ᓭᐣᐟ ᒑᐣ 5

1ᑳ ᐳᓂᐸᔨᐠ ᐅᒪ ᑭ ᐅᑎᐦᒋᐸᔨᐤ ᐅ ᐃᐧᐦᑯᐦᑐᐃᐧᓂᐋᐧᐤ ᒍᐊᐧᐠ; ᒋᓴᐢ ᒫᑲ ᒉᕒᐅᓴᓬᐊᒥᕽ ᑭ ᐃᑐᐦᑌᐤ. 2ᒉᕒᐅᓴᓬᐊᒥᕽ ᒫᑲ ᑭ ᐃᐦᑕᑲᐧᐣ ᒋᑭ ᒫᔭᑎᐦᑯ ᐃᐢᑳᐧᑌᒥᕽ, ᐊᐧᔨᐯᔮᐤ, ᐃᐸᕒᐅᐃᐧ ᑭᓭᐧᐃᐧᓂᕽ ᐯᑌᐢᑕ ᐁ ᐃᓯᔨᐦᑳᑌᐠ, ᓂᔭᓇᓇᐧᔭᐠ ᐁ ᐱᑕᐃᐧᐢᑲᐧᑌᒥᐊᐧᕽ. 3ᐁᑯᑕ ᒫᑲ ᐁ ᐱᒥᓯᐦᑭᐠ ᐁ ᑭᐦᒋ ᒥᐦᒉᑎᒋᐠ ᐊᓂᑭ ᑳ ᐋᑯᓯᒋᐠ, ᐁᑳ ᑳ ᐋᐧᐱᒋᐠ, ᑳ ᐊᐧᒋᐢᑳᒋᐠ, ᑳ ᓂᐳᐃᐧᓯᒋᐠ, ᐁ ᐯᐦᑖᒋᐠ ᓂᐱᔨᐤ ᑭᑕ ᐊᐧᔮᑲᒥᐸᔨᔨᐠ. 5ᐁᑯᑕ ᒫᑲ ᑭ ᐊᔮᐤ ᐯᔭᐠ ᐊᔨᓯᔨᓂᐤ, ᓵᓴᐩ ᓂᐢᑐᒥᑕᓇᐤ ᐊᔨᓈᓀᐅᓵᑊ ᑕᐦᑐ ᐊᐢᑭ ᐁ ᑭ ᐊᑯᓯᐟ. 6ᐃᐢᐱ ᒫᑲ ᒋᓴᐢ ᐃᐧᔮᐸᒫᐟ ᐁ ᐱᒥᓯᓂᔨᐟ, ᒥᓇ ᐁ ᑭᐢᑫᔨᒫᐟ ᓵᓴᐩ ᑭᓀᐧᐢ ᐅᒥᓯ ᐁ ᑭ ᐃᓯ ᐊᔮᔨᐟ, ᑭ ᐃᑌᐤ, ᑭ ᐃᐧ ᐃᔨᓂᑲᐃᑯᓯᐣ ᒋ? 7ᐊᓇ ᒫᑲ ᑳ ᐋᑯᓯᐟ ᓈᐯᐤ ᑭ ᓈᐢᑫᐧᐊᐧᓯᒣᐤ, ᐅᑭᒫᐤ, ᓇᒪ ᐊᐃᐧᔭᐠ ᐊᔨᓯᔨᓂᐤ ᓂᐟ ᐊᔮᐋᐧᐤ, ᑭᑕ ᐸᑭᑎᓂᐟ ᓂᐱᕽ, ᐃᐢᐱ ᐁ ᐋᐧᔮᑲᒥᐸᔨᐠ ᓂᐱ, ᒣᑳᐧᐨ ᒫᑲ ᐁ ᐯ ᐃᑐᑎᔮᐣ, ᑯᑕᐠ ᒫᓇ ᐋᓯᐢᑯᐣ ᐸᑯᐯᐤ. 8ᒋᓴᐢ ᒫᑲ ᐅᒥᓯ ᐃᑌᐤ, ᐊᐧᓂᐢᑳ, ᐅᑎᓇ ᑭ ᓂᐯᐃᐧᐣ, ᒥᓇ ᐱᒧᐦᑌ. 9ᓭᒫᐠ ᒫᑲ ᐊᓇ ᓈᐯᐤ ᑭ ᐃᔨᓂᑲᐋᐤ, ᐁ ᑭ ᐅᑎᓇᕽ ᐅ ᓂᐯᐃᐧᐣ, ᒥᓇ ᐁ ᑭ ᐱᒧᐦᑌᐟ; ᐊᔭᒥᐦᐁᑭᓯᑲᐤ ᒫᑲ ᐁᐊᐧᑲᐧᓂᒪ ᐁ ᑭᓯᑳᐠ.

10 # ᓂᐦᐃᒫᔭ 13:19; ᒉᕒᐃᒫᔭ 17:21 ᐁᑯᓯ ᒍᐊᐧᐠ ᑭ ᐃᑌᐊᐧᐠ ᐊᓂᐦᐃ ᑳ ᑭ ᐃᔨᓂᑲᐃᒥᐟ, ᐊᔭᒥᐦᐁᑭᓯᑲᐤ ᐅᒪ; ᓇᒪᐃᐧᔭ ᐃᑕᐢᑌᐤ ᐅᔭᓱᐁᐧᐃᐧᐣ ᑭᑕ ᐱᒥᑕᑯᓇᒪᐣ ᑭ ᓂᐯᐃᐧᐣ. 11ᑭ ᓇᐢᑫᐧᐊᐧᓯᒣᐤ ᒫᑲ, ᐊᓇ ᑳ ᑭ ᐃᔨᓂᑲᐃᐟ ᐁᐊᐧᑯ ᑳ ᑭ ᐃᓯᐟ, ᐅᑎᓇ ᑭ ᓂᐯᐃᐧᐣ, ᒥᓇ ᐱᒧᐦᑌ. 12ᑭ ᑲᑫᐧᒋᒣᐊᐧᐠ ᒫᑲ, ᑫᑯ ᐊᔨᓯᔨᓂᐤ ᐊᓇ ᑳ ᑭ ᐃᑎᐢᐠ, ᐅᑎᓇ ᑭ ᓂᐯᐃᐧᐣ, ᒥᓇ ᐱᒧᐦᑌ? 13ᐊᓇ ᒫᑲ ᑳ ᑭ ᐃᔨᓂᑲᐦᐃᐦᐟ ᓇᒪᐃᐧᔭ ᑭ ᑭᐢᑫᔨᒣᐤ ᐊᐁᐧᓈᓂᐦᐃ; ᒋᑫᒫ ᒋᓴᐢ ᑭ ᓯᐯᐧᑕᐃᓱ, ᐁ ᒥᐦᒉᑎᐃᐧᐟ ᐁᑯᑕ. 14ᒣᐧᐢᑕᐢ ᐃᔨᑯᕽ ᒫᑲ ᒋᓴᐢ ᑭ ᒥᐢᑲᐁᐧᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᐅᒥᓯ ᒫᑲ ᑭ ᐃᑌᐤ, ᒫᑎᑲ, ᑭ ᑭ ᐃᔨᓂᑲᐃᑲᐃᐧᐣ; ᐁᑳᐃᐧᔭ ᐃᐧᑳᐨ ᒥᓇ ᒪᒋ ᑐᑕ: ᒫᐢᑯᐨ ᐊᐊᐧᓯᒣ ᑭ ᑳ ᒫᔨ ᐅᑎᐦᑎᑯᐣ. 15ᑭ ᓯᐯᐧᑌᐤ ᒫᑲ ᐊᓇ ᓈᐯᐤ ᐁ ᑭ ᓇᑕᐃᐧ ᐃᐧᐦᑕᒪᐋᐧᐟ ᒍᐊᐧ, ᒋᓴᓴ ᐁᐊᐧᑲᐧᓂ ᑳ ᑭ ᐃᔨᓂᑲᐃᑯᐟ. 16ᐁᐊᐧᑯ ᒫᑲ ᐅᐦᒋ ᒍᐊᐧᐠ ᑭ ᐃᐧ ᒫᔨᑐᑕᐁᐧᐊᐧᐠ ᒋᓴᓴ, ᒋᑫᒫ ᐅᒪ ᐁ ᑭ ᐊᔨᑐᑕᒥᔨᐟ ᐁ ᐊᔭᒥᐦᐁᑭᓯᑳᔨᐠ.

17ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᓄᑖᐃᐧ ᐊᑐᐢᑫᐤ ᐊᓄᐦᐨ ᐃᐢᑯ, ᓂᐢᑕ ᒫᑲ ᓂᐟ ᐊᑐᐢᑳᐣ. 18ᐁᐊᐧᑫᐧᔨᐤ ᒫᑲ ᐅᐦᒋ ᒍᐊᐧᐠ ᐊᐊᐧᓯᒣ ᑭ ᓇᑐᓇᒪᐧᐠ ᑭᑕ ᓂᐸᐊᒋᐠ, ᓇᒪᐃᐧᔭ ᐱᑯ ᐁ ᑭ ᐱᑯᓈᒥᔨᐟ ᐁ ᐊᔭᒥᐦᐁᑭᓯᑳᔨᐠ, ᒫᑲ ᐁ ᑭ ᐃᑌᐧᔨᐟ ᑭᓭᒪᓂᑐ ᓄᔪᑖᐃᐧᐣ, ᐁ ᐃᐧᒋ ᐃᐢᐱᑌᔨᑖᑯᓯᐃᓱᐟ ᑭᓭᒪᓂᑐᐊᐧ. 19ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐅᑯᓯᓯᒫᐤ ᓇᒪ ᑫᑲᐧᐩ ᑭᑕ ᑭ ᑐᑕᕽ, ᐱᑯ ᐁ ᐃᓯ ᐋᐧᐸᒫᐟ ᐁᐧᔪᑖᐃᐧᕽ ᐁ ᐊᔨᑐᑕᒥᔨᐟ; ᐁ ᐃᓯᐦᒋᑫᔨᐟ ᐁᑯᓯ ᐃᐧᐢᑕ ᒣᐧᐦᒋ ᐁᓯᒋᑫᐟ ᐅᑯᓯᓯᒫᐤ. 20ᐅᑖᐃᐧᒫᐤ ᓵᑭᐦᐁᐤ ᐅᑯᓯᓯᒫᐊᐧ, ᒥᓇ ᑲᐦᑭᔭᐤ ᑫᑲᐧᐩ ᐋᐧᐸᐦᑕᐁᐤ ᐁ ᐃᓯᐦᒋᑫᐟ; ᑭᑕ ᐋᐧᐸᐦᑕᐁᐤ ᒫᑲ ᐊᐊᐧᓯᒣ ᑭᐦᒋ ᐊᑐᐢᑫᐃᐧᓇ ᐃᐢᐱᐨ ᐅᐦᐃ, ᑭᑕ ᒫᒪᐢᑳᑕᒣᐠ. 21ᒋᑫᒫ ᐅᑖᐃᐧᒫᐤ ᑳ ᐃᓯ ᐊᐧᓂᐢᑳᓇᐟ ᑳ ᓂᐱᔨᐟ, ᐁᑯᓯ ᐁ ᐱᒫᒋᐦᐋᐟ; ᐁᑯᓯ ᐃᐧᐢᑕ ᐅᑯᓯᓯᒫᐤ ᐃᓯ ᐱᒪᒋᐁᐤ ᐊᐃᐧᔭ ᐋᐧ ᐱᒫᒋᐊᒋ. 22ᒋᑫᒫ ᐅᑖᐃᐧᒫᐤ ᓇᒪᐃᐧᔭ ᐊᐃᐧᔭ ᐅᔭᓱᐋᐧᑌᐤ ᒫᑲ ᑭ ᐸᑭᑎᓇᒪᐁᐧᐤ ᑲᐦᑭᔭᐤ ᐅᔭᓱᐊᐧᓯᐁᐧᐃᐧᐣ ᐅᑯᓯᓯᒫᐊᐧ; 23ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭᑕ ᑭᐢᑌᔨᒫᒋᐠ ᐅᑯᓯᓯᒫᐊᐧ, ᑖᐱᐢᑯᐨ ᑳ ᐃᓯ ᑭᐢᑌᔨᒫᒋᐠ ᐅᑖᐃᐧᒫᐊᐧ, ᐊᓇ ᐃᓴ ᐁᑳ ᑳ ᑭᐢᑌᔨᒫᐟ ᐅᑯᓯᓯᒫᐊᐧ, ᓇᒪᐃᐧᔭ ᑭᐢᑌᔨᒣᐤ ᐅᑖᐃᐧᒫᐊᐧ ᑳ ᑭ ᐯ ᐃᓯᑎᓴᐋᐧᔨᐟ. 24ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐊᓇ ᑳ ᐯᐦᑕᕽ ᓂᐟ ᐃᑌᐧᐃᐧᓂᔨᐤ, ᒥᓇ ᑳ ᑖᐯᐧᑕᐋᐧᐟ ᑳ ᐯ ᐃᓯᑎᓴᐦᐅᔨᐟ, ᐊᔮᐤ ᑳᑭᑫ ᐱᒫᑎᓯᐃᐧᐣ ᓇᒪᐃᐧᔭ ᒫᑲ ᓇᓂᐳᒥᑯᐃᐧᓂᕽ ᑭᑕ ᐯ ᐃᑐᐦᑌᐤ; ᒫᑲ ᒪᔮᐢᑲᒼ ᓂᐳᐃᐧᐣ ᐱᒫᑎᓯᐃᐧᓂᕽ ᐃᓯ. 25ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐹᐸᔨᐤ ᑎᐸᐃᑲᐣ, ᓵᓵᐩ ᐃᓴ ᐱᑯ, ᐃᐢᐱ ᑳ ᓂᐱᒋᐠ ᑫ ᐯᑕᐊᐧᒋᐠ ᑭᓭᒪᓂᑐᐃᐧ ᑯᓯᓴᓇ; ᐊᓂᑭ ᒫᑲ ᑫ ᐯᑕᐊᐧᒋᐠ ᑭᑕ ᐱᒫᑎᓯᐊᐧᐠ. 26ᒋᑫᒫ ᑳ ᐃᓯ ᐅᐱᒪᑎᓯᐃᐧᓂᐟ ᐅᑖᐃᐧᒫᐤ; ᐁᑯᓯ ᑭ ᐃᓯ ᒥᔦᐤ ᐅᑯᓯᓴ ᑭᑕ ᐅᐱᒪᑎᓯᐃᐧᓂᔨᐟ; 27ᒥᓇ ᐁ ᑭ ᒥᔮᐟ ᑎᐯᔨᐦᒋᑫᐃᐧᐣ ᑭᑕ ᑲᐢᑭᑕᔨᐟ ᐅᔭᓱᐋᐧᓯᐁᐧᐃᐧᐣ, ᒋᑫᒫ ᐁ ᐃᔨᓂᐃᐧᑯᓯᓵᓂᐃᐧᔨᐟ. 28ᐁᑳᐃᐧᔭ ᒫᒪᐢᑲᑌᔨᑕᒧᐠ ᐅᒪ; ᒋᑫᒫ ᐹᐸᔨᐤ ᑎᐸᐃᑲᐣ, ᐃᐢᐱ ᑲᐦᑭᔭᐤ ᔨᑲᐧᐦᐊᐢᑳᓂᕽ ᑳ ᐊᔮᒋᐠ ᑫ ᐯᑕᒫᐧᒋ ᐅᐟ ᐃᑌᐧᐃᐧᓂᔨᐤ, 29#ᑖᓂᐁᓬ 12:2ᑭᑕ ᐯ ᐊᐧᓂᐢᑳᐊᐧᐠ ᒫᑲ; ᑳ ᑭ ᒥᔪ ᐃᓯᐦᒋᑫᒋᐠ, ᐋᐱᓯᓯᓄᐃᐧᓂᕽ ᐱᒫᑎᓯᐃᐧᓂᕽ; ᒫᑲ ᑳ ᑭ ᒪᒋ ᐃᓯᐦᒋᑫᐠ, ᐋᐱᓯᓯᓄᐃᐧᓂᕽ ᐅᔭᓱᐋᐧᑎᑯᐃᐧᓇᕽ. 30ᓇᒪᐃᐧᔭ ᓂᔭ ᑫᑲᐧᐩ ᓂ ᑳ ᑭ ᐯᔭᑯ ᑲᐢᑭᑖᐣ; ᐁ ᐃᑎᑕᒫᐣ, ᓂᐟ ᐃᓯ ᐅᔭᓱᐊᐧᐣ; ᑲᐧᔭᐢᑲᐧᐣ ᒫᑲ ᓂᐟ ᐃᑕᓱᐁᐧᐃᐧᐣ; ᒋᑫᒫ ᓇᒪᐃᐧᔭ ᓂ ᓇᑐᓀᐣ ᓂᔭ ᓂᐟ ᐃᑌᔨᑕᒧᐃᐧᐣ, ᐅᐟ ᐃᑌᔨᑕᒧᐃᐧᐣ ᒫᑲ ᐊᓇ ᑳ ᐯ ᐃᓯᑎᓴᐦᐅᐟ. 31ᑭᐢᐱᐣ ᓂᔭ ᐊᒋᒥᓱᔮᓂ, ᓇᒪᐃᐧᔭ ᑖᐯᐧᒪᑲᐣ ᓂᐟ ᐋᒋᒧᐃᐧᐣ.

32ᑯᑕᐠ ᐃᑖᐤ ᑳ ᐊᒋᒥᐟ; ᓂ ᑭᐢᑫᔨᑌᐣ ᒫᑲ ᐅᐟ ᐋᒋᒧᐃᐧᐣ ᑳ ᐃᑕᒋᒥᐟ ᐁ ᑖᐯᐧᒪᑲᓂᔨᐠ. 33#ᒑᐣ 1:19-27; 3:27-30ᑭ ᑭ ᑲᑫᐧᒋᒫᐋᐧᐤ ᒑᐣ, ᑭ ᐋᑐᑕᒼ ᒫᑲ ᑖᐯᐧᐃᐧᐣ. 34ᒫᑲ ᐋᒋᒥᑯᐃᐧᐣ ᑳ ᐅᑎᓇᒫᐣ ᓇᒪᐃᐧᔭ ᐊᔨᓯᔨᓂᕽ ᐅᐦᒋ; ᐁᔨᐁᐧᕽ ᒫᑲ ᐅᐦᐃ ᓂᐟ ᐃᑖᐧᐣ, ᑭᑕ ᐅᐦᒋ ᐱᒫᑎᓯᔦᐠ. 35ᐁᐊᐧᑳᐧᓇ ᐋᐧᓴᐢᑯᑌᓂᑲᐣ ᐁ ᓴᐢᑭᑌᐠ ᒥᓇ ᐁ ᐋᐧᓴᐢᑯᑌᐠ: ᑭ ᑭ ᐃᑌᔨᑌᓈᐋᐧᐤ ᒫᑲ ᓄᒪᑫᐢ ᑭᑕ ᒥᔭᐋᐧᑕᒣᐠ ᐅ ᐋᐧᓭᔮᓯᐃᐧᓂᕽ. 36ᒫᑲ ᓂᔭ ᓂᐟ ᐊᔮᐣ ᓇᐊᐧᐨ ᑭᐦᒋ ᐋᒋᒥᑯᐃᐧᐣ ᐃᐢᐱᐨ ᒑᐣ; ᐊᑐᐢᑫᐃᐧᓇ ᑳ ᑭ ᒥᔨᐟ ᐁᐧᔪᑖᐃᐧᕽ ᑭᑕ ᑭᓯᑖᔮᐣ, ᐁᐊᐧᑯᓂ ᐊᑐᐢᑫᐃᐧᓇ ᐁ ᐃᑐᑕᒫᐣ, ᑳ ᐋᒋᒥᑯᔮᐣ, ᐁ ᑭ ᐯ ᐃᓯᑎᓴᐦᐅᐟ ᐁᐧᔪᑖᐃᐧᕽ. 37#ᒫᐟᔪ 3:17; ᒫᕒᐠ 1:11; ᓬᐅᐠ 3:22ᐃᐧᐢᑕ ᒫᑲ ᐁᐧᔪᑖᐃᐧᕽ ᑳ ᑭ ᐯ ᐃᓯᑎᓴᐦᐅᐟ, ᓂ ᑭ ᐋᒋᒥᐠ. ᓇᒪᐃᐧᑳᐨ ᑯᐦᒋ ᐯᑕᐋᐧᐋᐧᐤ, ᐊᐦᐳ ᑯᐦᒋ ᐋᐧᐸᒫᐋᐧᐤ ᐁᓯᓇᑯᓯᐟ. 38ᓇᒪᐃᐧᔭ ᒥᓇ ᑭ ᑭᑭᐢᑳᑯᐋᐧᓈᐋᐧᐤ ᐅᐟ ᐊᔭᒥᐃᐧᐣ; ᒋᑫᒫ ᐊᓂᐦᐃ ᑳ ᑭ ᐯ ᐃᓯᑎᓴᐋᐧᐟ, ᓇᒪᐃᐧᔭ ᑭ ᑖᐯᐧᑖᒫᐊᐧ.

39ᑭ ᓇᑐᓂᑳᓈᐋᐧᐤ ᑭᐦᒋ ᒪᓯᓇᐦᐃᑫᐃᐧᓂᕽ; ᒋᑫᒫ ᐁᑯᑕ ᓂᐟ ᐊᔮᓈᐣ ᑲᑭᑫ ᐱᒫᑎᓯᐃᐧᐣ ᑭᐟ ᐃᑌᔨᑌᓈᐋᐧᐤ; ᐁᐊᐧᑯᓂ ᒫᑲ ᑳ ᐋᒋᒥᑯᔮᐣ. 40ᓇᒪᐃᐧᔭ ᒥᓇ ᑭ ᐃᐧ ᐯ ᓈᓯᓈᐋᐧᐤ, ᑭᑕ ᐊᔮᔦᐠ ᐱᒫᑎᓯᐃᐧᐣ. 41ᓇᒪᐃᐧᔭ ᐊᔨᓯᔨᓂᕽ ᓄᐦᑎᓀᐣ ᑭᐢᑌᔨᑖᑯᓯᐃᐧᐣ. 42ᒫᑲ ᑭ ᑭᐢᑫᔨᒥᑎᓈᐋᐧᐤ, ᐁᑳ ᐁ ᑭᑭᐢᑳᑯᔦᐠ ᑭᓭᒪᓂᑐ ᐅ ᓵᑭᐦᐃᐁᐧᐃᐧᐣ. 43ᓄᑖᐃᐧ ᐅᐟ ᐃᓯᔨᐦᑳᓱᐃᐧᓂᕽ ᓂ ᐯ ᐃᑐᐦᑖᐣ, ᓇᒪᐃᐧᔭ ᒫᑲ ᑯᑎᓂᓈᐋᐧᐤ; ᑭᐢᐱᐣ ᑯᑕᐠ ᐊᐃᐧᔭᐠ ᑎᐱᔭᐤ ᐅᐟ ᐃᓯᔨᐦᑳᓱᐃᐧᓂᕽ ᐯ ᐃᑐᐦᑌᐟ, ᐁᐊᐧᑯ ᑭ ᑲ ᐅᑎᓈᐋᐧᐤ. 44ᑖᓂᓯ ᑫ ᑭ ᐃᓯ ᑖᐯᐧᑕᒣᐠ, ᑭᔭᐋᐧᐤ ᑳ ᐅᑎᓇᒪᑐᔦᐠ ᑭᐢᑌᔨᑖᑯᓯᐃᐧᐣ ᐁᑯᓯ ᑭᐢᑌᔨᑖᑯᓯᐃᐧᐣ ᑳ ᒣᑭᐟ ᐊᓇ ᐱᑯ ᑫᓭᒪᓂᑐᐃᐧᐟ ᓇᒪᐃᐧᔭ ᑭ ᓇᑐᓀᓈᐋᐧᐤ? 45ᐁᑳᐃᐧᔭ ᐃᑌᔨᑕᒧᐠ ᑭᑕ ᒫᔮᒋᒧᐢᑕᐊᐧᐠ ᐁᐧᔪᑖᐃᐧᕽ ᑭᔭᐋᐧᐤ ᐅᐦᒋ: ᐃᐦᑖᐤ ᐯᔭᐠ ᐁ ᒫᔮᒋᒥᑯᔦᐠ: ᒧᓯᐢ ᐅᑎ, ᑳ ᒪᒥᓯᔦᐠ. 46ᑭ ᑖᐯᐧᑕᐊᐧᐁᐧᑯᐸᓀ ᒧᓯᐢ, ᑭ ᑲ ᑭ ᑖᐯᐧᑕᐃᐧᑖᐋᐧᐤ: ᒋᑫᒫ ᓂ ᑭ ᐋᒋᒥᐠ ᐅ ᒪᓯᓇᐦᐃᑫᐃᐧᓂᕽ. 47ᒫᑲ ᑭᐢᐱᐣ ᐁᑳ ᑖᐯᐧᑕᒣᑯ ᐅ ᒪᓯᓇᐦᐃᑫᐃᐧᓇ, ᑖᓂᓯ ᑫ ᐃᓯ ᑖᐯᐧᑕᒣᐠ ᓂᐟ ᐃᑌᐧᐃᐧᓇ?

Currently Selected:

ᓭᐣᐟ ᒑᐣ 5: KKMs

Highlight

Copy