Матфейица бицараб Рохалил хабар 9

9 бетӏер

Гӏисаца сахлъизавула палижалъ ккурав чи

1Добго росодаги рекӏун, ралъадги бахун, Гӏиса жиндирго шагьар Капернаумалде тӏадвуссана. 2Гьале туртида лъун гьесухъе восун вачӏана палижалъ ккурав чи. Гьезул божи бихьун, Гӏисаца унтарасда абуна:

– Хӏинкъуге, дир вас, мунагьаздаса вацӏцӏалъилин мун!

3Гьебмехалъ цо-цо диниял гӏалимзабаз пикру гьабуна, Аллагьасде гӏасилъун вугин гьавилан. 4Гьезул пикруги бичӏчӏун, Гӏисаца абуна:

– Щай нужеца квешаб пикру нужерго рекӏелъе биччалеб? 5Кинаб бигьаяб: «Мун мунагьаздаса вацӏцӏалъанилан» абизейищ, яги: «Тӏаде вахъун вилълъанхъейилан» абизейищ? 6Амма нужеда лъан букӏа: Гӏадамил Лъимадул ихтияр буго гьаб ракьалда гӏадамазул мунагьал тӏасалъугьун тезе.

Цинги гьес унтарасда абуна:

– Тӏаде вахъа. Дурго турутги босун, рокъове а, – ян.

7Тӏадеги вахъун, жиндирго рокъове ана гьев чи. 8Гьеб бихьидал, халкъалъул руккел кутакалда хӏинкъула, инсанасе гьединаб ихтияр кьурав Аллагьасе рецц гьабизе лъугьуна.

Гӏисаца Матфей муридлъун восула

9Гьениса нахъе унаго, Гӏисада нухлул хӏакъ бакӏарулеб бакӏалда гӏодов чӏун вихьана Матфей абулев цо гьеб ишалъе тӏамурав чи. Гӏисаца гьесда абуна:

– Дида цадахъ вилълъа, – ян. Вахъун Гӏисада цадахъ уна гьев.

10Гьале гьесул рокъов кваналев вукӏана Гӏиса. Рачӏун гьесда ва гьесул муридазда цадахъ гӏодор чӏун рукӏана гӏемерал магъало бакӏарулел чагӏи ва цогидабги мунагь-хӏакъалъул агьлу. 11Гьеб бихьидал, фарисеяз Гӏисал муридазда абуна:

– Магъало бакӏарулел чагӏаздаги ва цогидаб мунагь-хӏакъалъул агьлуялдаги цадахъ гӏодовги чӏун щай гьав нужер мугӏалим кваналев?

12Гьеб рагӏидал, Гӏисаца гьезда абуна:

– Сахазе гурев тохтир хӏажалъулев, унтаразейин. 13Гьанже нуж ун лъикӏ, Аллагьасул гьадинал рагӏабазул магӏна лъазабизе: «Нужер къурбанал рокьун гьечӏо дие, нужедаго гьоркьоб гурхӏел-рахӏму бокьун буго». Аллагьасде руссине муъминзаби ахӏизе гуро дун вачӏун вугев, мунапикъзаби ахӏизейин.

Кӏал кквеялъул хӏакъалъулъ

14Яхӏял муридал рачӏана Гӏисада аскӏоре:

– Нижецаги фарисеязги кӏал ккола, гьал дур муридаз кӏал щай кколареб? – ан гьикъана гьез.

15Гӏисаца гьезда абуна:

– Бахӏарав аскӏов вугебгӏан мехалъ гьес берталъе ахӏарал гьудулзаби къваридго-пашманго рукӏине бегьилищ? Рачӏина бахӏарав гьезухъа вахъун арал къоялги, гьеле гьебмехалъ кквела гьез кӏалги.

16Цӏияб ххамил рукъи басрияб ратӏлида баларо лъицаниги, – цӏияб букъун хадуб, басриябги бихъун ина, каратӏги дагьабги кӏодолъила. 17Гьединго басрияб рахълъеналъубе цӏияб чагъирги тӏоларо. Гьелъ рахълъен багьизабила, чагъирги гӏодобе чвахила, рахълъенги хвела. Цӏияб чагъир цӏияб рахълъеналъубе тӏуни, цонигиялъе зарал ккеларо.

Гӏисаца унтарайги сахлъизаюла хварайги чӏаголъизаюла

18Гьедин гьезие хабар бицунев Гӏиса вукӏаго, аскӏовеги вачӏун, цо хӏакимас накалда чӏун гьарана гьесда:

– Гьабсагӏат хвана дир яс. Вачӏун дуца цо квер хъвани, чӏаголъила гьей.

19Вахъун гьесда цадахъ ана Гӏиса, муридалги рахъана гьесда хадур.

20Анцӏила кӏиго соналъ би къотӏичӏого ва черх бацӏцӏалъичӏого йикӏарай цо чӏужугӏаданалъ къотӏносан унев вукӏарав Гӏисал гӏабаялдасан далун букӏараб цо гӏертелалда нахъасан ячӏун квер хъвана. 21Гӏисал ратӏлидагӏаги квер хъвазе щвани, жий сахлъилин ракӏалде кколаан гьелда. 22Нахъехун вуссиндал гьей йихьарав Гӏисаца абуна:

– Хӏинкъуге, дир яс, дурго божи-иманалъ хвасар гьаюнин мун.

Гьебсагӏатго сахлъана гьей гӏадан.

23Дов хӏакимасул бакӏалде гьал щведал, щвантӏих пулел чагӏи рачӏун ратана гьенире. Руччабиги ругоан магӏаби гьарулел#9:23 Жугьутӏазул гӏадат букӏана чи хвараб бакӏалде щвантӏих пулел гӏадамалги магӏихъабиги ахӏулеб. . 24Гӏисаца гьезда абуна:

– Нуж нахъе а. Гьей яс хун гьечӏо, кьижун ккун йиго, – ян.

Гьел гьасда тӏад релъанхъизе лъугьана.

25Гӏадамал къватӏире ритӏидал, гьей ясалда аскӏовеги ун, Гӏисаца гьелъул квер ккуна, – яс тӏаде яхъун ячӏана. 26Гьеб лъугьа-бахъиналъул хабар тӏибитӏана гьеб рахъалъул кинабго халкъалда гьоркьоб.

Гӏисаца гӏемерал чагӏи сахлъизарула

27Гӏиса гьениса тӏадвуссун унаго, кӏиго бецав чи вачӏунев вукӏана хаду-хадув.

– Я, Давудил Вас#9:27 Давудил умматалъул чи. Гӏиса! Гурхӏа мун нижеда! – ян ахӏулеб букӏана гьез.

28Рокъове щведал, кӏиявго бецав чи вачӏана гьесда аскӏове. Гӏисаца гьезда гьикъана:

– Нужеца гьарараб жо дида гьабизе кӏвеялда божулищ нуж? – ан.

– Божула, Бетӏерчӏахъад, – абун жаваб кьуна гьез.

29– Нуж божараб жо лъугьаги нужее, – янги абун, гьезул беразда квер хъвана Гӏисаца.

30Канлъи бихьун, берал рагьун рачӏана гьезул. Воре, лъиданиги бицунгейилан лъазабуна Гӏисаца гьезда. 31Амма гьеб рахъалъул тӏолабго халкъалда гьоркьоб тӏибитӏизабуна гьез Гӏисал хӏакъалъулъ хабар.

32Гьел къватӏире индал, Гӏисахъе вачун вачӏана жундуз ккурав мацӏ лъаларев чи. 33Гӏисаца жен бачахъидал, гаргадизе кӏвана гьесда. Исраилил халкъалда гьоркьоб гьединаб лъугьа-бахъин киданиги ккун букӏинчӏилан гӏажаиблъун хутӏана гӏадамал. 34Фарисеязни абулеб букӏана жундул рачахъизе гьесие жундузул ханас кумек гьабулеб бугилан.

35Гӏиса шагьаразде ва росабалъе хьвадулев вукӏана. Гьезул синагогабазда гӏадамазе вагӏза-насихӏат гьабулаан, Парччахӏлъиялъул хӏакъалъулъ Рохалил хабар лъазабулаан, кинабго унтиялдаса, кинабго щокълъиялдаса гӏадамал сахлъизарулаан. 36Халкъалъул руккел бихьун, гьев гурхӏана, чара хун ва бакъхӏан, вехь гьечӏеб гӏи гӏадин, гьел рукӏиндал. 37Гьебмехалъ жиндирго муридазда абуна гьес:

– Хуриб хӏалухъен гӏемер бижун буго, хӏалтӏухъаби дагь руго. 38Гьеб лъилъизе кверщел кодоб бугев Бетӏергьанасда гьаре лъилъарухъаби ритӏеян.

Currently Selected:

Матфейица бицараб Рохалил хабар 9: AvrNT

Highlight

Copy