Bl 27

Jakôp tơgar iŏk pŭn hiôk đơ̆ng Êsâu

1Yua kơ Isăk kră boih, măt đĭ pă bang boih, na sư krao Êsâu, kon kơdră sư păng khan thoi âu: Ơ dăm! Êsâu tơl: Đei inh tơ âu. 2Sư khan thoi âu: Âu 'bă đĭ kră boih, ưh kơ băt layơ wă lôch. 3Thoi noh dang ei, inh wă kơ e iŏk đao hơlă, iŏk hră jŏ hăm 'brơ̆m năm tơ bri chă lua ăn kơ inh 'nhĕm bri. 4Na hơmet ăn kơ inh sŏng sa 'nhĕm mă 'lơ̆ng kiơ̆ kơ hơlŏng inh lăp, na pôk ăn kơ inh sŏng sa đơ̆ng noh inh gô sơkat kơ e đei tơdrong pŭn hiôk adrol kơ inh wă lôch.

5Kơplah Isăk khan kơ Êsâu kon drŏ-nglo sư noh hei, na Rê'bêka kơtơ̆ng. Lăp Êsâu lĕch năm tơ bri chă lua kơ 'bă sư 'nhĕm bri wă pôk ăn kơ 'bă sư sa. 6Rê'bêka roi kơ Jakôp, kon drŏ-nglo sư, thoi âu: 'Nâu mĕ đei kơtơ̆ng 'bă e đei khan kơ Êsâu 'nhŏng e, pơkă khan: 7E athei chă 'nhĕm bri hơmet kơ inh sŏng sa, pôk ăn 'nhĕm sa mă 'lơ̆ng ăn kơ inh sa; adrol kơ inh wă lôch, inh gô sơkat ăn đei tơdrong pŭn hiôk kơ e 'bơ̆t anăp Kră Yang. 8Thoi noh ơ dăm! Dang ei, mơ̆ng mĕ bĕ păng pơm kiơ̆ kơ nơ̆r mĕ athei: 9Năm bĕ tơ khŭl bơbe, rôp 'bar tŏ bơbe 'lơ̆ng, na mĕ gô pơm 'nhĕm hơmet pôk ăn kơ 'bă e sa, hơmet 'nhĕm mă 'lơ̆ng kiơ̆ kơ hơlŏng sư lăp, 10na e gô năm ba kơ 'bă e sa, wă kơ sư sơkat ăn kơ e đei tơdrong pŭn hiôk adrol kơ sư wă lôch.

11Jakôp tơl mĕ sư thoi âu:a Ơ mĕ, Êsâu 'nhŏng inh, sư đei sŏk sop jing mă gah inh ưh kơ đei sŏk sop. 12Băt kơnh 'bă inh gô pel inh, khan kơ inh bơngai hơlĕnh, na inh gô pŭ tơdrong hiap pơtê̆, ưh kơ đei tơdrong pŭn hiôk ôh. 13Mĕ sư tơl: Tơdrong hơngiap noh lê̆ kơ mĕ pŭ; kư̆ lui kơ nơ̆r mĕ bĕ, năm rôp 'bar tŏ kon bơbe bĕ.b

14Thoi noh, Jakôp năm rôp 'bar tŏ kon bơbe, năm ba kơ mĕ sư, hơmet pơm 'nhĕm 'lơ̆ng, kiơ̆ thoi hơlŏng 'bă sư lăp 'maih sa. 15Na Rê'bêka iŏk hơbĕn ao Êsâu mă 'lơ̆ng hloh, Êsâu kon kơdră sư, mă oei 'măn lê̆ tơ lăm hnam, na pơhrŭk ăn kơ Jakôp, kon hơdruch sư. 16Đơ̆ng noh sư iŏk akar bơbe pôn 'bar pah ti hăm hơko, yua kơ ti păng hơko ưh kơ đei sŏk sop. 17Rê'bêka iŏk 'nhĕm păng 'bĕng mă sư đei hơmet noh 'măn 'bơ̆t ti Jakôp kon hơdruch sư.

18Jakôp năm pôk ăn kơ 'bă sư păng khan thoi âu: 'Bă ơi!

Isăk tơl: “Đei 'bă tơ âu, e anăn bu?”

19Jakôp tơl: Inh Êsâu, kon kơdră ih, inh đei pơm kiơ̆ kơ ih đei athei. Apinh ih iung sa 'nhĕm inh chă lua; wă kơ ih sơkat ăn kơ inh đei tơdrong pŭn hiôk. 20Isăk jet: Liơ kon chă lua mă 'bônh kơ đei dêh? Sư tơl: Noh đơ̆ng Kră Yang Kră Yang 'Bok Kei-Dei ih mă ăn kơ inh jah đei tơ'bơ̆p thoi noh! 21Isăk khan kơ Jakôp thoi âu: Dăm! Năm mă jê̆ tơ âu wă kơ inh pel lăng hăm trŏ kơ Êsâu ưh, mă kon kơdră inh. 22Jakôp năm jê̆ Isăk; sư pel păng khan: Nơ̆r pơma ei Jakôp, mă-lei 'bar pah ti Êsâu. 23Sư ưh kơnăl yua kơ 'bar pah ti đei sŏk sop jing thoi Êsâu 'nhŏng sư. Thoi noh Isăk gô sơkat ăn tơdrong pŭn hiôk.

24Klaih kơ noh sư jet dơ̆ng: 'Nâu e hăm trŏ kơ Êsâu kon kơdră inh? Jakôp tơl: Trŏ boih inh âu. 25Isăk khan: Pôk ăn bĕ kơ 'bă 'nhĕm bri đơ̆ng kon chă lua noh, adrol kơ inh sơkat wă ăn kơ e đei tơdrong pŭn hiôk. Jakôp hơmet pôk ăn kơ 'bă sư sa, kư̆m ba sik huch dai.

26Đơ̆ng noh Isăk 'bă sư khan thoi âu: Ŏ dăm! Năm mă jê̆ tơ âu na chŭm inh. 27Jakôp năm jê̆ păng chŭm sư. Isăk 'bâu phu ao kon sư Êsâu na sư sơkat hloi thŭ pŭn hiôk păng khan:

'Nâu 'bâu phu đơ̆ng kon inh.

Nhen thoi 'bâu tơ mir chŭn

mă Kră Yang đei ăn pŭn hiôk.

28Apinh Kră Yang 'Bok Kei-Dei ăn kơ kon 'mui tŭk đơ̆ng plĕnh jur,

Wă kơ đei mơ̆r kơ teh.

Păng đei phe 'ba hăm sik plei hơmu rơkah rơkai.

29Đĭ kon bơngai gô chu yom kơ kon.

Đĭ lu dêh char gô drap kơkuh 'bơ̆t anăp kon!

E athei gơh pơgơ̆r lu 'nhŏng oh,

dôm lu 'nhŏng oh kon mĕ e gô kơkuh 'bơ̆t anăp e.

Bu pơjăm, hiap e Kră Yang 'Bok Kei-Dei gô hiap tơwih.

Bu sơkat pŭn hiôk ăn kơ e,

Kră Yang 'Bok Kei-Dei gô sơkat ăn kơ sư pŭn hiôk mơ̆n!

30Isăk 'nao sơkat ăn pŭn hiôk đang boih păng Jakôp 'nao weh đơ̆ng 'bă sư đĕch, na Êsâu 'nhŏng sư brŏk đơ̆ng lua. 31Sư kư̆m pai hơmet 'nhĕm 'lơ̆ng, wă pôk ăn kơ 'bă sư păng khan: 'Bă apinh ih iung sa bĕ 'nhĕm bri đơ̆ng inh chă lua, wă kơ đơ̆ng ih sơkat ăn kơ inh đei pŭn hiôk.

32Isăk 'bă sư, jet: E bu dơ̆ng?

Sư tơl: Inh Êsâu, kon kơdră ih.

33Isăk kơtơ̆ng thoi noh sư 'brơ̆k lăm jơhngơ̆m dêh na khan: Thoi ei, bĭ bu mă chă lua 'nhĕm bri hei đei hơmet pôk ăn kơ 'bă sa boih? 'Nao adrol 'biơ̆ kơ e brŏk. 'Bă sa đĭ boih păng sơkat ăn boih kơ sư đei tơdrong pŭn hiôk, lei pŭn hiôk noh đei kơ sư boih.

34'Nao kơtơ̆ng 'bă sư roi tam mă tôch, na Êsâu nhơ̆m re hơdrĭ hơdrôi ơh khan kơ 'bă sư thoi âu: 'Bă! Apinh ih sơkat hloi kơ inh dơ̆ng hai?

35Mă-lei Isăk tơl dơ̆ng: Oh e chă đon pơdăr tơgar iŏk tơdrong pŭn hiôk đơ̆ng e boih.

36Êsâu khan hloi: Hăm trŏ đe krao sư Jakôp yua kơ sư đei 'bar wơ̆t boih sư pơjei iŏk tơdrong gơh đơ̆ng inh. Sư đei tơgar boih jing 'nhŏng kơdră păng dang ei tơgar dơ̆ng tơdrong pŭn hiôk đơ̆ng inh. Sư khan dơ̆ng: 'Bă ưh pă đei tơdrong pŭn hiôk kiơ dơ̆ng boih hă?

37Isăk tơl thoi âu: 'Bă sơkat ăn kơ sư jing yŏng e, hăm đĭ lu 'nhŏng oh jing đĭch đam sư; păng 'bă sơkat apinh Kră Yang 'Bok Kei-Dei hơmet 'măn phe 'ba păng đei sik plei hơmu kơ sư. Thoi ei 'bă wă pơm liơ kơ e dơ̆ng dang ei?

38Êsâu tơl: Ơ 'bă! Ih đei lăp pŭn hiôk noh đĕch hă? Apinh ih sơkat kơ inh hai đei tơdrong pŭn hiôk mơ̆n. 'Bă! Đơ̆ng noh Êsâu nhơ̆m.

39Isăk, 'bă sư pơma dơ̆ng:

Âu anih e oei teh gô ưh kơ jing.

Păng tŭk kư̆m ưh kơ gan jur đơ̆ng plĕnh.

40E gô arih đơ̆ng đao,

Păng gô jing đĭch kơ lu oh e.

Đơ̆ng rŏng kơnh e gô arih thông mang,

năr 'nâu tơ âu, dơning tơ nai,

E gô hrĕch lê̆ 'long ăt sư đơ̆ng hơko e.

Êsâu wă pơlôch Jakôp na Jakôp năm tơ mih sư La'ban

41Êsâu đei jơhngơ̆m blĕk kơ Jakôp yua kơ 'bă sư sơkat ăn pŭn hiôk kơ Jakôp, sư tơchĕng lăm jơhngơ̆m đon sư khan: Năr 'bă inh lôch wă jê̆ boih, thoi noh, na inh gô pơlôch Jakôp, oh inh.

42Đe roi nơ̆r Êsâu, kon kơdră sư kơ Rê'bêka, na sư athei đe krao hloi Jakôp kon hơdruch sư, na sư khan thoi âu: 'Nâu, Êsâu, 'nhŏng e, wă pơlôch e, wă pơm 'mong. 43Thoi noh, dang ei dăm, mơ̆ng bĕ nơ̆r mĕ, iung năm kơdâu ôn tơ hnam La'ban mih e tơ Charan. 44Păng oei hloi tơ ei mă đunh, gô dĭng mă 'nhŏng huay pă blĕk kơ e. 45Mưh 'nhŏng e huay pă đei blĕk boih păng sư hiơt đĭ boih dôm tơdrong đêl e pơm kơ sư na mĕ krao e brŏk. Liơ mă mĕ gơh hiôk hiong 'bar 'nu măr iĕm lăm minh năr?

46Rê'bêka khan kơ Isăk thoi âu: Inh ơh klai dêh rŏ ưh pă 'maih arih dơ̆ng, yua kơ lu kon adruh adrĕch Hêtit mă Êsâu pơm akăn. Tơdah Jakôp oei kơ lu adruh adrĕch Hêtit pơm akăn, wă khan iŏk minh 'nu lăm tơring âu thoi lu đe noh; mưh lei inh arih wă pơm kiơ?

Currently Selected:

Bl 27: bdq

Highlight

Copy