Матфейица бицараб Рохалил хабар 20
20
20 бетӏер
Цӏолбол ахикь хӏалтӏаразул мисал
1Зобалазул Парччахӏлъи релълъуна, радал хехго вахъун, жиндирго цӏолбол ахикь хӏалтӏизе гӏадамал ралагьизе арав цо бечедав чиясда. 2Къое цо-цо динар кьезе къотӏиги гьабун, хӏалтӏухъаби ккун руго гьес ва цӏолбол ахикье ритӏун руго. 3Лъабго сагӏаталдасан нахъеги базаркъотӏносан унаго, цоги чагӏиги ратун руго гьенир, хӏалтӏи щвелародайилан рахъун чӏун. 4Нуж разияб мухьги кьелин, дир цӏолбол ахикье хӏалтӏизе айилан ритӏун руго гьас гьелги. Ун руго гьел гьенире. 5Къалъул гӏужалдехунги ва къалъудаса лъабго сагӏат араб мехалъги базаркъотӏнове ун, додинго ритӏун руго гьес хӏалтӏухъаби. 6Бакъанидехунги ун вуго гьав чи базаркъотӏнове. Дагьалги гӏадамал ратун руго гьенир рахъун чӏун.
– Къойица гьанир чӏалгӏаде рахъун чӏун щибулел нуж ругел? – ан гьикъун буго гьас гьезда.
7Жал лъицаниги хӏалтӏизе рачунел гьечӏилан абун буго гьез. Гьездаги абун буго гьес жиндир цӏолбол ахикье айилан. 8Маркӏачӏубер рукӏкӏараб мехалъ, жиндие хъулухъ гьабулев чиясда гьес абун буго дол хӏалтӏухъабиги ахӏун, ахиралда ритӏараздасан байбихьун тӏоцере ритӏаразде щвезегӏан гьезие мухь кьейилан. 9Бакъанимехалда хӏалтӏизе байбихьаразеги цо-цо динар щун буго. 10Радалго хӏалтӏизе квер баразда ракӏалда букӏун буго жидее цӏикӏкӏун кьелилан. Амма гьезиеги цо-цо динар гурони щун гьечӏо. 11Гьебмехалъ ахил бетӏергьанасде гъулгъудизе лъугьун руго гьел:
12– Ахикье ахиралда рачӏарал гӏадамал цо сагӏаталъ гурони хӏалтӏичӏо. Нижин абуни, радалалдаса бакъинегӏан бухӏараб бакъукь хӏалтӏана. Гьезиеги нижееги бащад кьуна дуца мухь.
13Гьезул цоясдехун вуссун ахил бетӏергьанас абун буго:
– Ле, гьудул! Дуе гьабураб къотӏи хвезабунищ дица? Мун разилъун вукӏинчӏищ цо динаралъухъ хӏалтӏизе? 14Дуего кьураб мухьги босун нахъе щай унарев? Дие бокьун буго дуе кьуралда бащад тӏарамагъада витӏарасеги кьезе. 15Дирго буголъиялда бокьараб гьабизе ихтияр гьечӏебищ дир? Яги дир сахаватлъиялда бер бахиллъунищ мун вугев?
16Гьедин цере рукӏарал ахиралде ккела, ахиралда рукӏарал цере ккела.
Гӏазаб-гӏакъубаялъул хӏакъалъулъ – лъабабизеги
17Иерусалималде унаго нухда Гӏисаца анцӏила кӏиявго мурид батӏаго ахӏана ва гьезда абуна:
18– Гьале нилъ Иерусалималде унел руго. Гьенив Гӏадамил Лъимер чӏахӏиял кашишзабаздаги диниял гӏалимзабаздаги кодове кьела, гьезги чӏвазе къотӏила. 19Цинги инжит-хӏакъир гьавизе, цӏалаца вухизе ва хъанчида вазе цогидаб халкъалъул гӏадамазда кодове кьела гьев. Ва хун лъабабилеб къоялъ чӏаголъила.
Якъубилги Иоаннилги эбелалъе Гӏисал жаваб
20Гьебмехалъ Гӏисада аскӏое ячӏуна Зебедайил васазул эбел. Гьелда аскӏор рукӏана кӏиявго васги. Гьелъ гӏодое къулун цо жо гьарулеб букӏана.
21– Щиб дуе бокьун бугеб? – ан гьикъана Гӏисаца.
Гьелъ абуна:
– Мун Парччахӏлъун ккараб мехалъ, гьав дир кӏиявго вас дуца дудаго аскӏор цояв кваранаб рахъалда, цогидавги квегӏаб рахъалда, гӏодор чӏезарилин рагӏи кье дие.
22Гӏисаца гьелъул васазда абуна:
– Нужедаго лъалеб гьечӏо нужеца гьарулеб бугеб жо. Кӏвеладай нужеда дица гьекъезе ккараб лълъар гьекъезе?
Кӏвелилан жаваб кьуна гьез.
23Гӏисаца абуна:
– Дица гьекъезе ккараб лълъар гьекъезе ккезе буго нужеца. Амма дир кваранабги квегӏабги рахъалда гӏодор чӏезариялъул иш дида бараб гьечӏо, дир Инсул хӏукмуялда бараб буго.
24Гьеб хабар рагӏарабго, хутӏарав анцӏавго мурид дов кӏиявго вацасде ццидахун лъугьана. 25Аскӏореги ахӏун, Гӏисаца гьезда абуна:
– Нужеда лъалагури цогидал халкъазул парччахӏзабаз халкъалда тӏад ханлъи гьабулеблъи, чӏухӏби-хӏакимзабаз гӏадамазда тӏад жидерго ихтияр билълъанхъизабулеблъи. 26Амма нужеда гьоркьоб гьедин букӏине бегьуларо. Нужеда гьоркьоса лъиениги бищунго кӏудиявлъун вукӏине бокьани, гьев цогидазе хъулухъалъе чӏа абе. 27Нужеда гьоркьоса бищунго цеве вукӏине бокьаравги цогидазе лагълъун вукӏа абе. 28Гӏадамил Лъимерги жиндие лъицаниги хъулухъ гьабизелъун гуро вачӏарав. Гьев вачӏун вуго цогидазе хъулухъ гьабизе ва гӏемеразе гӏоло рецӏалие жиндирго рухӏ кьезе.
Иерихоналдаса унаго Гӏисаца кӏиго бецав чи сахлъизавула
29Иерихон шагьаралдаса къватӏире гьел рахъунеб мехалъ, халкъалъул руккел букӏана Гӏисада хадуб бачӏунеб. 30Гьале нухлул рагӏалда гӏодов чӏун вукӏарав кӏиго бецав чи, Гӏиса аскӏосан унев вукӏин рагӏун, ахӏдезе лъугьана:
– Я, Бетӏерчӏахъад! Я, Давудил вас! Гурхӏа мун нижеда! – ян.
31Гӏадамаз абуна гьезда руцӏцӏун чӏайилан, амма гьел дагьабги гьаракь борхун ахӏдезе лъугьана:
– Я, Бетӏерчӏахъад! Я, Давудил вас! Гурхӏа мун нижеда! – ян.
32Гьенив лъалхъун, Гӏисаца гьел аскӏоре ахӏана ва дица щиб гьабизе нужее бокьун бугебилан гьикъана. 33Гьез абуна:
– Я, Бетӏерчӏахъад, нижер беразда канлъи бихьизе бокьун буго.
34Гьев кӏиясдаго гурхӏун, Гӏисаца гьезул беразда квер бахъана. Гьебсагӏат беразда канлъи бихьун, Гӏисада цадахъ рилълъана гьел.
Currently Selected:
Матфейица бицараб Рохалил хабар 20: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
