Апостолмуд 8

Шаул Христост иткдг улсиг көөнә

1Степаныг алсиг Шаул чик гиҗ тоолна. Тер өдрмүдт Ерусалимин иткдг улсиг икәр шахад көөнә. Апостолмудас талдан иткдг улс Йудья, Шамарья һазрар йовад тарлдна. 2Бурхнд шүтдг улс Степаныг оршаһад икәр уульцхав. 3Шаул чонҗиг уга кехәр иткдг улсла ноолдаһан эклнә. Христост иткдг улсин гермүд эргәд, тер залус күүкд улсиг гертнь бәрәд түүрмд суулһна.

Шамарьяд Пилип цәәлһвр кенә

4Ерусалимас көөгдәд тарлдсн иткдг улс йовсн һазртан Бурхна номиг олнд күргәд тархав. 5Пилип бас Шамарья һазрин балһснд ирәд, Христосин тускар цәәлһврин көдлмш кев. 6Олн әмтн седклән өгәд, Пилипин келсиг соңсцхав. Терүнә кесн онц темдгиг тедн үзв. 7Кесг күүнәс хар сәкүсн чаңһар хәәкрәд һарв. Кесг мөч тәкрсн, доһлң улс гемәсн эдгв. 8Энүг үзәд балһсна улс байрлцхав.

9Эн балһснд Шимон гидг бөөтә күн бас бәәҗ. Шамарьян бәәрн улсиг эврәннь эрдмәрн өврүлҗ, бийән алдрт тоолдг билә. 10Эн күүнд «Ик Күчн» гидг бурхна хүвлһән күрч гиһәд элгнь чигн, зәәсңгнь чигн терүг өврдг бәәҗ. 11Терүг соңсдг учрнь юундв гихлә зөвәр цагтан олн-әмтиг илвәрн авлҗаҗ. 12Эн балһсна улс Бурхна орн-нутгин тускар болн Исус Христосин нериг Пилип келснд иткхләрн залус, күүкд улс үлдлго уснд кирслгдв. 13Шимон Христост бас иткәд, уснд кирслгдснә дару Пилипин хаҗуд бәәв. Тер Пилипин кесн онц темдгүд болн күчтә йовдлмуд үзәд өврв.

14Ерусалимд бәәсн апостолмуд, Шамарьян улс Бурхна ном авсинь соңсад, Пётр Йохан хойриг теднүр илгәнә. 15Пётр Йохан хойр ирәд, шинәс Бурхнд итксн күүнд Әрүн Сәкүс өгдгәр зальврна. 16Яһад гихлә, Исусин нернә төлә уснд кирслгдв чигн Әрүн Сәкүсн тедн деер бууһад уга бәәҗ. 17Тегәд Пётр Йохан хойр иткдг улсин толһа деернь һаран тәвнә. Теднь Әрүн Сәкүс авв.

18Апостолмудын һаран тәвлһәр Әрүн Сәкүсн өггдсиг Шимон үзәд, Пётр Йохан хойрт мөңг өгхәр седнә.

19– Кемр мини тәвсн һарас күн болһн Әрүн Сәкүсәр бас дүүрхлә, нанд бас тиим күч өгтн, – гиҗ тер сурна.

20– Бурхна билгиг мөңгәр хулдҗ авхар седсн чи мөңгтәһән хамдан үкх бол, – гиҗ Пётр терүнд келнә, – 21Энчнь йосндан чини көдлмш биш. Яһад гихлә, Бурхна нүүрт чини зүркн ода чигн цевр биш. 22Эн килнцтә бәәдл үлдәһәд Деед Эзнд үнн седкләсн зальврх кергтә, тегәд Бурхн чини килнцичн тәвҗ өгх. 23Чи үлү үзәд, килнцтә тоотын ялчнь болҗанач.

24Тиигхлә Шимон Пётр Йохан хойрас иигҗ сурна:

– Буйн болтха, эрҗәнәв танас, тана келсн тоот нанд хальддгоһар мини төлә Деед Эзнд зальвртн, – гинә.

25Апостолмуд олн-әмтнд герчләд, Деед Эзнә номан цәәлһҗ медүләд, хәрү Ерусалим тал һарад йовна. Хәрҗ йовад, хаалһдан харһсн Шамарьян селәдт бас Сән Зәңг тархана.

Пилип болн Эфиоп

26– Бос! Өмн үзг тал йов! Ерусалимас Газа тал һарсн хаалһд һарад зогс, – гиҗ Деед Эзнә элч Пилипд келнә. (Эн хаалһар ода күн йовхш.)

27Пилип босад йовна. Зуурнь Кандаки гидг Эфиопин хатн хаана үнтә тоотыг хадһлдг Ерусалимд мөргүл кехәр ирсн тәәһн һардач күн харһна. Тер күн мөрн тергн деер сууһад, 28хәрү йовҗ йовад әәлдәч Эшьян бичсн дегтр умшҗ йовла. 29Пилипд Сәкүсн келнә:

– Тер тергнүр өөрдәд хаҗуднь йов.

30Пилип тергн тал гүүҗ өөрдәд, Эшьян дегтрәс умшҗасинь соңсад келв:

– Умшҗаснчнь чамд медгдҗәнү?

31– Күн эс цәәлһҗ өгхлә, яһҗ медҗ чадх биләв? – гиһәд хәрү өгәд, Пилипиг өөрән суухиг эрнә.

32Умшҗасн халхднь иигҗ бичәтә: «Алулхар дахулҗ йовсн хөн кевтә Тер йовла. Кирһәчиг үзсн хурһн кевтә кииһән авлго бәәҗ. Тер нег чигн үг келсн уга. Чик зарһ кех зөв өглго, 33Терүг дорацулад бәәнә. Терүнә тохм-уңгиннь үлдлин тускар кен келҗ өгхмб? Ода болхла Терүнә җирһл һазрас авгдҗана». 34Эфиопин һардач Пилипәс сурна:

– Эрҗәнәв чамаг, цәәлһҗ өглч нанд. Кенә тускар энд әәлдәч келҗәхмб? Бийиннь тускарий аль талдан күүнә тускарий?

35Тиигҗ сурхлань Пилип Бурхна Бичгин тер ормас экләд Исусин туск Сән Зәңг цәәлһҗ өгнә. 36-37Тер хоорнд йова йовҗ тедн уста һазрт өөрднә. Ус үзәд һардач:

– Хәлә, эн усн. Намаг кирслхд юн харш болҗана? – гиҗ сурна.

38Тегәд тергән зогсаһад, хоюрн уснд орна. Пилип терүг уснд кирслв. 39Тедниг уснас һарсн цаглань Пилипиг Деед Эзнә Сәкүсн деегшән авчкна. Һардач Пилипиг дәкҗ үзсн уга. Тер цаарандан байртаһар йовад йовна. 40Пилип Ашдодт үзгднә. Тер Ашдодас Кесәрья тал одна. Зуурнь бәәсн кесг хотна олн-әмтнд Сән Зәңгиг цәәлһәд келәд йовв.

Currently Selected:

Апостолмуд 8: ХКО_ӘБ

Highlight

Copy