1 Пётр 5

Бурхна сүрг

1Би Христосин зовлңгиг үзсн болн үзүлгдх зөвтә туурмҗ хувах чонҗин һардачв. Тадн дунд бәәсн чонҗин һардачнриг онц кевәр сурҗанав. 2Таднд даалһсн Бурхна сүрг хәрүлтн. Күчәр келгҗәх көдлмш мет биш седкләрн эн кергән күцәтн. Мөңгнә төлә биш әрүн седкләрн церглтн. 3Таднд даалһсн улст нойн бичә болтн, зуг Бурхна сүргт үлгүр болтн. 4Тиигхлә Ах Хөөч ирхлә, тадн туурмҗин төрүц үрдго титм авхит.

5Тиим кевәр баһчуд чигн чонҗин һардачнрин үг соңстн. Хоорндан цуһар номһн кевәр бәәтн. Яһад гихлә, «Бурхн омгта улсин өмнәс сөрүцнә, зуг номһн улст хәәрлт өгнә». 6Эн учрар күчтә Бурхна өмн бийән номһрултн. Цагнь ирхлә, Бурхн тадниг деегшулх. 7Зовҗах седклин ацаһан Бурхнд өгтн, яһад гихлә, Тер таднд килмҗән өгнә.

8Бийән бәрәд, серглң бәәтн. Тана өшәтн эрлг, өөртн күүг зальгхар хәәҗәх арслң мет күркрәд йовад бәәнә. 9Бат итклтә бәәтн. Эрлгин өмн зөрлцҗ зогстн, нарт делкәд бәәсн тана ахнр-дүүнр тиим кевәр бас зовлң дааҗахинь тодлтн.

10Зуг невчкн зуур зовлң үзсн хөөн тадниг Исус Христосла негдснд мөңк туурмҗ автха гиҗ дуудсн хәәрлтин Бурхн тадниг күццднь сәәрүләд, итклд батрулад, күч өгх. 11Терүнә цуг йосн мөңкиндән бәәтхә. Тиигтхә.

Төгсвр

12Эн ахр бичгиг би Силуанар дамҗад бичв. Миниһәр болхла, эн итклтә ах. Мини бичсн үгмүд Бурхна йосн хәәрлтин герч гиҗ би таднд урмд өгхәр герчлҗәнәв. Эн хәәрлтд батар зогсхитн эрҗәнәв.

13Таднла әдл шүүҗ авгдсн Вавилон балһсна чонҗ болн Марк гидг көвүм таднд менд илгәҗәнә. 14Нег-негнтәһән ахнр-дүүнрин дурна үмслһәр мендлтн. Христос Исусла негдсн таднд эв иртхә!

Currently Selected:

1 Пётр 5: ХКО_ӘБ

Highlight

Copy