Матай 7
7
Кү бичә гемшәтн
1Кү бичә гемшәтн. Тадниг Бурхн гемшәхн уга. 2Ямаран кевәр әмтиг гемшәнәт, тиим кевәр тадниг Бурхн гемшәх. Ямаран кемҗәһәр кемҗәлнәт, тиим кемҗәһәр тадниг кемҗәлх. 3Ахиннь толһадк өвс үзәд бәәҗ, эврәннь толһадк өвр яһад эс үздмч? 4«Ах минь, толһаһасчн өвс һарһҗ хайнав», – гиҗ келнчн яһҗ көндрҗ келдмб? Чини толһа деер өвр бәәнәлм. 5Хойр чирәтн! Түрүләд эврәннь толһа деерк өвр авч хайчкад, тегәд ахиннь толһадк өвс яһҗ авч хайхинь медхич. 6Хар нохасд үнтә зөөрән хайҗ бичә өгтн. Тедн хәрү эргәд тадниг шүүрәд зуучкх. Һахан чикнд сувсан бичә өлгтн. Тедн өлгситн көлдән шивәд, ишкәд үрәчкх.
Суртн, хәәтн, үүд цоктн!
7Сурад бәәтн – сурситн өгх. Хәәһәд бәәтн – хәәсән олҗ авхит. Үүдинь цокҗатн – таднд тәәлҗ секх. 8Сурад бәәсн күн – сурсан авчана. Хәәһәд бәәснь – хәәсән олҗана. Үүд цокҗаснд – тәәлҗ секҗәнә. 9Көвүнтн өдмг сурхла, кен таднас чолу өгхмб? 10Көвүн заһс сурхла, эцкнь моһа өгхий? 11Кемр тадн килнцтә болвчн үрндән яһҗ белг өгхинь сәәнәр медхлә, энүнәс үлү кедү сән белг тана теңгрин Эцктн сурсн әмтнд өгх!
12Ямр чигн кергт тана өмн әмтн яһҗ бийән бәртхә гинәт, тиим кевәр тадн чигн теднә өмн бийән бәртн. Энүг Закан болн әәлдәчнрин дегтрмүд сурһна.
Чик хаалһар йовтн
13Уутьхн үүдәр орҗ йовтн. Үклин амн өргн, хаалһнь амр. Олн әмтн түүгәр йовна. 14Әмн-җирһлин амн уутьхн, хаалһнь кецү. Терүг олдгнь йир цөн.
Кесн үүл эзән үзүлдг
15Худл әәлдәчнрәс бийән саглтн! Тедн хөөнә бәәдл зүүсн махч чонмуд мет. 16Тадн тедниг кесн үүләрнь медҗ авхит. Көгләс уста үзм, хатханчгас инҗр цуглулҗ болхий? 17Тер учрар сән модн сән темс өгнә. Му модн – му темс өгнә. 18Сән модн му темс өгхш. Му модн – сән темс өгдмн биш. 19Сән темс өгдго модн болһниг чавчад шачасн һалд хайчкна. 20Тер учрар худл әәлдәчнриг теднә кесн үүләр медҗ авхит. 21«Деед Эзн! Деед Эзн!» – гиҗ дуудсн әмтнәс цугнь Теңгрин Орнд орхш. Зуг Теңгрин Эцкимм заасинь күцәдг күн Теңгрин орнд орх.
22Зарһин өдрт олна ик зунь:
– Деед Эзн! Деед Эзн! Тана нерн деерәс бидн номитн тархадг эс билүвидн? Тана нерн деерәс хар сәкүсдиг көөҗ һарһдг эс билүвидн? Тана нерн деерәс кесг өвәрцс кедг эс билүвидн? – гиҗ келх.
23Зуг Би хәрүднь:
– Би тадниг төрүц меддго биләв. Му кедг улс! Нанас хооран йовтн! – гиҗ келхүв.
Ухата болн эргү тосхач
24Тер учрар, эн Мини үг соңсад, келсим күцәдг күүг хад чолун деер гер бәрсн ухата күүнлә дүңцүлҗ болхмн. 25Хар салькн көдләд, хур икәр орад, һолын усн деврәд, тер герин орад асхрв. Зуг гер чолун деер бәәсн төләд, ормасн төрүц көндрсн уга.
26Зуг Мини үг соңсад, келсим күцәдго күүг элсн деер гер бәрсн ухан уга күүнлә дүңцүлҗ болхмн. 27Хар салькн көдләд, хур икәр орад, һолын усн деврәд, тер герин орад асхрна. Гернь хольврад хамхрад одна, – гиҗ Исус сурһв.
28Исус үгән төгсәхлә, әмтн терүнә номд икәр өврцхәв. 29Исус закана багшнрла әдл биш Бурхна йос бәрдг күүнлә әдл сурһв.
Currently Selected:
Матай 7: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023