Эклц 3

Түрүн килнц

1Деед Эзн Бурхна үүдәсн зерлг аңгудас хамгин мектәнь моһа бәәҗ. Күүкд күүнәс тер сурна:

– Нег чигн моднас темс бичә идтн гиҗ, Бурхн үнндән тиигҗ келви?

2Күүкд күн моһад иигҗ хәрү өгнә:

– Бидн садын моддас темсд идҗ чадҗанавидн. 3Болв Бурхн келв: «Садын тал дунд урһҗах модна темсд бичә идтн, бичә тедниг көндәтн, эс гихлә тадн үкҗ одхит».

4– Уга, тадн төрүц үкшгот. 5Болв терүг амссн өдрәс авн нүднтн секгдәд, цаһан сана болн хар сана медәд, Бурхнла әдл болҗ одхиг Бурхн медҗәнә, – гиҗ моһа келнә.

6Модна темсн хотд сән болхинь, зүсәрн авта бәәдлтәһинь күүкд күн үзәд, цецн уха өгдгинь санна. Тегәд нег темс авад иднә. Залудан нег темс өгнә, тернь темсиг бас иднә. 7Тер хойрт серл орад, нүцкн бәәсән меднә, тегәд бийдән белкүсәрн боодг боодһа инҗрин хамтхасар кеҗ авцхана.

8Өдрин серүн цагла сад дотраһур Деед Эзн Бурхна йовсн ә тедн соңсна. Залу гергн хойр Деед Эзн Бурхнас садын модд дунд бултна. 9Болв Деед Эзн күүг дуудна:

– Чи альд бәәнәч?

10– Сад дотр Тана ду соңсад әәвүв, юңгад гихлә би нүцкмб. Тегәд би бултув, – гиҗ күн хәрү өгнә.

11– Чамаг нүцкн гиҗ кен чамд келв? Мини бичә ид гиҗ заксн моднас темс чи идсн болвзач? – гиҗ Деед Эзн Бурхн сурв.

12– Нанла бәәтхә гиһәд Тана өгсн күүкд күн нанд тер модна темс өгв, би терүг идүв, – гиҗ күн хәрү өгнә.

13Тиигхләнь Деед Эзн Бурхн күүкд күүнд иигҗ келв:

– Ю кеснчнь энви?

– Моһа намаг меклв, тегәд би идүв, – гиҗ күүкд күн хәрү өгнә.

14Тиигхләнь Деед Эзн Бурхн моһад келнә:

– Чи иим йовдл һарһснас көлтә

Цуг малмуд дундас,

Талдан зерлг аңгуд дундас харалла харһҗанач.

Чи элкәрн мөлкхич,

Җирһлиннь цуг өдрмүдт

Чи тоос идхич.

15Чини болн күүкд күүнә хоорнд,

Чини хөөт үйнрин болн терүнә

Хөөт үйнрин хоорнд

Би өшә орулнав.

Терүнә хөөт үйнр чамаг толһаһарчн шаах,

Чи тедниг өскәһәрнь хатххич.

16Күүкд күүнд Деед Эзн Бурхн келв:

– Чини саата цагин зовлңгиг Би икдүлхүв: үрдән чи энлҗәһәд һарһхич. Чи залутаһан ниилхәр седхич, болв тер чамд нойрхх.

17Адамд Тер келв:

– Чи гергнәннь үг соңсад, бичә ид гиҗ чамд Би заксн бийнь, тер модна темс идснәс көлтә һазр харалла харһҗана: җирһлиннь цуг өдрмүдт күчр көдлмш кеһәд, чи һазрас эдлврән авхич.

18Һазр чамд хатханчг болн буг өвс урһах,

Чи һазрас урһсн юмар эдлвр кехич.

19Һазрт хәрү ортлан,

Чи эврәннь көлсән асхҗ өдмгән олхич,

Юңгад гихлә чи һазрас авгдлач.

Юңгад гихлә чи – тоосн болҗанач,

Чи тооснд хәрү хүврхич.

20Адам эврәннь гергндән Ева#3:20 Ева – эн нерн (евр. Хавва) әәһәрн «җирһл» гидг еврей келнә үгин бәәдлтә. гидг нер өгв. Яһад гихлә тер цуг әмд бәәсн әмтнә элнцг экнь болв. 21Деед Эзн Бурхн арсар хувц кеһәд, терүгәр Адамиг болн терүнә гергиг хувцлв.

22Хөөннь Деед Эзн Бурхн келнә:

– Күн ода цаһан сана болн хар сана медсәрн Мадна негнләнь әдл болв. Җирһлин моднас күн темс бичә таслҗ идтхә, мөңк бичә җирһтхә гиҗ саглв.

23Һазрас авгдсн күн һазр деер көдлтхә гиһәд, Деед Эзн Бурхн терүг Эденә садас көөв. 24Күүг көөчкәд, Бурхн Эденә садын дорд үзгт җирһлин модн талк хаалһ манхин төлә керүбмүдиг#3:24 Керүбмүд – әрүн орм мандг Бурхна күчтә элчнр. зогсав, эргдг һал үлд тәвв.

Currently Selected:

Эклц 3: ХКО_ӘБ

Highlight

Copy