Luk 1
1
Pơih nơ̆r pơma
1Ơ Theophil, đơ̆ng sơ̆ khơ̆ dang ei đei lơ bơngai chă chih roi gah dôm tơdrong Yêsu oei hơdai păng bơ̆n tơ ala teh âu sơ̆. 2Lu sư chih dôm tơdrong bơ̆n kơtơ̆ng đơ̆ng lu bơngai mă 'bôh tôm tơdrong Yêsu đơ̆ng tơm hmơm sơ̆, khơ̆ Sư tŏk tơ plĕnh. Lu bơngai 'bôh tơdrong Yêsu sơ̆ sư ră roi tơdrong noh kơ bơ̆n. 3Na inh kư̆m chă jet pơnhên đe gah tơdrong Yêsu đơ̆ng tơm hmơm sơ̆, na inh kư̆m wă roi ăn kơ ih mă đơ̆ng tơm truh tơ wĕch, 4wă kơ ih băt mă tơpă gah tơdrong Yêsu.
Tơdrong đe wă tơpŭ kơ Yôhan
5Kơplah pơtao Hêrôt pơgơ̆r dêh char Juđê sơ̆ đei minh 'nu 'bok soi anăn sư Sachari. Sư khŭl 'bok soi mă đe anăn khŭl Abia. Anăn akăn sư Êlisabet. Akăn sư ei kon sâu Arôn mă pơm 'bok soi tơm hmơm sơ̆. 6Bre sư pơm 'lơ̆ng tơpăt kơ 'Bok Kei-Dei păng rok kiơ̆ dôm tơdrong juăt 'Bok Kei-Dei pơkă. 7Mă-lei bre sư ưh kơ đei hơ'lơ̆p yua kơ Êlisabet bơngai hơwŏng. Bre sư kư̆m kră ngăl boih.
8Minh năr ei 'bok Sachari jang tơdrong 'Bok Kei-Dei tơ hnam akŭm 'Bok Kei-Dei tơm tơ Pơlei Jêrusalem yua kơ trŏ năr lu khŭl sư jang tơ noh. 9Na lu 'bok soi juăt kơ pơpơn dih băl wă kơ băt bu gơh mơ̆t lăm hnam 'Bok Kei-Dei tơm noh soh 'long pơgang 'bâu phu yua wă kơkuh kơ 'Bok Kei-Dei. Na năr ei đe pơpơn dih băl na trŏ kơ 'bok Sachari gơh mơ̆t soh.
10Kơplah Sachari mơ̆t soh 'long pơgang lăm hnam 'Bok Kei-Dei na lu kon pơlei pơla oei krao khan tơ 'ngoaih. 11Na blư 'bôh hloi linh jang 'lơ̆ng đơ̆ng 'Bok Kei-Dei jur dơ̆ng gah 'ma kơ chơnang soi soh 'long pơgang 'bâu phu ei. 12Sachari 'bôh sư, na hli. 13Mă-lei linh jang 'lơ̆ng ei khan kơ sư: “Ih 'nĕ kơ hli. 'Bok Kei-Dei kơtơ̆ng nơ̆r ih krao khan apinh sư wă kơ đei kon. Na akăn ih ning-mônh gô tơpŭ kơ minh 'nu kon drŏ-nglo. Na ih anăn sư Yôhan. 14Ih gô hiôk tơpă păng kư̆m đei lơ bơngai nai hiôk yua kơ đei sư. 15Yua kơ ning-mônh sư gô pơm tih 'bơ̆t anăp 'Bok Kei-Dei. Sư ưh kơ gơh et sik dah dôm tơmam kiơ pơm ăn suai. Sư 'bĕnh blai Yang Bơhngol 'Lơ̆ng mă đơ̆ng đe tơpŭ kơ sư truh tơ ning-mônh. 16Sư gô tơgŭm lơ bơngai Isơrael wih tơ Kră Yang bơ̆n 'Bok Kei-Dei. 17Kră Yang bơ̆n wă jê̆ jur na kon ih ei gô năm hơdrol kơ Kră Yang. Sư đei Yang Bơhngol 'Lơ̆ng ăn kơ sư jing pran kơtang tơpă kư̆m thoi Êli sơ̆. Sư gô tơgŭm kon pơlei Isơrael 'mêm mơnat kơ lu kon sư. Sư gô tơgŭm lu bơngai ưh kơ lui tơbral kơdih tơdrong yoch na wă kơ đei đon 'lơ̆ng. Yua kơ thoi noh na sư hơmet ming kon bơngai adrol kơ Kră Yang truh.” 18Na Sachari jet linh jang 'lơ̆ng ei: “Lơliơ inh gơh băt tơdrong noh gơh sĭt yua kơ inh kră tơpă boih păng ŭnh om inh kư̆m kră mơ̆n?”
19Linh jang 'lơ̆ng ei khan: “Inh âu boih Gabrel. Inh ling-lang oei hơdai 'Bok Kei-Dei. Sư wơh inh jur pơtruh ăn kơ ih tơdrong noh, 20mă-lei ih khan ưh kơ lui kơ inh. Ning-mônh ih gô 'bôh tơpă. Yua kơ ih ưh kơ lui na ih jing ưh kơ gơh pơma đơ̆ng dang ei truh kơ năr ih 'bôh tơdrong inh roi ăn kơ ih hei.”
21Kơplah linh jang 'lơ̆ng ei oei pơma dơnuh kơ sư, na lu kon pơlei pơla chang gô sư lĕch ră. Kơna kon pơlei sơleng kơ đon yua kơ tơdrong kiơ Sachari ngôi lăm hnam 'Bok Kei-Dei đunh dêh. 22Lăp Sachari lĕch sư ưh kơ gơh pơma kơ đe na lu sư băt kơ Sachari 'bôh tơdrong hlĭch lăm noh. Na sư pơma kơmlo ăn kơ đe đĕch.
23Lăp trŏ kơ năr sư pơdơh kơ jang lăm hnam 'Bok Kei-Dei boih na Sachari wih tơ hnam. 24Klaih kơ noh akăn sư jing akâu kơhioh, na akăn sư oei lăm hnam pơđăm khei ưh kơ đei lĕch ôh. 25Akăn sư khan thoi âu: “Dang ei Kră Yang 'Bok Kei-Dei tơgŭm inh boih, đe huay pă pơma kơnê̆ kơ inh dơ̆ng boih.”
Linh jang 'lơ̆ng khan kơ Mari sư gô tơpŭ kơ Yêsu
26Lăp Êlisabet akâu kơhioh tơdrâu khei boih na 'Bok Kei-Dei wơh linh jang 'lơ̆ng Sư, anăn sư Gabrel, jur tơ Pơlei Nasaret lăm dêh Galilê. 27Linh jang 'lơ̆ng ei năm tơ minh 'nu adruh sơkơ̆t boih păng minh 'nu tơdăm, anăn sư Yôsep. Yôsep sư adrĕch adrung pơtao Đawit sơ̆. Na anăn adruh ei Mari. 28Linh jang 'lơ̆ng ei truh tơ Mari khan hloi thoi âu: “Kơkuh kơ ih, duch. 'Bok Kei-Dei wă yua ih păng Sư lăp đon kơ ih boih.”
29Mari kơtơ̆ng thoi noh sư mah chrêu kơ đon yua kơ sư ưh kơ băt wă đei tơdrong kiơ, mah kơkuh kơ sư thoi noh.
30Linh jang 'lơ̆ng ei khan kơ sư dơ̆ng: “Ơ Mari, ih 'nĕ kơ hli yua kơ 'Bok Kei-Dei lăp đon kơ ih tơpă. 31Ih gô anăp, klaih kơ noh tơpŭ kơ minh 'nu kon drŏ-nglo. Ih anăn Sư Yêsu. 32Sư pơm tih păng đe krao Sư Kon 'Bok Kei-Dei Kră Yang mă tih hloh. Kră Yang 'Bok Kei-Dei wă ăn kơ Sư pơm pơtao iĕm, kư̆m thoi 'bok pơtao Đawit iĕm sơ̆. 33Sư gô pơgơ̆r adrĕch adrung kon sâu Jakôp ling-lang ưh kơ đei layơ tôch.”
34Na Mari khan kơ linh jang 'lơ̆ng ei: “Lơliơ tơdrong noh gơh đei yua kơ inh oei adruh ưh tam đei klo?”
35Linh jang 'lơ̆ng ei khan kơ sư dơ̆ng: “Gô đei Yang Bơhngol 'Lơ̆ng jur tơ ih, tơdrong mơsêh mơyang mă 'Bok Kei-Dei wă ăn kơ ih. Thoi noh na kon nge mă ih tơpŭ noh, Sư Kon 'Bok Kei-Dei mă 'lơ̆ng tơpăt. 36Ih lăng kơtum ih, Êlisabet. Sư kră tơpă boih, na sơ̆ đe khan kơ sư bơngai hơwŏng, mă-lei dang ei sư akâu kơhioh, đei tơdrâu khei boih. 37'Bok Kei-Dei gơh pơm tôm tơdrong.”
38Na Mari khan: “Inh âu jơ̆ đĭch đam Kră Yang, inh mơ̆ng kơ Sư ăn kơ inh thoi ih khan kơ inh hei.” Na linh jang 'lơ̆ng ei wih hloi đơ̆ng sư tŏk tơ plĕnh ti.
Mari năm hơpong kơ Êlisabet
39Lăp đơ̆ng rŏng kơ noh Mari năm tơ pơlei đe kiơ̆ kơpal groi kông lăm dêh char Juđê. 40Na sư mơ̆t tơ hnam Sachari na kơkuh kơ Êlisabet. 41Lăp Êlisabet 'bôh Mari kơkuh kơ sư, nge lăm klak sư adrŏ hloi. Na Êlisabet hơloh 'bĕnh blai Yang Bơhngol 'Lơ̆ng, 42păng pơma 'bơ̆r re kơ Mari khan: “'Bok Kei-Dei wă ăn kơ ih hiôk hloh kơ đĭ-đăng kơ lu drŏ-kăn đe nai. Sư ăn kơ kon mă ih wă tơpŭ ning-mônh kư̆m hiôk thoi noh mơ̆n. 43Yua kơ kiơ 'Bok Kei-Dei mơnat kơ inh na sư mah athei mĕ Yŏng inh năm ngôi tơ inh? 44Lăp inh kơtơ̆ng ih kơkuh kơ inh hei, nge lăm klak inh hiôk dêh na sư mah adrŏ. 45Ih hiôk tơpă yua kơ ih lui kơ nơ̆r Kră Yang khan kơ ih gô đei kon.”
Mari ư-ang 'Bok Kei-Dei
46Na Mari khan:
“Jơhngơ̆m inh bơnê ư-ang kơ Kră Yang dêh,
47jơhngơ̆m inh hiôk yua kơ 'Bok Kei-Dei pơklaih inh.
48Yua kơ Sư mơnat kơ inh bơngai đam Sư,
na đơ̆ng âu tơ anăp ning-mônh đĭ-đăng kơ lu kon bơngai gô khan kơ inh đei pŭn hiôk tơpă.
49'Noh yua kơ dôm tơdrong mơsêh mơyang đơ̆ng 'Bok Kei-Dei ăn kơ inh tơpă.
'Bok Kei-Dei pơm tơdrong 'lơ̆ng tơpăt ngăl.
50Sư mơnat kơ đĭ-đăng bơngai mă lui yom kơ Sư,
mă đơ̆ng sơ̆ khơ̆ ning-mônh.
51Sư yua tơdrong mơsêh mơyang Sư
wă blah pơpuh tŭk lê̆ lu bơngai mă pơang akâu kơdih hăm pơm kơnê̆ kơ đe.
52Sư tơjur tŭk đĭ lu bơngai mă pơm tih sơ̆,
na atŏk dơ̆ng lu bơngai mă pơm iĕ hloh kơ đe.
53Sư 'me lu bơngai pơngot rơwĕt tơmam sa 'lơ̆ng,
mă-lei lu bơngai mơdrŏng noh Sư tơbrŏk ti hoh đĕch.
54Sư tơgŭm lu bơ̆n bơngai Isơrael mă đĭch Sư,
yua kơ Sư pơkă đơ̆ng sơ̆ khan wă mơnat kơ lu bơ̆n.
55Sư pơkă kơ lu 'bok bơ̆n sơ̆,
đơ̆ng Abraham truh kơ lu kon sâu sư ning-mônh, khan wă tơgŭm bơ̆n ling-lang.”
56Mari oei hơdai păng Êlisabet dang lăp pêng khei. Đơ̆ng rŏng kơ noh sư brŏk tơ hnam sư kơdih.
Êlisabet tơpŭ kơ Yôhan mă pơm kơ đe 'batem
57Truh kơ khei 'năr Êlisabet boih na sư tơpŭ kơ minh 'nu kon drŏ-nglo. 58Lu bôl buăl hăm kon pơlei pơla kơtum kơtŏng 'nhŏng oh sư kơtơ̆ng ang tơdrong 'Bok Kei-Dei mơnat kơ sư tơpă ăn kơ sư kon, na lu sư kư̆m wang hiôk chơt mơ̆n.
59Lăp kon sư ei truh tơhngam năr boih na đe năm kăt tơdra akar kon sư kiơ̆ kơ tơdrong juăt lu bơngai Isơrael. Lu 'nhŏng oh đe mĕ 'bă sư wă anăn sư Sachari kư̆m lei-lăi thoi anăn 'bă sư mơ̆n yua kơ sư juăt anăn thoi noh. 60Mă-lei mĕ sư khan: “Ưh ôh, bơ̆n anăn sư Yôhan đĕch.”
61Na lu sư khan: “'Nhŏng oh bơ̆n, adrĕch adrung bơ̆n ưh kơ đei bu anăn Yôhan, na liơ bơ̆n gơh anăn sư thoi noh.”
62Na lu sư pơma pơtao păng ti jet 'bă sư wă anăn kon sư bu. 63Na 'bă sư athei lu sư chă gơ'bang iĕ wă chih. Na Sachari chih thoi âu: “Anăn sư Yôhan.” Na đĭ-đăng kơ lu sư sơleng kơ đon.
64Na 'bă sư Sachari gơh pơma hloi, na sư ư-ang 'Bok Kei-Dei.
65Đĭ-đăng kơ lu bôl buăl păng kon pơlei pơla wang kơtơ̆ng thoi noh na lu sư chrêu kơ đon păng năm chă roi kơ đe dôm tơdrong noh jơ̆p kơ tơring kiơ̆ kông dêh char Juđê ei. 66Đĭ-đăng bơngai kơtơ̆ng tơdrong noh pơwao lăm đon sư kơdih khan: “Nge âu ning-mônh sư wă pơm kiơ kơnh?” Lu sư tơchĕng thoi noh yua kơ lu sư 'bôh 'Bok Kei-Dei tơgŭm sư tơpă.
Sachari roi lê̆ hơdrol gah tơdrong Yêsu ning-mônh
67'Bă sư Sachari 'bĕnh blai Yang Bơhngol 'Lơ̆ng na sư roi lê̆ hơdrol thoi âu:
68“Bĕ bơ̆n ư-ang kơ 'Bok Kei-Dei, Kră Yang wei-lăng bơngai Isơrael bơ̆n,
yua kơ Sư tơgŭm bơ̆n tơpă na Sư huai iŏk bơ̆n.
69Sư ăn kơ bơ̆n minh 'nu 'Bok Dŏng Pơklaih mă đei tôm tơdrong mơsêh mơyang.
'Bok 'noh Kon Sâu Đawit mă đĭch đam 'Bok Kei-Dei.
70'Bok Kei-Dei ăn kơ lu bơngai pơtruh nơ̆r Sư sơ̆ kư̆m khan thoi noh mơ̆n.
71'Bok Kei-Dei pơklaih bơ̆n đơ̆ng dôm lu bơngai areh arĕnh ayăt kơ bơ̆n.
72Sư pơm tơdrong noh wă kiơ̆ kơ tơdrong Sư pơkă kơ 'bok kơdră bơ̆n sơ̆,
khan gô wă tơgŭm bơ̆n tơpă.
73Na Sư pơkă kơ 'bok Abraham bơ̆n tơdrong noh,
74wă kơ pơklaih bơ̆n đơ̆ng dôm lu bơngai mă ayăt kơ bơ̆n.
Na Sư wă kơ bơ̆n jang tơdrong Sư huay kơ hli,
75păng pơm 'lơ̆ng tơpăt păng Sư păng kon bơngai mơ̆n tơ anăp 'Bok Kei-Dei,
mă đơ̆ng sơ̆ khơ̆ ning-mônh.
Sachari roi lê̆ hơdrol gah tơdrong kon sư ning-mônh.
76Ơ dăm, gah ih âu đe gô anăn ih bơngai pơtruh nơ̆r 'Bok Kei-Dei mă Kră Yang Tih Hloh,
yua kơ ih gô năm hơdrol kơ Kră Yang wă hơmet ming kon bơngai hơdrol kơ Sư truh.
77Na ih gô bơtho lu bơngai mă 'Bok Kei-Dei wei-lăng wă kơ lu sư gơh klaih đơ̆ng tơdrong yoch,
wă oei hiôk păng 'Bok Kei-Dei.
78-79Yua kơ Kră Yang mơnat kơ bơ̆n tơpă,
na Sư ăn 'Bok Dŏng Pơklaih ei jur tơ bơ̆n.
Sư thoi măt 'năr pơchrang tơ'bôh tơdrong hơdah kơ bơ̆n mă bơngai oei lăm măng mu,
wă lôch hiong ră, mă-lei Sư gô tơ'bôh ăn kơ bơ̆n tôm tơdrong hiôk-hian.”
80Kon sư ei rai đunh rai wơ̆ păng nuih pran kơtang. Sư oei tơ char glă chơngue truh kơ 'Bok Kei-Dei gơh yua sư chă bơtho kơ lu bơngai Isơrael.
Mari tơpŭ kơ Yêsu
Currently Selected:
Luk 1: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
