Апостолмуд 6

Долан нөкд заалһн

1Сурһульчнр олар ирдг болад, грек келтә евреймүд бәәрн евреймүдлә зүткцхәв. Өдр болһн хот хувахла, теднә белвсн күүкд улст күртхш гиҗ грек келтә евреймүд келлдҗәв.

2– Бурхна номан үлдәчкәд, идх хотыннь арһан хәәсн сән йовдл биш. 3-4Ахнр-дүүнр! Дундасн эврәннь медсн, цецн ухата, Әрүн Сәкүстә долан кү шүүҗ автн. Эн долан күн хот-хоолын туск көдлмшиг күцәх. Бидн болхла цаган үрәл уга мөргәд, ном умшхмн, гиһәд арвн хойр апостолмуд сурһульчнриг дуудҗ авад келв.

5Апостолмудын селвгиг цуглрсн улс таасад: батар иткдг, Әрүн Сәкүстә Степаныг, Пилипиг, Прохориг, Никәнриг, Тимониг, Пармениг болн Антиохас Николайиг (эн күн Йудья күн биш болвчн Деед Эзнд иткдг бәәҗ) шүүҗ авна. 6Тегәд тедниг апостолмудын өмн ирүлв. Апостолмуд һаран тәвәд эднә төлә зальврв. 7Бурхна ном Ерусалимд тархагдад, сүзгтә улсин тонь өдр ирвәс өсәд гелңгүд чигн Исусин номиг иткдг болна.

Степаныг бәрлһн

8Бурхн Степаныг әдсләд, терүнд ик чидл өгв. Степан олн улс дунд күчтә өвәрц, онц темдг һарһдг болна. 9Күрәнә, Александрийин, Киликьян, Азийин һазрас «Сул күн» гидг хурлас улс Степана көдлмшт харшлад зүткдг болна. 10Әрүн Сәкүсн Степанд цецн уха өгсн учрас зүтклдх арһ теднд уга болад бәәв. 11Арһан бархларн, тедн нег цөөкн залуст авлһ өгәд, иигҗ келтн гиҗ дасхна: «Мошег болн Бурхиг му келсинь бидн соңславидн». 12Иигҗ тедн закана багшнриг, медәтнриг, олн әмтиг үгдән орулв. Евреймүд Степанад ирәд, терүг бәрәд Деед хургт авч ирв. 13-14Тедн худлч күүһәр герч кеһәд иигҗ келүлв:

– Эн күн Бурхна закаг болн әрүн ормиг муурулад келнә. Назаретин Исус һол сүмиг хамхлад, Мошен өгсн заңшалыг оңдарулх гиҗ тер келсиг бидн соңславидн.

15Цуглрсн улс цугтан Степаныг хәләһәд, Степана чирәнь Бурхна элчин нүрлә әдл бәәсиг үзцхәв.

Currently Selected:

Апостолмуд 6: ХКО_ӘБ

Highlight

Copy