กันไกญกอ 6

โม ป เรอึม อาแลฮ ปุย

1ฟวยจ เซ เยอ เญือม เอีจ โฮวน ลุกซิก ปุๆ, โม ป ลปุง กริก เติ โม ป ลปุง ฮีบรู, นึง โอ โม แมฮัง ป มัฮ ไน โม โกะ อื โฮลฮ โอเอีฮ เญือม จัต ปุย โอเอีฮ โครยญ ซเง่ะ เซ. 2โม ป โฮว ฆรอ ลปุง ตัง พะเยซู กาว ลอา ปุย เซ กอก โม ลุกซิก เกือฮ โพรม เตือง โอยจ แตะ. อัฮ เฮี ละ อื, “เอะ คาว โตว ละ ละ แตะ กัน ครอฮ แตะ ลปุง พะจาว นึง ซ มาว แตะ ไม่ จัต แตะ ป โซม ป ปอน ละ ปุย. 3เอียกปุ, ไมจ เปอะ เลือก ปุย ไน โม เปะ ไอฮ อาแลฮ ปุย, ป มัฮ ปุย ไมจ มอยฮ ไม่ เนอึม รพาวม แตะ, ป นาวก นึง ลปุ พะจาว, ไม่ กัมกึต วิไซ ไมจ แตะ. ซ ดุฮ ฮุ แปน ป คิต กัน เฮี. 4โม เอะ นึง อื ซ ละ เวลา ยุฮ แตะ ละ ซ ไววอน แตะ ไม่ เพอึก แตะ ลปุง พะจาว ละ ปุย,” อัฮ เซ.

5ป อัฮ อื เซ ปุก รพาวม โม ลุกซิก เตือง โอยจ อื. โม เซ เลือก ซเทเฟน, ปุย นาวก นึง รพาวม เจือ ไม่ ลปุ พะจาว. เลือก โรฮ ฟีลิป ไม่ โพรโคโร, ไม่ นิคาโนน ไม่ ทิโมน, ไม่ พารเมนา, ไม่ นิโคลาว ป มัฮ ปุย เวียง อันทิโอก ป เอีจ เลียก นึง ริต ยุฮ โม ยิว. 6เกือฮ อื ฮอยจ เคะ โม ป มัฮ ไกญกอ ยุฮ แตะ. โม ไกญกอ เซ ไววอน ย่อง เตะ แตะ ราว อื.

7ลปุง พะจาว พรุ เฮือ ปุๆ. โม ลุกซิก นึง เวียง เยรูซาเลม พรุฮแพร โฮวน ปุๆ โม ซตุ โฮวน โรฮ ป เจือ เยอ.

ไล โฮมวต ปุย ซเทเฟน

8ป มัฮ ซเทเฟน เนอ, มัฮ ปุย อาวต เนอึม กุนมุ่น ยุฮ พะจาว นึง ไม่ อัมนัต อื. ยุฮ ป ซัมคัน ปอ เงอึต โม ลัปซด่อน นึง. 9ไก โฮงซุต ป อัฮ ปุย โฮงซุต ยุฮ โม ป เบลือฮ ฮา แปน แตะ ครา ไม่ ติ. โม ยิว ป กอ ซุต นึง อื มัฮ ปุย เวียง ไซริน ง่อน, ปุย เวียง อะเลกซันเด่เรีย ง่อน, ปุย จังวัต ซิลีเซีย ไม่ เอเซีย ง่อน. โม เซ ลลั่ฮ เก ปุ แตะ ไม่ ซเทเฟน. 10ลปุ พะจาว เกือฮ กัมกึต วิไซ ไมจ ละ ซเทเฟน นึง ลปุง อื. โม เซ ไป นึง อื.

11โม เซ บระ ซาวป ดวน ปุย รโจฮ ซเทเฟน ฆาื อื. ดวน อื อัฮ เฮี, “เอะ เอีจ ฮมอง เงอะ เพียก แฮม ปุย เฮี ไอ โมเซ ไม่ เพียก อื พะจาว,” ดวน โม เซ อัฮ เซ.

12เญือม เซ โม เซ ซาวป เซีฮ ซุย โม ลัปซด่อน ไม่ โม ป กวต ป เฮียง ไม่ โม คู เพอึก พะทัม, เกือฮ อื รอก พาวม นึง อื. โม เซ โฮว ซาวป โฮมวต ซเทเฟน ฆาื อื. เอีญ ตาว อื ฮอยจ ละ โม ซพา. 13บะ โรวก ปุย เกือฮ อื แปน ซกิ พีญัน โอ เนอึม. เกือฮ อื เลียก อัฮ เฮี, “ปุย เฮี เคราะ โตว อื เพียก แฮม แตะ วิฮัน เฮี ไม่ โกตไม ยุฮ พะจาว. 14เอะ เอีจ ฮมอง เงอะ อัฮ ปุย เฮี อื ตะ เยซู ย่วง นาซาเรต ยุฮ ไลจ ไม่ วิฮัน เฮี, ไม่ อัฮ อื ซ เปียน ปซี ปซา เอีจ เกือฮ ไอ โมเซ ละ เอะ เซ,” เกือฮ อื อัฮ เซ.

15เมาะ ป งาวม นึง ซพา เซ แก ที ซเทเฟน เตือง โอยจ แตะ. ยุ นา อื ตอก เอิน นา เตปด่า ยุฮ พะจาว ละ อื.

Currently Selected:

กันไกญกอ 6: lcp

Highlight

Copy