Яков 1

Мендллһн

1Би Бурхна болн Деед Эзн Исус Христосин Яков, таднд олн келн улс дунд тарсн арвн хойр уңг-тохмин улст менд илгәҗәнәв.

Цецн ухан болн иткл

2Ахнр-дүүнрм! Ямаранчн сөрлһнлә харһсн цагт байрлтн. 3Тана итклиг сөрснә хөөн та тесвртә болдгиг тадн меднәт. 4Тана тесвр оньдиндән икдтхә. Тиигәд тадн бөдүн болн юмнд дуту уга болҗ чадхит. 5Кемр тадн дундк улсин кенд чигн цецн ухан эс орхла, Бурхнас суртха. Бурхн терүнд өгх. Бурхн өгәнч, сурсн күүг гемшәлго, цецн уха өгнә. 6Зуг сурсн цагт тадн алмацл угаһар иткх зөвтәт. Алмацсн күн салькар өрггдҗ көөгддг теңгсин дольган мет болна. 7-8Шиидвр авх арһ уга күн, шуд хаалһар йовҗ чаддго күн Деед Эзнәс юм авч чадхв гиҗ бичә сантха.

Угатя болн байн күүнә тускар

9Иткдг номһн күүг Бурхн деегшлүлхлә, тер байрлх зөвтә. 10Байн күүг Бурхн номһрулхла, тер күн байрлх зөвтә. Яһад гихлә, цагтнь тер кеер урһдг ноһана цецгә мет уга болҗ одх. 11Нарн һарад, һаң халун шатаһад, ноһаг хагсана. Терүнә цецгәнь унад, сәәхн бәәдлнь уга болҗ одна. Тиим кевәр байн күн эврәннь кергән кеҗәһәд уга болҗ одна.

Сөрлһнә тускар

12Сөрлһнлә харһад, терүг дааҗ һардг күн буйн кишгтә болдг. Яһад гихлә, цугинь даасн хөөн тер мөңк җирһл эдләд ачлгдх. Эн ачиг Бурхн Бийднь дурта улст өгнәв гив. 13Тадн сөрлһнлә харһхларн, Бурхн намаг сөрҗәнә, гиҗ бичә келтн. Бурхн Бийнь хар санаһар сөргдхш, әмтиг бас сөрхш. 14Күн му седвәрт авлгдад, терүнә хавхд торна. 15Энүнә хөөн му седвәр күүнә седклд батрад, күүг килнцд уңһана. Кесн килнцнь күүг үкллә харһулна.

16Хәлән бәәтн, хәәртә ах-дүүнрм, меклгддг болвзат! 17Сән болн йосн белг теңгрәс ирнә, нарн, сар, одд үүдәсн Эцкәс өггднә. Тер төрүц сольгдхш, хүврснә бәәдл чигн уга. 18Бурхн эврәннь таалар үннә үгәр дамҗад, маднд шин җирһл өгв. Мадниг Терүнә олн үүдәврин хамгин түрүңкнь болтха гиҗ тиигв.

Бурхна үг соңсснь болн күцәснь

19Хәәртә ахнр-дүүнрм! Энүг тодлтн: Оньган өгч соңсхд белн болтн, зуг келхәр, уурлхар бичә адһтн. 20Яһад гихлә, күн уурлхла, Бурхнд тааста юм кеҗ чадшго. 21Эн учрар ямаран чигн бузр авъясан болн му йовдлан хайтн. Бурхна келсн үгиг номһн седкләр тогтаҗ автн. Эн үг таниг аврҗ чадх чинртә.

22Бурхна үгиг харҗахар гиҗ бичә соңстн күцәтн. Тиим эс болхла, тадн бийән меклҗәнәт. 23Үгиг соңсдг, зуг күцәдго күн нүр үздгт бийән ширтҗ хәләдг күн мет. 24Бийән хәләчкәд, һарад йовҗ одна. Тиигәд ямаран бәәдлтә болдган мартчкна. 25Болв сулдхврин туск дуту уга номиг шинҗлҗ күцәдг күн буйн кишгтә. Тер мартмха соңсач биш, соңссан күцәдг күн болҗана.

26Би шаҗна йосар бәәдв гиҗ тоолдг, зуг келән бәрҗ чаддго күн бийән меклнә. Терүнә шаҗна бәәдлнь юмн биш. 27Өнчн күүкд болн белвсн күүкд улс зовхла, теднд нөкд болад, орчлңгин хар санаһар бийән бузрдалго бәәдгиг Бурхн Эцк йосн цевр шаҗнд тоолна.

Currently Selected:

Яков 1: ХКО_ӘБ

Highlight

Copy