1 โมเซ 23

ไลลวง ยุม ซารา ไม่ รมอยจ ปุย อื

1ซารา ไอม ฮอยจ ละ ไก อาญุ แตะ ติ รอย ไม่ ง่า โรฮ อาแลฮ เนอึม. 2ฟวยจ เซ ยุม นึง ย่วง เฮปโรน เมือง คะนาอัน. อัปราฮัม เยือม อื นา เซ.

3เญือม เซ อัปราฮัม โกฮ โฮว ฮา ป ยุม เซ, โฮว เคะ โม ฮิตไท. 4อัฮ เฮี ละ อื, “อาึ มัฮ ปุย ตังเมือง อาวต ลลาึง โม เปะ นา เฮี. ปัว เปอะ โชะ เตะ ละ อาึ ติ โดฮ ละ ซ รมอยจ เจอะ ปรโปวน เญือะ แตะ นึง,” อัฮ เซ ละ อื.

5โม ฮิตไท อัฮ เฮี ละ อัปราฮัม, 6“จาวไน, ง่อต ป อัฮ เอะ เอ. เอะ นัปทื ปะ. เมีญ โรฮ ปะ แปน ป ระ ลลาึง แตะ. เลือก เมิฮ โตะ ทัม ยุฮ เอะ เฮี. ไอฮ ป ปุก รพาวม เปอะ นึง. เอะ เฆรอึม ตื รพาวม นึง ซ เกือฮ แตะ โตะ รมอยจ ยุฮ แตะ ละ เปอะ ละ ซ รมอยจ เปอะ ปุย เญือะ แตะ นึง,” อัฮ เซ.

7เญือม เซ อัปราฮัม นุ่ม ไว โม ฮิตไท เซ. 8อัฮ เฮี, “ดัฮ ปุก รพาวม โม เปะ ละ ซ เกือฮ เปอะ อาึ รมอยจ ปุย เญือะ แตะ นา เฮี, ปัว เปอะ ไฮมญ เนิ นึง เอฟโรน กวน โซฮา เซ. 9ปัว เปอะ เกือฮ โชะ โตะ ทัม ยุฮ แตะ เซ เนิ ป อัฮ ปุย มักเปลา ไม่ เซ. มัฮ ป อาวต เฆียง รปึม ยุฮ อื. เกือฮ โชะ อื เนิ ตัม โซมกวน อื ซองนา โม เปะ เฮี, ละ ซ แปน อื เบือง รมอยจ ละ โม เญือะ เญะ,” อัฮ เซ ละ โม เซ อัปราฮัม เมอ.

10โม ฮิตไท เซ งาวม ดิ นา ก โพรม แตะ นึง โบ โตะ รเวือะ เวียง เซ. เอฟโรน เซ งาวม โรฮ นา เซ. อัฮ เฮี ซองนา ปุย โฮวน เซ, 11“จาวไน, ง่อต ป อัฮ อาึ อื, อาึ เกือฮ เยือ ละ เปอะ รปึม เซ, เตือง โตะ ทัม นึง อื. อาึ เกือฮ ละ เปอะ ซองนา โม คระ เฌือต แตะ เตือง โอยจ อื เฮี. ไอฮ เมิฮ. รมอยจ ปุย เญือะ เปอะ นึง,” อัฮ เซ ละ อื.

12เญือม เซ อัปราฮัม นุ่ม ไว โม ฮิตไท เซ. 13อัฮ เฮี ละ เอฟโรน เรียง ปอ ฮมอง ปุย เตือง โอยจ อื, “ปัว เปอะ ง่อต ป อัฮ อาึ เฮี, อาึ ซ รวี รปึม เซ นึง เปอะ. ไมจ เปอะ ไอฮ งวยฮ อื ตัม เมาะ โซมกวน อื. อาึ ซ รมอยจ ปุย เญือะ แตะ นึง,” อัฮ เซ.

14เอฟโรน อัฮ เฮี ละ อัปราฮัม, 15“จาวไน, รปึม เฮี งวยฮ ปาวน รอย เชเคน#23:15 นัมนัก มาื ติ เชเคน เซ ไก ด่าว 16 กรัม. โน่ง, อัม มัฮ ป ที ญอย ปุย นึง ละ ปุ แตะ? ไอฮ เมิฮ. รมอยจ ปุย เญือะ เปอะ นึง,” อัฮ เซ ละ อื.

16อัปราฮัม ญอม ไอฮ อื เมาะ เซ. ตุย ญอย ละ อื. แฆ มาื ละ อื ปาวน รอย เชเคน ตอก อัฮ อื ซองนา ปุย โฮวน เซ. โกว นัม นัก มาื ตัม ป โกว โม ปอกา เจน เซ.

17อัปราฮัม รวี เนอึม รปึม มักเปลา ป ไก ลวง ลั่ก โอก ซเงะ เญือะ มัมเร เซ ป มัฮ คอง เอฟโรน ไพรม อื. โฮลฮ อื เตือง รปึม เตือง โตะ ทัม เตือง โคะ ป ไก นึง อื เลี่ป รปึม เซ. 18แปน ป แจง แน นึง ปุน แปน โม ฮิตไท พีญัน อื เตือง โอยจ แตะ เญือม โพรม ดิ อื โบ โตะ รเวือะ เวียง เซ. 19เญือม เซ อัปราฮัม รมอยจ ซารา ปุย เญือะ แตะ โตะ ทัม อาวต นึง เมือง คะนาอัน เซ. 20มัฮ ตอก เซ ตอก โฮลฮ อัปราฮัม กุม รปึม ป มัฮ คอง โม ฮิตไท ไพรม อื เซ, เตือง โตะ ทัม นึง อื ละ ซ แปน อื รมอยจ ยุฮ อื.

Currently Selected:

1 โมเซ 23: lcp

Highlight

Copy