ 'yɛr kʊ ba, “A sɛb a Nãaŋmɩn gãn pɔ ɩka, ‘A n yir na ɩ naa Nãaŋmɩn sʊɔrfʊ jie,’ (Isaiya 56:7) tɩchɛ ‘Ka yɩn maal wʊ ka wʊ ɩ nãnyisɩ sɔɔlfʊ jie.’ ” (Jeremiya 7:11)

14Jɔ̃n nɩ gbɛrsɩ chen a be a Nãaŋmɩn puorfʊ yir ka wʊ sãa ba. 15Tɩchɛ a Juu nɩbɛ bɔɔrlo nɩbɛrɛ nɩ a nɛɛ wiwiilbe na nyɛ a nɛ'maa tʊ̃mɔ̃ wʊn tʊ̃ nɩ a bibiir na ɩrɛ a gɔ̃mɔ̃ a Nãaŋmɩn puorfʊ yir pɔ ɩka, “Yãan yooo! Nãa David Bie.” Ka a ba pʊʊr sɔ̃ɔ.

16Ba sʊɔr a Yesu, “Fʊ wõn a lɛ a bibiir banyãna na 'yɛrɛ ɔ?” Ka wʊ 'yɛr, “Ɔ̃ɔ, yaa dɔ̃ɔ kar ɩka, ‘A bibiir nɩ bipɩlɛ nɛgãma pɔ lɛ yɩ bʊɔrɔ pɛɛfʊ ɛ?’ ” (Yiel Gãn 8:2)

17Wʊ bar ba naa tɩ yi chen a Betanɩ tẽe pɔ tɩ gã a be.

18Wʊn wa lɩɛb chen a tẽkpɛ̃ɛ pɔ a bibio, kɔ̃ kpɛ wʊ naa. 19Wʊ nyɛn kɔ̃kɔ̃ɔ tɩɛ na ara a sɔr kõkoor, a wʊ chen tɩ ta ka wɔ̃mɔ̃ ba be be ɛ, tɩ wʊ ɩ va nara tɛɛ. Ka Yesu 'yɛr kʊ a tɩɛ, “Fʊ kʊ̃ lɛ wɔ̃ wɔ̃mɔ̃ go ɛ!” Ka a tɩɛ juɔl kpi ajienaa.

20A poturbo na wa nyɛ a tɩɛ na kpi, nɛɛr 'maa ba naa ka ba 'yɛrɛ, “Ŋmɩnɛ lɛ a tɩɛ ɩ juɔl ajienaa a lɛ?”

21Ka Yesu 'yɛr kʊ ba, “Yelmãɛ lɛ n 'yɛrɛ kʊrɔ yɩ, yɩn tara sɔɔfʊ na yaa baal ɛ, a ba ɩ a lɛ na tʊ̃ kʊ a tɩɛ nyã tɛɛ lɛ yɩn tʊ̃ ɛ, tɩchɛ yɩn gba 'yɛr kʊ a tɔ̃ɔ nyãna, ‘Ir suu a man pɔ,’ tɩ wʊ̃n ir naa. 22Yɩn wa sʊɔr bon jaa tɩ tara sɔɔfʊ, yɩn nyɛ naa.”

23Yesu na wa tɩ kpɛ a Nãaŋmɩn puorfʊ yir bɛchaar pɔ na wʊ wile, ka a Juu nɩbɛ bɔɔrlo nɩbɛrɛ nɩ a Juu nɩbɛrɛ wa a wʊ sɛ̃ a sɔ̃ɔ 'lɔ wʊn wile wa sʊʊr wʊ, “Bo kpɛ̃ɔ lɛ fʊ de tʊ̃nɔ̃ nɩ a anyã nɩ an lɛ kʊ fʊ a sɔr ɩka fʊ tʊ̃nɔ̃ nɩ a anyã?”

24Ka a Yesu 'yɛr kʊ ba, “N mɩ na sʊʊr yɩn sʊʊrfʊ bʊ̃'yen. Yɩn wa tʊ̃ɔ wiil ma a par, n mɩ na wiil yɩ naa a nɩrɛ 'lɔ na kʊ ma a kpɛ̃ɔ ka tʊ̃nɔ̃ nɩ a anyãna. 25A Jɔɔn na dɔ̃ɔ suoro a nɩbɛ a Nãaŋmɩn kʊ̃ɔ, Nãaŋmɩn lɛ kʊ wʊ a sɔr bɩɩ nɩbɛ lɛ kʊ wʊ a sɔr? Yɩ 'yɛr n kaa?” Ka ba piel chɩrɛ taa, “Sɩn be 'yɛr ɩka Nãaŋmɩn lɛ tʊ̃ wʊ wʊn sʊʊr sɩ naa ka bo lɛ so ka saa sɔɔ de wʊ ɛ? 26Tɩchɛ sɩn mɩ 'yɛr ɩka nɩrɛ lɛ tʊ̃ wʊ a ba ɩ ɛ, sɩ joro naa a nɩbɛ dãbãɛ bojũu nɩrɛ jaa sɔɔ naa ɩka a Jɔɔn ɩn Nãaŋmɩn 'yɛ'yɛrɛ.”

27Be lɛ a ba 'yɛr kʊ a Yesu, “Saa bɔ̃ɔ ɛ.” Ka a Yesu mɩ 'yɛr kʊ ba, “N mɩ kʊ̃ 'yɛr kʊ yɩ a nɩrɛ 'lɔ na kʊ ma a kpɛ̃ɔ ka n tʊ̃nɔ̃ nɩ a anyãna ɛ.”

28Ka a Yesu 'yɛr kʊ ba, “Ŋmɩnɛ lɛ yɩ tɩɛr? Daba lɛ tara bibiir ayi, na wʊ chen tɩ 'yɛr kʊ a dɔ̃ɔ sʊɔ, ‘N Bie chen tɩ tʊ̃ a n puo tʊ̃mɔ̃ a dɩna.’ 29Ka wʊ 'yɛr, ‘N kʊ̃ chen ɛ,’ tɩchɛ na wʊ ta sɔ̃ɔ lɩɛb a wʊ tɩɛr na wʊ chen. 30A sãa lɛ chen tɩ 'yɛr kʊ a ayi sʊɔ a lɛ nɩ wʊ ju mɩ, ka wʊ 'yɛr, ‘N chen naa,’ tɩ na wʊ tɔr.

31“A bibiir banyãna ayi, buor sʊɔ lɛ tʊ̃ a wʊ sãa bɔfʊ?” Ka ba 'yɛr, “A dɔ̃ɔ sʊɔ lɛ.” Ka Yesu 'yɛr kʊ ba, “Yelmãɛ jaa lɛ n 'yɛrɛ kʊrɔ yɩ a lõpodierbe nɩ a pɔɔ baar na dɔ̃ɔ yɩn nie kpɛ a Nãaŋmɩn nãalʊ̃ʊ pɔ. 32Jɔɔn Kɔ̃suoro wan wa wile yɩ a yelmãɛ sɔr ka yaa sɔɔ de wʊ ɛ, tɩchɛ a lõpodierbe nɩ a pɔɔ baar sɔɔn de wʊ, yɩn sɔɔ wa nyɛ gba yaa lɩɛb a yɩ tɩɛr sɔɔ de wʊ ɛ.

33“Yɩ lɛ chɛlɛ a sʊkpa ãsʊɔ. Daba lɛ kɔ wʊ puo na wʊ. Wʊ wɔɔn a puo wʊ jaa jilʊ̃, na wʊ tuu bɔɔ ka ban ma pɔr a wɔ̃mɔ̃ 'yɔ̃ɔnɔ̃ na ba nɛŋmɛr ir a kʊ̃ɔ. Wʊ mɛn jie ãsʊɔ na do ka nɩrɛ na ma do jãnɛ a be kaara a puo. Wʊ den a puo kʊ nɩbɛ ɩka ba kaara tɩ na wʊ yɔ chen paal yuo pɔ. 34A pɔrfʊ sɔ̃ɔ na wa ta, wʊ tʊ̃n a wʊ gbãgbaar ɩka ba chen a nɩbɛ bala sɛ̃ tɩ pɔr a tɩɛ wɔ̃mɔ̃.

35“Tɩchɛ ka a nɩbɛ bala nyɔɔ a wʊ gbãgbaar ŋme a ãsʊɔ, na ba kʊ a ãsʊɔ tɩ na ba lɔb a ãsʊɔ nɩ kʊsɩbɛ kʊ. 36Be lɛ wʊ lɛ tʊ̃ a gbãgbaar bamɩne ka ba ge ba a lɛ nɛ nɩ wʊ ju. 37A baaraa lɛ wʊ tʊ̃ a wʊ mãɛ bie a ba sɛ̃ na wʊ 'yɛr, ‘Ban 'yɔ̃ɔ naa a n bie.’

38“Tɩchɛ a pokaarba na wa nyɛ a bie, ba 'yɛr kʊ taa, ‘Nyã lɛ ɩ a bʊ̃dire, yɩ ɩ a sɩ kʊ wʊ tɩ de a bonsɩ.’ 39Be lɛ ba nyɔɔ wʊ kʊ lɔb bar a puo kõkoor.

40“Pʊ̃pãanyã a puo sʊɔ wa wa, ŋmɩnɛ lɛ wʊn ɩ a pokaarba banyãna?”

41Ka ba 'yɛr kʊ wʊ, “Wʊn wan wa kʊ a pokaarba banyã ba jaa tɩ de a puo kʊ nɩyor, a bala na ma sɔɔ ka ba põ a puo bonsɩ a ŋmafʊ sɔ̃ɔ.”

42Yesu 'yɛr kʊ ba, “Yaa kar a jie nyã a Nãaŋmɩn gãn na 'yɛr ɩka a, ‘A kʊsɩr 'lɔ a mɩmɩɛrbɛ na tɔr bar lɛ ɩ a kʊsɩr ju. A sɩ Soro lɛ tʊ̃ a nɩtɔ̃ ka a sɔb sɩ a nɩbie.’ (Yiel Gãn 118:22, 23)

43“A lɛ jũu n 'yɛrɛ na kʊrɔ yɩ, Nãaŋmɩn na faan a wʊ nãalʊ̃ʊ yin a yɩ sɛ̃ kʊ a nɩyor bala na sɔɔ wʊ. 44Nɩrɛ nyã na lo a kʊsɩr nyã ju na pʊrpʊr a, tɩchɛ a wʊ mɩ na kʊ nɩrɛ nyã ju wʊn lo dɔɔl.”

45A Juu nɩbɛ bɔɔrlo nɩbɛrɛ nɩ a Faraseemɩne na wa wõ a wʊ sʊkpar anyãna, ba bɔ̃ɔn naa ɩka bala lɛ wʊ lɔɔrɔ a sʊkpar gbɛɛrɛ nɩ. 46Ka ba bʊɔrɔ na sɔr ɩka ba nyɔɔ wʊ, tɩ na ba joro a nɩyɔɔ dãbãɛ bojũu ba nyɛn ka wʊ ɩ Nãaŋmɩn 'yɛ'yɛrɛ.

Currently Selected:

Matiu 21: BIV

Highlight

Copy