1 Йохан 5

Орчлңгиг диилснә тускар

1Исусиг Бурхна илгәсн Аврач гиҗ иткдг күн Бурхнас төрҗ. Эцкд дурта күн үрнднь дурта болдг мөн. 2Бурхнд дурта болад, Терүнә заавриг күцәдг учрас бидн Бурхна үрдүдт дурта болдган меднәвидн. 3Яһад гихлә, Бурхна заавриг күцәдг күн Бурхнд дуртаһан медүлнә. Бурхна зааврмуд маднд кецү биш. 4Яһад гихлә, Бурхнас төрсн күн орчлңгиг диилҗ чадна. Бидн иткләрн орчлңгиг диилнә гидгнь эн: мана иткләр диилнәвидн. 5Орчлңгиг кен диилхмб? Исусиг Бурхна Көвүн гиҗ иткдг күн.

Бурхна Көвүнә туск герчллһн

6Исус Христос усн цусн хойрар дамҗҗ ирҗ. Тер һанцхн усар биш, зуг усн цусн хойрар дамҗад ирҗ. Әрүн Сәкүсн энүг үнн гиҗ герчлҗәнә, яһад гихлә, Әрүн Сәкүсн бийнь үнн болҗана. 7Һурвн герч эн: 8Әрүн Сәкүсн, усн болн цусн. Эн һурвн нег юмна тускар герчлҗәнә. 9Бидн әмтнә герчллһнд иткнәвидн, зуг Бурхна герчллһн деер. Бурхн Бийнь Көвүнә тускар герчлҗәнә. 10Бурхна Көвүнд иткдг күүнә седклд эн герчллһн бәәнә. Бурхнд эс иткдг күн Бурхиг худлчд тоолна, яһад гихлә, Бурхиг Эврәннь Көвүнә тускар герчлснд тер иткҗәхш. 11Герчллһн эн: Бурхн маднд мөңк җирһл өгв, Терүнә Көвүн мөңк җирһлин булг. 12Бурхна Көвүтә бәәдг күн мөңк җирһл эдлнә. Бурхна Көвүн уга күн мөңк җирһл эдлхш.

Мөңк җирһлин тускар

13Тадниг мөңк җирһл эдлдгиг медтхә гиҗ би энүг Бурхна Көвүнә нернд, иткдг таднд бичв. 14Бидн зөргтәһәр Бурхна өмн зогсҗанавидн. Яһад гихлә, Бурхна таалар ю эс сурв чигн, Бурхн мадниг соңсх. Энүг бидн Бурхна өмн лавта меднәвидн. 15Кемр юуна тускар эс зальврв чигн, Терүг соңсдгинь бидн медхлә, сурсан авч чадхиг бас меднәвидн. 16Кемр кен чигн ахан үклд орулдго килнц кеҗәхинь үзхлә, терүнә төлә зальвртха. Бурхн терүг әмд үлдәх. Зуг энд би үклд орулдго килнц кесн күүнә тускар келҗәнәв. Зуг үклд орулдг килнц бәәнә. Үклд орулдг килнц кесн күүнә төлә бичә зальвртн. 17Ямаранчн буру йовдл килнц мөн. Болв үклд орулдго килнц бас бәәнә. 18Бурхнас төрсн күн болһн цааранднь килнц кехш. Бурхна Көвүн терүг әрвлнә. Тиим күүнд эрлг му юм кеҗ чадшго. 19Бидн Бурхна үрдүд болдган меднәвидн. Зуг эн орчлң эрлгин үлмәд бәәнә. 20Мадниг йосн Бурхиг медтхә гиһәд, Бурхна Көвүн ирәд маднд медрл өгв. Энүг бидн меднәвидн. Бидн йосн Бурхнла болн Терүнә Көвүн Исус Христосла ни-негн бәәнәвидн. Исус Христос болхла, йосн Бурхн болн мөңк җирһл. 21Үрдүд мини! Шүтәнәс хол йовтн.

Currently Selected:

1 Йохан 5: ХКО_ӘБ

Highlight

Copy