Матай 9
9
Исус һар-көлнь тәкрсн күүг эдгәҗәнә
1-2Исус сурһульчнрла оңһц дотр орад, нууриг һатлад, эврәннь хотнур ирв. Нег цөөкн күн Терүн тал һар-көлнь тәкрсн күүг девскртәһинь авч ирв. Исус теднә итклинь үзәд:
– Байрл! Килнцчн тәвгдҗәнә, – гиҗ гемтә күүнд келв.
3Тиигхлә ном цәәлһәчнр: «Эн күн Бийән Бурхнд тоолҗана. Эн Бурхна тускар му келҗәнә», – гиҗ дотран санцхав.
4Исус теднә ухаһинь медәд:
– Седклтн юңгад тиим му ухата болна? 5Ю келхд амр: «Чини килнцчн тәвгдҗәнә» эс гиҗ «Босад йов»? 6Би, Күмни Көвүн, әмтнә килнц тәвҗ өгх йостав гиҗ таднд медүлхин төлә эн күүнд иигҗ келҗәнәв: Бос, эврәннь девскрән авад герүрн хәр.
7-8Тернь босад герүрн йовв. Энүг үзсн әмтн икәр сүрдв. Тедн тиим йос күүнд өгсн Бурхиг магтҗ туурулв.
Исус Матайиг дуудҗана
9Исус цааранднь йовҗ йовад тамһин герин өөр суусн нег кү үзв. Тер Матай бәәҗ.
– Намаг дахад йов, – гиҗ Исус тер күүнд келв.
Тернь босад Исусин ардаснь йовв. 10Исусиг Матайин герт хот ууҗасн цагт тиигәрән алв цуглулдг болн кесг килнцтә улс ирцхәв. Тедн Исусла хамдан хот ууһад нәәрлцхәв. 11Энүг үзсн паршмуд Исусин сурһульчнрас:
– Багштн алв цуглулдг килнцтә улсла яһад хот ууҗахмб? – гиҗ сурцхав.
12Теднә келсиг соңсад, Исус:
– Эрүл-менд күүнд биш, гемтә күүнд эмч кергтә. 13«Бәрц бәрхин ормд өршәңгү болтн», гисн үгмүд ямаран учртаһинь йовад медтн. Чик седклтә әмтиг биш, килнцтә әмтиг дуудхар Би ирүв, – гив.
Мацг бәрлһнә тускар
14Йохана сурһульчнр Исус тал ирәд:
– Бидн болн паршмуд мацг бәрнәвидн, Тана сурһульчнр мацг яһад эс бәрнә? – гиҗ сурцхав.
15– Хүрмд ирсн гиичнр күргнә өөр гейүрәд бәәхлә, сән болхий? Зуг цагнь ирхлә, күргн теднәс салһҗ авгдхла тер цагт тедн мацг бәрх. 16Хуучрад салврҗ одсн хувцнд шин халас тәвхш. Шин тәвсн халасн хуучн хувциг цааранднь теслх, шуурхань улм икдх. 17Тер мет күчән авчах чаһриг хуучн бөрвд кедмн биш. Бөрвнь шуурад үрх, чаһрнь асхрх. Күчән авчах чаһриг шин бөрвд кедмн. Тиигхлә чаһрньчн, бөрвньчн үрл уга бүтн бәәх, – гиҗ Исус хәрү өгв.
Күүкиг әмдрүллһн болн өвчтә күүкд күүг эдгәлһн
18Исусиг үгән келҗәхлә, Йудья улсин толһачнрин негнь өөрдәд, Исусин өмн сөгдәд:
– Мини күүкм шиңкән өңгрҗ одла, буйн болтха күүкндм һаран күргәтн. Тер әмдрх! – гив.
19Исус ормасн босад сурһульчнрла хамдан тер толһачиг дахҗ йовв. 20Генткн нег күүкд күн Исусин ардас өөрдәд, хувцна хормаднь һаран күргв. Тер күүкд күн арвн хойр җилдән цусн һарлһна гемәр зовад гемндг бәәҗ. 21«Кемр хувцна хормаднь һаран күрхлә, дарунь эдгхв», – гиһәд тер дотран ухалв. 22Исус ардаран эргҗ хәләһәд, тер күүкд күүг үзәд:
– Байрл! Итклчн чамаг аврав, – гив.
Тер кемд күүкд күн гемәсн эдгв. 23Исус толһачин герт ирәд, бүрә-бүшкүрчнриг, һашудҗ уульсн-дуулсн олн әмтиг үзәд:
24– Һартн эндәс! Күүкн өңгрсн уга. Күүкн унтҗ кевтнә, – гив.
25Әмтн Исусар наад бәрәд инәлдцхәв. 26Әмтиг һарһҗ йовулад, Исус герин хорад орад, күүкиг һараснь авхла, тернь босв. Эн өвәрцин туск зәңг эргндк һазрар тарв.
Хойр сохр күүг эдгәлһн
27Исус бәәсн һазрасн һарч йовхла, хойр сохр күн Терүг дахв.
– Давидин Көвүн#Давидин көвүн гиснь – Давидин тохмта күн. хәәрлич мадниг! – гиҗ тедн хәәкрцхәв.
28Исусиг нег герт орҗ йовхла, хойр сохр күн Исус тал өөрдв.
– Намаг нүднә хара орулҗ чадх, гиҗ иткҗәнт? – гиҗ Исус сурв.
– Иткҗәнәвидн, мана Деед Эзн, – гиҗ тедн хәрүднь келцхәв.
29– Таднд иткләр болтха! – гиҗ Исус келәд теднә нүднд һаран күргв.
Тедн үздг болв.
30– Хәләтн, Мини тускар күүнд бичә келтн, – гиҗ Исус теднд зәрлг болв.
31Зуг тер хойр эдгсн күн һарч йовад, эргндк һазрар Исусин тускар әмтнд зәңглв.
Келн уга хар сәкүстә күүг эдгәлһн
32Тедниг йовҗ одхла, Исус тал келн уга хар сәкүстә күүг авч ирв. 33Хар сәкүсиг көөсн хөөн келн уга күн келдг болв. Әмтн икәр алң болцхав.
– Тиим өвәрц йовдл эн Израилин һазрт одачн учрад уга билә, – гиҗ тедн келцхәв.
34– Эн эрлгин күчәр хар сәкүсдиг көөнә, – гиҗ паршмуд келдг бәәсмн.
Исус әмтнд сана зовҗана
35Исус балһсн, хотн болһнар йовад, хурлд әмтиг сурһад, Бурхна йосна тускар Сән Зәңг цәәлһҗ тархаһад, әмтиг олн зүсн гемәс эдгәдг бәәсмн. 36Исус олн әмтиг үзәд, теднд санань зовв, юңгад гихлә, тедн хөөч уга тарҗ одсн хөд мет муурсн бәәдлтә бәәҗ.
37-38– Хурах урһц ик, көдләчнр баһ. Тәрсн тәрәг хурах, хадх көдләчнриг илгәтхә гиһәд хадлһна Эзнд зальвртн! – гиҗ Исус эврәннь сурһульчнртан келсмн.
Currently Selected:
Матай 9: ХКО_ӘБ
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Институт перевода Библии, 2002-2023