Bl 28

Isăk athei Jakôp năm tơ char Phadan Aram

1Isăk krao Jakôp, sơkat ăn pŭn hiôk păng pơkă khan: E lê̆ kơ iŏk akăn lu adrĕch lăm Kanaan. 2Iung yak bĕ, năm tơ tơring Phadan Aram, tơ hnam Bêthuel, 'bok gah mĕ e, na oei hloi kơ lu kon đe mih e La'ban. 3Apơi apinh Kră Yang 'Bok Kei-Dei mơsêh mơyang ăn tơdrong pŭn hiôk kơ e, ăn kơ e pơjing hơ'lơ̆p rai lơ, wă kơ jing minh adrĕch adrung tih kơdrâ̆m. 4Apinh sư ăn kơ e păng adrĕch adrung e đei tơdrong pŭn hiôk đơ̆ng Abraham, wă kơ teh đak e oei dang ei jing anih jang sa, wă khan char mă Sư đei ăn boih kơ Abraham. 5Đơ̆ng noh Isăk athei Jakôp năm, sư năm tơ char Phadan Aram, truh tơ hnam La'ban, kon drŏ-nglo Bêthuel, bơngai Aram, sư 'nâu 'nhŏng kơ Rê'bêka, mĕ Jakôp păng Êsâu.

Êsâu oei kơ kon adruh Ismael

6Êsâu 'bôh Isăk đei sơkat ăn pŭn hiôk kơ Jakôp boih păng athei Jakôp năm tơ char Phadan Aram wă kơ chă akăn đơ̆ng ei; kơplah sư sơkat wă kơ đei pŭn hiôk na pơkă hloi khan: 'Nĕ kơ chă akăn lăm lu adruh char Kanaan hŏ. 7Êsâu kư̆m 'bôh Jakôp chu yom kơ mĕ 'bă sư na năm tơ dêh Phadan Aram noh. 8Sư băt kơ 'bă sư Isăk ưh kơ lăp đon lu adruh Kanaan. 9Na sư năm tơ hnam Ismael oei dơ̆ng kơ Mahalat pơm akăn, 'nguaih kơ 'bar 'nu akăn sư đei oei boih. Adruh âu kon Ismael sâu Abraham păng oh Nêbaôt.

Isăk roi tơdrong Bethel, Jakôp apo 'bôh

10Jakôp đơ̆ng Bêrsêba năm truh tơ Charan. 11Truh tơ minh anih noh, măt 'năr mơ̆t boih, na sư pơdơh kơmăng tơ anih noh. Sư iŏk minh pôm tơmo hơgơn kơ̆l, na sư tep hloi tơ noh. 12Na sư đei apo 'bôh minh pôm kung đơ̆ng teh âu truh tơ plĕnh, lu linh jang Kră Yang 'Bok Kei-Dei jur tŏk rok kung noh. 13Na âu, 'bôh Kră Yang hơ-oei 'bơ̆t kơ̆l kung noh păng khan thoi âu: Inh boih Kră Yang Kră Yang 'Bok Kei-Dei Abraham, 'bok ih kư̆m Kră Yang 'Bok Kei-Dei Isăk 'bă ih. Inh gô ăn kơ ih păng adrĕch adrung ih teh đak mă ih oei 'bĭch âu. 14Adrĕch adrung ih gô lơ kơdrâ̆m thoi chuơh tơ lăm teh âu, lanh truh tơ bơmơ̆t hơlĕch, gơal yă-nơ̆m păng lu khŭl kon bơngai a gô đei pŭn hiôk đơ̆ng ih păng đơ̆ng lu adrĕch adrung ih. 15'Nâu, inh gô oei hơdai ih, mă ih năm tơ yơ, inh gô kiơ̆ wei-lăng ih tơ noh păng gô anhăk ih wih brŏk tơ dêh âu; yua kơ Inh ưh kơ đei layơ wă achăng lê̆ ih dĭng mă Inh pơm keh dôm nơ̆r Inh đei pơkă boih hăm ih.

16Jakôp sư hơđơ̆r, iung khan thoi âu; tơpă đei Kră Yang tơ anih 'nâu mă inh ưh kơ băt! 17Sư hli păng khan thoi âu: Anih âu trŏ kơ hli krưp tơpă! 'Nâu trŏ kơ hnam Kră Yang 'Bok Kei-Dei tơpă, 'măng plĕnh tơpă.

18Sư iung đơ̆ng hrôih iŏk tơmo mă đơ̆ng sư hơgơn tơiung păng pơdơ̆ng pơm jrăng wă tơdra păng tuh hloi đak rơmă tơ kơ̆l jrăng noh, 19na sư krao anăn anih âu Bethel;b tơplih anăn pơlei Lus.

20Na Jakôp hơpơi kơdih sư thoi âu: Tơdah Kră Yang 'Bok Kei-Dei oei hơdai inh, wei-lăng inh kơplah inh oei yak, ăn 'bĕng sa, ao hrŭk. 21Păng inh wih brŏk tơ hnam 'bă inh, hiôk-hian, na Kră Yang jing Kră Yang 'Bok Kei-Dei inh. 22Tơmo mă đêl inh pơdơ̆ng 'nâu jing jrăng hnam Kră Yang 'Bok Kei-Dei păng inh gô pơyơ̆r kơ Ih minh lăm mơjĭt đơ̆ng dôm mŭk tơmam mă inh đei đơ̆ng Ih ăn.

Currently Selected:

Bl 28: bdq

Highlight

Copy