Матфейица бицараб Рохалил хабар 18

18 бетӏер

«Бищун кӏудияв щив?»

1– Парччахӏлъиялда ругезул гьоркьов бищун кӏудияв щив? – ан гьикъана гьебмехалъ, Гӏисада аскӏоре рачӏун, муридаз. 2Гӏисаца, аскӏобе ахӏун, цо лъимер гьезда гьоркьоб эхетизабуна. 3Гьес абуна:

– Хӏакълъун абулеб буго дица нужеда: гӏакълу-пикру хисичӏони ва лъимал гӏадин лъугьинчӏони, Зобалазул Парччахӏлъиялде лъугьинаро нуж киданиги. 4Живго гьитӏинлъизавурав ва гьеб лъимер гӏадин лъугьарав чи бищунго кӏудиявлъун вукӏине вуго Зобалазул Парччахӏлъиялда. 5Цо гьадинаб лъимер, дие гӏоло, лъицаниги къабул гьабуни, гьеб бащалъизе буго дун къабул гьавиялда. 6Амма диде иман лъуразда гьоркьоса цониги лъимер гӏадинав пулан мунагьалде цӏалев чиясде балагь бачӏина. Гьесие лъикӏаб букӏинаан, гьобоги горбода бухьун, гъваридаб ралъдалъ гъанкъизавуни.

«Мун мунагьалде цӏалев вугони...»

7Вай, инсан мунагьалде цӏалеб жоялъул дуниялалда бугеб балагьги гӏазабги! Щаян абуни, мунагьалде цӏалеб жо камун дуниял хутӏуларелъул. Гьединго балагьги гӏазабги жив сабаблъун цогидав мунагьалде цӏалев чиясеги!

8Дур квералъ, яги бохалъ мун мунагьалде цӏалев вугони, къотӏун нахъе рехе гьеб. Цояб квер камун, яги цояб бох камун абадияб рокъове лъугьин лъикӏ дуе, кӏиябго квергун, яги кӏиябго бохгун свин гьечӏеб цӏадаве рехизегӏан. 9Дур бералъ мун мунагьалде цӏалев вугони, бахъун нахъе рехе гьеб. Цо бергун абадияб рокъове лъугьин лъикӏ дуе, кӏиябго бергун жужахӏалъул цӏадаве рехизегӏан.

Билараб чахъдал мисал

10-11Воре, нужеца сан гьавичӏого тоге лъимер гӏадин вугев гӏадатияв цониги пулан. Щаян абуни, дица нужеда абулеб буго: гьединазул малаикзабазда кидаго кӏола зобалазда вугев дир Инсуда бадире ралагьизе.

12Кин нужеда ракӏалде кколеб: масала, цо пуланав чиясул буго нусго чахъу. Гьезул цояб билани, доб ункъоялда анцӏила ичӏабгоги магӏарда тун, гьеб билараб чахъу балагьизе инарищ гьев? 13Нагагь гьесда гьеб батани, хӏакълъун абулеб буго дица нужеда, риличӏого ругел дол ункъоялда анцӏила ичӏго чахъдадаса цӏикӏкӏун вохула гьев батараб чахъдадаса. 14Гьедин зобалазда вугев нужер Инсуеги бокьуларо лъимер гӏадин вугев гӏадатияв цониги пулан тӏагӏине.

Диналъул вацасул мунагьалъул хӏакъалъулъ

15Дурго диналъул вацасухъа ккани мун къварид гьавулеб мунагь, чи гьечӏеб бакӏалда бадибчӏвай гьабе гьесие. Гьев духъ гӏенеккани, дуе дурго вац нахъе щола. 16Гьев духъ гӏенеккичӏони, цо яги кӏиго чиги вачун, а мун гьесухъе. Тӏехьалда хъван бугелъул: «Лъилниги рагӏи ритӏухълъизе ккани, къваригӏуна кӏиго яги лъабго чиясул нугӏлъи». 17Гьезухъги дур вац гӏенеккичӏони, иман лъуразул агьлуялда бице. Гьезухъги гьев гӏенеккичӏони, дуца гьев рикӏкӏе Аллагь лъаларевлъун яги магъало бакӏарулев чилъун.

18Хӏакълъун абулеб буго дица нужеда: ракьалда нужеца гьукъарабщинаб зобалаздаги гьукъила. Ракьалда нужеца изну кьурабщиналъе зобалаздаги изну кьела. 19Цоги абулеб буго дица нужеда: нужер кӏигояв рекъон дуниялалда нужеца щиб гьараниги, Зобалазда вугев дир Инсуца тӏубазабила гьеб. 20Щай абуни, дир цӏаралъе гӏоло кӏиго яги лъабго чи данделъани, гьезда гьоркьов дунги вукӏуна.

Налъуласда гурхӏуларев чиясул хӏакъалъулъ

21Аскӏовеги вачӏун, Пётрица гьикъана Гӏисада:

– Дун къварид гьавулел мунагьал дир вацасухъа гӏемер ккани, чан нухалъ дун гьесда тӏасалъугьине кколев? Анкьго нухалъищ?

22Гӏисаца гьесда абуна:

– Дица дуда абулеб буго: анкьго нухалъ гурин, анкьцӏали#18:22 Анкьцӏали – лъабкъоялда анцӏго. нухалъилан.

23Зобалазул Парччахӏлъиги релълъинабизе бегьула жиндирго лагъзадерихъа налъи бакӏаризе лъугьарав цо парччахӏасда. 24Налъи бакӏаризе байбихьараб мехалъ, гьесухъе вачун вачӏун вуго анцӏазарго талант#18:24 Талант – бацӏцӏадаб гӏарцул цӏакъго кӏудияб кесек. Даран-базаралъулъ гӏарац гӏадин хӏалтӏизабулаан гьеб. гьесие налъуда бугев цо пуланав лагъ. 25Налъи бецӏизе гьесул рес гьечӏеблъиги лъан, парччахӏас буюрун буго гьев живгоги вичейин, гьесул чӏужу-лъималги ричейин, бугебщинаб боцӏи-рикъзиги бичейин, жиндие гӏарац чӏезабеян. 26Гьебмехалъ лагъ, кӏалагъоркье гьесда цевеги речӏчӏун, гьардезе лъугьун вуго:

– Сабру гьабе! Дица бецӏила гьеб кинабго.

27Парччахӏ гьев лагъасда гурхӏун вуго, гьеб налъиги бецӏичӏониги гьесие хӏалал гьабун буго. 28Гьениса вачӏунаго, гьев лагъасда ватун вуго жиндие нусго динар кьезе букӏарав живгогӏадав цоги лагъ. Налъи бецӏизе кколилан, щекъерги ккун, гъанкъулев вукӏун вуго гьас дов. 29Кӏалагъоркье гьасда цевеги речӏчӏун, гьарун буго дов налъулас, сабру гьабейин, жинца бецӏилин дуе налъи. 30Амма гьав разилъун гьечӏо, гвандинив тӏамизавун вуго, тӏубанго налъи бецӏизегӏан жанив чӏезавун вуго. 31Дов жанив тӏамурав лагъасул гьалмагъзаби цӏакъ пашманлъун руго гьеб бихьидал, инеги ун жидерго бетӏергьанасда бицун буго ккарабщиналъул хӏакъалъулъ. 32Гьебмехалъ дов лагъги ахӏун, гьесда абун буго парччахӏас:

– Ле, хӏалихьатав лагъ, дуца гьарараб мехалъ дуда букӏараб тӏолабго налъи тӏасалъугьун тана дица. 33Дун дуда гурхӏарав гӏадин, мунги гурхӏизе ккелароанищ мунго гӏадав лагъасда?

34Ццин бахъун гьев парччахӏас буюрун буго тӏолабго налъи бецӏизегӏан досие гӏазаб кьейилан. 35Гьедин гьабила нужееги Зобалазда вугев дир Инсуца, нужер щивав чи ракӏ-ракӏалъго вацасда тӏасалъугьинчӏони.

Currently Selected:

Матфейица бицараб Рохалил хабар 18: AvrNT

Highlight

Copy