Яков 5

Байн улст келсн сагллһн

1Ода, тадн баячуд, намаг соңстн! Оркрҗ уультн! Тадн зовлңла харһхит. 2Тана байн зөөртн илҗрәд одҗ, хувц-хунритн гүр идчкҗ. 3Алтнтн, цаһан мөңгнтн зеврҗ одҗ. Эн зев тана өмнәс герч болад, һал мет тадниг шатах. Эн сүл өдрмүдт эн зөөриг тадн цуглуллат. 4Тана һазрин урһц хурасн көдләчнрт тадн җалвинь өгл уга хулхалҗ авлат. Соңстн: тана көдләчнр хәәкрәд, һундлан өргнә. Теднә һундл Теңгрин цергин Деед Эзнд күрч. 5Тадн һазр деер элвг-делвгәр бәәҗ бахан хаңһадг биләт, аллһна өдрин төлә тадн бийән бордсн биләт. 6Тадн нүл уга улсиг гемшәһәд алсн биләт, болв тедн тана өмнәс төрүц сөрүцсн уга.

Тесврин болн зальврлһна тускар

7Ахнр-дүүнр минь! Деед Эзиг иртл тесвртә бәәтн. Хәләтн! Яһҗ тесвртәһәр тәрә тәрсн күн үнтә урһциг һазр кезә өгхинь, намрин болн хаврин хур орхинь күләнә. 8Тадн бас тесвртә кевәр бәәтн, зөргтә кевәр итктн, яһад гихлә, Деед Эзн ирхнь өөрхн. 9Гемшәгдшгон төлә нег-негнәннь тускар бичә һундл өргтн. Зарһч үүднә өөр зогсна.

10Ахнр-дүүнр минь! Деед Эзнә нерн деерәс келдг әәлдәчнрәс яһҗ тесвртә кевәр зовлңган даахинь үлгүр автн. 11Зовлң даадг улсиг бидн буйн кишгтә улс гиҗ келнәвидн. Иов яһҗ зовлң даасинь тадн соңслат. Сүүлднь Деед Эзн терүг яһҗ ачлсинь тадн бас соңслат. Яһад гихлә, Деед Эзн өршәңгү болн өр-өвч.

12Ахнр-дүүнр минь! Хамгин түрүнд үг өгхләрн бичә андһар тәвтн. Теңгрәр чигн, һазрар чигн, нань чигн юмар андһар бичә тәвтн. «Э» гиҗ санхларн, «Э» гитн, «уга» гиҗ санхларн, «уга» гитн. Эс тиигхлә, Бурхн тадниг гемшәх. 13Тадн дунд зовлңла харһсн күн бәәнү? Зальвртха! Тадн дунд байрта күн бәәнү? Магталын дуд дуултха! 14Тадн дунд гемтә күн бәәнү? Чонҗин һардачнриг дуудтха! Тедн ирәд, Терүнә төлә зальврад, Деед Эзнә нерн деерәс олив тос түрктхә. 15Тедн Бурхнд иткәд зальврхла, гемтә күн эдгх. Деед Эзн терүг эдгәх. Кемр гемтә күн килнц кесн болхла, Бурхн терүнә килнцинь тәвх. 16Тегәд эдгхин төлә нег-негндән килнцән илдкҗ келтн. Нег-негнәннь тускар зальвртн. Чик седклтә күүнә зальврлһн күчтә юм күцәҗ чадна.

17Әәлдәч Элья маднла әдл күн билә. Хур бичә ортха гиҗ тер шунҗ зальврла. Цуг нутгт һурвн җил дундуртан хур ордган уурч. 18Дәкәд терүнә зальврсар теңгрәс хур асхрв, һазр урһц өгв.

19Ахнр-дүүнр минь! Кемр тадн дундас кен чигн күн үнн хаалһас хаҗиһәд төөрхлә, талдан күн терүг хәрү Бурхн тал ирүлхлә, 20тодлтн: килнцтә күүг чик хаалһур ирүлсн күн терүнә седкл аврх. Энүнәс көлтә кесг килнц тәвгдх.

Currently Selected:

Яков 5: ХКО_ӘБ

Highlight

Copy