Bl 26

Isăk đei pơngot rơwĕt truh sư jur tơ Gêra. Nơ̆r Kră Yang 'Bok Kei-Dei pơkă kơ sư

1Sơ̆ đei pơngot lăm chăl arih Abraham, dang ei lăm tơring sư đei dơ̆ng pơngot rơwĕt. Isăk năm tơ Gêrar, char Abimêlek, pơtao đe Philistin. 2Kră Yang tơ'bơ̆p sư păng khan thoi âu: “'Nĕ kơ jur tơ dêh Êyiptơ, athei oei bĕ tơ anih mă Inh gô tơ'bôh kơ ih. 3Oei bĕ tơ char âu thoi tơmoi; Inh gô oei hơdai ih păng gô ăn kơ ih pŭn hiôk. Inh gô ăn kơ adrĕch adrung ih tơring âu păng dêh char âu păng Inh gô pơkeh nơ̆r Inh mă đei pơkă boih hăm Abraham, 'bă ih. 4Inh gô ăn thim kơ adrĕch adrung ih lơ thoi sơnglŏng tơ plĕnh ti: Gô ăn kơ lu sư dêh char âu đĭ-đăng kon bơngai jơ̆p pơlei pơla lăm teh đak gô đei tơdrong pŭn hiôk đơ̆ng lu sư, 5yua kơ Abraham chu boih nơ̆r Inh păng wei răk dôm nơ̆r Inh bơtho pơkă păng khôi juăt Inh.” 6Thoi noh Isăk oei tơ Gêrar.

Tơdrong duch Rê'bêka păng pơtao Abimêlek

7Yua kơ Rê'bêka bơngai 'lơ̆ng hơbŏ rơhau, na mưh kon pơlei apinh gah akăn sư, na sư khan, “Noh oh drŏ-kăn inh;” Hli kơ mưh khan, “Noh akăn inh,” sư tơchĕng kơnh hơmơt kơ lu sư pơlôch inh.

8Đang kơ Isăk oei tơ tơring noh kư̆m đunh, minh năr noh Abimêlek pơtao đe Philistin, tơmang đơ̆ng 'măng-'mŏk 'bôh Isăk oei hơnul păng Rê'bêka akăn sư. 9Na Abimêlek krao Isăk păng khan: “Sĭt tơpă âu akăn ih. Liơ ih khan: ‘Noh oh drŏ-kăn inh?’ ”

Isăk tơl: “Yua kơ inh tơchĕng, hli yua kơ đơ̆ng sư na inh gô lôch.”

10Abimêlek apinh: “Ih pơm kiơ kơ lu nhôn thoi noh? Dah đei minh 'nu bu năm 'bĭch hơdai hăm akăn ih, noh ih wă pơm ăn kơ nhôn pơm yoch!”

11Abimêlek hloi tơbăt ăn kơ đĭ-đăng kon tơring thoi âu: “Dah bu đei hơtŭt 'bơm bơngai âu, dah akăn sư, gô rôp pơlôch.”

Isăk mơdrŏng jơnap

12Isăk choh jang lăm tơring noh; sơnăm noh sư đei kĕch yuă iŏk lơ hloh kơ adrol hrĕng wơ̆t, yua kơ Kră Yang ăn đei tơdrong pŭn hiôk. 13Sư jing mơdrŏng, mŭk tơmam 'net kơ năr rai lơ hloh, na jing mơdrŏng tih. 14Sư đei triu, rơmo lơ păng đĭch drŏ-nglo đam drŏ-kăn: Yua kơ thoi noh kon pơlei Philistin đei 'ngeng klai. 15Na hơdôm tŏ sơlŭng đak mă đơ̆ng đĭch đam Abraham, sir sơ̆, dang ei lu kon pơlei Philistin 'bŭ pơđĭ.

16Abimêlek khan kơ Isăk thoi âu: “Weh bĕ đơ̆ng anih inh âu: Yua kơ ih mơdrŏng jơnap hloh kơ lu nhôn pă băt dang yơ.”

17Thoi noh, Isăk Lê̆ anih âu na yak năm pơjing pơlei tơ thŭng Gêrar păng oei tơ noh. 18Isăk sư sir ming hơdôm tŏ sơlŭng đak đơ̆ng đe đei sir boih lăm chăl Abraham, 'bă sư, mă đêl lu kon tơring Philistin 'bŭ lê̆ đĭ đơ̆ng rŏng kơ Abraham lôch păng anăn lu sơlŭng đak noh kiơ̆ thoi 'bă sư anăn sơ̆.

19Lu đĭch đam Isăk kư̆m đei sir thim plơ̆ng sơlŭng đak sir 'bơm trong đak lĕch. 20Lu bơngai wei triu tơ Gêrar, tơgar hăm lu bơngai wei triu Isăk, lu sư khan sơlŭng đak âu sơlŭng đak lu nhôn. Na Isăk anăn đak sơlŭng âu Êseta yua kơ lu bơngai wei triu nai tơgar đơ̆ng lu sư. 21Đang kơ noh, lu đĭch đam Isăk sir minh pôm sơlŭng nai, na kư̆m tơgar băl dơ̆ng; sư anăn sơlŭng noh Sêtna.b 22Đơ̆ng noh lu sư lê̆ sơlŭng noh na sir sơlŭng plơ̆ng, gah sơlŭng âu, lu sư ưh pă pơjah băl boih, na sư krao anăn Rêhôbôtc păng khan thoi âu: Dang ei Kră Yang lê̆ ăn kơ lu nhôn să rơhơi păng lu bơ̆n gô đei 'bôh păng mơdrŏng lăm char 'nâu.

Kră Yang đei pơkă dơ̆ng hăm Isăk

23Isăk weh đơ̆ng noh, yak tŏk tơ Bêrsêba. 24Măng noh Kră Yang jur tơ sư păng khan: Inh boih Kră Yang 'Bok Kei-Dei Abraham, 'bă ih, 'nĕ kơ hli, Inh oei hơdai ih. Inh gô ăn thim tơdrong pŭn hiôk kơ ih păng ăn adrĕch adrung ih, jing lơlap, yua kơ Abraham đĭch đam Inh. 25Isăk pơm minh pôm chơnang soi kơkuh, krao khan kơ Kră Yang păng pơm pơlei oei tơ noh. Đơ̆ng noh; lu đĭch đam sư sir minh pôm sơlŭng đak tơ anih noh.

Isăk păng Abimêlek pơgơ̆p băl

26Pơtao Abimêlek oei tơ Gêrar năm ngôi apong tơ Isăk; đei Ahusat, buăl sư păng Pikôl, yŏng linh sư, kư̆m năm kiơ̆. 27Isăk jet: Lu iĕm areh kơ inh pơpuh boih đơ̆ng tơring iĕm, na năm chă kiơ tơ inh dơ̆ng? 28Lu sư tơl thoi âu: Lu nhôn 'bôh nhen boih Kră Yang đei tơgŭm dŏng ih, na nhôn pơđâu băl: Athei đei nơ̆r pơkăm đơ̆ng lu nhôn hăm ih, wă kơ lu bơ̆n pơgơ̆p pôm đon hơdai. 29Athei pơkăm thoi âu: Ih kư̆m pă đei pơrăm lu nhôn, kư̆m thoi lu nhôn kư̆m ưh kơ pơrăm hơtŭt 'bơm ih, kư̆m thoi lu nhôn hơpơi apinh ih yak mă 'lơ̆ng sơ̆. Dang ei ih đei Kră Yang ăn pŭn hiôk. 30Isăk pôk hiŏng tơmam sŏng sa chơt hiôk hơdai; đĭ kơ lu sư sŏng sa hơdai.

31Truh năr đơ̆ng rŏng lu sư iung đơ̆ng hrôih, pơma pơkă pơkăm băl. Đơ̆ng noh Isăk ba lu đe noh wih brŏk hiôk-hian.

32Kŭm lăm năr noh, lu đĭch đam Isăk năm roi tơbăt kơ sư kơ sơlŭng đak mă lu sư oei sir; lu sư đei sir 'bôh đak boih. 33Na anăn sơlŭng đak noh Sêba,d Yua kơ thoi noh truh dang ei đe krao anăn pơlei jê̆ sơlŭng noh Bêrsêbae

Êsâu chă akăn

34Kơplah Êsâu đei puăn-jĭt sơnăm, sư oei kơ Judit, kon drŏ-kăn Bêri, bơngai Hêtit; păng Basemat, kon drŏ-kăn Êlon, kư̆m bơngai Hêtit. 35'Bar 'nu mŏ mai noh mă pơm ăn kơ jơhngơ̆m Isăk păng Rê'bêka ơh sơ'ngon.

Currently Selected:

Bl 26: bdq

Highlight

Copy