Mateo 19

I cʌntesa Jesús che' mi' cʌyob i bʌ xñujpuñijel

(Mc 10.1-12; Lc 16.18)

1Che' bʌ tsa' ujti ti cʌntesa Jesús, tsa' loq'ui ti' lum Galilea, tsa' majli ti lum i c'aba' Judea ti junwejl Jordán ja'. 2Bajc'ʌl wiñicob x'ixicob tsi' tsajcayob majlel. Ya'i tsi' lajmesa jiñi xc'am-ʌjelob.

3Tsa' tiliyob fariseojob ba'añ Jesús, come yomob i yilʌben i pusic'al, tsi' c'ajtibeyob:

—¿Tic'bil ba wiñic ti mandar cha'añ mi' cʌy i yijñam che' mach yomix i q'uel?#19.3 Jiñi mu' ba i cha'leñob cʌntesa cha'añ Mandar, t'oxolob che' bajche' mi' yʌq'ueñob isujmlel jiñi Mandar ya' ti Dt 24.1. Jiñi mu' bʌ i tsajcañob i cʌntesa Shammai wen tsʌts mi melob i bʌ yic'ot ma'añic mi' yʌq'ueñob i to'ol cʌyob i bʌ wiñicob x'ixicob, cojach che' bʌ mi yujtel ts'i'lel; pero jiñi mu' bʌ i tsajcʌbeñob i cʌntesa Hillel mi' yʌc'ob i t'añ cha'añ mi' mejlel i cʌyob i bʌj wiñic x'ixic cha'añ ya' alʌ wocol tac.

4Jesús tsi' su'beyob:

—¿Mach ba añic tsa' la' q'uele ti juñ: “Cha'añ Dios ti ñaxan, tsi' mele wiñic yic'ot x'ixic#Gn 1.27; 5.2?” —Che'en. 5Tsi' yʌlʌ: “Jiñi cha'añ mi' cʌy i tat i ña' wiñic, cha'añ mi' yajñel yic'ot i yijñam, come jiñi cha'tiquil mi' yochelob ti juntiquil jach”.#Gn 2.24; Ef 5.31 6Mach chʌn cha'tiquilix, juntiquil jach. Jiñi cha'añ mach i t'ox wiñic chuqui Dios tsi' tempa, che'en Jesús.

7Tsi' c'ajtibeyob:

—¿Chucoch Moisés tsi' yʌlʌ cha'añ mi' mejlel cʌq'uen lojon quijñam i juñilel ba' ts'ijbubil cha'añ tsa'ix j cʌyʌ lojon?#Dt 24.1-4; Mt 5.31

8Jesús tsi' jac'beyob:

—Cha'añ i tsʌtslel la' pusic'al, jiñi cha'añ Moisés tsi' yʌc'ʌ i t'añ cha'añ mi' mejlel la' cʌy la' wijñam che' mi la' wʌq'uen i juñilel; pero mach che'ic tsa' ujti ti' cajibal pañimil. 9Pero joñon mic su'beñetla majqui jach mi' to'ol cʌy i yijñam che' ma'añic i ts'i'lel, cha'añ jach yom i pʌy yam bʌ, mi' cha'len ts'i'lel; [jiñi mu' bʌ i pʌy jiñi cʌybil bʌ x'ixic, mi' cha'len ts'i'lel,]#Mal 2.13-16; Mt 5.32; 1 Cor 7.10-11#19.9 Ili t'añ Jiñi mu' bʌ i pʌy jiñi cʌybil bʌ x'ixic, mi' cha'len ts'i'lel: Ma'añic ti' yan tac bʌ Biblia. —che'en Jesús.

10Jiñi xcʌnt'añob i cha'añ tsi' yʌlʌyob:

—Mi che'ʌch mi' yajñel wiñic yic'ot i yijñam, tic'ʌl ñumen uts'at che' ma'añic mi' pʌy i yijñam.

11Jesús tsi' su'beyob:

—Mach ti' pejtelelic mi mejlel i ch'ʌmbeñob isujm jiñi t'añ, jiñi jach jiñi tsa' bʌ aq'uentiyob i ch'ʌmben isujm. 12Añ wiñicob mach bʌ añic mi caj i pʌyob i yijñam, come che'ʌch tsi' yilayob pañimil, yaño' bʌ melbilob jach ti wiñicob, pero añ yaño' bʌ, che' jach bʌ mi' to'ol ajñelob cha'añ i ye'tel ti' yumʌntel panchan. Majqui jach mi' mejlel i ch'ʌm ti' wenta che' bajche' iliyi, la' i ch'ʌm, —che'en Jesús.

Jesús tsi' yʌc'ʌ i c'ʌb ti alobob

(Mc 10.13-16; Lc 18.15-17)

13Tsa' pʌjyiyob tilel alobob ba'añ Jesús cha'añ mi' yʌc' i c'ʌb ti' tojlelob, yic'ot cha'añ mi' melbeñob oración; pero jiñi xcʌnt'añob tsi' tiq'uiyob. 14Jesús tsi' yʌlʌ: La' tilicob alobob ba'añon, mach mi la' mʌctañob, come i cha'añobʌch i yumʌntel jiñi am bʌ ti panchan, che'en.

15Che' bʌ tsa' ujti i yʌc' i c'ʌb ti' tojlel jiñi alobob, Jesús tsa' majli.

Jiñi wen chumul bʌ ch'itoñ wiñic

(Mc 10.17-31; Lc 18.18-30)

16Tsa' tili juntiquil wiñic ba'añ Jesús, tsi' yʌlʌ:

—Wen bʌ Maestro, ¿chuqui uts'at yom mic mel cha'añ mic taj j cuxtʌlel mach bʌ añic mi' jilel? —Che'en.

17Jesús tsi' su'be:

—¿Chucoch ma' pejcañon ti wen? Ma'añic juntiquil wen bʌ, jiñi jach Dios. Mi awom a taj a cuxtʌlel mach bʌ añic mi' jilel, jac'ben i mandar, —che'en.

18Jiñi wiñic tsi' c'ajti:

—¿Chuqui ti mandar?

Jesús tsi' su'be:

—Mach a cha'len tsʌnsa,#Ex 20.13; Dt 5.17 mach a cha'len ts'i'lel,#Ex 20.14; Dt 5.18 mach a cha'len xujch',#Ex 20.15; Dt 5.19 mach a cha'len jop't'añ,#Ex 20.16; Dt 5.20 19q'uele ti ñuc a tat a ña',#Ex 20.12; Dt 5.16 yic'ot c'uxbin a pi'ʌlob che' bajche' ma' bajñel c'uxbin a bʌ,#Lv 19.18; Mt 22.33; Stg 2.8 che'en.

20Jiñi ch'itoñ wiñic tsi' su'be:

—Pejtelel jiñi mandar tsa' c jac'ʌ c'ʌlʌl che' ch'itoñon to. ¿Chuqui to yam bʌ yom mic mel? —Che'en.

21Jesús tsi' su'be:

—Mi junyajlel toj awom ajñel, cucu choño a chu'bʌañ, aq'uen jiñi p'ump'uño' bʌ, che' jiñi mi caj a taj ca'bʌl a chu'bʌañ ti panchan; la' tsajcañon, —che'en Jesús.

22Che' bʌ tsi' yu'bi jiñi t'añ, wen ch'ijiyem tsa' caji ti majlel, come añ ca'bʌl i chu'bʌañ.

23Jesús tsi' su'be xcʌnt'añob i cha'añ:

—Isujm mic su'beñetla, wen wocol mi' yochel ti' yumʌntel panchan jiñi wen chumul bʌ wiñic. 24Mic cha' su'beñetla, mach wen wocolic mi' ñumel camello ti' wut acuxan, pero ñumen wocol mi' yochel ti' yumʌntel Dios jiñi wen chumul bʌ wiñic, —che'en Jesús.

25Che' bʌ tsi' yu'biyob xcʌnt'añob i cha'añ, tsa' toj sajtiyob i pusic'al, tsi' yʌlʌyob:

—¿Majqui mi mejlel ti coltʌntel che' jiñi?

26Jesús, tsi' ch'ujch'uj q'ueleyob, tsi' su'beyob:

—Jiñi wiñicob mach mejlicob, pero Dios mi mejlel i mel ti pejtelel, —che'en.

27Pedro tsi' jac'ʌ:

—Tsa' j cʌyʌ lojon c chu'bʌañ cha'añ mic tsajcañet lojon. ¿Chuqui mi caj c taj lojon? —Che'en. 28Jesús tsi' su'beyob:

—Ti isujm mic su'beñetla, ti tsiji' bʌ pañimil,#19.28 Ti tsiji' bʌ pañimil: Jiñʌch che' mi' c'otel i yorajlel mi' laj tsijibtesʌntel (Is 65.17; 66.22; Ap 21.1-5). che' buchul i Yalobil Wiñic ti' yumʌntel ti' ñuclel,#Dn 7.9-14; Mt 25.31; Lc 22.30 jatetla ja'el tsa' bʌ la' tsajcayon mi caj la' buchtʌl ti lajchʌmp'ejl buchlibʌl cha'añ mi la' mel jiñi lajchʌnmojt i p'olbal Israel. 29Majqui jach mi' cʌy i yotot, i yʌscuñob i chichob i yijts'iñob, i tat, i ña', [i yijñam]#19.29 Ti yan tac bʌ Biblia ma'añic mi lac taj ili t'añ: i yijñam. i yalobilob, i lumal, cha'añ tij c'aba', mi caj i taj yam bʌ jo'c'al i ñumel che' bajche' jiñi tsa' bʌ i cʌyʌ, mi caj i taj ja'el i cuxtʌlel mach bʌ añic mi' jilel. 30Pero ca'bʌl jiñi ñaxaño' bʌ mi caj i cʌytʌlob ti wi'ipat, che' ja'el ca'bʌl jiñi wi'ilobix bʌ mi caj i majlel ti ñaxan,#Mt 20.16; Mc 10.31; Lc 13.30 —che'en Jesús.

Currently Selected:

Mateo 19: NTCH

Highlight

Copy