Апостолмуд 2

Әрүн Сәкүснә бууҗ ирлһн

1Тәвдгч өдр гидг нәр (Песахин хөөн тәвн өдр давхла, терүг Тәвдгч өдр гиҗ нерәднә) ирхлә, цугтан хамдан цуглрв. 2Генткн теңгрәс шүрүн салькн көдлсмн мет шууган теднә бәәсн гер дүүргв. 3Тер кемлә герт бәәсн сурһульчнр ассн һалын бәәдлтә заль зааград тарсинь үзв. Күн болһн деер неҗәдәр Тер буув. 4Әрүн Сәкүсәр дүүрәд, тедн цугтан Әрүн Сәкүснә күчәр тал-талдан келәр келцхәв.

5Ерусалимд тер цагт зүсн-зүүл орн-нутгудас Бурхнд шүтдг Йудья улс ирв. 6-7Эн шууга соңсад, олн улс тенд цуглрв. Цугтан һәәхәд өврв. Яһад гихлә, сурһульч болһн теднә төрскн келәр келҗәхиг соңсв.

8– Эн күүндҗәх улс цугтан Һалильяс биший? – гиҗ дегд икәр алң болад, нег-негнәсн сурлдв, – Бидн эврәннь төрскн келәр сурһульчнриг келҗәхиг соңсҗанавидн. Яһҗ тиигҗ күн болһнла әдләр келҗәхмб? 9Мадн дунд Партьян, Мидин, Еламин, Месапотамьян, Йудьян болн Кападокьян, Понта болн Азийин һазрас, 10Пругьяс, Пампульяс, Египетәс, Ливиин Күрәнә хаҗуһас, Римин бәәрн улс, 11Критин улс болн арабмуд бидн цугтан мана төрскн келәр сурһульчнр Бурхна алдр кергүдин тускар келҗәхиг соңсҗанавидн. 12Эн юн гидг юмн болҗахмб? – гиҗ цугтан нег-негнәсн өврәд, алмацад сурҗав.

13– Сурһульчнр дегд икәр әмтәхн чаһр уусмн бәәдлтә, – гиһәд зәрмснь наад бәрцхәв.

Пётрин келсн үг

14Арвн негн апостолмудта хамдан йовсн Пётр зогсв.

– Йудьян залус болн Ерусалимд бәәх цуг әмтн, ода мини келхәр бәәхиг оньган өгч соңстн, – гиһәд Пётр дууһан деегшән өргәд келв. – 15Эднтн, тана ухалҗасар, согту биш. Шиңкән йисн час өрүнлм. 16Энтн әәлдәч Йолин келсн үгиг күцәҗәнә. « 17Сүүлин өдрмүдт Би Эврәннь Сәкүсән цуг улст өгхв гиҗ Бурхн келҗәнә. Тадна көвүд болн күүкд әәлдх, баһчуд юм үздг болх, көгшдүд зүүд зүүдлцхәх. 18Эврәннь зарцмудт, залус болну, күүкд улс болну, тер өдрмүдт Би Эврәннь Сәкүсән өгхв. Тедн әәлдхл келх. 19Тиигәд теңгр деер болн һазр дор Би темдгүд үзүлхв: цусн, һал болн утана үүлн. 20Деед Эзнә алдр болн туурмҗта өдр ирхин өмн өргнд нарн харңһурх, сар цусн мет улах. 21Зуг Деед Эзнә нериг дуудсн улс авргдх». 22Израилин улс, намаг соңстн! Тана нүднд болсн күчтә кергүдәр, өвәрц болн онц темдгүдәр Назаретас ирсн Исусиг илгәсән Бурхн лавлла. Тадн цуг энүг меднәт. 23Бурхна зураһар болн тааһад медлһәр Исус тадна һарт илгәгдлә, терүг тадн буру номта улсин һарар кирст хадад алвт. 24Болв Бурхн Терүг зовлңгас сулдхад әмдрүлв. Яһад гихлә, үкл терүг цааранднь бәрәнд бәрҗ чадшго билә. « 25Деед Эзиг би кезә чигн өмнән үзҗ йовлав. Деед Эзн нанла хамдан. Эн учрар би үүмхшв. 26Терүнәс мини зүркн байрар асад, келсм байрта болна. Би күн болвчн, Бурхнд иткәд амрхв. 27Яһад гихлә, Та Мини сүмсиг үклин һазрт үлдәшгот! Танд шүтдг зарциг шора кеҗ әгрәшгот. 28Та нанд җирһлүр көтлсн хаалһ үзүлвт. Танла би кезә чигн байрта-бахмҗта бәәхв», – гиҗ Давид Исусин тускар келлә.

29Ахнр! Өвк эцк Давид өңгрәд оршагдсинь би үнндән лавлҗ чадхв. Терүнә үкәр эндр өдр күртл манад бәәһә. 30Давид әәлдәч бәәҗ. Тер Бурхна андһар меддг бәәҗ. Бурхн терүнә үлдсн тохм-уңгаснь негинь авад ширәд суулһҗ. 31Давид Бурхна иргч зураһин тускар медәд, Христосин әмдрлтин тускар келв. Исус үклин һазрт үлдәгдсн уга. Терүнә цогц-махмуд төрүц әгршго. 32Тиигәд Исусиг Бурхн әмдрүләд босхсиг бидн цугтан герчлҗ чадхвидн. 33Бурхн Терүг барун талан өөдлүлв. Исус Эцкәсн Бурхна өгхәр келсн Әрүн Сәкүс авв. Ода тана үзҗәх болн соңсҗах тоот Исусин асхрад ирҗәх белг болҗана. 34-35Давид теңгрт өөдлсмн уга. Болв эврән иигҗ келв: «Чини өшәтиг диилҗ көлдчнь эс хайтл, Мини барун тал сууҗ йов, – гиҗ Деед Эзн мини Деед Эзнд келсмн». 36Израилин олн улс медәд авчктн: Тана кирст хадгдсн Исус Бурхна залсн Деед Эзн болн Бурхна илгәсн Аврач болҗана.

37Иим үг соңссн улс сана зовад бәәв. Пётрәс болн оңдан апостолмудас сурна:

– Ахнр, ода бидн яахмб?

38– Күн болһн килнцтә җирһлән үлдәтн. Исусин нернә төлә уснд бийән кирслх зөвтәт. Түүнә хөөн тадна килнц Бурхн тәвҗ өгәд, Әрүн Сәкүс белглх. 39Таднд, тана үрдүдт, нам холд йовснднь чигн, Бурхна дуудсн күн болһнд Терүнә белг күртх. 40Тадн бийән килнцтә, азд-аля тохмта улст ирх зарһас саглтн! – гиҗ Пётр теднд келв.

41Тиигәд терүнә үгиг үнн седкләрн авсн улс уснд кирслгдв. Тер өдр Бурхнд сүзглсн баг улс тооһарн һурвн миңһ шаху күрв.

Сүзгтә улсин җирһл

42Цааранднь кезә чигн сүзгтә улс апостолмудар дамҗад, Бурхна ном дасад, нег-негнләһән харһлдад, мөргәд, хот-хооларн хувалцҗав. 43Апостолмуд күчәр кесг өвәрц болн онц темдгтә йовдлмуд күцәҗәв. Тер учрар күн болһн әәв. 44Бурхнд иткдг улс цугтан хамдан, хам-хоша негәр бәәцхәв. 45Тедн өв-көрңгән болн эдл-ахуһан хулдад, күн болһнд учр-утхинь тоолҗ күртсәр хуваҗ өгчәцхәв. 46Цугтан нег кевәр өдр болһн һол сүмд цуглрҗав. Тедн гер болһнд өдмг күртәһәд, байрта, амулң бәәдлд хот-хоолан эдләд, 47Бурхиг магтв. Олн әмтн цугтан Бурхнд иткдг улсиг күндлв. Деед Эзн өдр болһн авргдсн улсиг эн багла негдүлдг болв.

Currently Selected:

Апостолмуд 2: ХКО_ӘБ

Highlight

Copy