Эклц 18
18
Һурвн гиич
1Өдрәр һал үдлә Мамрен хар моддын хаҗуд шатриннь үүднд суухлань, Абрахам тал Деед Эзн баралҗ ирнә. 2Хәләхлә, хол биш зогсчасн һурвн күн Абрахамд үзгднә. Тедниг үзн, Абрахам шатрин үүдн талас өмнәснь тосч гүүһәд, һазрт күрч мөргв.
3– Мини Деед Эзн, кемр би Тана нүүрт хәәрлт үзсн болхла, Эврәннь зарцин хаҗуһар бичә давҗ һартн. 4Эн модн дор амрад суутн, көлитн уһах ус ода авч ирх, 5би таднд хот авч ирнәв. Кемр тадн эврәннь зарцин хаҗуһар йовҗ йовсн болхла, невчкн чидл авад, цаарандан йовхит, – гиҗ тер келв.
– Йир сән. Келсәрн ке, – гиҗ тедн келв.
6Абрахам шатр дотр бәәсн Сарра тал адһна.
– Шулуһар икәр сән һуйр авад, элдәд өдмг болһ, – гиҗ Абрахам гергндән келнә.
7Дәкәд тер мал талан гүүҗ одад, сәәнәснь баахн туһл бәрҗ авад, зарцдан өгнә. Тернь хот белднә. 8Дәкәд Абрахам ээзгә, үс авч ирнә, гиичнрин өмн болһсн туһлын мах тәвнә. Тедниг хот идтл, Абрахам хаҗуднь модна сүүдрт зогсв.
9– Сарра гидг гергнчнь яһла? – гиҗ тедн Абрахамас сурна.
– Тенд, шатр дотр бәәнә, – гиҗ тер хәрү өгнә.
10Тиигхләнь нег гиич келнә:
– Би маһд уга урһх җилд хәрү чам тал ирнәв, минь эн цагла. Чини гергн Сарра көвүтә болх.
Арднь бәәсн шатрин үүднд зогсчасн Сарра теднә күүндвр соңсна. 11Абрахам Сарра хойр көгшн, ик наста билә. Күүкд улст ирдг сарин кир Саррад ирдгән уурла. 12Тегәд Сарра инәһәд, дотран иигҗ санна:
– Би көгшрүв, мини эзн көгшн: нанд тиим байр үзгдхмн болхви?
13Тиигхләнь Деед Эзн Абрахамд келнә:
– Яһад Сарра инәҗәхмб? «Йосндан нанд күүкд олдхмн болхви, би көгшнлм», – гиҗ яһад келв? 14Деед Эзнд күцәҗ болшго кецү юмн бәәхий? Би тадн тал җил болад ирнәв, Сарра көвүтә болх.
15– Би инәсн угав, – гиҗ Сарра әәһәд, худл келнә.
– Уга, чи инәләч, – гиҗ Деед Эзн келнә.
Абрахам Содомин тускар сурна
16Залус босад, Содом тал хәләцхәв. Абрахам тедниг үдшәхәр хамдан һарна.
17– Кехәр седҗәхән Би Абрахамас нуухий? 18Абрахамас маһд уга алдр болн чидлтә улс үүдх. Һазр деерк келн-улс цугтан терүгәр дамҗад әдс авх. 19Би терүг шүүҗ авхларн, тер эврәннь үрдтән, цуг хөөт үйнртән Деед Эзнә хаалһар йовтха гиҗ заквр өгтхә гиләв: үнн болн чик бәәдлтәһәр бәәтхә. Би, Деед Эзн, Абрахамд өгх болсан күцәхүв, – гиҗ Деед Эзн келв.
20– Содом болн Гоморан балһсдт бәәх улс йир андн, теднә килнц дегд ик, гиҗ Би соңслав. 21Би бууһад хәләнәв, Мини соңссар болхий аль угай? Кемр уга болхла, Би медхв, – гиҗ Деед Эзн Абрахамд келв.
22Залус эргәд, Содом тал йовна, болв Абрахам Деед Эзнә өмн зогсад үлдв. 23Абрахам Терүн тал өөрдәд иигҗ келнә:
– Та үннч күүг килнцтә күүнлә хамднь уга кеһәд оркхийт? 24Кемр тер балһснд тәвн үннч күн бәәхлә яахмб? Эн ормиг Та үннч тәвн күүнә төлә хармнлго, уга кехийт? 25Бичә үзгдтхә. Тиим юм Та һарһшгот. Үннч күүг килнцтә күүнлә хамднь алшгот, үннч күүг килнцтә күүнлә әдл засглҗ чадшгот. Та тиигҗ чадшгот! Цуг һазрин Зарһч үнн биш юм һарһхий?
26– Кемр Содомд Би үннч тәвн кү олҗ авхла, теднә төлә эн балһсиг хәәрлнәв, – гиҗ Деед Эзн келв.
27Тиигхлә Абрахам шинәс иигҗ келв:
– Ода би күр, тоосн болх болв чигн Деед Эзнд зөрцҗ иигҗ келхәр седҗәнәв: 28Кемр үннч тәвн күүнд тавнь эс күртхлә яахмб? Тавн күүнәс көлтә Та цуг балһсиг уга кехийт?
– Кемр Би тенд дөчн тавн кү олхла, тиигхлә терүг Би уга кешгов, – гиҗ Деед Эзн келв.
29Абрахам терүнәс бас нег дәкҗ:
– Тенд зуг дөчхн күн олдхла яахмб? – гиҗ сурна.
– Дөчн күн бәәхлә, Би тиим юм кешгов, – гиҗ Деед Эзн келв.
30Тиигхлә Абрахам келв:
– Деед Эзн бичә уурлтха, нанд келх зөв өгтхә. Кемр зуг һучн күн олдхла яахмб?
– Кемр тенд һучн кү олҗ авхла, Би тиим юм кешгов, – гиҗ Деед Эзн хәрү өгв.
31Абрахам иигҗ келв:
– Деед Эзнәс иигҗ сурхар би шиидүв. Тенд зуг хөрн күн олдхла яахмб?
– Хөрн күүнә төлә, Би терүг уга кешгов, – гиҗ Деед Эзн хәрү өгв.
32Тиигхлә Абрахам келв:
– Деед Эзн бичә уурлтха, зуг нанд бас келх зөв өгтхә. Кемр арвхн күн олдхла яахмб?
– Арвн күүнә төлә Би терүг уга кешгов, – гиҗ Деед Эзн келв.
33Абрахамла кесн күүндврән төгсәһәд, Деед Эзн йовв, Абрахам герүрн хәрҗ ирв.
Currently Selected:
Эклц 18: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
